Génesis 5 - Kashibo-Kakataibo Biblia

Adánnën rëbúnkikama ꞌiá bana

¹ Ënëx ka Adánnën rëbúnkinën anëkama kuënëokë ꞌikën. Uni uniokin ka Nukën ꞌIbu Diosan, asaribi ꞌitánun ꞌakëxa;

² ꞌakin ka bëbu ꞌimainun xanu ꞌakëxa, ꞌatankëxun ka upíokin sinánxukin kakëxa. A nëtë́an uni uniokë, a nëtën ka Dios kiakëxa: Ënëx ka uni kakin anëkë ꞌikën.

³ Adán axa ciento treinta baritiañu ꞌain ka aín bëchikë Set a iskësabi ax bakë́ankëxa.

⁴ Usakin ꞌatankëxun ka Adán ochocientos baritia tsókin ka bëbu ꞌimainun xanu okin bakë bëchipakëxa;

⁵ usokin bakë bëchipatankëx ka novecientos treinta baritia sënë́mi tsóakëxa. Tsótankëx ka a bari ꞌiruax ñuakëxa.

⁶ Set ax ciento cinco baritiañu ꞌain ka aín rëkuën bakë bëchikë Enós kakë ax bakë́ankëxa.

⁷ Usakin ꞌatankëx ka Set ochocientos siete baritia, ꞌimi tsóakëxa, tsókin ka bëbu ꞌimainun xanuribiokin bakë bëchipatëkëankëxa;

⁸ usakin bakë bëchipatankëx ka novecientos doce baritia sënë́mi tsóakëxa. Tsótankëx ka a bari sënënkëbë ñuakëxa.

⁹ Enós ax noventa baritiañu ꞌain ka aín bëchikë Cainán bakë́ankëxa.

¹⁰ Usakin ꞌatankëx ka Enós ochocientos quince baritia ꞌimikin ka bëbu ꞌimainun xanuribiokin bakë bëchipatëkëankëxa;

¹¹ usokin bakë bëchipatankëx ka novecientos cinco baritia sënë́mi tsóakëxa. Tsótankëx ka a bari sënënkëbë ñuakëxa.

¹² Cainán ax setenta baritiañu ꞌain ka aín bëchikë Mahalalel bakë́ankëxa.

¹³ Usakin ꞌatankëx ka Cainán ochocientos cuarenta baritia sënë́mi tsóakëxa; tsókin ka bëbu ꞌimainun xanuribiokin bakë bëchipatëkëankëxa;

¹⁴ usokin bakë bëchipatankëx ka novecientos diez baritia sënë́mi tsóakëxa. Tsótankëx ka a bari sënënkëbë ñuakëxa.

¹⁵ Mahalalel ax sesenta ꞌimainun cinco baritiañu ꞌain ka aín bëchikë Jéred bakë́ankëxa.

¹⁶ Usakin ꞌatankëx ka Mahalalel ochocientos treinta baritia ꞌimi tsóakëxa; tsókin ka bëbu ꞌimainun xanuribiokin bakë bëchipatëkëankëxa;

¹⁷ usokin bakë bëchipatankëx ka ochocientos noventa ꞌimainun cinco bari sënë́mi tsóakëxa. Tsótankëx ka a bari sënënkëbë ñuakëxa.

¹⁸ Jéred ax ciento sesenta ꞌimainun rabë́ baritiañu ꞌain ka aín bëchikë Henoc bakë́ankëxa.

¹⁹ Usakin ꞌatankëx ka Jéred ochocientos baritia ꞌimi tsóakëxa; tsókin ka bëbu ꞌimainun xanuribiokin bakë bëchipatëkëankëxa;

²⁰ usokin bakë bëchipatankëx ka novecientos sesenta ꞌimainun rabë́ baritia sënë́mi tsóakëxa. Tsótankëx ka a bari sënënkëbë ñuakëxa.

²¹ Henoc ax sesenta ꞌimainun cinco baritiañu ꞌain ka ain bëchikë Matusalén bakë́ankëxa.

²² Henoc ax ka Nukën ꞌIbu Dios kuëënkësabi oi tsóakëxa. Usa ꞌain ka aín rëkuën bëchikë Matusalén bëchitankëx, Henoc ax tsóakëxa trescientos baritia, ꞌimikin ka bëbu ꞌimainun xanuribiokin bakë bëchipatëkëankëxa;

²³ usa ꞌaish ka Henoc kamabi aín baritia tsókë ꞌiakëxa trescientos sesenta ꞌimainun cinco baritia tsóakëxa.

²⁴ Henoc ax ka Nukën ꞌIbu Dios kuëënkësabi oi tsókë uni ꞌiakëxa, usa ꞌikë ka achúshi nëtë ꞌikëbëtan Nukën ꞌIbu Diosan bikëx nëtë́akëxa.

²⁵ Matusalén axa ciento ochenta ꞌimainun siete baritia ꞌain ka aín bëchikë bakë́ankëxa.

²⁶ Usa ꞌain ka Matusalén setecientos ochenta ꞌimainun rabë́ baritia tsoakëxa; tsókin ka bëbu ꞌimainun xanuribiokin bëchipatëkëankëxa;

²⁷ usa ꞌain ka novecientos sesenta ꞌimainun nueve baritia sënë́mi tsóakëxa. Tsótankëx ka a bari sënënkëbë ñuakëxa.

²⁸ Lámec ax ciento ochenta ꞌimainun rabë́ baritia ꞌain ka aín bëchikë achúshi bakë́ankëxa,

²⁹ a ka Noé kakin anëakëxa, ësai kikin: Nukën ꞌIbun ka me ꞌaisama oxa, usa ꞌain kananuna ꞌitsaira ñu mëi tëmëranuxun ꞌain; usa ꞌaínbi ka ënë tuákën nu tantiminuxun ꞌaia.

³⁰ Noé bëchitankëx, ka Lámec quinientos noventa ꞌimainun cinco baritia, tsóakëxa, tsókin ka bëbu ꞌimainun xanuribi bëchipatëkëankëxa;

³¹ usa ꞌain ka setecientos setenta ꞌimainun siete baritia sënë́mi tsóakëxa. Tsótankëx a bari sënënkëbë ñuakëxa.

³² Noé ax quinientos baritiañu ꞌain ka aín bëchikë bëbukama bakë́ankëxa, aín anë ka ꞌiakëxa Sem, Cam ꞌimainun Jafet, akamax ka Noénën bëchikë ꞌiakëxa.