Génesis 49 - Kashibo-Kakataibo Biblia

Ashikian Jacobnën aín bakë bëchikëkama ká bana

¹ Usa ꞌain ka Jacobnën kamabi aín bëchikëkama anua unun kixun kamiakëxa: “Kamikëxa anu rikuatsinkë ka ꞌë ꞌurama kamina ukanti ꞌain kixun kakëxa, bërí kana usaími ꞌëx ñukëbë ꞌikanti bana mitsu ñuixunti ꞌain:

² ꞌËn bëbu bakë bëchikëkama ësokin mitsu kamainun kuati kamina ꞌë urama ukanti ꞌain, ꞌën mitsu kamainun ka kuakan, ꞌëx kana mitsun papa Jacob ꞌikëbia Nukën ꞌIbu Diosan Israel kakinribi anëa ꞌain.

³ Rubén, mix kamina ꞌën bakë bëchikë apan ꞌain, usa ꞌaish kamina a irapain ꞌëx kushi ꞌixun bëchia ꞌain, mix kamina kushi ꞌianan raíri kamasamaira ꞌinuxun ꞌain.

⁴ ꞌAínbi kamina mix ꞌën rëkuë́n bakë bëchikë ꞌitima ꞌain, mix kamina achúshi baka shërë́ uínbi bëaraisama usaribi ꞌain: mix kamina anu ꞌëx ꞌuxtinu ꞌë ꞌatimaoi an ꞌë ñu mëëxunkë ꞌën xanubë ꞌiakën.

⁵ Simeón ꞌimainun Leví mix kamina xukë́n rabë́bi ꞌain; usa ꞌixun kamina min manë xëtokën ꞌakin anun bënë́kinshi uni këñuakën.

⁶ Uinsaranbi kana anumi mitsux timë́kë anu ꞌëx ꞌisamatanin. Usa ꞌixun kamina min chirabakë ꞌatima okankë anun nishkiani kuanxun unikama ꞌakën, usakin ꞌanan kamina vaca, aín bënë aín ipukunu ꞌikë aín punu tëakësaribi okin ꞌakën.

⁷ ¡Usa ꞌain kamina mitsux nishi ꞌatimaira sinánñubu ꞌain! Usa ꞌaish kamina mitsux ñuina raëkëma ꞌikësaribiti sinani nishin. Usa ꞌain kana ꞌën mi rabë́ asérabi bëtsi bëtsi menu kuanimi Israel ëmakanuax ꞌurai mi amanu amanu kuanun ꞌimiti ꞌain.

⁸ Judá min xukë́n apankama ꞌimainun ꞌanáka kamanribi ka mi rabinuxun ꞌaia. Usakin mi rabi ka min xukë́nkamax mi bëmánon nirakëti ñanati tëtúbuti ꞌikën, kamina axa mimi nishkë unikama abë ꞌakanankin mi kupitanuma ꞌanuxun ꞌain.

⁹ Judá mix kamina ꞌën bakë bëchikë ꞌain. Usa ꞌaish kamina achúshi ꞌinuánën tuá bërí kanikënëan ꞌain piti ñuina bixun bënë́kinshi tëtúbuxun pitankëx menu rakábukë usaribi ꞌain, usai ꞌi kamina ꞌinuán aín titaxa ꞌikësaribiti ꞌiti ꞌain ¿Uin kara usaími ꞌia mi ubioti kuëënti ꞌik?

¹⁰ Uínbi ka aín kushi Judá bikuantima ꞌikën, ꞌimainun ka aín manë tsati ꞌapun tuinkë ꞌikëa tuinkë a bikuantima ꞌikën, a manë tsatin ꞌibuka unuxun ꞌaia usa ꞌain ka kamabi menu ꞌikë unikaman ax kikësabiokin ꞌanuxun ꞌaia.

¹¹ An ka uvas ꞌapákë kamami bërí kanikë aín burro tëkërë kati ꞌikën, ꞌanan ka aín chupa kamabi uvas baka vino ꞌakë anun chukati ꞌikën.

¹² Aín bërux ka uvas baka vino ꞌakë aín chëxësamaira ꞌikën; ꞌimainun ka aín xëtakamaxribi vaca xuma uxubëtan sënë́maira uxuira uxu ꞌikën.

¹³ Zabulónën rëbúnkin kamax ka parúmpapa kuëbí tsónuxun ꞌaia, anua ꞌaisamaira manë nunti këñuruti butun a urama kamina ꞌinuxun ꞌain. Usa ꞌain ka min me anua Sidón kakë ëma anu sënë́nbi ꞌunántiokë ꞌiti ꞌikën.

¹⁴ Isacar mix kamina an ñu papikë ñuinanëxa anuxun pimiti aín xubunu tantikësa ꞌinuxun ꞌain.

¹⁵ Uínsaran kara a me upí isanan, anu tantitisa ꞌikë isia, anuax ka aín kaxunu ñu purunux katúbuti ꞌikën, usai ꞌikin ka kana ꞌaima kima tëmëramikin ñu mëëmikë ꞌiti ꞌain.

¹⁶ Dannën rëbúnkinën ka aín aintsi ꞌibukaman ꞌapu ꞌixun ꞌakinti ꞌikën, ax ka achúshi uni Jacobnën rëbúnkisa ꞌiti ꞌikën.

¹⁷ Dannën rëbúnkinëx ka achúshi runu bai rapasu tsókësa ꞌiti ꞌikën, usa ꞌain ka aín taë tsiputunua aín caballo natëxkëbë anu ꞌikë uni pakëti ꞌikën, ësaribi okin kamina axa mitsumi nishkë unikaman ꞌakëxunbi mikaman ꞌamitima ꞌain, kixun ka Jacobnën aín bakë bëchikëkama kakëxa.

¹⁸ ¡Nukën ꞌIbu minmi ꞌë ië́miti kana kuëënin! ësokin ka Nukën ꞌIbu Dios ñukákin Jacobnën kakëxa.

¹⁹ Gad min rëbúnkikamaribi ka suntárunën abë ꞌakanankin ꞌanuxun ꞌaia. ꞌAínbi ka ainra abámikin ꞌanuxun ꞌaia.

²⁰ Aser min piti ñukama ax ka nëishirabu ꞌiti ꞌikën, usa ꞌain ka min piti ñu axribi ꞌapukaman písa upíbu ꞌiti ꞌikën.

²¹ Neftalí, ax ka achúshi chaxu uínbi ubíokëma nikë, aín tuakëxa upíira ꞌikë usaribi ꞌiti ꞌikën.

²² José min rëbúnki kamaxribi ka achúshi i baka kuëbí nikë, axa ꞌitsaira ꞌinun bimikësa usaribi ꞌianan, pëñanakëkin anun xubu bëarakë me mapubuinkë usarabi ꞌiti ꞌikën. Usaribiti ka min rëbúnki kamax mekama tsitsirui bukunuxun ꞌaia.

²³ Usa ꞌikë ka axa pian ꞌakanankë unikaman istisama tankin timakin, aín pia ami pukin ënkinma ubionuxun ꞌaia;

²⁴ ꞌaínbi ka Josénën rëbúnki kaman aín pëñan kushi uni ꞌixun ainra an ꞌakatsikixun ꞌakëxunbi aín pëñan bërëkinma ꞌati ꞌikën; usa ꞌain kana mi asabika kixun kain. ꞌËn ꞌIbu Dios a ꞌën rabikë kushiira kushi, ¡An ka an ñuina bërúankë unisa ꞌixun Israel unibu bërúanti ꞌikë!,

²⁵ ¡asábi ka Nukën ꞌIbu Dios a ꞌën rabikë, an ka mi ꞌakinuxun ꞌaia; Nukën ꞌIbu Dios kamabi kushiñuira an ka mi upiokin ꞌakinti ꞌikën! ¡Naíkamë ꞌëo manámixunbi ka ꞌuí ꞌibútanun mi upíokin sinánxunti ꞌikën! ¡An ka parúmpapa ꞌukëmëu ꞌikë me anuaxbia ꞌumpax utanun mi upíokin sinánxunti ꞌikën! ¡An ka min ñuinakama tuaia ꞌanan xanu bakënti aribi upíokin sinánxunti ꞌikën!

²⁶ Min papan ka upiokin mi sinánxunkin aín papan ꞌasaribiokin mi upíokin sinánxuanxa. Ax ka bashikama këñúkëbëbi këñutima ꞌikën, upíokin sinánxunkë ax ka Josénën maxkánubi ꞌiti ꞌikën, akana aín xukë́nkama ꞌakima ꞌën kaísan.

²⁷ Benjamín, min rëbúnki kamaxribi ka tsira ꞌinu, në́kënëan pëkarakuantsinkëma ꞌain ishi aín piti ninua ñuina bixun, pitankëxun bari xupibukëbëtan aín tëxëkë a ꞌain raíribëtan pikësa usa ꞌiti ꞌain. Usaribi okin kamina axa mimi nishkin këñukatsikixun ꞌakëxunbi minra axa mimi nishkë unikama ꞌati ꞌain.”

²⁸ Ënëkamax ka mapai rabë́ ꞌimainun rabë́ ñaká Jacobnën bakë bëchikëkama ꞌiakëxa, usa ꞌikë ka aín papan achúshi achúshi upíokin sinánxunkin kakëxa.

Jacob ñua ñuikë bana

²⁹ Achúshi nëtën ka Jacobnën aín bakë bëchikëkama ësokin kakëxa: “Ënuax ꞌitsama nëtë ꞌikëbë kana ñuti ꞌain. Usa ꞌain kamina ꞌë ñuia ënu mainkima anua ꞌën chaitiokëkama maían kini anubi ꞌë maínti ꞌain, ax ka Efrón kakë hitita uni aín me ꞌikën,

³⁰ usa ꞌaish ka Canaán me anu ꞌikën; ax ka Macpelá kakë me anu ꞌikë kini ꞌikën, ax ka Mamré bëmánau ꞌikëa Abrahamnën Efrónnën me këñunbi anu aín aintsikama ñuia maínti marua ꞌiakëxa.

³¹ Anu ka aín bëchikë kaman Abraham ꞌimainun aín xanu Sara maíankëxa, ꞌimainun ka Isaackëñun aín xanu Rebeca aribi maíankëxa, maínña ꞌaínbi kana ꞌënribi anu ꞌën xanu Lía maíankën.

³² Anu ꞌikë me ꞌimainun kini ax ka ꞌën xutan hitita unikamanua marua ꞌikën.”

³³ Ësokin pain aín banakamaira kama aín bakë bëchikë ñuixunkin sënë́ontankëx rakabutëkënibi ka Jacob aín bana ñomëtishi ñuakëxa.