Génesis 48 - Kashibo-Kakataibo Biblia

Jacobnën upíokin sinánxunkin Josénën bëchikë Efraín ꞌimainun Manasés ka bana

¹ Usakian ꞌakë basirama ꞌaínbi ka Josénën aín papa Jacob ꞌinsínkë ñuikania kuakëxa. Kuabiani ka José a isi kuankëxa, kuankin ka aín bëchikë rabë́ Manasés ꞌimainun Efraín uankëxa.

² Usai anu kuankë ꞌain ka Jacob min bëchikë José ka mi isi ubaxa kixun ñuixunkankëxa, ñuixunkëxun kuati kushitisama tanibi anua uxkë anuax nirui tsórakëakëxa.

³ Usai ꞌikin ka aín bëchikë José anu bëbakë kakëxa: —Nukën ꞌIbu Dios kushiira kushi axa tirí kakë ëma Canaán me anuax ꞌëmi mërakin upíokin sinánxunkin,

⁴ ënë bana ꞌë kakëxa: Ka kuat, ꞌën kana mixmi ꞌaisamaira min bakë bëchikë ꞌimainun min rëbúnki kamaxribi amami amami ëma oi bukunun ꞌimiti ꞌain. Usai ꞌia ꞌikë kana min rëbúnkikama ënë me ꞌinánti ꞌain. Atunan ka ënë me xënibua ꞌaínbi ꞌinuxun ꞌaia.

⁵ Bërí ka min bëchikë rabë́ Efraín ꞌimainun Manasés ꞌëx Egipto me ënu mibë tsóti ukëmapan ꞌainmi bëchia ax ka ꞌësaribi ꞌiti ꞌikën, ax ka ꞌën bëchikë Rubén ꞌimainun Simeón usa ꞌiti ꞌikën.

⁶ Usa ꞌain ka min bëchikë Efraín ꞌimainun Manasésnën ꞌanáka ꞌiti akama anribi aín xukë́n apanëa kasunania ꞌain me biti ꞌikën.

⁷ ꞌËn kana ësokin mi kain, ꞌëx Padán-aram anu kuantëkënkëbë ka Canaán kakë me anuaxa ka min tita Raquel ñuakëxa, ax ka Efrata kakë me urama ꞌiakëxa, Efrata ëma anun kuanti bai ꞌipitiu kana maíankën, ax ka Belén kakë ëma bërí ꞌikën.

⁸ Ësakin kakinbi ka Jacobnën Josénën bëchikë rabë́ isakëxa, iskin ka ñukákin kakëxa: —Ënëx kara, ¿uikama ꞌik?

⁹ —Ënëx ka ꞌën bëchikë rabë́ Nukën ꞌIbu Diosan Egipto me ënuxun ꞌë ꞌinánkë ꞌikë —kixun ka Josénën kakëxa. Ësakian kakëxun ka aín papan kakëxa: —ꞌË ꞌurama kamina min bëchikë bëti ꞌain, ꞌën kana Dios an ꞌë sinánxuan usaribi okin upíokin sinánxunti ꞌain.

¹⁰ Usa ꞌain ka Jacobnën kaniakëkin upíokin isama ꞌikën. Usakian upíokin iskëbëtanma ka Josénën aín bëchikë rabë́ a ꞌurama okëxa, ꞌurama oia ka Jacobnën ꞌikúkin bikin bëtsuku kakin aín kisinu tsónpakëxa.

¹¹ Usakin ꞌatankëxun ka José katëkëankëxa: —ꞌËn kana amiribishi mi istëkënti sinánkëma ꞌain sinaniamabi ka Diosanbi ꞌën min bëchikë këñunbi mi istëkënun ꞌë ꞌimiaxa.

¹² Ësakian ꞌaia ka Josénën aín bëchikë rabë́ aín papan kisinua tsókë a bitsi rantinpuruni aín bëmánanën me tikai tsóbuakëxa.

¹³ Usai ꞌitankëxun ka mëinkin aín bëchikë Efraín aín mëkën mëkeu bianan, Manasés aribi mëmiu biakëxa, bitankëxun ka aín papa rapasu urama buánkëxa. Usakian ꞌakëx ka Efraín aín xuta Jacob mëkeu nimainun Manasés axribi a mëmiu niakëxa.

¹⁴ ꞌAínbi ka Jacobnën ami mëshpakin aín mëkën rabë́ mëkeu ꞌikë a Efraínën maxkánu nankin upíokin sinánxunkin axa ꞌanáka ꞌaínbi, nankinshi ka Manasésnën maxkánuribi aín mëkën mëmiu axa aín apan aín nankëxa.

¹⁵ Usa ꞌain ka ain bëchikë José a ësokin upíokin sinánxunkin kakëxa: “Nukën ꞌIbu Dios an kakësabi okían ꞌën xuta Abraham ꞌimainun ꞌën papa Isaacnën Dios an ka a nëtë́an ꞌën titan tuaia ꞌë bërúan ꞌixun bëríbi uinu karana kuani anuabi ꞌë bërúaia,

¹⁶ usa ꞌixun ka Dios an uisai kara ꞌiti ꞌikëbi an ꞌë bërúankë anribi ënë tuákamaribi bëruánti ꞌikën. Usa ꞌain ka ënë tuákama kupín ꞌën anë sinanan ꞌën xuta Abraham ꞌimainun Isaac aín anë sinánti ꞌikën. Usa ꞌain ka atux ꞌaisamaira bakë bëchipati ꞌuakamë ꞌëoanan kamabi menu kuani aín ëmaitsi ëmaitsi ꞌai tsókanti ꞌikën.”

¹⁷ Usakian aín papan ꞌakë Josénën iskëxbi ka ꞌatimakian aín mëkën mëkeu Efraínën maxkánu nankë ꞌiakëxa, usakian ꞌakëbi ka aín papan mëkën Efraínën maxkánua bikin Manasésnën maxkánu nankëxa,

¹⁸ usakin ꞌakin ka ësokin kakëxa: —¡Usakin ꞌaxuma ka ꞌa papan! Ënëx ka aín apan ꞌikën. Usa ꞌain kamina min mëkën mëkeu ꞌikë aín maxkánu nanti ꞌain.

¹⁹ ꞌAínbi ka usakin ꞌaisama tankin aín papan kakëxa: —¡Kana ꞌunanin ꞌën bakën, ꞌën ꞌunánxun kana ꞌain! Axribi ka achúshi ëma chaiira ꞌianan raírikama ꞌikësamaira ꞌinuxun ꞌaia. ꞌAínbi ka aín xukë́n ꞌanáka ënëxira ꞌitsaira ꞌitanun ꞌuakamë ꞌëoi ëma itsiribi ëma itsiribi ꞌitánun uínbi kanantisamaira kushiira ꞌinuxun ꞌaia.

²⁰ A nëtënbi ka Jacobnën ësokin kakin upíokin sinánxuankëxa: —Israelkaman ka mitsun anë upíokin sinánxunkin bëtsi kati ꞌikën, Nukën ꞌIbu Diosan ka Efraín ꞌimainun Manasés ꞌasaribiokin mi ꞌati ꞌikën, ësokin ꞌakin ka Jacobnën Efraín aín apansa ꞌimianan Manasés aín ꞌanákasa ꞌimiakëxa.

²¹ Usakin katankëx sënë́nkin ka José kakëxa: —Ka kuat, ꞌëx kana ñuti ꞌurama ꞌain; usa ꞌaínbi ka Nukën ꞌIbu Dios ax mitsubë ꞌixun ka amiribishi min chaitiokëkama anu tsóa me anubi mi buántëkënti ꞌikën.

²² Usa ꞌain kana min xukë́nkama ꞌinánkësamaira okin mi ꞌinan: Siquem kakë me a mi ꞌinánti ꞌain, ax ka abë ꞌakanantankëxun Amorreo unikama ꞌën bikuan ꞌikën.