Génesis 47 - Kashibo-Kakataibo Biblia

¹ Usakin aín xukë́nkama katankëx ka José ꞌapu faraón kai kuankëxa. Kuanxun ka kakëxa ꞌën xukë́antu ka ꞌën papabë Canaán menuax bëbaxa, bërí ka Gosen kakë me anu ꞌikën, anu ka aín ovejakama aín vacakama ꞌimainun aín ñukamabëbi uaxa.

² Ësakin kabiani kuanxun ka aín xukë́nkama mapai achúshi kaískin bibiankin ꞌapu faraón ꞌunamiti buánkëxa.

³ Usa ꞌain ka ꞌapu faraónën Josénën xukë́nkama ñukákin kakëxa: —¿Añunën kaina mitsux tëin? Kixun ñukákëxun atun kakëxa: —An ꞌapu ꞌikë mi ñu mëëxunti nukaman kananuna nun chaitiokëkaman ꞌasaribiokin ovejakama bërúain.

⁴ Nukamax kananuna ënë menu tsóti uan, anu nux ꞌikë Canaán me anu ka ꞌitsaira numi ꞌianan a piti ñu ꞌaíma ꞌimainun nun ñuinakama pimiti pasto ꞌaíma ꞌikën. Usa ꞌain kamina an mi ñu mëëxunti nukama ënë menu ꞌapu ꞌixun nukamaxnu anu tsónun Gosen kakë me a nu ꞌinánti ꞌain.

⁵ Usakian atun kakëxun ka ꞌapu faraónën José kakëxa: —Min papa ꞌimainun min xukë́antukamax ka ënë menu mibë tsóti uaxa.

⁶ Usa ꞌain ka Egipto me ënëx bërí atunan ꞌiti ꞌikën. Usa ꞌain kamina Gosen kakë me a atu ꞌinánti ꞌain, ax ka upíira me ënë menu ꞌikën, usa ꞌain ka anu tsóti atux bërúti ꞌikën. ꞌImainun kamina achúshi an ñuina ꞌarakati ꞌunánkë uni ꞌën vacakama bërúanun nanti ꞌain.

⁷ Usa ꞌain ka Josénën aín papa Jacob aribi ꞌapu faraón a ꞌunánmikin aín xubunu uankëxa. Uankëxun ka ꞌurama okin Jacobnën upiokinshi kakin faraón ꞌurama okëxa,

⁸ usakian urama okëxun ka ꞌapu faraónën ñukákëxa: —¿Uiti baritiañu kaina bërí mix ꞌain?

⁹ Kixuan ñukákëxun ka Jacobnën kakëxa: —ꞌËx kana bërí ꞌain ciento treinta baritiañu usa ꞌain kana achúshi menushi ꞌima kuaínbëkini tsóti niakën. Usa ꞌain kana a baritiakaman upiti tsóti ꞌianan tëmërai ꞌiakën, usa ꞌaínbi kana ꞌën chaitiokëkama ꞌiásarabiti kaniakëti tsóti.

¹⁰ Ësakin faraón katankëx ka Jacob ꞌimainun aín bëchikë José anuaxa banakë anuax kana kuani kabiani chikíakëxa.

¹¹ Usa ꞌain ka Josénën ꞌapu faraónëan kásabiokin aín papa ꞌimainun aín xukë́n apankama anua ꞌinun Gosen kakë ꞌikëbi Ramsés kakinribi anëkë me upíira a ꞌinánkëxa. Anua aín aintsikamabëbi tsónun ꞌinánkë Egiptonu ꞌikë me ax ka upíira ꞌiakëxa.

¹² Usakin, a ꞌinántankëxun ka Josénën aín aintsi ꞌibukama aín piti akamaribi ꞌinánkëxa, ꞌinánkin ka uiti ꞌitsa kara kuëënia a istankëxun an kuëënkë a cha ꞌinánan an ꞌitsama kuëënkë a chukúmashi ꞌinánkëxa.

Anúan numi chaiira ꞌikë a baritiakama José Egipto menu ꞌapu ꞌia

¹³ Usa ꞌain ka uinu ꞌikë menubi trigo a piti ꞌaíma ꞌiakëxa, usa ꞌain ka a piti ñu ꞌaíma ꞌain ꞌitsaira numi ꞌiakëxa. ꞌIkëbë ka Egipto menu ꞌianan Canaán kakë me anuribi ꞌikëbë ka anu ꞌikë, unikama numin bamatisa tani ꞌikankëxa.

¹⁴ Usai ꞌikian anu tsókë unikama ꞌimainun Canaán kakë me anu ꞌikë unikaman trigo marukin ꞌinánkëxun ka, Josénën kamabi trigo kupían bikë kuríki a timëtankëxun ꞌapu faraónën xubunu nankëxa.

¹⁵ Ësakian atun trigo marukëbëbi ka Egiptonu ꞌikë ꞌimainun Canaán menu ꞌikë unikaman kuríki këñuakëxa, usai atun kuríki këñuan ka José kai egipcio unikama kuankëxa: —¡Kuanxun ka min kamina nun piti nu ꞌinánti ꞌain! kixun kakëxa kakin ka minmi numin bamaiabi nu piti ꞌinankëma ax ka ꞌaisama ꞌiti ꞌikën, nux kuríkiñuma kupinshi kananuna ësai ꞌin kixun kakëxa.

¹⁶ Ësai kia ka Josénën atu kakëxa: —Mikamax kuríkiñuma ꞌixun, mitsun ñuina ꞌarakakëkama ꞌë bëxunkëxun kana a bianan mitsu trigo ꞌinaishiti ꞌain.

¹⁷ Ësokian kakëxun ka Egiptonu ꞌikë unikaman aín caballo, vaca, ovejakama ꞌimainun aín asnokama kupí Josénu buánkëxa, uania ka Josénën a kupín a baritiakaman atun ꞌarakakë ñuina bianan trigo ꞌinánkëxa.

¹⁸ ꞌAínbi ka a baritia inúkëbëa bëtsi bari ꞌirukëbëtan José anu kuantëkënxun kakankëxa: —Minbi kamina ꞌunan nun kananuna mimi unë́kinma kuríkiñuma kananuna ꞌai kixun mi kain; ꞌimainun ka nun ꞌarakakë ñuinakamaribi kananuna kamabi mi ꞌinan. Usa ꞌain ka nunnu a mi ꞌinántëkënti bëtsi ñu ꞌaíma ꞌikën, usa ꞌain ka uni ꞌimainun me ishi bëruaxa.

¹⁹ Usa ꞌain kamina min nun me këñunbi nu maruti ꞌain, trigo nu ꞌinánkin kamina biti ꞌain. Usa ꞌaish kananuna tëmëramikinbi faraón nun menuxunbi ñu mëëxunti ꞌain, usa ꞌain kamina min a piti ꞌimainun menu a ꞌapáti ñu bëru nu ꞌinánti ꞌain. Usakin ꞌakëxma ka me ꞌaisama ꞌiti ꞌikën. ¿Uisa kupín kaina min, nun me ëbiani bamatanun nu ënti ꞌain?

²⁰ Ësakian kakëxun ka Josénën Egiptonu ꞌikë mekama faraónan ꞌinun maruakëxa, egipcio unikaman ka marutsinxumabi atun me numin ꞌikin aín mekama maruakëxa, usakian marukëx ka kamabi mex faraónan ꞌiakëxa,

²¹ ꞌimainun ka Egiptonu ꞌikë unikamax Josénën tëmëramikin ñu mëmikë kamabi Egipto menu ꞌikë unikama ꞌiakëxa.

²² Usakin ꞌakin anu ꞌikë mekama marukinbi ka Josénën sacerdote kaman me a mëëkima ꞌapu faraónën atun piti trigo ꞌitsaira ꞌinánkëxa, ꞌinánkëxun ka a pikin numin ꞌikinma atun me maruti sinánma ꞌikën.

²³ Usakin ꞌatankëxun ka Josénën anu ꞌikë unikama kakëxa: —Bërí kamina kamabi min me ꞌimainun mikamaxribi ꞌapu faraónan ꞌiti ꞌain, ꞌën kana kamabi a maruxuan usa ꞌain kamina ñu bëru ënë ꞌapáti ꞌain,

²⁴ ꞌaínbi kamina faraón ꞌapákëxa tuaia bitankëxun mapai achúshi pisha ꞌinánti ꞌain; ꞌinánkëbëa rabë́ ꞌimainun rabë́ pisha tikikë ax ka ꞌapánan mitsun bëchikëkama ꞌimainun kamabi axa mitsubë tsókë unikamabëtan piti ꞌikën.

²⁵ Kakëxun ka atun kakëxa: —Mix kamina nubë upí ꞌain usa ꞌixun kamina numin bamati ꞌikëbi nukama ꞌakian. Usa ꞌaish kananuna faraón tëmërakin ñu mëëxuni nukama ꞌiti ꞌain, kiax ka kanankëxa.

²⁶ Usa ꞌain ka Josénën amiribishi a tanti bana Egipto menu ꞌatëkëankëxa, a banax ka ꞌapu faraón mapai achúshi pisha ꞌinánti kikë ꞌiakëxa. Ënë bana ka bëríbi anu ꞌikën; ꞌaínbi ka sacerdote unikama atun me kupín kupíotima ꞌiakëxa, atun me uínsaranbi ꞌapu faraónan biama ꞌikën.

Jacobnën ashikin aín bëchikë José anua ñuia maínti me ñuikin ka

²⁷ Usa ꞌain ka israel unikamax Egipto menu tsóti bërúakëxa. Anu bërúax ka Gosen kakë me anuax ꞌaisamaira ꞌinun ꞌuakamë ꞌëokëxa.

²⁸ Usa ꞌain ka Jacob diecisiete baritia Egipto menu tsóakëxa, anuax ka ciento cuarenta ꞌimainun siete baritiañu ꞌiakëxa.

²⁹ Usai anu ꞌixun ka Jacobnën achúshi nëtën bërí kana kaniakëkë ꞌain kana ñuti ꞌain kixun sinánkëxa. Sinánkin ka José abë bananua unun kixun kamiakëxa: —Asérabi ꞌën mi kakësabiokin ꞌaisatankin kamina ꞌën kisinu min mëkën nanti ꞌain ꞌimainun kana sinanatëkëntima okinmi ꞌanun mi kain. Uisa ꞌixunbi kamina ñuia Egipto me ënu ꞌë maintima ꞌain.

³⁰ Usa ꞌain kamina ꞌën aintsikama ꞌiásaribiti ñuia kamina Egipto me ënu maínti sinánkima anua ꞌën chaitikama maínkë anuribi uanxun maínti ꞌai kixun ka kakëxa. Kakëxun ka Josénën —Asabika min sinánkësa okin kana ꞌati ꞌain —kixun kakëxa.

³¹ —¡Sinanátëkëntima okin! kamina ashikin ꞌë kati ꞌain —kixun ka amiribishi aín papan kakëxa. Ësakian kakëxuan Josénën sinanatëkëntima okin kakëx, ka Jacob anua ꞌuxkë anuax aín tëpiti ami tëtuti ñanati ꞌiakëxa.