Génesis 46 - Kashibo-Kakataibo Biblia

Jacob Egipto menu kuan

¹ Usai ꞌitankëx ka Jacob kamabi aín ñu ꞌimainun aín ñuina ꞌarakakëkama buani bain kuankëxa. Kuani Beerseba kakë menu bëbaxun ka ñuina rëtankëxun usakin ꞌati sinánxun aín papa Isaacnën Dios xaroxuankëxa.

² A imë́bi ka Diosan abë banakin Jacob ꞌikëbia Israel kakin anëkë a kuënkin namámikësokin kakëxa. Kakëxun ka an: —Ënu kana ꞌain kixun ka kakëxa.

³ Kakëxun ka Diosan kakëxa: —ꞌËx kana Dios min papan rabia a ꞌain. Usa ꞌain kamina Egipto menu kuanti rakuë́tima ꞌain: Anuxun kana ꞌën min rëbúnkikama achúshi ëma kushiira ꞌianan chaiira ꞌitánun ꞌuákamë ꞌëomiti ꞌain.

⁴ Usa ꞌain kana ꞌëx mibëbi Egipto menu kuanti ꞌain, anuxun kana amiribishi min rëbúnkikama ꞌënbi chikinuxun ꞌain. ꞌImainun ka mixmi ñukëbë José mi rapasu ꞌiti ꞌikën.

⁵ Usai anuax Diosbë banatankëx ka Jacob Beerseba anuax kuankëxa. Kuania ka aín bëchikëkaman aín papan Jacob ꞌimainun aín bëchikëkama atun xanukama a këñunbi ꞌapu faraónëan anúan atux kuanti bëmikë carreta anu puruakëxa.

⁶ Usa ꞌain ka Jacob kamabi aín ñukama ꞌimainun aín, aintsikamabëbi Egipto menu kuankin aín ꞌarakakë ñuina vacakama ovejakama ꞌimainun kamabi Canaán menuxuan bikë a kamabi ubani kuankëxa.

⁷ Kuankin ka aín bëchikë bëbu ꞌimainun aín bëchikë xanukama ꞌimainun aín xuta nukëbënë ꞌimainun aín baba xanu akama abë kuankin uankëxa.

⁸ Ënëx ka Israel unikama axa Egipto menu rikian atun anëkama ꞌikën; ax ka Jacob ꞌimainun aín rëbúnkikama ꞌiakëxa: Rubén ax ka Jacobnën bëchikë apan ꞌiakëxa.

⁹ Rubénën bakë bëchikëkama ka ꞌiakëxa: Hanoc, Falú, Hesrón, ꞌimainun Carmí.

¹⁰ Simeónën bakë bëchikëkama ënëx ꞌiakëxa: Jemuel, Jamín, Óhad Jaquín, Sóhar ꞌimainun Saúl, ax ka achúshi cananea xanun tuá ꞌiakëxa.

¹¹ Ënëx ka Levínën bakë bëchikëkama ꞌiakëxa: Guersón, Quehat ꞌimainun Merarí.

¹² Ënëx ka Judánën bakë bëchikëkama ꞌiakëxa: Er, Onán, Selá, Fares, ꞌimainun Zérah. (Er ꞌimainun Onán ax ka Canaán kakë me anuax ñuakëxa.) Ënëxribi ka Faresnën bëchikëkama ꞌiakëxa: Hesrón ꞌimainun Hamul.

¹³ Ënëx ka Isacarnën bakë bëchikëkama ꞌiakëxa: Tolá, Puvá, Job ꞌimainun Simrón.

¹⁴ Ënëx ka Zabulónën bakë bëchikëkama ꞌiakëxa: Séred, Elón ꞌimainun Jahleel.

¹⁵ Ënë kamax ka Lía bixúan Jacobnën ami bëchikëkama ꞌimainun aín bëchikë xanu achúshi Dina aribi ꞌiakëxa, ax ka Padán-aram, kakë me anu tsókëpan ꞌixuan bëchia ꞌiakëxa. Usa ꞌain ka kamabi aín rëbúnkinëx xanu ꞌimainun bëbu tupúnkëx ka treinta ꞌimainun tres uni ꞌiakëxa.

¹⁶ Ënë kamax ka Gadnën bakë bëchikëkama ꞌiakëxa: Sefón, Haguí, Esbón, Suní, Erí, Arodí ꞌimainun Arelí.

¹⁷ Ënë kamax ka Asernën bakë bëchikëkama aín anë ꞌiakëxa: Imná, Isvá, Isví, Beria ꞌimainun ka atun chirabakë ax Sérah, kakin anëkë ꞌiakëxa. Ënë kamax ka Beriánën bakë bëchikëkamaribi ꞌiakëxa. Héber ꞌimainun Malquiel.

¹⁸ Ënë kamax ka Jacobnën Zilpámi bakë bëchiakama ꞌiakëxa. A xanux ka an ñu mëmikë xanu ꞌikëa Labánën aín bëchikë xanu Lía a ñu ꞌaxúnun kixun ꞌinánkë ꞌiakëxa, usa ꞌain ka kamabi aín rëbúnkikamax bëbu ꞌimainun xanu tupúnkëx dieciséis uni ꞌiakëxa.

¹⁹ Ënëx ka Raquelmia Jacobnën bëchia ꞌiakëxa: José ꞌimainun Benjamín.

²⁰ Ënë kamax ka aín xanu Asenat kakë amia Josénën bakë bëchikë ꞌiakëxa Manasés ꞌimainun Efraín, ax ka Egipto menuxuan bëchikë ꞌiakëxa. Asenat ax ka Potifera sacerdote On kakë ëmanu ꞌikë aín bëchikë xanu ꞌiakëxa.

²¹ Ënë kamaxribi ka Benjamínnën bakë bëchikëkama ꞌiakëxa: Bela, Béquer, Asbel, Guerá, Naamán Ehi, Ros, Mupim, Hupim ꞌimainun Ard.

²² Ënë kamax ka Raquel ꞌimainun Jacobnën rëbúnki ꞌaish catorce uni ꞌiakëxa.

²³ Ënëx ka Dannën bakë bëchikë Husim kakë ꞌiakëxa.

²⁴ Ënë kamaxribi ka Neftalí aín bëchikë ꞌiakëxa: Jahzeel, Guní, Jezer ꞌimainun Silem.

²⁵ Ënëkamax ka Bilhánmia Jacobnën bëchiakama ꞌiakëxa: Ax ka Labánnëan aín bëchikë xanu Raquel ꞌinaishia, aín rëbúnkikama ꞌaish mapai achúshi ꞌimainun rabë́ unibëtan sënë́inshi ꞌiakëxa.

²⁶ Ënë unikamax ka Jacobë Egipto menu kuankëxa, usa ꞌaish ka aín aintsi ꞌibukamaishi sesenta ꞌimainun seis uni ꞌiakëxa, usa ꞌain ka ꞌain bëchikënën xanukama ax tupunkëma ꞌiakëxa.

²⁷ Ënëx ka Josénën bëchikë rabë́ Egipto menuxuan aín titan tuá ꞌiakëxa. Usa ꞌain ka Egipto menu sesenta uni Jacobnën aintsi ꞌibukama abë bëbakëxa.

²⁸ Usa ꞌain ka Jacobnën Judá pain aín xukë́n José istánun kixun xuakëxa. Xukin ka Gosen kakë me anu bëbaia bitsi unun kixun kamiakëxa, kamikëxa kuantamainun ka Jacob Gosen kakë me anu bëbakëxa,

²⁹ usakin kamikëxun ka Josénën aín carreta anúan aín papa bëñakin bitsi kuanun mëníonun ꞌamiakëxa. ꞌAmibiani ka aín papa bitsi axribi kuankëxa, kuanxun ka aín papa ꞌikúkin tëpatsakin bitsi anuax basipain iankëxa.

³⁰ Usai ꞌitankëxun ka Jacobnën aín bëchikë José kakëxa: —ꞌËnbi kana mi ñukësa ꞌaíshmi nëtë́a ꞌikëbi mi mërain, usa ꞌain ka ꞌëx mi istánkëx ñuti asábi ꞌikën.

³¹ Usa ꞌain ka Josénën aín xukë́nkama, kanan aín papa aintsi ꞌibukama kakëxa: —Bërí kana ꞌapu faraón iskin kati ꞌain. Iskin kana ꞌën xukë́nkama ꞌimainun ꞌën papan aintsi ꞌibukama, axa Canaán menu tsókë, ax ka ꞌëbë ënë menu tsóti uaxa kixun;

³² ꞌimainun ka bëaxa aín ovejakama aín vaca kamabi atun ꞌarakakë ñuinakama, usa ꞌain ka atux oveja bërúanan vaca ꞌarakai anun tëkë unibu ꞌikën.

³³ Usa ꞌain kamina ꞌapu faraónën añunën kaina tëkanin kixun ñukákëxun,

³⁴ mitsun kati ꞌain, nun ñu mëëti ka ovejakama ꞌarakati ꞌimainun vaca ꞌarakati ꞌikën nun, chaitiokë kaman ꞌasaribiokin. Usakinmi kakëxun ka Gosen kakë me ënë anumi ꞌinun mitsu ꞌinánti ꞌikën, egipcio unikamax ka an oveja bërúankë uni ꞌimainun an vaca bërúankë unikamabë timë́ax ꞌiti kuëënma unibu ꞌikën.