Génesis 45 - Kashibo-Kakataibo Biblia

Aín xukë́nkama Josénën ꞌëx kana mitsun xukë́n ꞌanáka ꞌai kixun ami chikirakëkin ꞌunánmia

¹ Ësakin kaia Judá sënë́nkëbëtan ka Josénën tënëtisamaira tankin, an ñu mëëxunkë unikama a rapasu ꞌikëbi munuma kuënkë́nkin kakëxa: ënuax kamina kamaxi chikínkanti ꞌain. Ësokian kakëx ka an ñu mëëxunkë unikama José rapasunuax chikímainua, aín xukë́n kamáxëshi abë bërútia ka ꞌëx kana min xukë́n ꞌanáka José a ꞌain, kixun ꞌunánmiakëxa.

² Usakin kaibia munuma kuënkëni inkë a ka egipcio unikaman kuakëxa, kuaxun chaniokin ñuia ka faraónnënribi anua ꞌikë aín xubunuxunbi kuakëxa.

³ Usai ꞌitankëxun ka Josénën aín xukë́nkama kakëxa: —ꞌËx kana José a ꞌain. ¿Nun pa kara bëríbi tsótax? Ësakian kakëx a bëtánain ꞌaish ratúkin ka uínbi uisokinbi káma ꞌikën.

⁴ ꞌAínbi ka Josénën aín xukë́nkama kakëxa: —ꞌË ꞌurama kamina ukanti ꞌain. Usakin kakëxa a rapasu ꞌaia, ka Josénën kakëxa: —ꞌËx kana mitsun xukë́n José ami Egipto menu ukë unikama marua a ꞌain;

⁵ usa ꞌain kamina ꞌatimakin kana ꞌa kixun sinani ubikantima ꞌain, mitsun kamina ꞌë maruakën usa ꞌaínbi ka Nukën ꞌIbu Diosan ꞌë pain mitsúxmi tëmëraia ꞌakinun ënë menu ꞌë bëakëxa.

⁶ Bërí ka rabë́ baritia numi ënë menu ꞌinutia, usa ꞌaínbi ka mapai achúshi baritia pain pishianxa, usa ꞌain ka unin ꞌapákëxbi añu ñubi ꞌirutima ꞌikën.

⁷ ꞌAínbi ka Nukën ꞌIbu Diosan mitsux uisama pain ꞌain ënë menu ꞌë pain bëakëxa nun rëbúnki kamaxa ënë menu ꞌinun, ꞌimainun ënë unikama upíokin manukima ax kushiira ꞌixun ënë menu ꞌakinun ꞌë bëakëxa.

⁸ Usa ꞌain ka Nukën ꞌIbu Diosan ënë menu uti ꞌë sinánxuankëxa; mitsun kamina ꞌë xuama ꞌain, usa ꞌixun ka anbi ꞌë ꞌapu faraón an bana ñuixunti ꞌimianan aín xubunu ñu mëënun ꞌimiakëxa, ꞌimianan ka anbi Egipto me ënu ꞌapusa ꞌixun unikama ñu mëëmianan kamabi ñukama ꞌën ꞌanun kixun ꞌë ꞌimiakëxa.

⁹ Usa ꞌain kamina bënëti anua ꞌikë anu kuantankëxun nun pa kai kuanti ꞌain: Nun xukë́n José kananuna mëran kixun kamina kai kuanti ꞌain, ësai ka min bëchikë José kiaxa: Nukën ꞌIbu Diosan ka kamabi Egipto menu ꞌapusa ꞌinun ꞌë ꞌimiaxa. Usa ꞌain kamina basima bënëti ꞌë isi uti ꞌain.

¹⁰ Usa ꞌain kamina min bakë bëchikëkama ꞌimainun min babakamaribi bëanan min ñuinakama bëti ꞌain, bëia kana anumi mikamax tsónun Gosen kakë me a mitsu ꞌinánti ꞌain. Usa ꞌaish kamina ꞌë ꞌurama ꞌiti ꞌain.

¹¹ Ënumi ukëkana min aintsi ꞌibukama këñunbi mitsun piti ꞌinánan, kamabi mibëa ꞌikë akamaribi añu ñubi pishintisamokin ꞌakinti ꞌain; ënuax mapai achúshi bari pain ka anun ñu ꞌapákëbi koima ꞌianan numi ax ꞌiti ꞌikën.

¹² ꞌËn xukë́n Benjamín ꞌimainun mitsúnbi kamina ꞌëx ësai kia kuakan.

¹³ ꞌImainun kamina kamabi ñu ꞌën aín kushi ꞌixun Egipto ëma ënuxun ꞌaia iskë, a kamina ꞌën papañuixuni kuanti ꞌain ꞌimainun kamina ënuami iskë ñukamaribi, José ka a menu upiti tsotia kixun kamina kati ꞌain. ¡Bënëti kamina nun pa bëi kuanti ꞌain!

¹⁴ Ësokin atu kai ka José aín xukë́n Benjamín ꞌikúti iankëxa. ꞌImainun ka Benjamínëxribi José ꞌikúkin tëpatsati ami iankëxa.

¹⁵ Usai Benjamínbë ꞌitankëx sënë́nkin ka Josénën aín xukë́n apankamaribi bëtsukukakin bitsi intëkëankëxa, ësai pain ꞌitankëxun ka aín xukë́nkama abë rakuë́timaishi banakëxa.

¹⁶ Usai ꞌikë ka faraón ꞌimainun aín unikaman aín xubunu ꞌixunbi ñuikania kuakëxa, kuati ka Josénën xukë́nkama kara ënë menu bëbaxa kixun sinani kuëënkankëxa.

¹⁷ Usaia ꞌikë kuaxun ka faraónën José kakëxa: —Min xukë́nkama kamina aín, ñuinanu purubianti trigokama ꞌinánti ꞌain, ꞌinántankëxun kamina anuaxa ukë Canaán menu kuantëkëntanun xuti ꞌain,

¹⁸ anu kuantakëxun ka aín papa ꞌimainun aín aintsi ꞌibukama ꞌë bëxúnti ꞌikën. Bëxunkëxun kana ꞌën anua ꞌinun Egipto me upíira anu ñu ꞌapákëa upiti ꞌirukë a ꞌinánti ꞌain, usa ꞌain ka ënë me ꞌën kaísun ꞌinánkë ënu ꞌirukë ꞌupíira a pi tsóti ꞌikën.

¹⁹ ꞌImainun kamina kati ꞌain, Egipto me ënua, ka carretakama buánti ꞌikën, anúan aín xanu ꞌimainun atun bëchikëkama, ꞌimainun anun min paparibi bëti. Atux ka uti ꞌikën,

²⁰ ꞌianan ka añu ñuñu kara bërí ꞌikë ami sinanimaishi uti ꞌikën, Egipto me ënua ꞌikë ñu upíirabu ax ka atunan ꞌiti ꞌikën.

²¹ Usakian faraónën kakëxun ka Jacobnën bëchikë. Josénën faraónën kakësabiokin aín unikaman carretakama ꞌinánun kanan, kuankian bainuxun pibianti aribi ꞌinánun kakëxa;

²² chupa ióbu kuankian chuakë pëanan pañubianti a ꞌinánkëxa, ꞌaínbi ka Benjamín ashi trescientos kuríki manë ꞌakë ꞌimainun mapai achúshibëtan sënën chupa aín pañuti ꞌinánkëxa.

²³ Usakin ꞌinánkin ka aín papa buámitia mapai rabë́ asno anu purukë Egipto menu ꞌikë ñu upíbu, ꞌimainun bëtsi mapai rabë́ asno anu purukë trigo aribi, buanmianan panankian bainuxun aín papan ukin pibëtsinti pán akamaribi buanmiakëxa.

²⁴ Usakin ñukama ꞌinántankëxun ka Josénën kuantanun xukin aín xukë́nkama kakëxa: —Bainuax atumina kuani mëëanankanin. Kaxúan xukëx ka aín xukë́nkama rikiankëxa.

²⁵ Usakin kaxúan Egipto menua xukëx ka Canaán kakë me anu nuküakëxa, anua aín papa tsókë anu bëbakëxa.

²⁶ Bëbaxun ka usaía ꞌikë kama ñuixunkin aín bëchikë achúshinën kakëxa, papan ꞌën xukë́n José ka tsótaxa ax ka Egipto menu ꞌikë unikaman ꞌapu ꞌikën, kixuan ñuixunkëx ka Jacob uisa kupín kara usa ꞌiti ꞌikë kixun sinánkin ka aín bëchikëkaman ñuixunkë ax ka asérabi ꞌikë kixun sinanima ratuti sinánkasmakëxa.

²⁷ Usai ꞌikinbi ka atúan ñuixunkëxun Josénëan anun kuanti xuxunkë carreta isanan ñukama aribi isi ꞌitsaira kuëënkin kuanti sinánkëxa.

²⁸ Sinani ka kiakëxa: “¡ꞌËn kana kuan ꞌën bëchikë José kaisa Egipto menu tsótaxa! Usa ꞌain kana bamaxumaishi isikuanti ꞌain.”