Génesis 44 - Kashibo-Kakataibo Biblia

Josénën manë xampa ñuikë bana

¹ Usakin ꞌatankëxun ka Josénën an ñu bërúankë aín kushi kakëxa: —Ënë unikaman pishanu kamina trigo atun buántisabi ꞌitánun ꞌaruti ꞌain, ꞌanan kamina atun kuríki achúshi achúshi pishanu bërakankin ꞌaruxunti ꞌain.

² ꞌAnan kamina ꞌën xampa manë uxua ꞌakë aribi aín xukë́n ꞌanákanën pisha bërakankin ꞌaruti ꞌain ꞌakin kamina, anun trigo kupíokë kuríki akëñunbi ꞌaruti ꞌain. Usokian Josénën ꞌamikëxun ka an ñu bërúankë unikaman ꞌaxuankëxa.

³ Usai ꞌiónxa pëkarakëbë barin urukin pë́kabëtsinkëbëtan ka Josénën an ñu mëëxunkë unikama kuantanua, aín xukë́nkama aín ñu mëníoti ꞌakinun kixun ꞌamiakëxa ꞌamixun ka aín xukë́nkama aín ñuinakama buani kuantanun xuakëxa.

⁴ Usai kuania ëma ëbiani urakiankë ꞌaímabi ka Josénën an ñu ꞌaxunkë uni kakëxa axa kuankë unikama akamina nuikuanti ꞌain nuixun nukúkin kamina kati ꞌain: —¿Uisa oti kaina upíokin ꞌakinkëxunbi ꞌatimakin ꞌan? ¿Uisati kaina mitsun manë uxua ꞌakë xampa amia

⁵ ꞌën ñu mëëxunkë unin xëanan anun ñu tankë a mëkaman? ¡Mitsun kamina ꞌatimakin ꞌan!

⁶ Ësakian kakëx kuanxun ka an ñu bërúankë uni an nukúkin, usakian kakë bana abi ñuikin atu kakëxa,

⁷ usakian kakëxun ka atun kakëxa: —¿Uisa ꞌixun kaina usakin kananuna ñu ꞌa kixun nukama kain? ¡uínsaranbi kananuna nun ësokin ñu ꞌakëma ꞌain!

⁸ Nux kananuna Canaán nëtënuaxbi nun pishanua mërakë kuríki a ꞌinantëkëni uan. ¿Uisaxun karanuna manë xampa mëkamanan kuri ami ñu mënxunkë unin xubunua mëkamati ꞌain?

⁹ ¡Usa ꞌain sapi ka an mi ñu mëëxunti ënëkama achúshinëx bamakë ꞌiti ꞌikën, uin pishanua kara manë xampa mëraia a ꞌimainunbi kananuna nukamaxribi an ñu mëëxunkë ꞌiti ꞌain!

¹⁰ Usokian kakëxun ka an José ñu mëëxunkë uni aín kushin atu kakëxa: —Mikamax kikësa ka ꞌiti ꞌikën, ꞌaínbi ka uin pishanu kara manë xampa ꞌikën ax kuni ꞌën ñumëmikë uni ꞌiti ꞌikën; usa ꞌaínbi ka aín patsanëx ꞌuchakëma ꞌiti ꞌikën.

¹¹ Usaia kikëbëtan ka a kamaxunbi atun pisha bënë́kinshi menu, nanpákin rëchuruakëxa.

¹² Rëchurupatia ka an ñu bërúankë unin kamabi pisha bariakëxa, barikin ka aín xukë́n apanmixun aín xukë́n ꞌanákami okin barikibi ka Benjamínën pishanua manë xampa mërakëxa.

¹³ Usakian mërakëbë ka atun chupa tukai nishi paëakëxa. Usai ꞌitankëxun ka amiribishi atua anun ñu nikinkë aín ñuinakaman kaxunu puruakëxa. Purubiani ka a ëmanubi kuantëkëankëxa.

¹⁴ Usa ꞌain ka Judá ꞌimainun aín xukënkamax kuanxbi amiribishi bërukiani Josénën xubunu bëbakëxa, bëbakinbi ka José anuabi mërakëxa mërai ka aín bëmáno nirakëti rantinpuruni tsóbukin aín bëmánanën me tikakëxa,

¹⁵ usai ꞌia ka akamabi Josénën kakëxa: —¿Añu kaina mikaman ꞌan? ¿Mitsun kaina ꞌunan achúshi uni ꞌësaribinën kara ñu tanti ꞌik?

¹⁶ Kia ka Judánën kakëxa: —¿Uisakin karanuna nukaman mi kati ꞌain? ¿Uisaxun karanuna ñu ꞌakëma ꞌixun nun kananuna ꞌan kixun mi kati ꞌain? Nukën ꞌlbu Diosan nux ꞌuchakë ꞌunánkë ꞌain kamina. Nukama min ñu mëmikë uni ꞌinun ꞌimiti ꞌain; ꞌimikin kamina, aín pishanua min manë xampa bikë abëbi, min ñu mëmikë uni ꞌinun nukama ꞌimiti ꞌain.

¹⁷ ꞌAínbi ka Josénën kakëxa: —Usama ka. Aín pishanuanu manë xampa mërakë ax kuni ka ꞌën ñu mëëmikë uni ꞌiti ꞌikën. Usa ꞌain ka aín patsanëx aín papan xubunu upitax rikianti ꞌikën. Uínbi ka mitsu kuania ubiotima ꞌikën.

Judánën Benjamín ñuikin José ka

¹⁸ Usa ꞌain ka Judánën José ꞌurama okin kakëxa: —ꞌËn kana mi ësokin kaisatanin, usa ꞌain kana ꞌën uínbi kuanuma mi kain. Kamina ꞌën kakëx ꞌëmi nishtima ꞌain, mix kamina ꞌapu faraón asaribi ꞌikë kana mi kain.

¹⁹ Min kamina nu ñukan nux karaisana papañu ꞌianan nun xukë́n ꞌanákañu ꞌain kixun,

²⁰ ñukákëxun kananuna mi ñuixuan nun papa achúshi kaniakëkë ka anu ꞌikën ꞌimainun ka nun xukë́n ꞌanáka achúshi bërí kanikë bëná anu ꞌikën, ax ka nun papan kaniakëkë ꞌixun bëchia ꞌikën. ꞌImainun kananuna mi kan nun papan ka ꞌitsaira atua kuëënia, ax ka aín xukë́n ñua akëñunbia aín titan tuá ꞌikën.

²¹ Usakin mi kakëxun kamina min uni bëna a ꞌunánun bënun kixun nu kan.

²² Nukaman kananuna mi kan a tuákën ka aín papa ëinsama tania, an ënkëx ka aín papa ñuti ꞌikën.

²³ ꞌAínbi kamina min nu kan nubëisa a uni bëna ukëbëtama ismina nu bitsima kixun.

²⁴ Usa ꞌain kananuna kuantankëxun min nu kakë bana, kamabi ñuixunkin nun papa kan.

²⁵ Usakin kakëxun ka nun papan nu kaxa: Karaisanuna amiribishi trigo ꞌitsamashi marui utëkëntima ꞌain kixun;

²⁶ ꞌaínbi kananuna nukaman kan: Nux kananuna ënë tuá min nukëñun xukëbëma kuaniman, usa ꞌain sapi kananuna ax kuankëbëtanma, a uni isi kuantima ꞌain.

²⁷ ꞌËn papan ka ësakin nukama kaxa: Mitsun kamina ꞌunan ꞌën xanun ka bëbu tuá rabë́ishi ꞌë tuáxuankëxa;

²⁸ achúshinëx ka ꞌëbë ꞌibi ënuax nëtë́akëxa, usa ꞌain kana bëríbi iskëma ꞌain. Ñuina raëkëma ninu ꞌikën kara piakëxa kixun kana sinanin.

²⁹ Usa ꞌain ka bërími ubankëxa aín xukë́n ꞌiásaribiti ñu ꞌaisama inuti nëtë́këbë kamina mi kamáxbi ꞌuchokë ꞌiti ꞌain, ꞌën sinanëinshi ꞌaisamaira masá sinani bamakëbë.

³⁰ Usa ꞌain ka ꞌën papa uniakë ami ꞌitsaira sinánkin aín nikë aín ñu mëëkë anuxunbi uinubia kuantanun kakinma ꞌarakaia, usa ꞌain ka a uniakë nukamax kuankëbë ꞌëx kuankëbë,

³¹ nun papa a istëkënima masá nuituti bëunan mëskukënënbi bamati ꞌikën. Usa ꞌain kananuna nukamax nun papa kaniakëkë ꞌaish aín nitë́xëkëinshi bamakëbë ꞌuchokë ꞌiti ꞌain.

³² Usa ꞌain kana ꞌën papa ësokin kan ꞌëxëshi kana an ënë tuá uisai kara ꞌia a iskë ꞌiti ꞌain ꞌimainun kana ësokinribi kan: Amiribishi minu bëtëkënima kana ꞌëx ꞌuchakë ꞌiti ꞌain usa ꞌain kamina ꞌëx bamati ꞌitámainun ꞌë ꞌuchoti ꞌain.

³³ Usa ꞌain kana ꞌën mi kain ꞌëx sapi kana min ñumëmikë unisa ꞌiti ꞌain, usa ꞌain kana uniakë ënëx kuantamainun ꞌëx mi ñu mëëxuni bërúti ꞌain. Usa ꞌain kamina min aín xukë́n kamabëa kuantanun a tuá xuti ꞌain.

³⁴ Uisa kupí, ¿uisax karana ꞌën papanu ënë tuá ꞌëbë kuankëbëma ꞌëx kuantëkënti ꞌain? ꞌËn karana ꞌën papa masá nuituti tëmëraia isti ꞌain.