Génesis 43 - Kashibo-Kakataibo Biblia

Aín xukë́n kaman Benjamín Egipto menu buan

¹ Usa ꞌain ka nëtëkamabi a piti ñu a menu ꞌaíma ꞌiakëxa,

² usa ꞌain ka Jacobnën aín bëchikë kamabëtan Egipto menua buánkë trigo a pikëx këñúkëbëtan aín bëchikëkama kakëxa: —Amiribishi kuantankëxun kamina trigo chukúmashi marutëkëni kuanti ꞌain.

³ ꞌAínbi ka Judánën kakëxa: —Asérabi ka anu ꞌikë unin an nukama kaxa: Min xukë́n ꞌanáka bëíma kamina ꞌë isi ukantima ꞌain.

⁴ Usa ꞌain kananuna min nubë, kuantanun xukëbë trigo maruikuanti ꞌain;

⁵ ꞌaínbi kananuna minmi nubë kuantanun xukëbëma kuaniman. A unin ka nu asérabi kaxa: Min xukë́n ꞌanáka a bëíma kamina ꞌë isi ukantima ꞌain.

⁶ Ësokian katëkënkëxun ka Jacobnën kakëxa: —¿Uisa kupín kaina ꞌë ꞌitsaira ꞌaisama on? ¿Uisati kaina nun xukën ꞌanáka ka anu ꞌikë kixun a uni kan?

⁷ Kakëxunbi ka atun katëkëankëxa: —A unin ka uisa unikaraisanuna ꞌain kixun ꞌitsaira ñukákin nun aintsi ꞌibukama nu ñukáxa. Ñukákin ka nu kaxa: ¿Min papa kara ñukëma pain tsótax? ¿Min xukë́n itsi kara anu ꞌik? Nun kananuna an ñukákësabi okin an kakë banakama kan. ¿Uisaxun karanuna min xukën ꞌanáka kamina bëti ꞌain kixun kakëxun ꞌunánkë ꞌitsían?

⁸ Usa ꞌain ka Judánën aín papa Jacob kakëxa: —Nux upitax tsóti kuëënkin kamina nun xukë́n ꞌanáka ꞌën bërúanun xuti ꞌain, xukëbë kananuna bëríbi kuanti ꞌain. Usa ꞌain kananuna mi ꞌimainun nukama ꞌianan nun bëchikë kamaribi ñutima ꞌikën.

⁹ ꞌËn kana a tuá bërúanti ꞌain; ꞌë kamina axa uisai kara ꞌikëbëtan kati ꞌain. ꞌËn a tuá bëtëkënima kana anun tsókë nëtëkaman ꞌëx min ꞌuchokë ꞌiti ꞌain.

¹⁰ Ënuax ꞌitsaira banai panatima kuanx kuni kananuna rabëti kuantankëx ukë ꞌitsían.

¹¹ Usa ꞌain ka aín papan ësokin kakëxa: —Anun nun ënëñu mëníoti bëtsi ñu ka ꞌaíma ꞌikën, usa ꞌain kamina ësokin ꞌati ꞌain: mitsun pisha kamanu kamina a uni ꞌinaishiti kuanxun achúshi ñu buánti ꞌain. Ënë menuxun uniokë ñu upíira: bálsamo kakë sanuira chukúma ꞌimainun buna rëpa chukúmashi ꞌimainun ro tsëpasa ꞌimainun i baka ꞌakë ro akëñun ro ua upíira nun menua ꞌikë aribi buánti ꞌain.

¹² Buánkin kamina nëtë itsinmi buánkë usamaira kuríki këxtuira buántankëxun minbi ꞌinánti ꞌain, mitsun ꞌinankëxunbia ꞌinantëkënkësamaira ꞌinánti ꞌain; ꞌinánkin kamina manuxun sapi ka usakin ꞌaxa aribi ꞌinánti ꞌain.

¹³ ¡Usa ꞌain kamina! min xukë́n ꞌanáka bibiakin buántankëxun a uni istëkëni kuankanti ꞌain.

¹⁴ Usa ꞌaínbi ka Nukën ꞌIbu Dios ax kamabi kushiñu an mitsua uisabi okima nuibanun ꞌimianan, min xukë́n sipunu ꞌikë a ënun sinánmikin Benjamín utëkënun upíokin sinánmiti ꞌikën. Usa ꞌain kana ꞌën bëchikëkama nëtë́këbë, bëchikëñuma ꞌëx ꞌiti ꞌain.

¹⁵ Usakian Jacobnën kakëxun ka aín bëchikëkaman anu ꞌikë ꞌapu ꞌinaishiti kuanti ñukama bianan, pishami kuríki këxtuira bianan, Benjamínribi bibiani Egiptonu kuankëxa. Kuantankëx ka anua José ꞌikë anu bëbakëxa,

¹⁶ usaía bëbaia ka Josénën Benjamín atubëa kuankë isakëxa, iskin ka an aín xubu bërúankë uni a kakëxa: —Ënë unikama kamina ꞌën xubunu buánti ꞌain, ꞌimainun kamina vaca rëtankëxun piti ꞌitsaira ꞌati ꞌain, atun ka bari xamarukëbëtan bërí ꞌëbëtan piti ꞌikën.

¹⁷ Ësakian kakëxun ka aín ñu bërúankë unin aín kushin Josénën kakësabiokin anbi aín xubunu atu buánkëxa,

¹⁸ ꞌaínbi ka Josénën xubunuax ratuti kánani kikankëxa: —¡Ënëx ka këmëkin nu bëkë ꞌikën! Bëtsi nëtën trigo marukin ꞌinankëxunbia nu ꞌinantëkënkë kuríki a kupín sapika nu bëaxa. Usa ꞌain sapi ka nukama kuantanun xukima tëmëramianan kupímashi nukamabi ñu mëëmiti ꞌikën, nun ñuinakama këñunbi.

¹⁹ Usa ꞌain ka nukuti aín xubu xëputi ꞌurama oí a rapasu kuani nirakëkin an ñu bërúankë uni abë banakin.

²⁰ Atun kakëxa: —¡Uisati, kara Nukën ꞌIbu! Bëtsi nëtën kananuna asérabi trigo marui uan,

²¹ ꞌaínbi kananuna ënuax kuantankëx anu nu imë́ uxti anu nukuxun nun pisha rëchurupakinbi, kananuna pisha bërakankin achúshi achúshi nun pishanua kuríki ꞌarukë mëran, a kuríki ka kamabi ꞌiaxa. A kananuna bërí ꞌinántëkënti bëan,

²² bëanan kananuna nun kuríkiribi anun trigo maruti bëtëkëan. ꞌAínbi kananuna uin kara a painun ꞌinánkë kuríki nun pishakamanu ꞌarutëkëanxa kixun ꞌunánkëma ꞌain.

²³ Kakëxun ka an ñu bërúankë unin atu kakëxa: —Kamina ꞌitsaira rakuë́kantima ꞌain. Mitsun Dios min papabëtan rabikë an sapi ka a kuríki mitsun pishanu ꞌarukë ꞌiti ꞌikën, ꞌën kana anúnmi trigo kupíokë kuríki a bian usa ꞌain kamina ꞌitsaira rakuë́tima ꞌain. Kamina ꞌitsaira masá nuituti rakuë́tima ꞌain. Ësokin katankëxun ka an ñu bërúankë unin Simeón sipunua chikínbëtsinkin aín xukë́n kamanu bëakëxa;

²⁴ usakin ꞌaxun ka atu kamabi Josénën xubu ꞌukëmëu ubankëxa, uantankëxun ka anúan tachukati ꞌumpax ꞌinántankëxun aín ñuinakamaribi aín piti ꞌinánkëxa.

²⁵ Usa ꞌain ka a ꞌinainshiti bëkë ñukama mëníokin, José ka bari maníkëbë atubëtan pi uti ꞌikë kixun ꞌunánxun kaíankëxa.

²⁶ Usakian kainkëxa aín xubunu bëbaia ka atúan ꞌinainshitia uankë ñukama a ꞌinánkëxa, ꞌinani ka ami rantinpuruni aín bëmánan memi bëtiki tsóbuakëxa.

²⁷ Usai ꞌia iskin ka Josénën atu uisa karaisa kixun ñukákëxa ñukátankëxun ka ësokinribi kakëxa: —¿Uisa kara min papa, a ñuikinmi ꞌë kakë kaniakëkë ax ꞌik? ¿Kara bëríbi tsótax?

²⁸ Kixuan ñukákëx ka akama tëtúbuti aín chixunu sënën kuabuti ami ꞌikin kakëxa: —An mi ñu mëëxunti, nukaman papa ka anu ꞌikën. Bëríbi ka tsótaxa.

²⁹ Usakian kakëxun a rapasunua israkinbi ka Josénën aín xukë́n Benjamín ꞌain papan akëñun aín titami bëchia a mërakëxa mërai ka kiakëxa: —¿Ënëx kara mitsun xukë́n ꞌanáka a ñuikinmi ꞌë bëráma kakë a ꞌik? ¡Nukën ꞌIbu Diosan ka mi ꞌakinti ꞌikën ꞌën bakën! Ësakin kaíshi,

³⁰ ka José aín xukë́n isi ꞌitsaira kuëënibi aín inkë urukëbë tënëtisamaira tani. Bënëtishi abákiani kuanx anua ꞌikë anu atsíanx iankëxa.

³¹ Usai intankëx sënë́ntankëx bëchukakiani kuani ka kiakëxa: ¡Aín piti kamina ënë kama mëtikati ꞌain!

³² Usa ꞌain ka an kakësabiokin an ñu ꞌaxunkë unikaman José axa ꞌapu ꞌikë abiribi mesanu aín piti nanxuanan aín xukë́nkama aribi bëtsi mesanu nanxuankëxa, nanxuanan ka an ñu ꞌaxunkë egipcio unikama aribi bëtsi mesanu nanxuankëxa atun ka hebreo unikamabëtan mëskuxun piama ꞌikën.

³³ Usa ꞌain ka Josénën aín xukë́n apankama ꞌanan Benjamín uinu kara tsóti ꞌikë kixun kakëxa. Katankëxun ka aín xukë́nkama atun ꞌapamixun ꞌabianxun ꞌanákami sënë́onkin atu upíokin sënë́inra ꞌitánun anu tsónun kakëxa usakian ꞌakëx ka sinánkasmai uisa kupín kara ësokin nu ꞌaia kiax bëtsibë bëtsibë isanankëxa.

³⁴ Usa ꞌain ka Josénën an anuxun pikë mesa anuxunbi raíri pikianan, ka aín xukë́n Benjamín raíri ꞌinánkësamaira okin aín piti cha ꞌinánkëxa. Usakin ꞌai ka José ꞌimainun aín xukë́nkamax pianan xëai ꞌitsaira kuëëankëxa.