Génesis 42 - Kashibo-Kakataibo Biblia

Josénën xukë́nkama Egipto menu kuan

¹ Usa ꞌain ka Jacobnën Egipto menu ka trigo axa kixuan ñuikania kuakëxa, kuakin ka aín bëchikëkama kakëxa: ¿Añu kaina anuxun mitsúxbi bëtsibë bëtsibë isanankin ꞌakanin?

² Ësokin ka ꞌë kakanxa Egipto menu kaisa trigo axa. Usa ꞌain kamina anu kuantankëxun nukaman piti trigo marui kuanti ꞌain, a piínu nukamax bukunun.

³ Ësokian aín papan kakëx ka Egipto menu mapai rabë́ Josénën xukë́nkama trigo marui kuankëxa;

⁴ ꞌaínbi ka Jacobnën aín bëchikë Benjamín, Josénën xukë́n a atubë kuantanun xuama ꞌikën, anu kuaníbi ka ñu ꞌaisama inuti ꞌikë kixun sinánkin.

⁵ Usa ꞌain ka Jacobnën bëchikë kamax anribia trigo marui kuankë unikamabë kuankëxa. A nëtë kaman ka kamabi Canaán menu a piti ñu ꞌaíma ain numi chaiira ꞌiakëxa.

⁶ Usaia ꞌimainun ka José ax Egipto menu ꞌapu ꞌain, unikama trigo maruti anëkë ꞌiakëxa. Usa ꞌixun ka axa trigo marui bëtsi menuax kuankë unikama anu kuania trigo maruakëxa. Marukëbëbi ka aín xukë́n kamaxribi ami bëbai nirakëti aín bëmánanën me tikai rantinpuruni tsóbuakëxa.

⁷ Usai anu nukutia iskin ka Josénën ënë unikamax ka ꞌën xukë́n ꞌikë kixun ꞌunánkëxa; ꞌunánkinbi ka, atu ꞌunánkëmasa ꞌixun, munuma banakin atu ñukákin kakëxa: —¡Mitsux! ¿kaina uinuax aín? Kakëxun ka —nukamax kananuna Canaán menuax trigo marui aín —kixun atun kakëxa.

⁸ ꞌAínbi ka an ꞌunánkëxunbi aín xukë́nkaman José ꞌunánma ꞌikën.

⁹ Usa ꞌain ka atux usai ꞌitia namá a sinánkin aín xukë́nkama Josénën kakëxa: —Mitsux kamina këmëkuatsini ꞌutunanishi uan. Usa ꞌain kamina uisaxun ꞌaisa kara ënë ëma ꞌikë kixun isi ukan.

¹⁰ —Usama ka nun ꞌIbu —kixun ka atun kakëxa—. An mi ñu mëëxunti nukamax kananuna trigo maruishi uan.

¹¹ Usa ꞌain kananuna nukamax achúshi papan bëchikëshi ꞌain. Usa ꞌaish kananuna upí sinánñuishi ꞌain. Usa ꞌain kananuna uínsarabi këmëkianxun bëtsi ëmakama ꞌutunkëma ꞌain.

¹² —Usama ka —kixun ka Josénën karaishiakëxa—. Mitsux kamina këmë kuatsini ꞌutunanishi uan.

¹³ Usakian kakëxunbi ka atun katëkëankëxa: —An mi ñu mëëxunti nukamax kananuna mapai rabë́ ꞌimainun rabë́ xukë́n ꞌain, usa ꞌaish kananuna achúshi papan bëchikëshi ꞌain, usa ꞌain kananuna nukamax Canaán kakë me anu tsotin. Usa ꞌain ka nun xukë́n ꞌanáka itsi nun papabë bëruaxa ꞌimainun ka nun xukë́n ꞌanákaira ax nubëma ꞌikën.

¹⁴ Ësokian kakëxun ka Josénën amiribishi katëkëankëxa: —¡Kana mitsu kan! Mitsux kamina këmëkuatsini uisakara ënë me ꞌikë kixun ꞌutuanan añu kara ënu ꞌikë kixun isi uan,

¹⁵ usa ꞌain kana ꞌën mitsu ësokin tanin: ꞌËnbi kana ꞌapu faraónën anën mitsu kain ënuax kamina min xukën ꞌanákaira ax pain utamainun uíxbi chikítima ꞌain.

¹⁶ Usa ꞌain ka mikama achúshinën a bitsi kuanti ꞌikën. A bitsia kuantamainun ka raírinëx sipuakë ꞌiti ꞌikën. Usa ꞌain kananuna mitsúxmi kikë ënëx kara asérabi ꞌikën kixun isti ꞌain, mitsux kikë asérabima ꞌain ka këmëkuatsini ukë ꞌiti ꞌikën. Ësakin kana faraónën anën mitsu kain.

¹⁷ Ësokin pain katankëxun ka rabë́ ꞌimainun achúshi nëtë Josénën atu sipuakëxa,

¹⁸ usakin sipuaxunbi ka rabë́ ꞌimainun achúshi nëtë ꞌikëbëtan atu kakëxa: —ꞌËx kana Dios kikësabi oi ꞌikë uni ꞌain. Usa ꞌain kamina mitsun ꞌën kakësabiokin ꞌati ꞌain, mitsúxmi nu këmë kuatsinxun ꞌutuni ukë ꞌikëbi:

¹⁹ usa ꞌain kana ꞌën ꞌunánti ꞌain mitsux kamina uni sinan upíñu ꞌain kixun usa ꞌain ka achúshinëx sipunu bërúmainun kamina mitsun aintsikaman piti trigo buani kuanti ꞌain.

²⁰ Kuantankëxun kamina min xukë́n ꞌanáka ꞌë bëxúnti ꞌain, a bëkëbëtan kana asérabi kamina mitsux këmëkëma ꞌai kixun ꞌunánti ꞌain. Usama ꞌain kamina mikamax bamakë ꞌiti ꞌain. Usaia kikëbë ka usa ka ꞌiti ꞌikë kiax kikankëxa,

²¹ ꞌaínbi ka atúxbi bëtsibë bëtsibë kanankëxa: —Asérabi kananuna nun xukë́nbë ꞌatimonankën, nun kananuna nua uisabi oxuma ꞌanun kakëxun kuakin nuibama ꞌain, axa tëmëraia iskinbi. Usa ꞌain kananuna nuxribi bërí tëmërain.

²² ꞌImainun ka Rubénën kakëxa: —Usa ꞌain kana ꞌën mitsu kakën nun xukë́n ꞌanáka kananuna ꞌatima otima ꞌain; kakëxunbi kamina mitsun kuakanma ꞌain, usa ꞌain sapika nukamaribi ax ñua kupí usakin nu ꞌaia.

²³ Usai atux kia Josénën kuatiabika ꞌunánma ꞌikën, ax ka bëtsían usai ka kia kixun kamainun banakëxa.

²⁴ Usakin aín xukë́nkama kaíbi atúxa usai kia kuati masá nuituti uri kuanx ka José iankëxa. Usai inkuatsini anua atux ꞌikë anu utëkënkin ka atu kakin, amo nitsinakin Simeón atun ismainunbi nëamiakëxa.

²⁵ Usokin ꞌamitankëxun ka Josénën aín unikama kakëxa, trigo aín pishanu buchuokin ꞌaruxuanan, kamina atun kuríkiribi atun pisha ꞌukëmëu achúshi achúshi pishanubi ꞌaruxuntënkëti ꞌain, ꞌanan kamina kuankian bainuxun pibianti aribi ꞌinánti ꞌain. Ësokian Josénën kakëxun ka an kakësabiokin aín unikaman ꞌakëxa.

²⁶ Usakian pishanu purukin trigo ꞌinánkëxun ka atun asno anu ꞌarubiani anuax kuankëxa.

²⁷ Usai anuax kuanbaiti ka ñantánbukëbë anua imë́ uxti anu nirakëakëxa, nirakëxun ka atu achúshinën pain aín pisha asno piminuxun trigo binuxun aín pisha rëchurukinbi ka, aín kuríki pishanu bërakankin ꞌarukë mërakëxa.

²⁸ Usakin mërai ratúkin ka aín xukë́n achúshinën raíri kakëxa: —¡Ka kuat, ꞌën kuríki ka amiribishi ꞌë mañaxa! ¡ꞌËn pishanubi ka ꞌën kuríki ꞌikën! Ësakian bëtsin kakëx ka raírinëx ratuti bërëi ꞌitsaira rakuë́ti a xukë́n kamáxbi kanankëxa: —¿Diosan kara nukamaxnu ësai ꞌiti nu sinánxukin ësokin nu ax?

²⁹ Usa ꞌain ka Canaán menu bëbakëxa, bëbaxun ka kamabi atux ꞌikë aín papa Jacob ñuixunkin kakëxa, a ëmanu ꞌikë ꞌapun ka nu ꞌatimai banai nishkin nux isanuna këmëkianxun atun me ꞌutuni kuan kixun nu kaxa:

³⁰ —A ëmanu ꞌikë ꞌapu an ka numi ꞌatimai, banai nishkin nu kaxa mitsux kamina këmë kuatsini ënë menu ꞌikë unikama unëxun ꞌutuni ukan.

³¹ Usai kiabi kananuna ësokin kan nux kananuna uni mënin sinánñuishi, ꞌain usa ꞌaish kananuna nukamax an uni ꞌutunkë uni ama ꞌain;

³² katankëxun kananuna ësokinribi kan nux kananuna achúshi papañushi mapai rabë́ ꞌimainun rabë́ xukë́n ꞌinun bëchia ꞌain; usa ꞌain ka bëtsi nubëma ꞌikën ꞌimainun ka nun xukë́n ꞌanáka nun papabë Canaán menu bëruaxa kixun kananuna kan.

³³ Ësakin kakëxun ka an nukama kaxa: Bërí kuni kana asérabi kaina mikamax upisinanñu ꞌain kixun ꞌunánti ꞌain. Usa ꞌain kamina min xukën achúshi ꞌënu ëbianti ꞌain ëbiankin kamina trigo ꞌitsamashi min aintsikama buánxunti aín,

³⁴ ꞌaínbi kamina min xukë́n ꞌanáka ꞌë bëxunkanti ꞌain. A mi ꞌë bëxunkëxun kana mitsux kamina upí sinánñubu ꞌianan këmëkuatsini ukëma ꞌain kixun ꞌunánti ꞌain; usa ꞌain kana mitsun xukë́n ꞌanáka axa upí ꞌinun ënti ꞌain, ꞌimainun kamina mitsuxribi ënë menu niti ꞌain.

³⁵ Usa ꞌain ka atun ëmanu kuantankëxun trigo pishanua bukunpakinbi Josénën xukë́n atun kuríki a ꞌukëmëuküa pisha chukúmaratsunua mërakëxa, achúshi achúshi atun pishanua. Usokin pisha chukúmaratsunua kuríki mërai ka a xukë́nkamaxbi aín papabëbi ratúkankëxa.

³⁶ Usa ꞌain ka Jacobnën kakëxa: —Mitsun kamina bëchikëñuma ꞌë ꞌimin. José ka nubëma ꞌikën, ꞌianan ka Simeónëxribi ka nubëma ꞌikën, ¡ꞌimainun kamina Benjamínribi ꞌë bërí ëmibiankasin kin! ¡Ësakin ꞌakin kamina ꞌë bëchikëñuma ënkanin!

³⁷ Usaia kia ka Rubénnën aín papa kakëxa: —ꞌËn bërúanun kamina Benjamín ꞌën mëkënu ënti ꞌain usa ꞌain kana ꞌënbi mi bëxuntëkënti ꞌain. Bëxunkëxuma kamina, ꞌën bëchikë rabë́ ënë ꞌati ꞌain.

³⁸ Usai kiabi ka Jacobnën aín bëchikë kakëxa: —ꞌËn bëchikë aín ꞌanáka ënë ꞌikëbi kana mitsukëñun xutima. Aín xukë́n José ka ñuakëxa usa ꞌain ka aratsushi tikiaxa. Mitsubë kuania ñu ꞌaisama inuti ñuanan ꞌikëbë kaina uisai ꞌiti ꞌain, mitsux kamina ꞌuchakë ꞌiti ꞌain ꞌëx kaniakëkë ꞌaish ꞌitsaira masá nuituti ñukëbë.