Génesis 41 - Kashibo-Kakataibo Biblia

Josénën ꞌapu faraónën namákëkama ñuixua bana

¹ Usa ꞌain ka rabë́ baritia inúkëbëtan. Achúshi imë́ faraónën, Nilo kakë baka kuëbi nixun isi pë́kiakëxa,

² usakian an namákin iskëxbi ka baka mëuküax, mapai achúshi ꞌimainun rabë́ vaca ꞌupíira ꞌimainun xuairabu ax chikítankëxun basi xo chaxkë́bu a ꞌukëmëuxun pia isan.

³ Usokian pikëbëbi a kaxu bakanuax chikitika ꞌatima ꞌaish chumínkëkama mapai ꞌimainun rabë́ vaca axribi baka kuëbí raíri a ꞌurama sëtërui nirakëakëxa.

⁴ Usai nirakëtankëxun ka vaca ꞌatimabu chumínkëkama an mapai ꞌimainun rabë́ vaca upíirabu ꞌimainun xuabu a eia isakëxa. ꞌIsibi ka faraón ratúkuatsianx bësuakëxa,

⁵ ꞌaínbi ka amiribishi ꞌuxtëkëankëxa ꞌuxunbi ka amiribishi namákin istëkëankëxa: achúshi trigo xonuax mapai achúshi ꞌimainun rabë́ aín bimi upíirabu ꞌaish koia isakëxa.

⁶ Iskëbë ka a kaxu mapai achúshi ꞌimainun rabë́ trigo bimi, amiaxa bari urukë amiax bëkikin suñun ꞌatimokëxa chushikë isakëxa,

⁷ akama trigo bimi chushikësa an ka trigo bimi mapai ꞌimainun rabë́ bimi upíirabu a pia isakëxa. Usakin iskinra namati bësui ka faraón kiakëxa iskinra kana namatin.

⁸ ꞌAínbi ka a pë́karan anun masánuitukëishi ꞌixun kamabi Egipto menu ꞌikë an ñu tankë ꞌimainun an ñu ꞌunánkë unikama unun kixun kamiakëxa. Kamikëxa rikuatsinkë ka faraónën usakian namákëkama ñuixuankëxa, ñuixunkëxunbi ka uinu ꞌikë uni an ñu tankë ꞌimainun an ñu ꞌunánkë achúshinënbi ñuixuama ꞌikën, uisakin namákin kara usakin namáxa kixun.

⁹ Usakian atun ñuixunkëbëma ka an faraón aín xëati ꞌinánkë uni aín kushi, ax kiakëxa: —Bërí kana sinanatin usai ꞌiti ꞌaímabi kana ꞌëx a sinanima manuan.

¹⁰ Mix ꞌapu ꞌixun kamina nishkin an pán ꞌakë aín kushi ꞌimainun an mi xëati ꞌinánkë ënëribi anua suntárunën kushi capitán ꞌikë sipu anu sipua.

¹¹ Achúshi imë́ kananuna nurabëxunbi namákën, an pán ꞌakë aín kushian ꞌamainun kana ꞌënribi bëtsiokin namákën, usa ꞌain ka an namákënëx ꞌunántisama ꞌimainun ꞌënanëxribi unántisama ꞌaish uisakin namákë kara kixun unántisama ꞌiakëxa.

¹² Ësokin nun namákë ꞌaínbi ka nubë achúshi hebreo uni bëna, an suntárunën kushi ñu mëëxunkëribi anu ꞌiakëxa. A uni kananuna nun namákë ñuixuankën, ñuixunkëxun ka nu uisakin namákë kara ax ꞌikë kixun nu ñuixuankëxa.

¹³ ¡An nu ñuixunkë usaibi ka ꞌiaxa! usa aín kana ꞌëx amiribishi ꞌën ñu mëëtinu atsímainun ka bëtsi aribi inu bëntanxun tëtsëkamiaxa.

¹⁴ Usokian ñuixunkëxun ka faraónën José bëríbia sipunua chikínbëtsinkin anu bënun kamiakëxa. Usakian kamikë ka Josénën mëníokakin aín bu tëamianan aín chupa upí pañubiani kuantankëx faraónu bëbakëxa.

¹⁵ Usaia bëbakë ka faraónën kakëxa: —ꞌËn kana ësokin namán ꞌaínbi ka an ꞌën namákë ꞌë ñuixunti ꞌaíma ꞌikën, usa ꞌaínbi kana ꞌën kuan, min isamina uni aín namákë ñuixuni kixun ñuia kana kuan, usa ꞌain kaina min ꞌën namákë ꞌë ñuixunti ꞌain.

¹⁶ Kakëxunbi ka Josénën —ax ka ꞌënbi ꞌakëma ꞌiti ꞌikë —kixun kakëxa—; ꞌaínbi ka Nukën ꞌIbu Diosan kuni mix ꞌapu ꞌaish upí ꞌinun mi ñuixunti ꞌikën.

¹⁷ Usokian kakëxun ka ꞌapu faraónën José katëkëankëxa: —ꞌËn namákënuax kana Nilo kakë baka kuëbí nikë ꞌian,

¹⁸ usakin ꞌën nixun iskëxbi ka bakanuax mapai achúshi ꞌimainun rabë́ vaca upíira ꞌaish, xuairabu an basi xochaxkëbu a mëuxun pia isan.

¹⁹ Usakian pikëbëbi ka a kaxú mapai achúshi ꞌimainun rabë́ vaca chumínkë ꞌaish ꞌatimara axribi piküaxa. ¡Uinsaranbi kana ꞌën usa vaca ꞌatima Egipto me ënua iskëma ꞌain!

²⁰ Ënë vaca chumínkë ꞌatimabu an ka ax pain chikíkë mapai rabë́ ꞌimainun rabë́ vaca upíirabukama a eaxa;

²¹ ꞌaínbi ka usakin eaxi uínbi ꞌunántisama ꞌiaxa, usa ꞌaish ka bëráma ꞌikësabi chumínkëira ꞌiaxa. Usokin namati kana bësuan,

²² ꞌaínbi kana ꞌuxtënkëxunbi amiribishi namákin mapai achúshi xonuax trigo bimi upíirabu koia isan.

²³ Usakin iskëbëbi ka a kaxú mapai ꞌimainun rabë́ trigo bimi ami bari urukë amiax bëkikin suñun ꞌakëx bëküax chushi ëskikë ꞌianan nëmëkë koaxa.

²⁴ A trigo bimi chushikësa ꞌimainun mënukësa an ka mapai ꞌimainun rabë́ trigo bimi upíirabu a piaxa. Usakin namáxun kana an ñu tankë unikama timëxun ñuixuan, ꞌaínbi ka atu achúshinënbi usakin namákë ka ax ꞌikë kixun ꞌë kakëma ꞌikën.

²⁵ Usakian kakëxun ka faraón Josénën kakëxa: —Minmi ꞌapu ꞌixun rabë́okin namákë ax ka achúshi ñu ishi ñui kikë ꞌikën. Diosan ka mi ꞌunánmisa tania añu kaina ꞌati ꞌai kixun.

²⁶ Mapai achúshi ꞌimainun rabë́ vacakama upíirabu ax ka mapai achúshi ꞌimainun rabë́ baritia ꞌikën, usaribi ka mapai achúshi ꞌimainun rabë́ trigo bimi upíirabu ax ꞌikën. Ax ka a mi namákë abi ꞌikën.

²⁷ Mapai achúshi ꞌimainun rabë́ vaca chumínkë ꞌimainun ꞌatima axa bëtsi kaxú chikíkë ax ka mapai achúshi ꞌimainun rabë́ baritia ꞌikën; usaribi ka mapai achúshi ꞌimainun rabë́ trigo bimi chushikësa ꞌimainun mënukësa amiaxa bari urukë amiax bëkikian suñun xarokë ax ka mapai achúshi ꞌimainun rabë́ baritia a piti ꞌaíma ꞌain numi ꞌiti a ꞌikën.

²⁸ ꞌËn mi kakë usabi oi ka ꞌiti ꞌikën: Diosan ka mix ꞌapu ꞌikë usakia an ñu ꞌati a ñuikin mi ismiaxa.

²⁹ Usa ꞌain ka ꞌinuxun ꞌaia mapai achúshi ꞌimainun rabë́ baritian a piti ꞌitsaira ꞌimainun unin ꞌapákë ñu ꞌitsaira bimiñu kamabi Egipto menu ꞌiti ꞌikën,

³⁰ usai ꞌitankëx ka mapai achúshi ꞌimainun rabë́ baritia a piti ꞌaimaira ꞌiti ꞌikën. Usai ꞌikëbëtan ka uínbi Egipto menu ka ꞌaisamaira piti ꞌiakëxa kixun sinántima ꞌikën.

³¹ Usa ꞌain ka a piti ñu ꞌaimaira ꞌikëbë, ñu ꞌapákëa kokë bëráma iása ꞌitima ꞌiti ꞌikën.

³² ꞌËn ꞌapu minmi rabë́ okin namákë ax ka, Nukën ꞌIbu Diosan uisakin kara ꞌaisa tania usakin ꞌaia, usa ꞌain ka ënuax basimashi ꞌiti ꞌikën.

³³ Usa ꞌain sapi kamina ꞌën sinánkëxun basikinmaishi uni achúshi sinánñuira ꞌimainun an ñu ꞌunánkë, an ënë Egipto menu ꞌikë unikama an bërúankin isti anëti ꞌain.

³⁴ Mix ꞌapu ꞌixun kamina ësokin ꞌati ꞌain: min kamina aín kushikama anëtankëxun, kamabi menu kuankian unin ꞌapákë trigo bimi bikë ax ka mapai achúshi pisha bikë anua aín chukúmashi biti ꞌikën, bikin ka mapai achúshi ꞌimainun rabë́ baritia ꞌimi Egipto menua unin ꞌapákë ꞌaisamaira tuaia timëti ꞌikën.

³⁵ Usa ꞌain kamina min kati ꞌain kamabi trigo bimi upibukama ka mapai ꞌimainun rabë́ baritia anun timëti ꞌikën; timëtankëxun ka achúshi xubunu bukúnti ꞌikën, ax ka usokin kamabi ëmakamanu bukúnti ꞌikën, ax ka kamabi uni ëmanu ꞌimainun naënu ꞌikë unikaman piti ꞌikën.

³⁶ Usakin mi ꞌamikëxun atun trigo bimi bukúnkë ꞌain ka mapai achúshi ꞌimainun rabë́ baritia numi ꞌikëbëbi unikama numin bamatima ꞌikën, Egipto me ënu tsókë unikamax.

José Egipto menu ꞌapu iá bana

³⁷ Usakian Josénën kakë ax ka ꞌapu faraón ꞌimainun aín unikamanan upí bana ꞌiakëxa,

³⁸ usaía kia ka faraónën aín unikama ësokin kakëxa: —¿Uisaxun karanuna bëtsi uni ꞌësaribi aín ꞌIbu Diosan bëru ñunshinñun nun mërati ꞌain?

³⁹ Ësai kitankëxun ka José kakëxa: —Misaribi uni sinánñuira ꞌimainun an ñu ꞌunánkë uni ka ꞌaíma ꞌikën, usa ꞌain min ꞌIbu Diosan mi ꞌunánmikëxun kamina ënë ñukama ꞌunanin.

⁴⁰ Ësokin katankëxun ka ꞌapu faraónën José kakëxa, mix kamina anu ꞌëx ꞌikë ꞌapun xubu anu ꞌiti ꞌain, ꞌimainun kamina ënë menu ꞌikë unikaman min kakësokin ꞌati ꞌikën, kamabi uni min kakësa okían ñu ꞌanun ꞌamiti ꞌain ꞌaínbi kana. ꞌËx kuni ꞌapu ꞌaish mi manámi ꞌianan kushiira ꞌiti ꞌain.

⁴¹ Ka kuat, ꞌën kana kamabi Egipto menu ꞌikë unikaman kushimi ꞌinun mi anëin. Ësokin kakinshi ka,

⁴² faraónën ꞌapu ꞌixuan mëñukë a ëchikinshi aín mëñusuti bitankëxun Josénën mëkënu mëñumiakëxa. Usakin mëñumitankëxun ka aín chupa lino ꞌupíira upí a pañumianan aín tëuti kuri ꞌakë a tëñumiakëxa.

⁴³ Usakin aín ñukama pañumitankëxun ka anúan ax nikë caballonën nikinkë bëtsi a kaxu ꞌikë bëtsi anu José ꞌaruakëxa, ꞌarutankëx ka kiakëxa, bërí ka kamabi unix aín bëmánanuax sharati rantinpurunkin kamina anúan kuanti bai bëaratima ꞌain, usa ꞌain ka Josénëx kamabi Egiptonu ꞌikë unikaman ꞌapu ꞌiakëxa.

⁴⁴ Usakin ꞌatankëxun ka faraónën kakëxa: —ꞌËx kana ꞌapu ꞌain, usa ꞌaínbi ka Egipto menu ꞌikë unin mix kikëma ꞌain añu ñubi ꞌatima ꞌikën.

⁴⁵ Usa ꞌain ka ꞌapu faraónën bëtsiokin anëkin José egipcionu ꞌikë anën anëakëxa Safenat-panéah kakin anëtankëxun, ka Asenat akëñun ꞌain xanu ꞌiti birakamiakëxa, ax ka Potifera kakë Sacerdotenën bëchikë xanu ꞌiakëxa, ax ka On kakë ëma anu tsókë uni ꞌiakëxa, usakian ꞌakëx ka José Egipto menu ꞌapu ꞌiakëxa.

⁴⁶ Anua ꞌapu ꞌimikë anu ka José treinta baritiañu ꞌiakëxa, usa ꞌain ka José anua faraón ꞌikë anuax chikítankëx Egipto me kamaoi kuainbëkini niakëxa.

⁴⁷ Usa ꞌain ka ñu ꞌapákë ꞌaisamaira bimiñu ꞌaish piti ꞌitsaira ꞌiakëxa mapai achúshi ꞌimainun rabë́ baritia ñu ꞌapákë bimiakëxa,

⁴⁸ usa ꞌikë ka Josénën ax ꞌapu ꞌixun kamabi trigo ꞌapákë mapai achúshi ꞌimainun rabë́ baritia sënëmikin timënun unikama ꞌamiakëxa; usakin ꞌamianan ka trigo buküanan anuxuan ꞌapáxun bikë ëmanua anu bukúnti ꞌakë anubia trigo bukunun ꞌamiakëxa.

⁴⁹ Usakian Josénën timëmikëx ka trigo bimi parúmpapa kuëbínua masi iskësaira ꞌiakëxa. Usa ꞌain ka ꞌaisamaira ꞌikë uínbi tupuntisamaira ꞌianan uiti ꞌitsaira kara kixun tupuntisamaira ꞌiakëxa.

⁵⁰ Usa ꞌain ka anúan ñu ꞌapákëxbi kootima baritia ꞌisamapain ꞌain Josénën aín xanu Asenat kakë ami rabë́okin bëchikë ꞌiakëxa.

⁵¹ A paian bëchikë aín rëkuë́n bëchikë a ka Manasés kakin anëakëxa, anëtankëx ka kiakëxa: “Nukën ꞌIbu Diosan ka ꞌëx masá nuituanan tëmëraiabi ꞌë manumiaxa ꞌimainun ka ꞌën papan aintsikamiribi manunun ꞌë ꞌimiaxa.”

⁵² Usakin ꞌatankëxun ka bëchitëcëntancëxun Efraín kakin anëakëxa, anëtankëx ka kiakëxa: Nukën ꞌIbu Diosan ka anuax ꞌëx tëmërakë me ënuax ꞌëx bëchikëñu ꞌiti kuëanxa.

⁵³ Usa ꞌain ka mapai achúshi ꞌimainun rabë́ bari inúkëbë unin ñu ꞌapákë Egipto menu ꞌaisamaira ꞌiskë ax sënë́ankëxa,

⁵⁴ usaía ꞌikëbë ka José kikësabi oi mapai ꞌimainun rabë́ baritia inúkëbë unin ñu ꞌapákëbi añu ñubi menu koama ꞌikën, José kikësabi oi ka usai ꞌiakëxa. Usaia raíri mekamanu ꞌimainun ka, Egipto menushi a piti ñu ꞌaisamaira ꞌiakëxa;

⁵⁵ usa ꞌain ka Egipto menu tsókë unikamax a piti ꞌaíma ꞌain numin ꞌi ꞌapu faraónu trigo ñukati kuankëxa, kuanxun ñukákëxunbi ka ꞌapu faraónën egipcio unibu kakëxa: Kamabi unikama mitsux kamina José isi kuanti ꞌain, kuanxun kamina añu ꞌanun kara mitsu kaia usakinbi ꞌati ꞌain.

⁵⁶ Usa ꞌain ka kamabi menua a piti ꞌaíma ꞌain Josénën anua trigo bukunkëkama xëókanun kixun kakëxuan xëókakëbëtan ka egipcio unikaman trigo maruakëxa, usai ꞌikëbë ka kamabi nëtën numi chaiira ꞌain a piti ꞌaíma ꞌiakëxa.

⁵⁷ Usai ꞌikëbë ka kamabi menuaxribi a piti ꞌaíma ꞌain Egipto menua José ꞌain, trigo marui unikama uinu ꞌikë menubi a piti ꞌaíma ꞌain uakëxa.