Génesis 40 - Kashibo-Kakataibo Biblia

Josénën uni rabë́ aín namákë ñuixuan bana

¹ Usai ꞌitankëxa basikëbë ka an uvas baka xëati Egipto menu ꞌikë ꞌapu ꞌinánkë a ꞌimainun an pán ꞌakë uni aín kushi rabë́ axribi, an ñu mëëxunkë ꞌapu Egiptonu ꞌikë ami ꞌatimati banai ami ꞌuchakëxa.

² Usa ꞌain ka faraón Egipto menu ꞌikë ꞌapu ax a uni rabë́ ami ꞌaisamairai nishkin an ꞌain xëati iskë aín kushi ꞌimainun an pán ꞌakë iskë aín kushi kuëntankëxun,

³ anua suntárukaman kushi ꞌikë capitán ꞌain xubunua ꞌikë sipu anu a rabë́bi xuakëxa, ax ka anua José sipuakë anubi ꞌiakëxa.

⁴ Usa ꞌain ka suntárunën kushi capitanën an bërúanun kixun José ꞌinánkëxa, ax ka an ꞌapu ñu ꞌaxunkë unikaman kushirabë́ ꞌiakëxa, usa ꞌaish ka akamax ꞌitsa barin anu sipuakë ꞌiakëxa.

⁵ Achúshi imë́ ka sipunu ꞌikë uni rabëtan namákëxa, an uvas baka ꞌapu xëati ꞌinánkë ꞌimainun ka an ꞌapu pán ꞌinánkë aín kushi a rabëxun namákëxa, a namákënëx ka achúshi achúshinëx usaía ꞌitiñu ꞌiakëxa.

⁶ Usa ꞌain ka José pëkaran sipunu ꞌikë unikama isi uakëxa, ukinbi ka ꞌitsaira sinania masá nuituax tsókë a rabë́ mërakëxa;

⁷ usa iskin ka ñukákëxa; —¿Uisakatsi kaina bërí masá nuitukë bëmánanshi ꞌain?

⁸ —Nu rabë́xun kananuna ënë imë́ ësokin namán, ꞌaínbi ka uisakin namákë kara ax ꞌikë kixun an nu ñuixunti ꞌaíma ꞌikën kakëxun ka Josénën. —¿Diosan kara uisakin namákë kara min namákë ax ꞌikë kixun mi ñuixuntima ꞌik? —Kixun atu kakëxa katankëxun ka Josénën—. ꞌË kamina min namákëkama ñuixunti ꞌai kixun kakëxa.

⁹ Usakin kakëxun ka an ꞌapu aín xëati ꞌinankë aín kushi an pain aín namákë ñuixunkin José ësokin kakëxa: —ꞌËn kana namákin uvas i achúshi isan,

¹⁰ ax ka rabë́ ꞌimainun achúshi pëñanñu ꞌiaxa. ꞌImainun ka uvas i ax kotankëx uábuaxa, usai ꞌitankëx ka aín uábukë ax aín tëxkanñu ꞌinun uvas ꞌitankëx pëkëaxa.

¹¹ Usai ꞌian kana ꞌën ꞌapun ami xëakë xampa a tuínxun ami uvas baka chinintakëxun kana xampamibi ꞌënbi buánxun ꞌapu aín mëkënnubi ꞌinan.

¹² Ësokian ñuixunkëxun ka Josénën kakëxa: —Min namákë ax ka ësa ꞌikën: rabë́ ꞌimainun achúshi i pëñanmi namákë ax ka rabë́ ꞌimainun achúshi nëtë ñui kikë ꞌikën,

¹³ usa ꞌain ka ënuax rabë́ ꞌimainun achúshi nëtë ꞌikëbëtan ꞌapun minmi an kuëënkëma ñu ꞌaxunkë a istankëxun amiribishi min ñu mëëtinu mi nantëkënti ꞌikën, usakin ꞌakëxun kamina min ꞌasábiokin ꞌapu xampami aín xëati ꞌinánkë abi ꞌatëkënti ꞌain.

¹⁴ Usa ꞌain kamina mia usokëxun min ꞌëmiribi sinánti ꞌain, sinánkin kamina ꞌapu faraón ꞌëribia ënua chikínun kati ꞌain. ¡Usa ꞌain kamina ꞌëribi nuibakin ꞌakinti ꞌain!

¹⁵ ꞌËx kana mëkama bëtsinkin hebreo unikama anu ꞌikë menua bëa ꞌain. Usa ꞌaish kana ꞌëx ñu ꞌatima ꞌakëma ꞌaish sipunu ꞌiti kuëënima.

¹⁶ Ësokian Josénën ꞌupiokin ñuixunia kuakin an pán ꞌakë aín kushi anribi ꞌënribi kana ësokin namá kixun kakëxa: —ꞌËnribi kana ësokin namákin rabë́ ꞌimainun achúshi tasá pán uxua ꞌën maxkánu nankë isi pëkian.

¹⁷ Manámia ꞌikë tasánua ꞌikë pán ax ka batokin mëskukin ꞌakë ax ka faraónan ꞌiaxa, aínbi ka ñuina pëchiñukaman tasá ꞌën maxkánua ꞌikë a piaxa.

¹⁸ Usakin kakëxun ka Josénën kakëxa: —Minmi namákë ax ka ësa ꞌikën: rabë́ ꞌimainun achúshi tasámi namákë ax ka rabë́ ꞌimainun achúshi nëtë ꞌikën,

¹⁹ usa ꞌain ka ënuax rabë́ ꞌimainun achúshi nëtë ꞌikëbëtan ꞌapu faraónën minmi an kuëënkëma ñu ꞌakë isti ꞌikën, istankëxun ka achúshi inu mi bëntanun ꞌamiti ꞌikën, usakin bëntania ka xëtëkaman min nami piti ꞌikën.

²⁰ Usai ꞌikë rabë́ ꞌimainun achúshi nëtë ꞌikëbëtan ka ꞌapu faraónën anúan aín titan tuá nëtë ꞌikëbëtan achúshi fiesta chaiira ꞌakëxa, ꞌakin ka kamabi aín uni kushibukama kamiakëxa. Usakin kamikëxa aín kushibu timëan ka ꞌapu faraónën an xëati ꞌinánkë unikaman kushi ꞌimainun an pán ꞌakë unikaman kushi sipunua binun xuakëxa.

²¹ Xukëxun bitsínkin bëia ka an aín xëati ꞌinánkë unikaman kushi aín ñu mëëtinubi bëráma ꞌakësabi okin nantëkëanan ka faraónën aín xëati ꞌinántëkënun anubi nankëxa;

²² ꞌaínbi ka an pán ꞌakë aín kushi aribi Josénëan aín namákë ñuixunkësabi okin inu bëntanxun tëtsëkanun ꞌamiakëxa.

²³ Usakin aín namákë ñuixunkëxbi ka an ꞌapu ꞌain xëati ꞌinánkë uni ax Josémi sinanima ami manúakëxa.