Génesis 4 - Kashibo-Kakataibo Biblia

Caín ꞌimainun Abel ꞌiá bana

¹ Usa ꞌain ka uni aín xanubë ꞌiakëxa. ꞌItankëx ka xanux tutankëx aín rëkuën tuá Caín bakë́ankëxa, bakë́anx ka kiakëxa: Bërí kana bëbu tuá achúshiñu ꞌain. Nukën ꞌIbunbi ka ꞌë ꞌinánxa.

² Usakin a pain ꞌatankëxun ka Abel Caínan xukë́n aribi tuakëxa. Abel axa an ñuina ꞌarakakë uni ꞌimainun ka Caín ax an ñu ꞌapákë uni ꞌiakëxa.

³ Uiti bari kara inúkëbëtan ka achúshi nëtë ꞌikëbëtan, Caínan aín ñu ꞌapákë a ꞌinánti bikë a Nukën ꞌIbu ꞌinánkëxa.

⁴ Usakian ꞌaia iskin ka Abelnënribi aín ꞌarakakë ñuina aín rëkuën tuá upíira kaístankëxun ꞌën ꞌIbu kana ꞌinánti ꞌain kixun sinánxun buánxuankëxa. Usakin ꞌaia ka Nukën ꞌIbun Abelnën ꞌinánkë ñuina upíira ꞌikë isakëxa,

⁵ ꞌaínbi ka Nukën ꞌIbu Diosan Caínan ꞌinánkë aín ñu ꞌapákë a upíirama ꞌikë isakëxa, iskëbë ka Caín ꞌaisamairai xuamati aín xukë́nmi nishakëxa.

⁶ Usai ꞌia ka Nukën ꞌIbun kakëxa: ¿Uisa kupín karamina ꞌaisamairai min xukë́nmi xuamati nishin?

⁷ Min upíokin ñu ꞌakin kamina upíokin sinántsian, ꞌaínbi kamina ꞌaiman, usa ꞌain ka min ꞌuchati ꞌuramara ꞌikën. Usa ꞌaínbi kamina min abi tënëkin ꞌatima ꞌain.

⁸ Achúshi nëtën ka Caínan aín xukë́n Abel kakëxa, ¡nu rabëtax karanuna nitsi kuantima ꞌain! Kabiani abë uri kuankin ka Caínan aín xukë́n Abel ami xuamati nishkë ꞌixun iskëuxunma mëëkin rëakëxa.

⁹ Usokin ꞌakë ka Nukën ꞌIbun Caín ñukákin kakëxa: —¿Uinu kara min xukë́n Abel ꞌit? Kakëxunbi ka Caínën kakëxa: —Kana ꞌunániman. ¿ꞌËn karana ꞌën xukë́n nitsia bërúanti ꞌain?

¹⁰ Usai kia ka Nukën ꞌIbun kakëxa: —¿Uisa kupín karamina usakin ꞌan? Min xukë́n ꞌanákanën imi menu, ꞌapamikinmi ꞌakë an ka uisa karana oti ꞌai usakin ꞌën mi ꞌanun kia.

¹¹ Usa ꞌain kamina, mix ꞌatimokë ꞌaish ënë menuax chikínkë ꞌiti ꞌain, anuxun min xukën aín imi ꞌapamikin ꞌakë me ënuax.

¹² Minmi ñu, mëëkin ꞌapákëxbi ka biminuxuma ꞌaia. Usa ꞌaish kamina ñuñuma, kuainbëkinishi tantima mekama oi ninuxun ꞌain.

¹³ Usakian Nukën ꞌIbu kakëxunbi ka Caínën kakëxa: —ꞌËn kana min ꞌaisamaira okin tëmëramikëxunbi tënëtima ꞌain.

¹⁴ Bërí kamina ënë menua ꞌë chikinin usa ꞌaish kana kuainbëkinishi mekama oi ninuxun ꞌain, mi ꞌura kana uisaran nëtënbi tantima ꞌinuxun ꞌain. ꞌIaka uínbi kara mëraia an ꞌë ꞌati ꞌikën.

¹⁵ ꞌAínbi ka Nukën ꞌIbun ësokin kakëxa: —Uin kara mi rëtia ax ka mapai achúshi ꞌimainun rabë́okin ꞌatimokë ꞌiti ꞌikën. Usakin katankëxun ka Nukën ꞌIbun Caín ꞌunántiokëxa, uin kara mëraia an rëtima okin.

¹⁶ Usakian Nukën ꞌIbu kakëx ka Caín anuaxa abë banakë me ëbiani kuankëxa, kuantankëx ka Nod, kakë me amiaxa bari urukë Edén ꞌikë anu ꞌiakëxa.

Usai Caínan rëbúnki ꞌiá bana

¹⁷ Usa ꞌain ka Caínan xanu bitankëxun ami bëbu tuá ꞌinun bëchiakëxa, aín anë ka ꞌiakëxa Henoc kakë. Usakin bëchitankëxun ka Caínan achúshi ëma ꞌakëxa. ꞌAtankëxun ka aín bëchikënën anën Henoc kakin anëakëxa.

¹⁸ Henoc ax ka Iradnën papa ꞌiakëxa, Irad ax ka Mehujaelnën papa ꞌiakëxa, Mehujael ax ka Metusaelnën papa ꞌiakëxa, ꞌimainun ka Metusael ax Lámecnën papa ꞌiakëxa.

¹⁹ Lámec ax ka xanu rabë́ñu ꞌiakëxa: Achúshinëxa Adá kakin anëkë ꞌimainun ka bëtsíxribi Silá kakin anëkë ꞌiakëxa.

²⁰ Adánën tuakëx ka Jabal kakin anëkë ꞌiakëxa, an pain ka ñuina chukúma ꞌimainun ñuina chakama ꞌarakakëxa. Usa ꞌaishi ka achúshi ꞌitinushi bukuima aín xanu ꞌimainun aín bëchikë ꞌimainun aín ñuinakamabë mekamanu kuainbëkini pastonuax bëtsi pastonu kuankëxa. Usa ꞌaish ka upíokin xubu oima chupa këxtú xubusa okin ꞌakë anuishi ꞌikë uni ꞌiakëxa, usa ꞌixun ka a unin vaca ꞌarakakëxa.

²¹ Jabal ax ka achúshi xukë́ñu ꞌiakëxa. Aín anë ka Jubal kakin anëkë ꞌiakëxa, usa ꞌain ka a unin rëbúnkinëx kamabi ñu ꞌunánkë ꞌixun arpa ꞌanan paka ꞌakë a bana oti ꞌunánkë uni ꞌiakëxa.

²² Silánën tuá Tubal-caín kakin anëkë a ka manë panshian unionan bëtsi ñukamaribi uniokë uni ꞌiakëxa. Tubal-caín ain chirabakë achúshinëx ka Naamá kakin anëkë ꞌiakëxa.

²³ Achúshi nëtën ka Lámecnën aín xanu Adá ꞌimainun Silá kakëxa: ꞌËn mi bana ñuixunmainun kamina upíokin kuati ꞌain: Achúshi uni ka bëná ꞌiaxa, a kana anbia ꞌë ꞌaisama oisa tankëxun rëan.

²⁴ Asérabia Caínax mapai achúshi ꞌimainun rabë́okin ꞌuchakë ꞌain kana, ꞌëxribi ꞌaisamaira okin setenta ꞌimainun siete okin ꞌuchokë ꞌëx ꞌiti ꞌain, kiax ka Lámec kiakëxa.

Adánnën anuishi sënënkin Evami achúshi okin bëchitëa bana

²⁵ Amiribishi aín xanubë ꞌitankëxun ka Adánnën achúshi bëbu tuá ꞌatëkëankëxa, ax ka Set kakin anëkë ꞌiakëxa, usa ꞌain ka kiakëxa: Diosan ka bëtsi tuáribi ꞌë ꞌinánxa Caínëan aín xukë́n Abel rëa ꞌain.

²⁶ Usa ꞌain ka Setnënribi achúshi bëchikë ꞌakëxa, aín anëx ka Enós kakë ꞌiakëxa. Usa ꞌain ka a nëtëkaman unin Nukën ꞌIbu ꞌakinun kixun ñukákëxa.