Génesis 38 - Kashibo-Kakataibo Biblia

Judá ꞌimainun Tamar ꞌiá bana

¹ Usai ꞌitankëx ka Judá aín xukë́n kamanuax chikíakëxa, chikíkiani kuatankëx ka achúshi uni Hirá kakë aín xubunu ꞌiakëxa, ax ka Adulam kakë ëma anu ꞌikë uni ꞌiakëxa,

² kuantankëx anu ꞌixun ka achúshi cananeo uni Súa kakë aín bëchikë ꞌunánkëxa, ꞌunántankëxun ka aín xanu ꞌiti biakëxa usakin bitankëx ka,

³ abë ꞌiakëxa, abë ꞌitankëxun ka aín xanu ami bëchiakëxa bëchixun ka Er kakin anëakëxa.

⁴ Usakin ami bëchixun ka amiribishi aín xanu ñuitsimitëkëankëxa: Usokin ñuitsimixun ka aín bëchikë a bakënia Onán kakin anëakëxa.

⁵ Usakin ꞌatankëxunbi ka amiribishi bëchitëkëankëxa, bëchixun ka Selá kakin anëakëxa, aín papa Judá axa Quezib kakë ëmanu ꞌain.

⁶ Usa ꞌain ka Judánën aín bëchikë apan Er kakë achúshi xanu Tamar a ꞌinánkëxa.

⁷ ꞌAínbi ka Nukën ꞌIbun ꞌatimati nitsia iskin an ꞌakë ñu kuëënkima Er a ñunun ꞌimiakëxa.

⁸ Usai Er ñuan ka Judánën aín bëchikë Onán kakëxa: —Min kamina ꞌunan añu kaina ꞌati ꞌain kixun, usa ꞌain kamina min xukë́nan kasunankë xanu min ꞌainitsi a biti ꞌain, a bixunmi ami bëchikë ax ka min xukë́n apan ñukë ꞌain rëbúnki ꞌiti ꞌikën.

⁹ ꞌAínbi ka Onánën tuá bakënkëkama ax ka ꞌën bëchikëma ꞌiti ꞌikë kixun ꞌunánkëxa. Usakin sinánkin ka aín xukënan kasunankë xanu a tuati kuëënkima ꞌain nami ꞌakin ꞌain nëtokë ñu ëmainshi ꞌapákëxa, usai ꞌikin ka aín xukë́n ñukë axa a kupín aín rëbúnkiñu ꞌiti kuëanma ꞌikën.

¹⁰ Usai ꞌia Nukën ꞌIbun iskëxbi ka Onán an ꞌakë ñukama upíma ꞌiakëxa, usa ꞌain ka aribi ñutanun sinánxuankëxa.

¹¹ Usa ꞌain ka Judánën aín piaka Tamar kakëxa: —Min papan xubunu pain kamina ꞌikuanti ꞌain, anuxun kamina ꞌën bëchikë Selá kanitamainun kaini kuanti ꞌain abëmi birananun. ꞌAínbi ka Judánën sinánkëxa Selá axribi sapi ka aín xukë́nkama ꞌikësaribiti ñuti ꞌikë kixun. Usa ꞌain ka Tamar ax aín papan xubunu ꞌi kuankëxa.

¹² Usa ꞌain ka ꞌitsama baritia ꞌikëbë Judánën xanu, Súanën bëchikë axribi ñuakëxa. Aín xanu ñukë ꞌain ka a sinani masá nuituakëxa usai ꞌitankëx ka Timnat kakë ëma anuxuan carnero rani tëakin mëníokë anu kuankëbë ka aín ꞌunánkë uni Hirá kakë adulamita uni ax abë kuankëxa.

¹³ Tamar an ka aín kuku a Timnatnua aín carnero rani tëai kuankë kuakëxa,

¹⁴ usai a ëmanu kuankë kuakin ka Tamarnën kasunamëkë xanun pañukë chupa pañukë a pëtankëx ka bëtsi chupan rakútankëx amo chupan bëpamëti unin ꞌunántimaisa kiax ꞌitankëx, anun Enaim kakë ëmanu atsínti anu tsóakëxa, ax ka anun Timnat kakë ëmanu kuanti bai anu ꞌiakëxa. Usa ꞌain ka ësokin sinánkëxa Selá ax ka bërí kanikë ꞌaish cha ꞌikën, ꞌaínbi kana abë biranankëma pain ꞌai kixun ka sinánkëxa.

¹⁵ Usaia anu aín chupan bëpamëax tsókë iskin ka Judánën sinánkëxa ax isa achúshi xanu bëtsi bëtsi unin aín nami ꞌakë a ꞌikë kixun.

¹⁶ Usai ꞌikë ukinbi mërai ka Judá anúan ukë bai a ëni amo nirakëti abë banakëxa, banakinbi ka ꞌunánma ꞌikën ax ka aín bëchikënën kasunankë xanu aín piaka a ꞌikë kixun ꞌunánima abë banakin ka kakëxa: —¿ꞌËbë kaina ꞌitima ꞌain? Kixuan kakëxun ka xanunribi ñukákin kakëxa: —¿Añu ñu kaina ꞌëbë ꞌinuxun min ꞌë ꞌinánti ꞌain? Ësokin ka xanunribi kakëxa.

¹⁷ —ꞌËn kana mi bëmiti ꞌain ꞌën ꞌarakakë carnero tuá achúshi —kixun —ka Judánën kakëxa. —Asabi ka —kixun ka xanun kakëxa—, ꞌaínbi kamina añu ñuñu kaina ꞌai a pain ꞌë ꞌinánbianti ꞌain, minmi ꞌë kakë a ꞌë bëmi kuanxun.

¹⁸ —¿Añu ñu mi ënxunti kaina kuëënin? —kixun ka Judánën ñukákëxa. —Ñukákëxun ka min tëñuti ꞌimainun anúnmi ꞌunánti orakakë a ꞌimainun min tuinkë tsati akamina ꞌë ënxunti ꞌai —kixun xanun kakëxa. Usai abë banatankëxun a ñukákëkama ꞌinántankëx ka abë uxakëxa, usai abë ꞌixun ka Judánën aín bëchikënën kasunankë xanu tuuókëxa.

¹⁹ Usai abë ꞌikiani kuanxun ka Tamarnën anúan rakuanan bëpamëkë a bianan xanu raëmëkën pañuti chupa pëxuan nanbiankë a pañutëkëankëxa.

²⁰ Usai ꞌikë basiramashi ka Judánën aín ꞌunánkë uni adulamita akëñun aín cabranën tuá achúshi xuakëxa, abëa ꞌikë xanu a ꞌinánkian aín ñu anu naënxankë a bixuntanun kixun xukëx kuanxunbi ka a xanu ꞌaíma okëxa.

²¹ Anu bëbaxun ꞌaíma okin ka anu ꞌikë unikama ñukákëxa: —¿Uinu kara axa bëtsi bëtsi unibë ꞌikë xanu Enaim kakë ëmanu kuanti bai ꞌipitiu tsókë ꞌisonkë ax ꞌik? Kakëxunbi ka —Ënu ka bëtsi bëtsi unibë ꞌikë xanu ꞌaíma ꞌixanxa —kixun atun kakëxa.

²² Ësakian kakëx ka amiribishi anua Judá ꞌikë anu kuantëankëxa kuanxun ka kakëxa: —ꞌËmi a ñuikin kakë xanu a kana mërakëma ꞌain ꞌimainun ka anu ꞌikë unikaman anuisa achúshi xanubi axa bëtsi bëtsi unibë ꞌikë ꞌaíma ꞌixanxa kixun ꞌë kaxa.

²³ Ësakian kakëxun ka Judánën kakëxa: —Asabi ka ꞌimainun ka ꞌën ꞌinánkë ñukama a biti ꞌikën, uixbia ꞌëmi kuaitima kupí ka ꞌën ñu kamabë bërúti ꞌikën, ꞌën këmëkinma xuxunkë ꞌikëbi kamina carnero bakë a mërakima ꞌinankëma ꞌain.

²⁴ Usai ax ꞌikë rabë́ ꞌimainun achúshi ꞌuxë ꞌirukësa ꞌain ka, Judá achúshi unin kakëxa: —Min piaka Tamar ax ka bëtsi unikamabë ꞌiaxa, usa ꞌaish na tuukë ax unibë ꞌikë kupían tuukë ꞌikën. Usai kia kuati ka Judá munuma kuënkëni kiakëxa: —¡Bitankëxun kamina a xanu në́nkanti ꞌain!

²⁵ ꞌAínbi ka unikaman chikinbëtsinki bëkëxunbi ka xanun aín kuku ësokin kamiakëxa: Ënë ñukama ꞌibu an ka ꞌë tuuoxa. Usa ꞌain kamina mitsúnbi iskin uinan kara ënë tëñuti anua ꞌunánti orakakë ꞌimainun tsati ënëx ꞌikë kixun ꞌunánti ꞌain.

²⁶ Kiaxa kikëbë ka Judá aín ñukama ꞌunáni kiakëxa: An upíokin ꞌakëbëtanbi kana ꞌën ꞌatima okin ꞌan, usa ꞌain kana ꞌën bakë bëchikë Selá ꞌinankëma ꞌain usai ꞌitankëx ka uínsaranbi abë ꞌitëkëanma ꞌikën.

²⁷ Usai ꞌitankëx ka Tamar ax aín nëtë ꞌikëbë rabë́ tuá naachikiakëxa.

²⁸ Naachikikin ka aín tita bakënkë anun a tuá achúshinën aín mëkën chikíankëxa. Chikinia ñuman chëxëanën mëtëkërë kai an xanu bakëmikë ax kiakëxa: Ënëx pain ka bakënti ꞌikën.

²⁹ Usakin ꞌakëxun ka a tuakën aín mëkën atsímitëkëankëxa ax ka ax pain bakënkë ꞌaish aín xukë́n apan ꞌiakëxa, usai ꞌikë ka an naachikimikë xanun Fares kakin anëtankëxun kakëxa: Uisax kaina min pan chikían.

³⁰ Usaia ꞌian ka aín xukë́n ñuman panshianën mëtëkërë kakë axribi bakëankëxa, usai bakënkë ka a xanun Zérah kakin anëakëxa.