Génesis 37 - Kashibo-Kakataibo Biblia

¹ Usa ꞌain ka Jacob Canaán kakë me anua aín papa ꞌitsama baritia tsóa me, anu tsóti bërúakëxa.

² Ënëx ka usaía Jacobnën ꞌaintsikama ꞌia ñuikë bana ꞌikën. Usa ꞌain ka José ax bëná ꞌaish diecisiete baritiañu ꞌixun, ꞌain papan ꞌarakakë ovejakama ain xukë́antu, Bilhá ꞌimainun Zilpá an ñu ꞌaxunkë xanumia aín papan bëchia akamabëtan bërúankëxa. Usa ꞌain ka Josénën ami nishkian aín xukë́nkama ꞌatima okëxun ꞌunáni aín papami manankëxa.

José ꞌimainun aín xukë́nkama ꞌia ñuikë bana

³ Usa ꞌain ka Jacobnën aín bëchikë José ꞌitsaira nuibakin kuëëankëxa, aín xukë́nkama ꞌakësamaira okin, ax kaniakëkë ꞌixun bëchikë kupin ka usakin ꞌakëxa, usa ꞌikë ka aín tari achúshi upíira upíokin kuënëokin ꞌaxun ꞌinánkëxa, usakian aín papan ꞌakëx ka ꞌitsaira kuëëankëxa.

⁴ Aín papan atu ꞌakësamaira okin kuëënia ꞌunani ka aín xukë́n apankamax Josémi xuamati nishi nutsi a istisama tani abëbi banatisama tankëxa.

⁵ Usakin aín xukë́nkaman ꞌakëxun ka Josénën achúshi ñantan namákëxa, namáxun ka aín xukënkama ñuixuankëxa ñuixunkëxbi ka atiaira xuamati ami nishakëxa,

⁶ ami nishkëxunbi ka aín namákë ñuixunkin aín xukë́nkama ësokin kakëxa: —Ësokin kana namá mi ñuixumainun kamina kuakanti ꞌain.

⁷ ꞌËn kana ësokin namán nukamax kananuna achúshi naënu ꞌian, anuxun kananuna trigo bimi nëakin bitankëxun bukunrukin nan, usokin ꞌakëxbi ka ꞌën trigo nëakin bikë ax upiti nitsimëkë ꞌiaxa, usai ꞌimainun ka mitsunanëx ꞌënan nikë ami ñanati a bëararati kuainakëkë ꞌiaxa.

⁸ Ësokian ñuixunkëxun ka aín xukën apan achúshinën kakëxa: —¿Usa ꞌain karamina mix nukaman ꞌapuira ꞌianan an nu ñumëmikë uni ꞌiti ꞌain? Usakian ain namákë ñuixunkëx ka atiaira ami xuamati aín xukë́nkama nishakëxa.

⁹ Usokin namátankëxun ka basikëbëtan Josénën amirbishi namátëkënxun aín xukë́nkama ñuixuankëxa. Ñuixunkin ka ësokin kakëxa: —¿ꞌËn kana namátëkënkin bari, ꞌuxë, mapai rabë́ ꞌimainun achúshi ꞌispa akamaxa ꞌëmi ñanati shaíkia isan kixun kaina ꞌunánkaniman?

¹⁰ Ësokin ka Josénën namátankëxun aín papa këñun aín xukë́antu ñuixuankëxa, ñuixunkëxunbi ka aín papan ësokin kakëxa: —¿Uisakin namákin kaina usokin namán? ¿Min kaina min tita ꞌimainun min xukë́nkamabë isana ꞌëx mi ꞌurama kuani mimi ñanati tëtúbuti ꞌai kixun sinanin?

¹¹ Usa ꞌain ka aín xukë́n apankama ꞌaisamairai ami xuamati nishakëxa, usai atux ꞌia iskin ka aín papan aín nuitu mëushi ënë ñukama manukima sinánkëxa.

Aín xukë́nkaman José marua bana

¹² Achúshi nëtën ka Josénën xukë́nkama Siquem kakë menu kuankëxa, aín papan ꞌarakakë ovejakama ꞌimainun cabrakama pimiti pasto bari.

¹³ Usai atux kuankë ꞌain ka Jacobnën aín bëchikë José kakëxa: —Ka kuat, min xukë́nkamax ka Siquem kakë me anu kuanxa, nun ꞌarakakë ovejakama ꞌimainun cabrakama, pasto pimi. Usa ꞌain kamina anua isi kuanti ꞌain. Kakëxun ka Josénën —Asábi ka kana isi kuanti ꞌain —kixun kakëxa.

¹⁴ —Kakëxun ka Jacobnën asábi ka kixun kakëxa. Ka istan uisa kara min xukë́nkama ꞌikën, ꞌimainun nun ꞌarakakë ovejakama kara uisa ꞌikë kamina isi kuanti ꞌain, isbëtsini kamina ꞌë kai uti ꞌain. Ësokin kaxun ka Jacobnën aín bëchikë José Hebrón kakë me anuxun xuakëxa, xukëx kuanx ka Siquem kakë me anu bëbakëxa,

¹⁵ bëbax kuaníbi ka me pampaira ꞌain amami kiakëxa. Amami kikë mërakin ka achúshi unin ñukákëxa: —¿Añu bari kaina uan?

¹⁶ —ꞌËn xukë́nkama bari kana uban —kixun ka Josénën kakëxa—. ¿Uinuxun ovejakama bërúai kara kuanxa karamina min ꞌë katima ꞌain?

¹⁷ —Ënuax ka kuanxa Dotánnu isa kuania kia kana kuan —kixun ka uni an kakëxa. Kakëx ka José aín xukë́nkama bari Dotán kakë ëma ꞌurama anu kuankëxa.

¹⁸ Mërabëtsini aia ꞌurakëo isi ka aín xukë́nkama José ñui ꞌatimai banai uisa karanuna oti ꞌain kiax kanankëxa, kánani ka José rëkatsi kiax kikankëxa.

¹⁹ Uisa karanuna oti ꞌain kiax ka bëtsibë bëtsibë ain xukënkama kanankëxa: —¡Ka kuat, an namákin iskë a ka aia!

²⁰ Kiax tsuákirui ka kananuna rëti ꞌai kiax kanankëxa; rëtankëxun kananuna achúshi kininu nipati ꞌain, usakin ꞌatankëx kananuna kiti ꞌain, ñuina raëkëman ka piaxa. Usakin ꞌatankëxun kananuna uisai kara aín namákë ax ꞌia kixun isti ꞌain.

²¹ Kia ka aín apan Rubénnën kuakëxa, kuakin ka uisakin kara ië́miti ꞌikë kixun sinánkin aín xukë́nkama kakëxa: —Kananuna rëtima ꞌain.

²² Kananuna aín imi ꞌapamikin ꞌatima ꞌain. ꞌAkinma kananuna kini anu uni ꞌikëma menu ꞌikë ënu nipati ꞌain, usa ꞌixun kananuna nun xukë́n ꞌatima ꞌain. Ësokin ka Rubénnën Aín xukë́n José ꞌati kuëënkinma kakëxa, an ka aín papanubi ubantëkëntisa tankëxa;

²³ usaía aín xukë́nkama kikëbëbi ka José aín xukë́nkama anu ꞌikë anu nuküakëxa, nukutia ka aín xukë́nkaman ñatanxun aín tari pañubiankë a pëmikin biakëxa,

²⁴ bitankëxun ka kini ꞌumpaxñuma ñankáishi tutunkë anu nipakëxa.

²⁵ Usokin ꞌatankëx ka anuxuan ꞌakë anubi pi. Buküakëxa bukuxun iskëxbi ka an ñu marukë ismaelita unikama Galaab kakë me anuax uakëxa. Ukin ka aín camellonën bëakëxa ꞌinínti ro sanuira ꞌimainun sanu ro i baka ꞌakë tsëpasa akama Egipto menu maruti ubani kuani uakëxa.

²⁶ Usaia rikuatsinia iskin ka Judánën aín xukë́nkama kakëxa: —¿Añu ñu karana nun xukë́n rëtankëxun kananti ꞌain, ꞌimainun karanuna uisoxun nun xukë́n bamakë unëti ꞌain?

²⁷ Usakin ꞌakë ꞌimainun kananuna ismaelita unikama rikuatsinkë ënë maruti ꞌain, usa ꞌain kananuna rëtima ꞌain, ax ka nun xukë́n ꞌibu ꞌikën. Usakian kakëx ka aín xukë́nkama asábi ka kiax kanankëxa.

²⁸ Usakin kininu nipakë basimashika an ñumarukë unikama uakëxa, ꞌaia iskin ka José kininua bitankëxun, aín xukë́nkaman an ñu marukë unikama veinte kuríki manë ꞌakë kupín maruakëxa. Usokin marukëxun ka José Egipto kakë menu buánkëxa.

²⁹ Usa ꞌain ka Rubén ax aín xukë́n José chikínti sinanx ꞌuxunbi kini ꞌukëmëuküa ꞌaíma okëxa, ꞌaíma oika ratuti sinánkasmai nitë́xëti bëríkarana uisai ꞌiti ꞌai kixun sinani aín chupa tukai masá nuituakëxa.

³⁰ Masá nuitubakëxa anua aín xukë́nkama ꞌikë anu kuankin ka kakëxa: —Uinu kara tuá ax ꞌikë. ¿Añu karana ꞌën bërí ꞌati ꞌain?

³¹ Usa ꞌain ka Josénën xukë́nkaman achúshi cabranën tuá rëtankëxun aín imin Josénën tari pëmikë anun a shiakëxa;

³² usakin ꞌatankëxun ka aín papa ësokin kamiakëxa: Ënë kananuna mëran. Ënëx kara min bëchikë José aín tarima ꞌikë kamina upíokin isti ꞌain.

³³ Kakëxun iskinbi ꞌunani ka Jacob kiakëxa: Ënëx ka ꞌën bëchikënën tari ꞌikën. Bëtsi ñuina raëkëman sapi ka piaxa.

³⁴ Usakin atu kai ka Jacob aín chupa tukai nitë́xëti ꞌitsaira iankëxa, aín bëchikë bamakësa sinani.

³⁵ Usaia aín papa uínbi manumisamai nitë́xëkëbëtan ka aín bëchikë xanu ꞌimainun nukëbënë kaman uisoxun karana aín masá nuitukë a manumiti ꞌain kixun sinánkëxa, ꞌaínbi ka an usokin kuëënmiti kuëëanma ꞌikën; kuëënima ka aín bëchikënën rabanan ꞌitsaira ini kiakëxa: ꞌËn sinánkë ënë nëtënux karana ꞌëxribi ꞌën bëchikë ꞌikësaribiti ñutima ꞌain, ñutankëx kana anua uni ñukë ꞌikë anuax ꞌëx abë mërananti ꞌain.

³⁶ An ñu marukë madianita unikaman ka José marubiankin Egipto kakë menu buánkëxa, buánxun ka suntárunën kushi Potifar kakë a maruakëxa, ax ka Egiptonu ꞌikë ꞌapu aín suntárunën kushi Capitán ꞌiakëxa.