Génesis 35 - Kashibo-Kakataibo Biblia

Nukën ꞌIbu Diosan Jacob Betelnuxun upíokin sinánxuan bana

¹ Nukën ꞌIbu Diosan ka Jacob kakëxa: “Ënuax kuantankëx kamina Betel kakë me anu tsóti kuanti ꞌain. Anuxun kamina min xukë́n Esaúmi rakuë́ti abákëbëa mimi mërá Dios a achúshi maxá maburukin anuxun ñuina xaroti ꞌaxuni kuanti ꞌain.”

² Ësakian kakëxun ka Jacobnën aín aintsikama kanan an ñu mëëxunkë unikama ꞌimainun an ñu ꞌaxunkë xanukamaribi kakëxa: —Kamina mitsun bëtsi dioskama ami rabikëkama a ꞌë bëxunkanti ꞌain, bëanan kamina nashitankëxun mitsun chupa upíbu pañuti ꞌain.

³ Ësokin katankëxun ka kakëxa bëríbi kananuna Betel menu kuanti ꞌain, kuantankëxun kananuna achúshi maxá maburukin ꞌatankëxun anuxun Nukën ꞌIbu Dios rabiti ꞌati ꞌain, an ka ꞌë ꞌatimakin sinaniabi ꞌakiankëxa, ꞌimainun ka ꞌë ꞌakinia uinu karana kuani anuabi.

⁴ Ësokin kakëxun ka Jacob atun diosmabia ꞌarakakë akama ꞌimainun aín pabinu nankë ñu akama këñunbi bëtsi ñukamaribi ꞌinánkëxa, ꞌinánkëxun ka Jacobnën i chaiira encina kakë a tëmú maíankëxa, ax ka Siquem kakë ëma ꞌurama ꞌiakëxa.

⁵ Uínsaran kara atux chikitia anun ka Diosan atu ꞌurama ꞌikë ëmakama ꞌitsaira rakuënun ꞌimiakëxa, usokëx rakuë́kin ka Jacob ꞌimainun aín bëchikëkama nuiama ꞌikën.

⁶ Usai ka Jacob ꞌimainun abëa kuankë unikamax achúshi ëma Luz kakë ꞌikëbi Betel kakinribi anëkë anu bëbakëxa, ax ka Canaán kakë me anu ꞌiakëxa.

⁷ Anu bëbatankëxun ka maxá bukurukin, ꞌatankëxun a me El-Betel kakin anëakëxa (Betel kikë ax ka Diosan xubu ki kikë ꞌikën) ax ka anuaxa aín xukënan ꞌakatsikiax ami sinánkëbë abákëbëa anuax Jacobmi Nukën ꞌIbu Dios mërá a me ꞌiakëxa.

⁸ Anu atux bëbakë ꞌaínbi ka an Rebeca bërúankë xanu Débora kakë ax ñuakëxa; ñukë ka encina kakë i ꞌani tanain maíankëxa ax ka Betel ꞌurama ꞌiakëxa, usai anuax ꞌikë ka Jacobnën a me ¡anuax inkë kakin anëakëxa!

⁹ Usai anuax Débora ñukë ꞌain ka Jacob amiribishi Padán-aram anuax utëkëankëxa, utëkënkëbë ka amiribishi ami mëratëkënkin Diosan upíokin sinánxuntëkëankëxa,

¹⁰ sinánxunkin ka ësokin kakëxa: “Mix kamina Jacob kakë bërí ꞌain, ꞌaínbi kamina bërí usokin anëkë ꞌitima ꞌain; usa ꞌain ka bërí min anë Israel kakë ꞌiti ꞌikën.” Usokin ka Diosan aín anë itsi nankin anëakëxa,

¹¹ anëkin ka ësokin kakëxa: ꞌËx kana Dios kamabi kushiñuira a ꞌain; usa ꞌain kamina bëchipati mebi tsitsirui ꞌuakamë ꞌëoi bukuti ꞌain, min rëbúnkikamaribi ka bëtsi bëtsi ëma ꞌai aín ꞌapuñu ꞌapuñu bukuti ꞌikën.

¹² ꞌËn kana kamabi me ënë min xuta Abraham ꞌimainun min papa Isaac ꞌinánkën, usa ꞌain kana mi ꞌinántankëxun min rëbúnki kamaribi ꞌinánti ꞌain.

¹³ Usai abë banatankëxun Jacob ëbiani ka Nukën ꞌIbu Dios anuax kuankëxa,

¹⁴ kuankëbëtan ka achúshi maxá chaxkë́ bitankëxun nitsinkin ꞌunántiokin nankëxa, anuaxa Nukën ꞌIbu Diosbë banakë a menu; usakin ꞌatankëxun ka ënëx ka Dios ꞌaxunkë ꞌikë kixun xëni ꞌimainun uvas baka aribi ami anpënkakëxa,

¹⁵ usakin ꞌatankëxun ka a me Betel kakin anëakëxa.

Raquel ñua ñuikë bana

¹⁶ Usai anu ꞌitankëx ka Betelnuax kuankëxa; ꞌaínbi ka Efrata ꞌurapain ꞌaínbi Raquel tëmërai aín tuá bakë́ankëxa.

¹⁷ Bakëni tëmëraia ka an bakëmikë xanun kakëxa: “Kamina rakuë́tima ꞌain bëbu tuá itsi kamina bakë́an usa ꞌain.”

¹⁸ ꞌAínbi ka ñuti ꞌuramashi ꞌaish anuishi sënëni ashiti kushin uinkin aín tuá Ben-oní kakin anëakëxa, ꞌikëbi ka aín papan Benjamín kakin anëtëkëankëxa.

¹⁹ Anuax kuaníbi ka Raquel ñuakëxa, ñukë ka anun Efratanu kuanti bai ꞌipítinu maíankëxa ax ka bërí Belén kakin anëkë ëma ꞌikën.

²⁰ Usakin anu mainxun ka Jacobnën achúshi maxá a iskin a sinánti anu ꞌunántiokin nankëxa, a maxá ka anua nan ꞌikë anua Raquel maían ꞌikë iskankëxa.

²¹ Anuxun usakin ꞌabiani ka Israel amiribishi kuantëkëankëxa kuantankëx ka anuxun ñuina bërúantia ꞌakë achúshi torre Éder kakë a inubiani kuantankëx anu tsóti bërúakëxa. (Éder kikë ax ka anuxun ñuina bërúankë ki kikë bana ꞌikën.)

²² Usai kuantankëx ka anu ꞌitsa baritia Israel tsóakëxa, usai anu tsókëbëbi ka achúshi nëtën Rubén anuax abë ꞌinuxun xanu bari kuankëxa kuanxunbi ka Bilhá mërax abë ꞌiakëxa, ax ka aín papa an ñu ꞌaxunkë xanu ꞌikëbi aín xanu ꞌiti raiokin bia ꞌiakëxa. Usai ꞌikë kuatankëx ka aín papa ꞌitsaira nishakëxa. Jacobnën bëchikëkama ka ꞌiakëxa mapai rabë́ ꞌimainun rabë́.

Jacobnën bakë bëchikëkama ꞌia bana

²³ Jacobnën Líami bëchikëkama aín anë ka ꞌiakëxa Rubén ax ka apan ꞌiakëxa, Simeón, Leví, Judá, Isacar ꞌimainun Zabulón.

²⁴ ꞌImainun ka Raquelmia bëchikë ꞌiakëxa José ꞌimainun Benjamín.

²⁵ Usokin ꞌaxun ka aín xanu Raquel an ñu ꞌaxunkë xanu Bilhá amiribi bëchiakëxa aín anë ka ꞌiakëxa Dan ꞌimainun Neftalí.

²⁶ ꞌImainun ka an aín xanu Lía ñu ꞌaxunkë Zilpá amiribi bëchikë ax ka Gad ꞌimainun Aser kakë ꞌiakëxa; ënë kamax ka Jacobnën Padán-aram anuxun bëchikëx anuax bakë́an kama ꞌiakëxa.

Isaac ñua ñuikë bana

²⁷ Achúshi nëtën ka Jacob aín papa Isaac isi Mamré kakë ëma ꞌikëbia Arbá kakin anëanan Hebrón kakinribi anëkë anu kuankëxa. A menu ka Abraham ꞌimainun Isaac tsóakëxa.

²⁸ Usa ꞌain ka Isaac ciento ochenta baritia tsótankëx ñuakëxa.

²⁹ Usa ꞌaish ka Isaac uni ꞌikësabi kaniakëti xënira ꞌaish ñuakëxa, ñukiani ka aín chaitiokëkama ñua ꞌaísh anu bukukë abë ꞌi kuankëxa.