Génesis 34 - Kashibo-Kakataibo Biblia

Siquemnën Dina nënën mëa ñuikë bana

¹ Líamia Jacobnën bëchikë xanu xuntaku Dina ax ka achúshi nëtën Siquem kakë ëmanu ꞌikë abë xanu chipashkamabë isi kuankëxa;

² ꞌaínbi ka anu kuanxunbi Siquem aín kuëëntisa uni ꞌikë isakëxa, ax ka Hamor heveos uni aín bëchikë ꞌiakëxa, usa ꞌaish ka Hamor ax a menu ꞌikë unikaman ꞌapu ꞌiakëxa, usai anun kuënkëxun ka Siquemnën ñatanxun abë uxkin nënën mëakëxa.

³ Usokin ꞌatankëx anun ꞌitsaira kuëënkin ka uisaxun karana ënë xanu biti ꞌai kixun sinánkëxa.

⁴ Sinánkin ka Siquemnën aín papa Hamor ësokin kakëxa: —Ënë xanu binun kaina ꞌë aín papa ñukáxuntima ꞌain. ꞌËn xanu ꞌiti kana ënë xanu bisatanin.

⁵ Usokian ꞌakë ka Jacobnën aín bëchikë Dina Siquemnën nënën mëëkë ꞌikë ꞌunánkëxa, ꞌaínbi ka aín bëchikë nukëbënëkama aín ñuina bërúaia kuankëkama ax pain rikuatsintanun kixun kaíankëxa, kainkin ka uisokinbi kamapan ꞌikën.

⁶ Usokin Jacobnën kainkëbëbi ka Hamor Siquemnën papa ax Jacobë banai kuankëxa.

⁷ Usai ꞌikë ka Jacobnën bëchikëkaman ꞌura kuaënxanx rikuatsinkinbi aín chirabakë ꞌanáka usaía ꞌikë kuakëxa, kuati ka ꞌaisamairai nishakëxa nishi ka kiakëxa, usakian ꞌakë ax ka nuxnu Israelnën bëchikë ꞌain numi kuaikin ꞌakë ꞌaish ꞌaisama nunan ꞌikën, usakin Jacobnën bëchikë Dina ꞌatima ka ꞌiaxa, kiax ka aín rarëbakë apankama ꞌitsaira nishi ka usakin ꞌatimabi usakin ñu ꞌaxa kiakëxa.

⁸ Usaia nishkë ꞌikëbi ka ꞌunánkima Hamornën atubë, banai kuanxun ësokin kakëxa: —ꞌËn bëchikë Siquem an ka ꞌitsaira mitsun chirabakë kuëënia. Usa ꞌain, karamina aín xanu ꞌitia binun ꞌinántima ꞌain,

⁹ usa ꞌain kananuna nukaman mitsun bëchikë xanukama biti ꞌain, bimainun kamina mitsunribi nukaman bëchikë xanukamaribi biti ꞌain.

¹⁰ Usokin bitankëx kamina nubë tsóti bërúti ꞌain. ꞌËx anu tsókë me ënëx ka mitsunanribi ꞌiti ꞌikën; usa ꞌain kamina ënu tsóti bërúanan mitsux kuëënkin ñu maruti ꞌanan, meribi marutisa tankin maruti ꞌain.

¹¹ Usakian aín papan kaia kuankin ka Siquemnëribi Jacob ꞌimainun Dinan rarëbakëkama ësokin kakëxa: —ꞌËn ribi kana mitsu kain. Kamina ꞌën papan kakëx kuëënti ꞌain, añu kaina kuëënin a kananuna mitsu ꞌinánti ꞌain.

¹² Nun kananuna bëtsi uni ꞌitsamashi kupíokin ꞌaxëkë ꞌain, ꞌaínbi kananuna mitsux kuëënia min chirabakë kupín uiti karamina kuëënin atibi mitsu ꞌinánan a ñukama kaina kuëënin akamabi mitsu ꞌinánun ꞌë kati ꞌain, ꞌaínbi kana ꞌëx pain mitsun chirabakëbë birananti ꞌain.

¹³ Ësokin kakëxunbi ka Siquemnën aín chirabakë Dina a nënën mëëkë a sinánkin aín papa Hamor akëñun paránti sinánxun,

¹⁴ ësokin kakëxa: —Nun kananuna nun chirabakë aín nëtokë ñu aín maxaka a tëakëma uni ꞌinanima ax ka achúshi rabin nunan ꞌikën.

¹⁵ Usa ꞌain ka asábi ꞌiti ꞌikën. ꞌAínbi kananuna achúshi ñu mitsu kain, kamabi nukëbënë unikaman ka nun ꞌakësaribi okin mitsunribi min nëtokë ñu rëbu aín maxaka tëakë ꞌiti ꞌain.

¹⁶ Usai ꞌitankëxun mitsun nun bëchikë bimainun kananuna nunribi mitsun bëchikë biti ꞌain; usai ꞌi kananuna mitsubëtanbi achúshi ëma ꞌatankëx anu ꞌiti ꞌain.

¹⁷ ꞌAínbi kananuna mitsúxmi nux kikësokin mitsun nëtokë ñu aín rëbu maxaka tëakëbëtama, ënuax chikiti kuankin nun chirabakë ꞌanáka buánti ꞌain.

¹⁸ Usokian kakëxun ka Hamor ꞌimainun aín bëchikë Siquemnën asabika kixun kakëxa.

¹⁹ Kabiani ꞌitsaira basima kuantankëx ka Siquem ax irapain ꞌunánti orakakin aín nëtokëñu aín maxaka tëakëxa, an ka ꞌitsaira Jacobnën bëchikë Dina kuëëankëxa. Usa ꞌaish ka Siquem ax aín papan aintsikaman uisakinbi kakëma uni ꞌiakëxa,

²⁰ usa ꞌaish ka aín papa Hamorbë anun a ëmanu atsínti xëkuë, anuxuan uni ñu ꞌunánkë ꞌimainun uni chabunën ñu marukë anu kuanxun, Siquemnën a ëmanu ꞌikë unikama kakëxa:

²¹ —Ënë unikamax ka bërí nun ꞌunánkë uni ꞌikën, usa ꞌaish ka nubë tsóanan aín ñu ënu ꞌixun maruti ꞌikën nun mex ka atux anu tsótisa chaiiracha ꞌikën, usa ꞌain kananuna nukaman atun bëchikë biti ꞌain bimainun ka atúnribi nun bëchikëbë birananti ꞌikën.

²² Usai ꞌi kananuna achúshi ëmaishi ꞌai atubë tsóti ꞌain, ꞌaínbi ka nun achúshi ñu ꞌati kuëënia, atux ka nun aintsi bëbu kamanribi atun ꞌakësaribi okin aín nëtokë ñun maxaka tëati kuëënia.

²³ Kamabi aín ñukama ꞌimainun aín ñuina kamáxbi ka nunanribi ꞌiti ꞌikën. Usa ꞌain kananuna asabi ka ꞌiti ꞌikë kiax kiti ꞌain, kikëbë ka atux nubë tsóti bërúti ꞌikën.

²⁴ Kixuan kakëx ka kamabi a ëmanu ꞌikë unikama suntáruti kuainsa uni bënábu ꞌimainun uni ꞌapanbukamaxribi asábi ka kiax kikankëxa, Hamor ꞌimainun aín bëchikë Siquem ax kikësabi oi usai atúxbi ꞌunántiorakakin ꞌain nëtokëñu maxaka tëakankëxa.

²⁵ ꞌAínbi ka Simeón ꞌimainun Leví Jacobnën bëchikë Dinan rarëbakë ax rabë́ ꞌimainun achúshi nëtë ꞌikëbë a ëmanu kuankëxa, unikama aín nëtokë ñun maxaka tëakë aín paë nëtë́tisa ꞌaímabi, kuanxun ka manë xëtokë bibianxun a rabë́xunbi anu ꞌikë unikama, ꞌunánti orakaxa aín nami kushima ꞌikë këñuakëxa.

²⁶ Këñuanan ka aín manë xëtokën Hamor ꞌimainun aín bëchikë Siquem aribi ꞌakëxa; ꞌakin ka Dina Siquemnën xubunua bibiankin buánkëxa.

²⁷ Usakian ꞌakë ꞌain ka Jacobnën bëchikë raíri kamaxribi uakëxa, ai ka uni bamakëkamanënbi nikiani kuankin a ëmanu ꞌikë ñu upíbu ꞌimainun bëtsi ñukamaribi biakëxa, aín chirabakë Dina nënën mëëkë a sinánkin.

²⁸ ꞌAnan ka ovejakama, vaca, asno akama ꞌimainun ëmanu ꞌikë ñukama bianan atu rapasu ꞌikë ñu kamabi biakëxa;

²⁹ bianan ka kamabi xubunu ꞌikë ñukama ꞌimainun anu ꞌikë uniakë xukama ꞌimainun xanukamaribi bibiankin buánkëxa.

³⁰ Usokin ꞌabiani kuania ka aín papa Jacobnën Simeón ꞌimainun Leví kakëxa: —Mitsun mi usa ñu ꞌakë kupín kana ꞌëx ꞌaisama bërútin. Bërí ka ënë menu tsókë unikamax ꞌëmi nishti ꞌikën, ax ka cananeo ꞌimainun ferezeos unikamax timë́ax kananxun nu ꞌakánti ꞌikën, nux kananuna ꞌitsamashi nun aintsikamabëbi ꞌain.

³¹ Ësokian kakëxunbi ka aín bëchikëkaman kakëxa: —¿Atun kara nun chirabakë ꞌanáka ꞌatima xanu ꞌakësa okin ꞌaisatanx?