Génesis 33 - Kashibo-Kakataibo Biblia

Jacob ꞌimainun Esaú amiribishi nuibanantëkëan bana

¹ Anuax kuankian Jacobnën ꞌuranxun iskëxbi ka aín xukë́n Esaú cuatrocientos aín unikamabë ami kikuatsini aia isakëxa iskin ka aín xanu rabë́ Lía ꞌimainun Raquel an ñu ꞌaxunkë xanua aín tuábë tuábëa ꞌinun kixun kakëxa.

² Ësokin ꞌatankëxun ka an ñu ꞌaxunkë xanu rabë́ a pain aín tuákama ꞌinánkëxa, ꞌinanxun ka Líaribi aín tuákama ꞌinánkëxa, ꞌinánkin sënë́onkin ka Raquel këñun aín tuá José ëankëxa.

³ Usakin ꞌatankëx ka ax pain rëkuë́nkiani kuani atux pain rantinpuruni tsóbuti aín bëmánan memi tikai mapai achúshi ꞌimainun rabë́ oi ꞌikiani kuankëbë ka ꞌain xukë́n apan axribi a ꞌurama obëtsini ubakëxa.

⁴ Usaia ꞌikëbë abákiani kuankin ka Esaúnën ꞌikúkin tëpatsakin aín xukë́n biakëxa, bikin ka bëtsuku kakëxa. Kai a rabëtaxbi iankëxa.

⁵ Usai ꞌitankëx sënëni chairukinbi ka Esaúnën xanukama ꞌimainun tuákama mërakëxa, mërakin ka ñukákëxa: —Ui kara ¿ënë kamax ꞌik? —Ënëx ka an mi ñu mëëxunti ënën bëchikëkama Diosan ꞌinánkë ꞌikë —kixun ka Jacobnën kakëxa.

⁶ Usokin kakëbë ka an ñu ꞌaxunkë xanu rabë́ axribi ai, aín tuakamabë ꞌurama obëtsini rantinpurini tsóbuakëxa, aín bëmánanën me tikai.

⁷ Usai ꞌikëbë axribi ꞌuramobëtsini ka Lía aín tuakamabë usaribiti axribi ꞌiakëxa, usaía ꞌikëbë ka axribi ꞌurama obëtsini José ꞌimainun aín tita Raquel axribi usairibi ꞌiakëxa.

⁸ Usai ꞌia ka Esaúnën ñukákëxa: —¿Uisokin sinánxunmi xukë kara ñuinakama a pain mi rëkuë́mikin xukë ꞌën iskë ax ꞌik? —Ax ka uisokin kaina min ꞌëmi sinanin unántisa tankin kana usokin an —kixun ka Jacobnën kakëxa.

⁹ —Kakëxunbi ka Esaúnën usama ka kakëxa: —ꞌËx ribi kana ñuinañu ꞌain, usa ꞌain ka min ñu ax minanbi ꞌiti ꞌikën.

¹⁰ Kakëxunbi ka Jacobnën amiribishi katëkëanxa: —Ax ka uisokin kaina min sinanin ꞌunántisa tankin ꞌakë ꞌikën, usa ꞌain kamina bërí mi ꞌinaishikë ñuinakama ënë biti ꞌain, usa ꞌain kana ꞌunánti ꞌain, upiokinmi ꞌë bikë ax ka Nukën ꞌIbu Diosbë isanankësa ꞌiti ꞌikën, min kamina ꞌë upíokin bian usa ꞌain ka minmi ꞌë bikë ax asábi ꞌikën.

¹¹ ꞌËn kana mi ꞌinaishiti ñukama bëkë ënëmi binun mi kain Nukën ꞌIbu Diosan ka ꞌitsaira ñuñuira ꞌinun ꞌë ꞌimiaxa, usa ꞌain kana ñuñumama ꞌain. Ësakian Jacobnën ꞌuran kakëxun ka Esaúnën an ꞌinánkë ñuinakama biakëxa.

¹² ꞌAínbi ka kiakëxa: —Asabi ka ënuax kananuna kuanti ꞌain. ꞌËx kana rëkuë́nkianti ꞌain.

¹³ Kakëxun ka Jacobnën ësokin kakëxa: —Mix kamina ꞌën nuibakë xukë́n ꞌain, minbi kamina ꞌunan uniakë xuratsu ax kuani ka bënëtishi atsania ꞌimainun kana sinanin ꞌën ovejakama ꞌimainun vaca tuáñu akamaxribi atsani ka achúshi nëtë́inshi kamáxëshi bamati ꞌikën; ꞌianan ka kamabi ovejanën tuakamaxribi bamati ꞌikën.

¹⁴ Usa ꞌain kamina mix pain rëkuë́nkianti ꞌain; an mi ñu mëëxunti ënën ka munu kuankin aín ñuinakama ꞌimainun, uniakëkamaribi munu kuania ubamainun kamina kuanti ꞌain, usa ꞌain kananuna Seír kakë me ꞌikë anuax mërananti ꞌain.

¹⁵ —Kia ka asábi ka —Esaúnën kakëxa—, usa ꞌain kana ꞌën uni raíri ꞌëbëa ukë ënë mibë kuanun mi ënxunbianti ꞌain. ꞌAínbi ka Jacobnën katëkëankëxa: —Usama ka ¿ꞌItsaira kaina ꞌëmi sinan?

¹⁶ Usa ꞌain ka Esaú a nëtënbi, Seír kakë me anu kuantëkëankëxa.

¹⁷ Anu kuantamainun ka Jacob Sucot kakë me au kuankëxa, anu ka achúshi xubu aín unikama ax anu ꞌiti ꞌamiakëxa, ꞌimainun ka achúshi mapanati okin anua ñuinakama ꞌiti aribi ꞌamiakëxa. Usokin ꞌatankëxun ka a me Sucot kakin anëakëxa. (Sucot kikë bana ax ka mapanati okë ki kikë ꞌikën.)

¹⁸ Usa ꞌain ka Jacob Padán-aram anuax ai uisaibi ꞌikëma chuámashirua Canaán menu bëbatankëx Siquem kakë ëma a ꞌukëmanan anu ꞌiti ꞌatankëx anu ꞌiakëxa.

¹⁹ Anu ꞌixun ka achúshi uni Hamor kakë, aín bëchikë Siquem kakë aín me cien kuríki manë kupí maruakëxa, marutankëx ka anubi tsóakëxa.

²⁰ Usa ꞌain ka anu ꞌixun basikëbëtan anuxun Dios rabiti achúshi ñu ꞌakëxa, ꞌatankëxun ka El-elohé-Israel kakin anëakëxa, (ax ka Israelnën a rabikë Dios ki kikë ꞌikën).