Génesis 25 - Kashibo-Kakataibo Biblia

Abraham ꞌimainun Queturánën rëbúnkikama ꞌia bana

¹ Usa ꞌain ka Abrahamnën bëtsi xanu biti sinánkin, Queturá kakin anëkë a biakëxa.

² Bitankëxun ka amiribi bëchipakëxa aín anë ka ꞌiakëxa Zimrán, Jocsán, Medán, Madián, Isbac ꞌimainun Súa.

³ Jocsán ax ka Sebá ꞌimainun Dedán aín papa ꞌiakëxa. Ënë kamax ka Dedánën rëbúnkikama ꞌiakëxa, aín anëx ka ꞌikë asureo, letuseo ꞌimainun leumeo akama.

⁴ Ënë kamax ka Madiánën bëchikë ꞌiakëxa Efá, Éfer, Hanoc, Abidá ꞌimainun Eldaá. Ënë unikamax ka Queturánën rëbúnkikama ꞌiakëxa.

⁵ Isaac an ka kamabi aín papa Abrahamnën ñukama biakëxa.

⁶ Usakin ꞌanan ka bëtsi xanumia ꞌakë, aín bëchikëkama Abrahamnën aín ñu ꞌitsamashi ꞌinánkëxa, usokin ꞌinántankëxun ka ñukëmapain ꞌixun aín bëchikë raíri amanu kuantanun kixun xuakëxa, xuanan ka Isaac axëshia anua ꞌikë me anu ꞌinun kixun kakëxa.

Abraham ñukë ꞌikë aín bëchikë Isaac ꞌimainun Ismaelnën maían

⁷ Usa ꞌain ka Abraham ciento sesenta ꞌimainun cinco baritia tsótankëx,

⁸ ka uni ꞌikësabi kaniakëtankëx ñuakëxa. Ñui ka ꞌain chaitiokëkama ñua ꞌaísh anu bukukë abë ꞌi kuankëxa.

⁹ Usa ꞌain ka aín bëchikë Isaac ꞌimainun Ismaelnën Macpelá kakë kini anu maíankëxa, ax ka Mamré kakë me ꞌukëmanan, Sóhar hitita uni aín bëchikë Efrón aín me ꞌiakëxa.

¹⁰ A mex ka Abrahamnën hitita unikamanan ꞌikëbia marua ꞌiakëxa. A menu ka Abraham ñukë aín xanu Sara rapasubi maíankëxa.

¹¹ Usaia Abraham ñua ꞌain ka Nukën ꞌIbu Diosan Isaac upíokin sinánxuankëxa, usa okían ꞌakëx ka anua ꞌumpax ꞌikë a rapasubi tsóti bërúakëxa. “Ax ka ꞌiakëxa, axa tsókë ꞌimainun an ꞌë iskë kakin anëkë anu.”

Ismaelnën rëbúnkikama ꞌiá bana

¹² Ënë kamax ka Ismaelnën bëchikë Abrahamnën bëchikë egipcia xanu Agar, an Sara ñu ꞌaxunkë amia bëchikë ꞌiakëxa,

¹³ ënëx ka aín rëkuë́n bëchikë a pain ꞌakëxa bakë́an a ꞌiakëxa: Nebaiot, ax ka aín bëchikë apan ꞌiakëxa; ꞌatankëxun ka bëtsiribi ꞌakëxa Quedar, Adbeel, Mibsam,

¹⁴ Mismá, Dumá, Masá,

¹⁵ Hadar, Temá, Jetur, Nafís ꞌimainun Quedmá.

¹⁶ Ënëkamax ka Ismaelnën bëchikë mapai rabë́ ꞌimainun rabë́ akaman anë ꞌikën, usa ꞌain ka atun anënbi anënbi aín me anëanan ax anu ꞌikë aribi anëakëxa. Usa ꞌain ka akama achúshi achúshinëx ain menu menu atun ꞌapuñu ꞌiakëxa.

¹⁷ Ismael ax ka ciento treinta ꞌimainun siete baritiañu ꞌaish ñuakëxa, ñui ka aín chaitiokëkama ꞌiasaribiti ñuia anu ꞌain chaitiokëkama maían anubi maíankëxa.

¹⁸ Usai ax ñua ain rëbúnki kamax anubi tsóti Havilá kakë me Egipto ꞌukëmanan anun, Asirianu kuani kuanti anubi tsóti buküakëxa. Usai ꞌi ka anuax aín xukë́n kamabëbi ꞌatimonani nishanani anubi buküakëxa.

Esaúnën ain bëchikë apan usai ꞌiti ꞌikëbi Jacob marua ñuikë bana

¹⁹ Ënë banax ka usai kara Abrahamnën bëchikë Isaac ax ꞌiakëxa, kixun ñuikë bana ꞌikën.

²⁰ Isaacnën ka cuarenta baritiañu ꞌixun Rebeca aín xanu ꞌiti biakëxa, ax ka Betuelnën bëchikë Labánën chirabakë ꞌiakëxa, akamax ka Arameos unibu Padán-aram kakë me anu tsókë ꞌiakëxa.

²¹ Usa ꞌain ka Rebeca tuakëma xanu ꞌiakëxa, usa ꞌain Isaac an ami bëchikaskin ꞌain xanu ꞌitsaira ñukáxuankëxa. Usakian ñukákëxun ka Nukën ꞌIbun an ñukákë a kuakin Rebeca tuuñu ꞌinun ꞌimiakëxa.

²² Usai tui ka aín pukunu rabë́ tuá ꞌirukë ꞌaish, anuaxbi ubiti titikanania tankin an sinánkëxa: “Ënëxa ësai ꞌikëbë karana ꞌëx, ¿uisa ꞌaish basi tsóti ꞌain?” Usakin sinánbiani ka Nukën ꞌIbu uisa kupín kara usai ꞌia kixun ñukati kuankëxa,

²³ usakian ñukákëxun an kakëxa: “Min pukumëu ka tuá rabë́ ꞌikën, ax ka rabë́ ëma ꞌiti ꞌikën, usa ꞌaish bakënkëma ꞌaíshbi ubionania. Achúshinëx ka kushiira ꞌaish bëtsisama ꞌiti ꞌikën, aín apan ax ka aín ꞌanáka meu ꞌiti ꞌikën, usa ꞌain ka ꞌanáka ax kushiira ꞌinuxun ꞌaia.”

²⁴ Ësokian kakë basirama ꞌaínbi ka Rebeca aín nëtë sënë́nkëbë, rabë́ tuá bakë́ankëxa.

²⁵ A paian Rebeca bakënkë ax ka ranshin ꞌaish raninbaë ꞌiakëxa, usa ꞌikë ka a tuá Esaú kakin anëakëxa.

²⁶ Usai ꞌikin aín apan Esaú aín taë tsiputu tuinbëtsini aín ꞌanáka chikíakëxa, usaía ꞌikë a ka Jacob kakin anëakëxa. Usaia aín xanu Rebeca a tuá rabë́ bakënkë ꞌain ka Isaac ax setenta baritiañu ꞌiakëxa.

Esaú ꞌimainun Jacob ꞌia bana

²⁷ Usa ꞌain ka a tuá rabë́ kaniakëxa. Usai kanitankëx ka aín rëkuë́n bëchikë Esaú ax ninua ñuira okë uni ꞌiakëxa; ꞌimainun ka aín ꞌanáka Jacob mënin sinaínshi uni ꞌiakëxa, usa ꞌain ka aín xubunuashi ñu mëi tsóti kuëëni ꞌiakëxa.

²⁸ Usa ꞌain ka Isaacnën aín bëchikë Esaú a ꞌitsaira nuibakëxa, aín ñuakë pikin, usakian aín papan aín rëkuë́n bëchikë a nuibamainun ka Rebecanën aín tuá Jacob aribi ꞌitsaira nuibakëxa.

²⁹ Nëtë itsin ka Jacobnën purutusa piti ñu nëish okin ꞌaruanbi ka Esaú uran ninu ñu bari nibaiti pananx.

³⁰ Ukin kakëxa: —ꞌË karamina min piti panshionkinmi ꞌakë tëxëra ꞌinántima ꞌain, kana numin bamatisa tanin. (Usa ꞌaish ka Esaú ax aín kuai anë Edom kakin anëkë ꞌiakëxa.)

³¹ Min kamina —ꞌËx min apansa ꞌixun min biti ñukama ꞌën binun ꞌë ꞌimiti ꞌain, —kixun ka Jacobnën kakëxa.

³² Kakëxun ka Esaúnën kakëxa: —Uisa ꞌixun kaina, ꞌëx panax numin bamatisa taniabi isëshiti ꞌain, minmi min xukën apan ꞌikëbi ꞌakinkëxma kana min apan ꞌëx ꞌitima ꞌain.

³³ —Kia ka bëríbi kamina Nukën ꞌIbu Diosan ismainunbi asérabi sinanatëkëntima okin ꞌë kati ꞌain —kixun Jacobnën aín xukë́n karaishiakëxa. Usokian kakëxun ka Esaúnën sinanatëkëntima okin kakëxa, usakin ka Jacob axa ꞌain apan ꞌinun kakëxa.

³⁴ Usakian kakëxun ka Jacobnën aín piti purutusa nëish okían ꞌarukë a këñun pán pinun kixun aín xukë́n Esaú ꞌinánkëxa, usakian ꞌinánkëxun pianan xëatankëx ka nirukiani a kaimashi ꞌën kana apan ꞌixun ñukama biti ꞌai kixun sinanima kuankëxa.