Génesis 24 - Kashibo-Kakataibo Biblia

Abrahamnën achúshi xanu aín bëchikë Isaac barixua ñuikë bana

¹ Usa ꞌain ka Abraham ax kaniakëkë ꞌikë, Nukën ꞌIbu an ꞌati kamabi ñu sinánxunkë ꞌiakëxa.

² Achúshi nëtën ka Abrahamnën ax irapain a ñu mëëxuni abë tëkë an aín ñukama bërúankë a kuënxun kakëxa: —Min mëkën ꞌën kisinu nankin kamina,

³ sinanatëkëntima okin Nukën ꞌIbu naí ꞌimainun ënë me bërúankë an ka ꞌën bëchikë Isaacnën ënë menu ꞌikë xanukama binun ëntima ꞌikën, anu ꞌëx tsókë Canaán kakë me ënua,

⁴ usa ꞌain ka Abrahamnën an ñu mëmikë uni kakëxa, anuax ꞌëx uá ꞌën nëtë anu kuantankëxun ꞌën aintsikaman bëchikë xanu achúshi barixuni kuanti ꞌain.

⁵ Ësokian kakëxun ka an ñu mëëxunkë unin kakëxa: —ꞌËx kuantankëxun anu ꞌikë xanu mërakin kakëxbia ꞌëbë uisama tankëbëtan karana, ¿añu ꞌati ꞌain? ¿karana min bëchikë anuaxmi chikía me anubi buántëkënti ꞌain?

⁶ Kixuan kakëxun ka Abrahamnën kakëxa: —¡Usama ka uisa ꞌixunbi kamina ꞌën bëchikë anu buántima ꞌain!

⁷ Nukën ꞌIbu Dios, naínu ꞌikë an ka ꞌën aintsikaman menua chikinbëtsinkin bëxun ꞌë ꞌimainun ꞌën rëbúnkikama ënë me ꞌinan, an ka aín ángel abë kuantankëxumi achúshi xanu ꞌën bëchikë bixunun mi ꞌakinti ꞌikën.

⁸ Xanu achúshinëx mibë, uisama tankëbëbi ka ꞌën mi kakë ënëx asábi ꞌiti ꞌikën, ¡usa ꞌain kamina uisaxunbi anu ꞌën bëchikë buántima ꞌain!

⁹ Ësokian kakëxun ka an ñu mëëxunkë unin aín kisinu aín mëkën nankin Abraham, bëtsiokin min sinántima okin kana min kakësabiokin ꞌati ꞌain kixun kakëxa.

¹⁰ Usokian Abrahamnën kakëxun ka an ñu mëëxunkë unin, ñu upíbu kaiskin buánti an ñumëmikë unían nankë barikin biakëxa, xanu aín aintsikama ꞌináni kuanti akama bianan ka mëkën rabë́ camelloribi a ñu mëëxunkë uninan biakëxa, usakin ꞌinánkëxun bitankëx ka raíri unikama abë kuanti bibiani Nahor kakë ëma, Mesopotamia kakë menu ꞌikë anu kuankëxa.

¹¹ Usai ꞌitsa nëtë ꞌikiani kuantankëx ka Nahor kakë ëma rapasu pain bëbakëxa, bëbakëbëbi ka bari xupinbuakëxa. Usai xupibukëbë ka anu ꞌikë xanu chipashkamax aín chumu bëi ꞌumpax biti anu uakëxa. Aia ka unikaman anua ꞌumpax biti rapasu bukuxun aín camellokama tantimikin isakëxa,

¹² usai anu bukuxun iskëxbia xanukama ukëbëtan ka Nukën ꞌIbu abë banakin kakëxa: ꞌËn ꞌIbu ꞌimainun ꞌën ñu mëëxunkë uni Abraham aín Dios kana ësokin mi ñukatin, usa ꞌain kamina bërí ꞌën ꞌati ñukama upí ꞌinun ꞌë ꞌakinti ꞌain, ꞌimainun kamina ꞌën a ñu mëëxunkë uni aribi nuibakin upíokin ꞌakinti ꞌain.

¹³ Anua ꞌumpax biti rapasu kana bëban, usa ꞌain ka ënu ꞌikë xanu chipashkama ꞌumpax bitsi ꞌaia.

¹⁴ Achúshi xanu chipash ꞌën kakëxuan sinánun kamina ꞌimiti ꞌain: Usama ka ꞌën min ꞌumpax ꞌanun karamina min chumu nanpatima ꞌain, kakëxun ka ꞌë kati ꞌikën: ꞌUmpax kamina ꞌati ꞌain, min camellokamaribi kana ꞌumpax ꞌamiti ꞌain, a xanux ka Isaac min kaískë uni aín xanu ꞌiti ꞌikën. Usa ꞌain kana ꞌën ꞌunánti ꞌain min kamina ꞌën ñu mëëxunkë uni upíokin nuibakin ꞌakinin kixun.

¹⁵ Usai abë banai sënë́nkëma ꞌixunbi ka xanu achúshi me ñutë ꞌakë tëxanu nanxun tuinbëtsinia isakëxa. Ax ka Rebeca Betuel kakë uni aín bëchikë xanu ꞌiakëxa. Betuel ax ka Milcámia Nahornën bëchia ꞌiakëxa, ax ka Abrahamnën xukënan bëchikë ꞌiakëxa.

¹⁶ Usa ꞌain ka Rebeca ax upíira xanu ꞌimainun, unibë ꞌikin tankëma pan ꞌiakëxa; uinu ꞌikë unibëbi ꞌikëmapan ꞌiakëxa. Usa ꞌixun ka anua ꞌumpax biti anu utankëxun, aín me ñutë ꞌakë nanpátankëxun buchuobiani kuankëbëbi

¹⁷ ka uni ax abákiani kuantankëx a nukui nirakëkin kakëxa: —ꞌË karamina min me ñutënua ꞌikë ꞌumpax chamara ꞌamitima ꞌain.

¹⁸ —Kakëxun ka xanun kakëxa, kamina min xëati ꞌain usakin kakinshi ka me ñutënua mëkën rabëtan bikin nanpákin xëanun ꞌinánkëxa.

¹⁹ ꞌInánkëxun xëai sënënia ishi ka Rebecanën kakëxa: —Min camellokamaribi kana ꞌumpax bixunti ꞌain, an kuëënkësokian xëanun.

²⁰ Katankëxun ka bënë́kinshi aín me ñutë ꞌakënu ꞌikë ꞌumpax a pain anua ꞌumpax ꞌarutia nuntisokin ꞌakë anu maniakëxa, usakin manitankëxun ka ꞌitsai kuankin ꞌumpax camellokaman xëanun bixuankëxa.

²¹ Usakin ꞌaia ka a unin uisakinbi kakinma isakëxa, an ka unántisa tankëxa asérabi kara Nukën ꞌIbun ax kuëënkësabi oi kuania upíokin ꞌakianxa kixun.

²² Usokin ꞌumpax camellokaman xëai sënë́nkëbëtanshi ka a unin kuri seis gramo ꞌëñësa bixun xanu a rëñumiakëxa. ꞌAnan ka mëkënu mëñuti kuri cien gramosa aribi mëñumikin,

²³ kakëxa: —ꞌË kamina kati ꞌain mix karamina uin bëchikë ꞌain, min papan xubu kara anu ꞌiisa ꞌikën ꞌën unikamabë kana anu ënë imë́ ꞌuxti ꞌain.

²⁴ Kixuan ñukákëxun ka Rebecanën kakëxa: —ꞌËx kana Abrahamnën xukë́n Nahor an Milcámi bëchia Betuel kakë uni aín bëchikë ꞌain.

²⁵ Nun xubunu ka anu ꞌiti ꞌikën usa ꞌain kamina ënë imë́ anu mikama ꞌuxi kuanti ꞌain, ꞌimainun ka basi ꞌitsa axa min camellokama pimiti.

²⁶ Usa ꞌain ka a unin rantinpuruni tsóbukin Nukën ꞌIbu,

²⁷ asabi ka kakin: ¡ꞌËn ꞌibu Abraham aín Dios, ax ka abë upí ꞌianan a nuibakë ꞌixun ꞌëx aín aintsikaman xubunu bëbanun ꞌë bërúanxun bëaxa kiax kiakëxa!

²⁸ Usai ꞌitankëx ka Rebeca abákiani aín titan xubunu kuani bëbakin uisai kara ꞌiaxa akamabi ñuixunkin kakëxa.

²⁹ Usakian aín chirabakën bana ñuia kuabiani ka Labán kakë, ax a uni bari abákiani anua ꞌumpax biti kini anu abákiani kuankëxa,

³⁰ usai ka mëñusuti aín chirabakën aín pëñanu buánkë a isanan, aín chirabakëa usakin uni an kakë akama ñuia kuabiani kuankëxa. Kuanx ka Labán ax Abrahamnën ñu mëmikë uni axa aín camello kamabë anua ꞌumpax biti kini ꞌurama nirakëkin,

³¹ kakëxa: —Ka ut, min ꞌIbu Diosan ka mi ënu bërúanxun bëaxa. ¡Mix kamina ëman ënu bërútima ꞌain, ꞌën kana anumi nukúti mitsu mëníoxuan ꞌimainun kana anumi min camellokamaribi tantimiti aribi mënion usa ꞌain kamina ꞌën xubunu ꞌi kuanti ꞌain!

³² Usokian kakëx ka a unikama abëa kuankë buani aín xubunu kuankëxa. Anuxun ka anu ꞌikë ñukamapain nanpátankëxun camellokama pimitankëxun anuan a ꞌimainun abëa kuankë unikama tachukati ꞌumpax bëxúankëxa.

³³ Usai ꞌiax sënë́an aín piti ꞌinánkëxunbi ka Abrahamnën ñu mëmikë unin kakëxa: —ꞌËn kana mitsu a kati bana kaxuma pitima ꞌain: —Ësokian kakëxun ka. Labánën kakëxa: —Kamina uisa bana kara nu kati ꞌain.

³⁴ Kakëxun ka Abrahamnën xukë unin kakëxa: —ꞌËx kana, Abraham an ñu mëëxunkë uni ꞌain,

³⁵ Nukën ꞌIbun an ka an ꞌë ñu mëëmikë uni ꞌitsaira ñuñu ꞌinun ꞌimiaxa: usa ꞌixun ka ꞌinánxa ovejakama, vaca, kuri ꞌimainun manë panshian, uni an ñu mëëxunti, xanu an ñu ꞌaxúnti akama ꞌinánan ka camello ꞌimainun asno akama ꞌinánxa.

³⁶ Usakin ꞌinánkin ka aín xanu Sara aribi achúshi tuá kaniakëkë ꞌikëbi ꞌinánxa, usa ꞌain ka ꞌën ñu mëëxunkë uni an aín bëchikë kamabi aín ñukama ꞌinánti sinánxa.

³⁷ ꞌËn ñu mëëxunkë unin ka sinanatëkënkima, an kakësabiokin ꞌanun ꞌë kaxa: ꞌËn bëchikë kamina ꞌëx anu tsókë Canaán me ënua xanu bimitima ꞌain.

³⁸ Usa ꞌain kamina ꞌën papan menu kuantankëxun, anua aín aintsikama ꞌikë anua achúshi xanu ꞌën bëchikë barixuni kuanti ꞌain.

³⁹ Kixuan kakëxun kana ꞌën kan: ꞌËn ꞌIbu, ¿anu ꞌikë xanu achúshinëx ꞌëbë uisama tankëbëtan karana añu ꞌati ꞌain?

⁴⁰ Kakëxun ka ësokin ꞌë kaxa: ꞌËx kana Nukën ꞌIbu kikësoi abë nitsin, usa ꞌain ka aín ángel xuti ꞌikën, mia kuania bërúanun bërúankëx kuanxun kamina achúshi xanu ꞌën aintsin bëchikë xanu ꞌën bëchikë bixunti ꞌain, ax ka ꞌiti ꞌikën, ꞌën papan aintsin ꞌibun bëchikëbi.

⁴¹ Usa ꞌaínbi kamina ꞌën aintsikaman aín bëchikë xanu chipash mibë uisamatankëbëbi mix sinanatëkëntima kikë bana usaibi asábi bërúti ꞌain.

⁴² Usa ꞌain kana bërí ꞌën anua ꞌumpax biti kini anu bëbaxun abë banakin ësokin Nukën ꞌIbu kan, ꞌën ñu mëëxunkë uni Abraham aín Dios: Asérabi kamina ꞌëx ënu uti ꞌë ꞌakian,

⁴³ usa ꞌain kana bërí anuxun ꞌumpax biti kini a rapasu ꞌixun mi ñukatin: uinu ꞌikë xanu chipash kara ꞌumpax bitsi aia akana ꞌën ësokin kati ꞌain: ꞌË kaina min ꞌumpax ñutëñu ꞌikë a ꞌamitima ꞌain,

⁴⁴ ësokin ꞌën kakëxun ka ꞌë kati ꞌikën: Asabi ka kamina min xëati ꞌai kixun ꞌë kanan min, camellokamaribi kana ꞌumpax bixunti ꞌai an ꞌë kakë xanu ax ka min kaískë uni a ꞌën ñu mëëxunkë uni aín bëchikënën xanu ꞌiti ꞌikën.

⁴⁵ Ësokin ñukákin ꞌën këñúkë ꞌaímabi ka ꞌën iskëxbi Rebeca ñutë tuíanx uaxa. Ukin ka anua ꞌumpax biti anu nukúkin menu tsóntankëxun bitsia kana kan: Min ꞌumpax kaina ꞌë xëanun ꞌinántima ꞌain kixun.

⁴⁶ Kakëxun ka an bënë́kinshi aín ñutë, nanpákin ꞌë kaxa: Kamina xëati ꞌain, ꞌimainun kana min camellokamaribi xëamiti ꞌain, katankëxun ka ꞌë xëamianan ꞌën camellokamaribi ꞌumpax xëamiaxa.

⁴⁷ Usakian ꞌaia kana ꞌën ñukan: ¿Mix karamina uin bëchikë ꞌain? kakëxun ka an ꞌë kaxa: ꞌËx kana Betuelnën bëchikë xanu ꞌain, ax ka Nahornëan Milcámi bëchia ꞌikën. Ësai kia kana achúshi rëñuti ñu bitankëxun rëñumianan kana rabë́ aín pëñanuribi pëñumian usakin ꞌai,

⁴⁸ rantinpuruni tsóbukin kana Nukën ꞌIbu rabikin kan; an ꞌë ñumëmikë Abraham aín Dios, min kamina ꞌë bai upitan an ꞌë ñumëmikë uni aín bëchikë xanu achúshi aín aintsikaman bëchikëbi bixunun kixun ꞌë bëan.

⁴⁹ Usa ꞌain kamina bëríbi ꞌë kati ꞌain kaina ꞌën mi kakë ënë an ꞌë ñu mëmikë ax kikësa okin ꞌati ꞌain, kamina ꞌë kati ꞌain añu karana ꞌën ꞌati ꞌai kixun ka uni an kakëxa.

⁵⁰ Ësokian kakëxun ka Labán ꞌimainun Betuelnën kakëxa: —Nukën ꞌIbun ka kamabi ñu ësokin axa, usa ꞌain kananuna nun mi asábi ka katankëxun kana ꞌatima ꞌai kixun mi kaiman.

⁵¹ Ka kuat, ënu ka Rebeca ꞌikën; kamina bibiankin buánti ꞌain. Ax ka an mi ñumëmikë uni aín bëchikënën xanu ꞌiti ꞌikën, Nukën ꞌIbun kakësabi oi.

⁵² Ësokian kakëxun kuati ka Abrahamnën ñumëmikë uni rantinpuruni memi bëtiki tsóbukin, Nukën ꞌIbu asábi ka kixun kakëxa.

⁵³ Usai ꞌi nirukinshi ka na bëkë ñukama churupakin biakëxa, ax ka ꞌiakëxa kuri, manë panshian, ꞌimainun chupa ꞌitsaira kupíkë, a bikin ka Rebeca ꞌinánkëxa. ꞌInánan ka aín rarëbakë këñun aín titaribi ñu ꞌitsaira ꞌinaishiakëxa.

⁵⁴ Usakin na buánkë ñukama a pain ꞌinántankëxun ka pitia nanxunkë a pitankëxun xëakëxa, abëa kuankë a uni kamabëtan usakin ꞌai ka a imë́ anu ꞌiakëxa: —Usai anu ꞌuxnë́ti pëkarakëbë nirukin, ka a unin kakëxa: Kana kuantëkënti ꞌain, anua an ꞌë ñu mëëmikë uni ꞌikë aín xubunu.

⁵⁵ Ësai kiabi ka Rebecanën rarëbakë apanën aín titabëtan kakëxa: —Nun sinánkëx ka ënë xanu nubëpain mapai rabë́ nëtë nubë ꞌiti ꞌikën, ꞌitankëx ka mibë kuanti ꞌikën.

⁵⁶ Ësokian kakëxunbi ka uni an kakëxa: —ꞌËx kana ënu ꞌitsa nëtë ꞌi ukëma ꞌain. Nukën ꞌIbu Diosan ka ꞌëx ënu uti upí ꞌimiaxa, usa ꞌain kamina ꞌëx kuantëkëntanun ꞌë xukanti ꞌain anua a ꞌën ñu mëëxunkë uni aín xubunu.

⁵⁷ Kakëxun ka anu ꞌikë unikaman kakëxa: —Asabi ka kananuna xanu chipash ax kara uisai kia kuati kuënti ꞌain, uisai kara ax kia kananuna kuati ꞌain.

⁵⁸ Ësokin katankëxun ka Rebeca kuënxun ñukákëxa: —¿Ënë unibë kaina bëríbi kuainsa tanin? —Asábi ka kana kuanti ꞌain —kiax ka ax kiakëxa.

⁵⁹ Kixuan kakëxun ka an bërúankin nikinkë xanu këñun, Rebeca kuantanun kixun Abrahamnën ñu mëëmikë unikama këñun xuakëxa.

⁶⁰ Usai kuania ka Rebeca upíokin sinánxunkin ësokin kakëxa: “Nukaman chirabakë, ¡min rëbúnkinëx ka ꞌaisamaira tupuntisama ꞌiti ꞌikën! ¡usa ꞌixun ka min rëbúnki kaman axa ami nishkë unikama abámikin ꞌatankëxun atun ëmakama biti ꞌikën!”

⁶¹ Ësokin kakin sënë́onkëx ka Rebeca ꞌimainun an nikinkë xanu akamabë kuani camellonu ꞌiruakëxa, usai ꞌirukiani ka Abrahamnën ñu mëëmikë uni akamabë kuani kuankëxa. Usai ka an Abraham ñu mëëxunkë uni Rebeca anua bibiankin buánkëbë ꞌiakëxa.

⁶² Usai atux kuanmainun ka Isaac axribi a nëtën anua ꞌumpax ꞌikë anuax kuankëxa, ax ka ꞌiakëxa axa tsókë ꞌimainun an ꞌë iskë kakin anëkë kini anu ꞌiakëxa, ax ka Négueb kakë me anu tsókë ꞌiakëxa.

⁶³ Anuax ka achúshi nëtën nitsi kuanxun xupibukëbëtan iskinbi ka. Unikama camellonën ꞌai amikikuatsini rikuatsinia isakëxa.

⁶⁴ Usakian ismainun ka Rebecanënribi au kuanti ami bësui tsóxun Isaac ꞌuranxunbi mërakëxa, usakin mëraishi ka anúan kuankë camello anuax ꞌibúakëxa

⁶⁵ usai ꞌibukinshi ka an buánkë uni a ñukákëxa: —¿Uinu ꞌikë uni kara axa numi kikuatsini ukë ux ꞌik? —Ax ka ꞌën ñu mëëxunkë uni a ꞌikën —kixun ka unin kakëxa. Usakian kakëxun aín chupa bitsi ka anun bëmápukuti rakuakëxa.

⁶⁶ Usaia ꞌimainun ka anu nukúkin aín ñumëmikë uni an Isaac axa usai ꞌikëkama ñuixuankëxa.

⁶⁷ Usokin unikaman ñuia kuatankëxun ka Isaacnën Rebeca bibiankin aín xubusa okían chupa këxtú ꞌakë anua aín tita Sara ꞌikë anu buánkëxa, anu buánxun ka biakëxa, usakin bitankëxun ka Isaacnën Rebeca ꞌitsaira kuëëankëxa, usakin aín xanu Rebeca ꞌitsaira kuëëni ka aín tita ñukë sinania masá nuitukë a sinántëkënima manúakëxa.