Génesis 23 - Kashibo-Kakataibo Biblia

Sara ñukë maínkan ñuikë bana

¹ Sara ka tsóakëxa ciento veintisiete baritia,

² ati baritia tsótankëx ka ñuakëxa Quiriat-arbá, kakëbia Hebrón kakin anëkë ëma anuax, ka Canaán me anu ꞌiakëxa. Usa ꞌain ka Abraham aín xanu ñukë ꞌain ꞌitsaira masá sinani iakëxa.

³ Usa ꞌain ka anua aín xanu Sara ñukë anuax nirukiani kuankëxa, anu mëníoti ꞌaíma ꞌain, kuantankëx ka hititas unikamabë banakëxa:

⁴ —Banakin ka ësokin kakëxa, ꞌëx kana bëtsi menu ꞌikë uni ꞌaíshbi mitsunu tsókë uni ꞌain, usa ꞌikëbi kamina anu uni ñuia maínti ꞌakë achúshi anu ꞌën xanu mëníonun ꞌë maruti ꞌain.

⁵ Usaia kia kuakin ka hititanu ꞌikë unikaman kakëxa:

⁶ —¡Usama ka ꞌën ꞌIbu kamina! ꞌËn kakëxun kuati ꞌain. Mix kamina nubë ꞌikë uni ꞌain, usa ꞌaish kamina mix achúshi uni Nukën ꞌIbu Diosan kaískë ꞌain. Usa ꞌikë ka mi ꞌakinia ax kushiira ꞌixun usa ꞌain kamina min xanu ñukë a uinu ꞌikë ax kara upíira ꞌikë istankëxun anu mëníoti ꞌain, uinu ꞌikë unínbi ka ꞌanu ꞌaxuma ꞌanun kixun mi katima ꞌikën kamina ꞌati ꞌain.

⁷ Ësokian kakëx nirukin ka Abraham asábi ka kixun hititakama kai atumi ñanákin,

⁸ ësokin atu kakëxa: —Mitsun asérabi ꞌën xanu ënu mëníoti kuëënkin kamina Sóharnën bëchikë Efrón a ꞌë ñukáxunti ꞌain.

⁹ Macpelánu ꞌikë kini aín me sënë́nkënua ꞌikë a ꞌë marunun kixun kati ꞌain. ꞌËn kana uiti kara aín kupí ꞌikë atibi kupíoti ꞌain, usa ꞌain kana anu uni ñuia maínti kiniñu ënë menu ꞌiti ꞌain.

¹⁰ Usaia Abraham kia kuakin ka Efrón hitita uni ax atubë tsóxun kakëxa, Abraham ꞌimainun anu timë́kë unikaman kuaisabi ꞌitánun kakëxa, usakian kaia ka a ëmanu ꞌikë unikaman ribi kuakëxa:

¹¹ —¡Usama ka ꞌën ꞌIbu, kana mi maruiman! ꞌËn kana mi me ꞌinainshitin, ꞌimainun kana anu uni ñuia maínti ꞌakë kini këñunbi me a mi ꞌinaishitin. ꞌËn aintsikamanribi ka kamaxunbi ꞌën me ënë mi ꞌinainshinuxun kaia kuatia. Usa ꞌain kamina min xanu anu maínti ꞌain.

¹² Ësokin kakëx ka unikamami ñanati ꞌitëkënkin ka Abrahamnën,

¹³ ësokin atun kuamainunbi Efrón kakëxa: —¡ꞌËn kamainun, kamina kuati ꞌain! Kana ësokin mi kain uiti karamina kuëënin min me kupí atibi kana mi kuríki ꞌinánti ꞌain, usakin mi pain kupíobianxun kana ꞌën xanu anu mainikuanti ꞌain.

¹⁴ Usai kia ka Efrónnën kakëxa:

¹⁵ —Mi kamainun kamina kuati ꞌain, ꞌën ꞌIbu: Me aín kupí ka cuatrocientas manë kuríki ꞌikën. Usa ꞌain kananuna ꞌati ꞌain kupí aín ꞌitsa kuëbikanantima ꞌain, usa ꞌain kamina bërí anu min xanu mainikuanti ꞌain.

¹⁶ Usakian kakëxun ka Abrahamnën asábi ka kana mi uiti kara aín kupí ꞌikën atibi mi kupíoti ꞌai kixun ka Efrón aín aintsi hititakaman ismainunbi, aín kuríki abia tupunun kixun kupíokin banatanun rërëkaxuankëxa.

¹⁷ Usokin ka Efrónnën me Macpelánu ꞌikë, au bari kuabúkë Mamré kakë anua ꞌikë kini, ꞌimainun kamabi ni a menua ꞌikë akama këñunbi Abraham maruakëxa,

¹⁸ usakian Abrahamnën bikëx ka a me ainan ꞌiakëxa. Usa ꞌain ka hitita unikama ꞌimainun raíri uni kamanribi anun inúkin iskë ꞌixun ënë mex ka nunama ꞌikë kixun ꞌunánkëxa.

¹⁹ Usokin marutankëxun ka Abrahamnën aín xanu Sara ñukë a Macpelá menu ꞌikë kini anu maíankëxa, au bari urukë Mamré kakë me anu, aín anë itsi ka Hebrón ꞌikëbia, Canaán kakë me anubi ꞌiakëxa.

²⁰ Usokin ꞌatankëx ka Abraham me ꞌimainun anua ꞌikë kini aín ꞌIbu ꞌiakëxa, ax ka Hititas kaman anua aín xanu maínti marukë me ꞌiakëxa.