Génesis 2 - Kashibo-Kakataibo Biblia

¹ Usokin ꞌatankëxun ka Nukën ꞌIbu Diosan naí ꞌimainun me, anua ꞌikë ñukama këñunbi ꞌakin kamabi sënëonkëxa.

² Mapai achúshi ꞌimainun achúshi nëtën ka Nukën ꞌIbu Diosan an ꞌakë ñukama sënëonkëxa, usokin ꞌatankëx ka tantiakëxa.

³ Usa ꞌain ka mapai achúshi ꞌimainun rabë́ nëtë a upíokin sinánxuni a nëtëx ka upíira ꞌiti ꞌikë kiax kiakëxa, a nëtën ka kamabi ñukama uniotankëx tantiakëxa.

⁴ Ënë banax ka usakin ka Nukën ꞌIbu Diosan naí ꞌimainun me uniokëxa kixun ñuikë bana ꞌikën. Usakin Nukën ꞌIbu Diosan naíkamë ꞌëo këñun me uniokin sënë́onkë ꞌaínbi ka,

Uni Edén kakë naësa menu ꞌiá

⁵ anu añu ñubi ꞌaima pain ꞌiakëxa, añu ñubi ka me mëuküax ꞌirukëma pain ꞌiakëxa, uñeribi ka Nukën ꞌIbu Diosan ꞌibumiama pain ꞌikën an me chabóti, ꞌimainun ka an naë mëníoti uni ꞌaima pain ꞌiakëxa.

⁶ Usa ꞌaínbi ka menuax mekama chabói ꞌumpax shióbuakëxa.

⁷ Usa ꞌain ka Nukën ꞌIbu Diosan mebi unisa ꞌinun ꞌatankëxun aín rëkinu rëxúnkakëxa, rëxúnkakëxëshi ka uíni uni ꞌiakëxa. Usai ꞌika uni uniakëxa.

⁸ Usokin ꞌatankëxun ka Nukën ꞌIbu Diosan Edén kakë naësa me, auküaxa bari urukë, anu achúshi naësa okin ꞌaxun anuxun kamabi ñu bëruánti anubi ëankëxa.

⁹ A naësa me anu ka Nukën ꞌIbu Diosan bëtsi bëtsi i upíbu ꞌixuan aín bimi upíbu pisabi ꞌinun tuati a koónun ꞌimiakëxa. Imianan ka naësa me a nëbëtsi a pia uni upiti tsóti ꞌimainun, a pikin uisa ñux kara upí ꞌikë a ꞌunánan uisa ñux kara ꞌatima ꞌikë a ꞌunánti aribi kónun ꞌimiakëxa.

¹⁰ Usa ꞌain ka Edén kakë naësa me anuax achúshi baka an naësa a chabóti shióbukë, anuax ka amo rabë́ ꞌimainun amorabë́ ꞌinun baka saëakëxa.

¹¹ A baka achúshinëx ka Pisón kakin anëkë ꞌiakëxa, an ka Havilá kakë mekama bëararakë ꞌiakëxa. A menu ka ꞌitsaira kuri ꞌiakëxa.

¹² A menu ka kuri upíira ꞌimainun i bëpín sanuira ꞌianan ka ónice kakë maxáxribi anu ꞌiakëxa.

¹³ Bëtsi baka ka Guihón kakin anëkë ꞌiakëxa, an ka Cus kakë me bëararakë ꞌiakëxa.

¹⁴ Bëtsi baka ka Tigris kakin anëkëribi ꞌiakëxa, ax ka Asiria amiaxa bari urukë ami kikiani kuankëxa. ꞌImainun ka Bëtsi bakaribi ax Éufrate kakë ꞌiakëxa.

¹⁵ Edén kakë me anu naësa achúshi ꞌatankëxun ka Nukën ꞌIbu Diosan an uniokë uni kakëxa: ënë bërúanan mënioi kamina ënu tsóti ꞌain,

¹⁶ katankëxun ka ësokinribi kakëxa: Min kamina piti ꞌain kamabi i bimi naësa ënua ꞌikë ënë,

¹⁷ ꞌën kana mi kain, anun upí ꞌimainun ꞌaisama ñu ꞌunánti a i ain bimi kamina pitima ꞌain. Uisaran karamina a bimi pin a nëtënbi kamina bamakë ꞌiti ꞌain.

¹⁸ Katankëxun ka Nukën ꞌIbu Diosan kakëxa: uníxa ashira ꞌiti ka ꞌaisama ꞌikën. Usa ꞌain kana an ꞌakinti bëtsi ꞌaxúnti ꞌain.

¹⁹ Usakin ꞌatankëxun ka Diosan menua uniokë ñuinakama ꞌimainun ñuina pëchiñukama unin anënun uninu uankëxa. A unían anëkë ꞌaish ka kamabi ñuinakama a piti a pitima ꞌimainun kamabi ñuina pëchiukama ꞌimainun raëkëmakama anëñu ꞌiakëxa,

²⁰ anëkëx ka aín anë ax anubi bërúakëxa. Usa ꞌaínbi ka a ñuinakama achúshinëxi a uni ꞌakinsama ꞌiakëxa.

²¹ Usa aín ka Nukën ꞌIbu Diosan a uni ꞌaímai upiti ꞌuxtanun ꞌuxmiakëxa, ꞌuxmikëxa ꞌaímai upiti uxan ka aín putu achúshi bitankëxun aín naminbi amiribishi bëtasakëxa.

²² A putúbi ka Nukën ꞌIbu Diosan achúshi xanu ꞌinun uniokëxa, uniotankëxun ka a uninu bëakëxa,

²³ bëia isi, ka uni kiakëxa: ¡Ënëx ka ꞌën namibi ꞌanan ꞌën xobi ꞌakë ꞌikën! Aín anëx ka xanu ꞌiti ꞌikën, ax ka Diosan unin putúbi bixun ꞌakë ꞌikën.

²⁴ Usa ꞌain ka unin aín xanu bikin aín papa aín tita ënti ꞌikën, usa ꞌaish ka a rabëtaxbi achúshi unisashi ꞌiti ꞌikën.

²⁵ Usakin ꞌakëx ka uni ꞌimainun xanu chupañuma ꞌiakëxa, ꞌaínbi ka usa ꞌixunbi a rabëxun rabinti sinánma ꞌikën, sinanima ka usabi ꞌiakëxa.