Génesis 19 - Kashibo-Kakataibo Biblia

Nukën ꞌIbun Sodoma ꞌimainun Gomorra ëma këñua bana

¹ Bari kuabúkëbë ka Sodoma kakë ëmanu ángel rabë́ bëbakëxa. Anu bëbakiania kuania ka Lotnën anun ëmanu atsínti xëkuënu tanti tsóxun isakëxa, ax ka anua uni timë́kë ꞌiakëxa. Anu tsótanbia aia ka iskin nirukiani kuanxun ka biakëxa, bitsi aín bëmánanën memi bëtikikin,

² ka kakëxa: —ꞌËn kana mitsu kain, pëkarakëbë kuanux karamina ꞌën xubunu tanti kuantima ꞌain. Anu kamina tachukatankëx tantiti ꞌain, anuax kamina pëkarakëma ꞌaínshi kuanti ꞌain. ꞌAínbi ka atun kakëxa: —Asabi ka ꞌaíshbi kananuna ꞌima. Xubu ëman ënushi kananuna nu rabë́ ꞌuxti ꞌain.

³ Kixun kakëxunbi ka, Lotnën amiribishi katëkëankëxa usama ka kamina kuantima ꞌain usakian ꞌuran kakëxun ka a rabëtan aín xubunu abë kuanti sinánkëxa. Usakin kabiani kuantankëx aín xubunu nukuxun ka Lotnën piti ꞌitsa ꞌanan pánribi anun chamiti ñu këñuma ꞌaxun a isia kuankë unikama a pikiankëxa.

⁴ Ax ꞌuxkëmapan ꞌaínbi ka a ëmanu ꞌikë unikaman kamabi Sodomanu ꞌikë unikaman aín xubu bëararakë ꞌiakëxa, anu ka uni apan ꞌimainun bëná unikamaribi ꞌiakëxa,

⁵ usai ꞌikin ka munuma sharati kushin banakin Lot kakëxa: —¿Uinu kara mibëa ënë ñantan min xubunu ukë uni rabë́ ax ꞌik? ¡Kamina chikínti ꞌain! ¡Atubë kananuna ꞌisatanin ënë imë́ kamina nu bëxúnti ꞌain!

⁶ Usai sharati kikëbë ka Lot atu kai chikíkin, ka aín xubu xëputi xëpúakëxa, anun uni atsintisama okin,

⁷ usokin xëpukin ka atu kakëxa: —ꞌË ꞌurama ꞌikë unikaman ñu ꞌatimairamina ꞌakani kamina bërúankakanti ꞌain.

⁸ Ka kuakan ꞌëx kana bëchikë xanu rabëñu ꞌain ax ka unibë ꞌikintankëma ꞌikën; usa ꞌain kana a rabë́ mitsun kuëënkësokinmi ꞌanun mitsu ꞌinánti ꞌain, ꞌaínbi kamina uni rabë́ ënë uisabi okantima ꞌain, atux ka ꞌën kuënkëx uaxa usa ꞌain.

⁹ Ësokian kakëxunbi ka unikaman kakëxa: —¡Mix amo nirakëanan kamina min xubunu nu atsímiti ꞌain! Mix ënu ꞌikë uni ꞌixun kaina min kuëënkësokin nu ꞌati ꞌain. ¡Bërí kananuna a unikama ꞌakima mi ꞌatima oti ꞌain! Usakin kakinshi ka Lot xutunkin aín xëpútinubi rakankin ñatankankëxa,

¹⁰ usakian ꞌakananiabi ka ángel rabë́ a isia kuankë an aín mëkën mëshpakianxun bikin aín xubunu atsímiakëxa; usakin ꞌakinshi ka aín xubu xëpúti upíokin xëpúakëxa,

¹¹ xëpukinshi ka ángelnën. Ëman bukukë unikama bëxuñu ꞌimiakëxa. Kamabi uni bënábukama ꞌimainun uni apankama axbi ka bëxuñu tikiakëxa. Usai ꞌikin anun atsínti xëputi barikasmatankëx ka atux rikiankëxa.

¹² Usokin ꞌatankëxun ka a isia kuankë uni rabë́ an Lot kakëxa: —¿Min aintsi ꞌibukama kara ënë ëmanu ꞌaíma ꞌik? Kamina biti ꞌain min bëchikë bëbu, ꞌimainun xanu min piaka min bëchikë an binuxun katakë uni akama kamina ënë ëmanua chikínbiankin ꞌura buánti ꞌain,

¹³ kixun katankëxun ka ángel rabëtan Lot ësokinribi kakëxa. Nun kananuna ënë ëma añu kara anu axa akama këñunbi këñui uan, usakin ꞌanun ka nu Nukën ꞌIbun xuaxa ꞌaisamaira unix ka uisa kupín kara ënë ëma Nukën ꞌIbun ñu ꞌatima ꞌaia iskinbi këñuima kiax kia, usa ꞌain kananuna nun bërí ënë ëma këñuin.

¹⁴ Usakian kakëx ka Lotnën aín bëchikë binuxun kakë aín piaka ꞌiti uni rabë́ barikuankëxa, kuanxun mërakin ka aín piaka ꞌiti uni a kakëxa: —¡Bënëti nirukiani ka kuantan Nukën ꞌIbun ka ënë ëma këñuti ꞌikën! ꞌAínbi ka aín piaka ꞌiti unikaman këmëkin isa Lotnën kaia kixun sinani kuanma ꞌikën.

¹⁵ Usai ꞌión pëkarakuatsínkëbëtan, ka ángel rabëtan Lot katëkëankëxa: —¡Bënëti kamina! Nirukiani min xanu ꞌimainun min bëchikë xanu rabë́ akama bibiani ënë ëma këñúkëma ꞌainshi bamatisama tani kuanti ꞌain.

¹⁶ Ësokin kakëxbia bënëti kuaniama ka nuibakin ángel rabëtan Lot, mëinkin biakëxa. Nukën ꞌIbun ka ꞌain xanu ꞌimainun aín bëchikë xanu rabë́ aribi a ëmanua bamatima kupin ië́mikin chikíankëxa.

¹⁷ A ëmanua chikinbiaxun ka ángel achúshinën Lot kakëxa: —¡Bënëti kamina abákiani kuanti ꞌain ië́tisatani! Kuankin kamina kaxú bësukin añu ñubi isima kuanti ꞌain, usai ꞌikamina nirakëtima kuanshiti ꞌain. Kuanshiti kamina matá mekama anu ië́tisa tani kuanti ꞌain.

¹⁸ ꞌAínbi ka ësokin Lotnën kakëxa: —¡Usama ka ꞌën ꞌIbu ka kuat, ax ka ꞌura ꞌikën!

¹⁹ Mitsun kamina ꞌitsaira ꞌë ꞌakian, usa ꞌixun kamina ꞌë ië́nun ꞌakian, ꞌaínbi kana ꞌëx matán me kamanu kuantima ꞌain, anu kuaniabia tsin bikëx kana ꞌëx bamati ꞌain.

²⁰ Ka kuat, ënë ꞌurama ka achúshi ëma chukúma ꞌikën, anu kana abáti ꞌain. ¡Anu ië́ti kuantanun kamina ꞌë ënti ꞌain, ax ka ëma chukúmara asérabi ꞌikën!

²¹ Usaia kia ka a uni achúshinën kakëxa: —ꞌËn kana minmi ꞌë kakëxun kuan usa ꞌain kana ami ꞌë ñuixunkë ëma chukúma a këñutima ꞌain,

²² usa ꞌain kamina ¡Bëríbi ënuax kuanti ꞌain! bënëtishi ka kuantan, mix a ëmanu bëbakëma pain ꞌain kana uisa ñubi ꞌatima ꞌain. Usa ꞌain ka a ëma Sóar kakin anëakëxa.

²³ Kuankëbë pë́karakëbëa bari urukëbë ka Lot ꞌimainun aín bëchikë xanu akamabë bëbakëxa Sóar kakë ëma chukúmara anu,

²⁴ usaía ëmanu bëbakëbëtanshi ka Nukën ꞌIbu tsi ꞌimainun azufre naínua ꞌibúmikin Sodoma ꞌimainun Gomorra kakë ëma a këñuakëxa;

²⁵ usakin ꞌakin ka Nukën ꞌIbu Diosan ëmanu tsókë unikama, ꞌimainun kamabi a menu kókë xubi ñu ꞌapákë ëma ꞌurama ꞌikë akamabi këñuakëxa.

²⁶ Usai ꞌikëbë kuankinbi kaxú bësukin isíbi ka Lotnën xanu, ax Sodoma ꞌimainun Gomorra isi kuainakëtishi bamai tashi maxáxsa ꞌinun churishi ꞌiruakëxa.

²⁷ Usai ꞌiónxa pëkarakëma ꞌaínshi ka Abraham anuaxa Nukën ꞌIbubë banonkë anubi kuantëankëxa;

²⁸ kuantankëx nirakëkin ka Abrahamnën Sodoma ꞌimainun Gomorra, kakë ëma aubësukin isakëxa, iskin ka kamabi me kuainakëkë amiaxa naë nënkësa ꞌinun kuin chaiira, chikitia isakëxa.

²⁹ Ësokin ka Nukën ꞌIbu Diosan ëma rabë́ anua Lot ꞌikë këñuakëxa, usakin a këñukinbi ka Abrahammi sinánkin aín piaka Lot ashi a ëmanua chikíankëxa.

Moabitaskama ꞌimainun Amonitakaman chaitiokë kama ꞌia ñuikë bana

³⁰ Usakian Nukën ꞌIbu Diosan a ëma këñuan ka Lot ꞌitsaira rakuë́ti Sóar kakë ëma anu ꞌisama tankëxa, anu ꞌiti bari ka aín bëchikë xanu rabë́ abëbi kuankëxa kuantakëx ka bashikama anu Lot aín bëchikë xanu rabë́, abë achúshi kini chaiira xubu namësa mëratankëx anu tsóti bërúakëxa.

³¹ Anu ꞌixun ka achúshi nëtën, aín bëchikë apanën sinánkëxa uisax karana tuáñu ꞌiti ꞌai kixun sinánxun ka aín xukë́n ꞌanáka kakëxa: —Nun papa ka xënira ꞌikën usa ꞌain ka ënë menu uni ꞌaíma ꞌikën an nu rabë́ xanuati ka ꞌaíma ꞌikën, kananuna ꞌunan kamabi menuxun ka unin xanu bixun bëchia;

³² usa ꞌain kananuna nu rabëxun nun bata paë xëamixun paëónti ꞌain, usokin ꞌatankëxun kananuna aín bëchikë ꞌitánun tuaxunti ꞌain.

³³ Usai kitankëxun ka a ñantánbi uvas baka paëokë aín papa xëamixun paëónkëxa; usokin ꞌatankëx ka aín rëkuë́n bëchikë ax pain abë ꞌikin aín nami ꞌamiakëxa, usaía abë ꞌikëxunbi ka aín papan paënxun táma ꞌikën aín rakábukë ꞌimainun aín nirukëbi.

³⁴ Usai ꞌiónx pëkarakin ka aín xukë́n apanën, aín ꞌanáka aribi kakëxa: —Ka kuat, ꞌëx kana nun pabë ënë imë́ ꞌión usa ꞌain kananuna nu rabëtan mixribimi abë ꞌinun ënë ñantan amiribishi paëónti ꞌain; usakin ꞌatankëxun kananuna nu rabëxunbi aín bëchikë ꞌitánun tuaxunti ꞌain.

³⁵ Usai kanantankëxun ka a ñantánbi amiribishi uvas baka paëokin ꞌakë aín ꞌanákanën aín papa xëamitankëx, abë ꞌiakëxa; ꞌaínbi ka Lotnën abë ꞌia rakábukë ꞌimainun aín nirukë abi táma ꞌikën.

³⁶ Usai ꞌitankëx ka Lotnën bëchikë xanu rabë́ tuuakëxa ax ka aín papanbi ꞌakë ꞌiakëxa.

³⁷ Aín bëchikë apan aín tuá ka Moab kakin anëkë ꞌiakëxa ax ka Moab unibunën rara ꞌiakëxa usa ꞌaish ka bëríbi Moabitas unibu aín rëbúnki ꞌikën.

³⁸ ꞌImainun ka aín ꞌanákanënribi tuakëxa achúshi okin aín anëx ka Bem-amí kakë ꞌiakëxa ax Bem-amí unibunën rara ꞌiakëxa usa ꞌaish ka bëríbi amonita unibu ax aín rëbúnkibi ꞌikën.