Génesis 18 - Kashibo-Kakataibo Biblia

Nukën ꞌIbu Diosan achúshi bëchikë ꞌinánuxun Abraham ká

¹ Usa ꞌain ka Nukën ꞌIbu Abrahammi anua Mamré kakë uni aín me ni ꞌikë anuax mërakëxa, mëramainun ka Abraham bari xamaruti ꞌurama ꞌain aín chupa këxtú xubusa okin ꞌakë aín xëkuë rapasu, tsókë ꞌiakëxa.

² Tsóxunbi ka Abrahamnën rabë́ ꞌimainun achúshi uni a bëtánain nikë isakëxa. Isi bënëtishi nirukin bitsi ka aín bëmánanën me tikatankëx,

³ nirukin ka kakëxa: —ꞌËn kana mi kain kamina bënë́kiani kuantima ꞌain ꞌën ꞌibu.

⁴ Mitsux mi kuëënkëbëtan kana ꞌën ꞌumpax bëxunun kati ꞌain, anun tachukatankëxmi in tupë́onkë tëmú chukúmashi tantikanun.

⁵ Bërí kamina ꞌunanin uinu kara an mi ꞌakinti ꞌia kixun, usa ꞌain kana mitsun piti bëxúnti ꞌain, bëia pitankëx kamina pibiani kuanti ꞌain. Ësokin kakëxun, ka a unikaman —asabika kananuna kaínti ꞌain —kixun atun kakëxa.

⁶ Usakian kakëx ka Abraham aín chupa këxtú xubusa okían ꞌakë anu atsíankëxa atsínkin ka Sara kakëxa: —¡Bënë́kinshi! Kamina trigo putuakë upíira veinte kilo bitankëxun pán ꞌati ꞌain.

⁷ Usakin aín xanu kabiani ka Abraham abákiani anua aín vaca ꞌikë anu, anua ka vaca bërí kanikë kaískin bitankëxun aín uni achúshi ꞌinánkëxa, ꞌinánkëxun ka an bënë́kinshi piti ꞌakëxa.

⁸ Usakian vaca bëna piti ꞌamainun ka Abrahamnën vaca xuma mëtuakin ꞌakë a ꞌimainun aín xuma aribi kara ꞌati ꞌikë kixun ñukákëxa, usakian atun pimainun ka a ꞌuramaxun añu ñuribi kara kuëënia aribi ꞌinánuxun kaíankëxa, kainkëxun ka i achúshi nikë tëmúxun piakëxa.

⁹ Usakin pitankëx sënë́nkin ka a isia kuankë unikama achúshinën Abraham ñukákëxa: —¿Uinu kara min xanu Sara ꞌik? Kakëxun ka kakëxa ka —anu ꞌëx ꞌikë chupa këxtú xubusa okin ꞌakë anu ꞌikën —kixun ka kakëxa.

¹⁰ Usakian kakëxun ka a isia ukë uni achúshinën kakëxa: —Mi istëkëni kana bëtsi bari ꞌikëbë utëkënti ꞌain ꞌimainun ka min xanu Sara ax achúshi tuáñu ꞌiti ꞌikën. Usakian kaia ka Saran kamabi banakama kuakëxa, ax anu ꞌikë aín xubu xëkuë ꞌurama anuaxa banaia.

¹¹ Usa ꞌaínbi ka Abraham ax uni apan kaniakëkë ꞌimainun ka aín xanu Sara axribi xanu apan kaniakëkë ꞌiakëxa usa ꞌaish ka Sara bërámabi aín pëi machakë sënë́nkë ꞌiakëxa.

¹² Usa ꞌain ka Saran a ñuia kia kuati aín kuaikë a tënëibi kuëpunchinibi kuëmumëkin tënëakëxa: ¿Uisax karana ꞌëx usai ꞌiti ꞌain? ꞌën bënë ꞌimainun ꞌëx kana bërí kaniakëkë apan ꞌain.

¹³ Usai ꞌia ꞌunánkin ka Nukën ꞌIbun Abraham kakëxa: —¿Uisa kupín kara Sara kuain? ¿an kara xënira ꞌaish kana tuáñu ꞌiti ꞌain kixun sinanimin?

¹⁴ ¿Nukën ꞌIbun ꞌakasmati ñu kara ꞌaíma ꞌik? bëtsi bari ꞌirukëbë kana ꞌëx mi istëkëni uti ꞌain, ꞌimainun ka Sara achúshi tuáñu ꞌiti ꞌikën kixun ka kakëxa.

¹⁵ Ësai kia kuati ka Sara rakuë́ti ꞌëx kana kuaikëma ꞌain kiax kisatankëxa: Usa ꞌain ka ësai kiakëxa: —ꞌËx kana kuaikëma ꞌain. ꞌAínbi ka Nukën ꞌIbun kakëxa: —ꞌËn kana mix kuaia isan.

Abrahamnën Sodoma kakë ëma kupín Nukën ꞌIbu Dios ñuká

¹⁶ Usa ꞌain ka a isia kuankë unikama ax nirukiani kuani Sodoma kakë ami kikiani kuankëxa. Kuankëbë ka Abrahamnën buánxun xuti axribi kuankëxa.

¹⁷ Usa ꞌain ka Nukën ꞌIbun sinánkëxa: “Kana Abraham kati ꞌain añu karana ꞌai kuani kixun,

¹⁸ ax ka kamabi unin chaitiokë ꞌaish achúshi ëma chaiira ꞌimainun kushiira ꞌiti ꞌikën. ꞌËn kana a kupín kamabi menu ꞌikë ëmakamanu ꞌikë unikama upíokin sinánxunti ꞌai kixun kana kan.

¹⁹ ꞌËn kana mi kaísan usa ꞌain kamina min bëchikëkama ꞌinánan, min rëbúnkikama mi ꞌunánmikë bana upíokin kuakin ꞌunánkin uinu ꞌikëx kara ꞌaisa ꞌimainun upí ꞌikë a ꞌati ꞌikën, usakin ꞌakëbëtan kana ꞌën usakin ꞌaxunuxun kakë usakinbi ꞌaxúnti ꞌain.”

²⁰ Ësakin ka Nukën ꞌIbun kakëxa: —Ësai ka Sodoma ꞌimainun Gomorra ëmanu ꞌikë unikama ñui uni kia, atux ꞌatima ñuira ꞌai ꞌuchakë, ax ka ꞌucha chaiira ꞌikën,

²¹ usa ꞌain kana bërí anu kuanti ꞌain, asérabi kana atun ꞌucha chaiira ꞌimainun ꞌatimañuira ꞌaia kixuan ñuia kuan. Usa ꞌain kana asérabi kara unin ñuia kuakë ax usa ꞌikë ꞌunánti ꞌain.

²² Usakin kabiani ka a isia ukë uni rabë́ ax Sodoma ëma isi anuax kuankëxa, kuantamainun ka Abraham anu pain Nukën ꞌIbubë bërúakëxa.

²³ Usa ꞌain ka a ꞌurama okin Abrahamnën Nukën ꞌIbu Dios ñukákëxa: —¿Karamina uni ꞌuchañu këñun uni ꞌuchañumakama ꞌatima okin këñuti ꞌain?

²⁴ A ëmanu ka cincuenta uni ñu ꞌatima ꞌai ꞌuchakëma ꞌiti ꞌikën. Usa ꞌain kaina, ¿a ëmanu ꞌikë unikama këñutima kupin a cincuenta unikama ënti ꞌain?

²⁵ ¡Min usokin uni ꞌuchañuma këñun uni ꞌuchañukama, ꞌakin kamina a rabëtaxbi ꞌuchakësa ꞌikë ꞌati ꞌain! ¡Usakin ꞌaxuma ka at! Mix kamina ꞌapu ꞌaish kamabi kushiñu ꞌain kamabi menu, ¿usa ꞌixunmi usakin ñu ꞌakë ax kara minan asabi ꞌiti ꞌit?

²⁶ Usa ꞌain ka Nukën ꞌIbun kakëxa: —Anua cincuenta uni ꞌuchañuma mërakin kana Sodoma ëmanu tsókë unikama këñutima ꞌain.

²⁷ Usakian kakëxun ka Abrahamnën amiribishi katëkëankëxa: —ꞌËn ësokin mi kakëxun kamina ꞌë uisabi otima ꞌain, mix kamina Nukën ꞌIbu Dios ꞌimainun kana ꞌëx achúshi unishi ꞌain;

²⁸ ꞌaínbi kara mapai achúshi uni ñu ꞌatima ꞌakëma anua cincuenta uni ꞌiti pishinti ꞌikën. ¿Mapai achúshi unikama ñu ꞌatima ꞌakëñuma ꞌain kaina ëma a këñuti ꞌain? Kakëxun ka Nukën ꞌIbu kakëxa: —ꞌËn cuarenta ꞌimainun cinco ꞌuchañuma uni mërakin, kana a ëma ꞌatimokin këñutima ꞌain.

²⁹ Katankëxun ka —Amiribishi katëkëankëxa, anu sapi ka cuarenta uni ñu ꞌatima ꞌakëma ꞌiti ꞌikën —kia ka Abrahamnën kakëxa. Kakëx ka —cuarenta a kupín kana a ëmanu ꞌikë unikama këñutima ꞌain —kixun Nukën ꞌIbu kakëxa.

³⁰ ꞌAínbi ka Abrahamnën amiribishi katëkëankëxa: —ꞌËn kana amiribishi mi kain usa ꞌain kamina ꞌën mi katëkënkëx ꞌëmi nishtima ꞌain, ꞌaínbi sapi kamina treinta unishi mërati ꞌain. Ësokian kakëxun ka Nukën ꞌIbun katëkëankëxa: —Anua treinta, uni ꞌuchañuma mërakin kana a ëmanu ꞌikë unikama këñutima ꞌain.

³¹ Usaia kia ka Abrahamnën amiribishi katëkëankëxa: —ꞌËn ꞌIbu, ꞌën kana ësokin kati ꞌikëmabi mi kain, ¿uisa kara veinte uni ꞌuchañumami anua mërakëbë ꞌiti ꞌik? Kixuan ñukákëxun ka Nukën ꞌIbun kakëxa: —ꞌËn anua veinte uni mërakin kana a ëma këñutima ꞌain.

³² Kia ka ënkinma Abrahamnën amiribishi katëkëankëxa: —ꞌËn kana ësokin mi kain ꞌën ꞌIbu, ꞌaínbi kamina mix ꞌëmi nishtima ꞌain, ꞌaínbi kana mi katëkënxuma ënë banaishi mi kain: ¿añu karamina anua diez uni ꞌuchañuma atu mërakin ꞌati ꞌain? Kakëxun ka Nukën ꞌIbun kakëxa: —Anua diez uni ꞌuchañuma mërakin kana a ëma këñutima ꞌain.

³³ Ësai pain Abrahambë banatankëx ka Nukën ꞌIbu, anuax kuankëxa; ax kuankëbë ka Abraham axribi aín ꞌiti chupa këxtú ꞌakë anu utëkëankëxa.