Génesis 10 - Kashibo-Kakataibo Biblia

Noénën rëbúnkikama ꞌiá

¹ Ënë kamax ka Noénën bëchikë Sem, Cam ꞌimainun Jafet, akaman rëbúnki ꞌikën, atux ka bakan tita chaiira ꞌikuatsian ꞌain, atunbi bëchipati tsóa a kama ꞌiakëxa.

² Jafetnën bakë bëchikëkama ka ꞌiakëxa Gómer, Magog, Madai, Javán, Tubal, Mésec ꞌimainun Tirás.

³ Gómernën bakë bëchikëkama ka ꞌiakëxa Asquenaz, Rifat ꞌimainun Togarmá.

⁴ Javánnën bëchikëkama ka ꞌiakëxa Elisá, Tarsis, Quitim ꞌimainun Rodanim.

⁵ Ënë unikamax ka Jafetnën rëbúnki ꞌiakëxa, ax ka achúshi Javán kakë ꞌiakëxa, aín rëbúnkinëx ka parúmpapa kuëbí tsóti ꞌuakamë ꞌëokëxa, usai ꞌika aín bananbi bananbi banai aín aintsibë timë́ax aín menu menubi tsóakëxa.

⁶ Camnën bëchikëkama aín anë ka ꞌiakëxa Cus, Misraim, Fut ꞌimainun Canaán.

⁷ Cusnën bëchikëkaman anë ka ꞌiakëxa Sebá, Havilá, Sabtá, Raamá ꞌimainun Sabtecá ꞌimainun ka Raamá aín bëchikënën anë Sebá ꞌimainun Dedán kakë ꞌiakëxa.

⁸ Cus ax ka bëtsi bëchikëñu Nimrod kakin anëkëñu ꞌiakëxa, ax painra ka uni kushiira a menu ꞌiakëxa.

⁹ Nimrod ax ka usai ꞌitia Nukën ꞌIbu kuëënkëbë an ñuokë unira ꞌiakëxa. Anuax ka achúshi bana ësai kia: Nimrod axa Nukën ꞌIbu kuëënkëbë ñuira okë ꞌia usaribi ka ꞌiti ꞌikën.

¹⁰ Usa ꞌain ka Nimrod ax ꞌapu ꞌain ëma chabu Babel, Érec, Acad ꞌimainun Calné, ënë ëmakamax ka Sinar menu ꞌiakëxa.

¹¹ Sinar menuax ka Asur kakë uni ax mërakëxa, mëraxun ka Nínive, Reohobot-ir, Quélah,

¹² ꞌimainun ëma chaiira Resen kakë, axa Nínive amo ꞌimainun Quélah axribi amo ꞌikë a ꞌakëxa.

¹³ Usa ꞌain ka Misraimnën rëbúnkikama ax ludeokama, anameokama, lehabitakama, naftuhítakama,

¹⁴ patruseokama casluhítakama ꞌimainun, caftoritaskama ax ka anuaxa filisteo unikama chikía ꞌikën.

¹⁵ Canaán ax ka rabë́ bëchikëñu ꞌiakëxa aín rëkuën ax ka ꞌiakëxa Sidón, kakë aín ꞌanáka ax ka ꞌiakëxa Het.

¹⁶ Usa ꞌain ka Canaánën rëbúnkikama ax ka jebuseos, amorreos, gergeseos,

¹⁷ heveos, araceos, sineos,

¹⁸ arvadeo, semareo ꞌimainun hamateo ꞌiakëxa. Usai ꞌikë ꞌitsa baritia ꞌinúkëbë ka cananeonën rëbúnkikama ax mekama mekama nu kuankëxa.

¹⁹ Usa ꞌain ka cananeo unikama me ax Guerar kakë me ami kikiani Sidón kakë ëma, anuax kuanx Gaza kakë ëma chukúma anu sënën ꞌiakëxa, ꞌimainun ka Sodoma, Gomorra, Admá ꞌimainun Seboím, kakë anuxunbi Lesa kakë ëma anu bërunkin bikë ꞌiakëxa.

²⁰ Ënë unikamax ka Camnën rëbúnki ꞌiakëxa, achúshi achúshi ëmax ka aín aintsibë aín menubi tsóti ꞌain bananbi banakëxa.

²¹ Sem, ax ka Jafetnën xukë́n aín apan ꞌiakëxa, anribi ka bëchipakëxa. Kamabi Ébernën bëchikëkamax ka Semnën rëbúnki ꞌiakëxa.

²² Semnën bëchikëkamax ka ꞌiakëxa Elam, Asur, Arfaxad, Lud ꞌimainun Aram.

²³ Aramnën bëchikëkamax ka ꞌiakëxa, Us, Hul, Guéter ꞌimainun Mas.

²⁴ Arfaxad ax ka Sélahnën papa ꞌiakëxa, ꞌimainun ka Sélah ax Ébernën papa ꞌiakëxa.

²⁵ Usa ꞌain ka Ébernën rabë́ okin bakë bëchiakëxa: achúshinëx ka Péleg kakë ꞌiakëxa, axa anu ꞌain ka unikama kamabi menu kuani abísakëxa; ꞌimainun ka Pélegnën xukë́n ax Joctán kakë ꞌiakëxa. (Péleg ax ka bëtsi bëtsi menu kuani amanu amanu kuankëxa.)

²⁶ Joctán ax ka ënë unikaman papa ꞌiakëxa Almodad, Sélef, Hasar-mávet, Jérah,

²⁷ Hadoram, Uzal, Diclá,

²⁸ Obal, Abimael, Sebá,

²⁹ Ofir Havilá ꞌimainun Jobab. Kamabi ënëkamax ka Joctánnën bëchikëkama ꞌiakëxa.

³⁰ Usa ꞌain ka anua atux tsókë anuaxbi kuankë me ax Mesá aukikiani kuankë ꞌimainun Sefar ax auküaxa bari urukë au ꞌikë ꞌiakëxa,

³¹ Ënë kamax ka Semnën rëbúnki ꞌiakëxa, achúshi achúshi ëma ꞌimainun ka aín aintsibëbi aín menubi tsóti ain bananbi banakëxa.

³² Ënëkamax ka Noénën bëchikënën aintsikama ꞌiakëxa, usa ꞌain ka aín rëbúnkinëx anubia aín rara tsóa menubi ꞌiakëxa. Baka chaiira ꞌikuatsian ꞌain ka abisi amanu amanu kuani atun ëmabi ꞌai anu tsókankëxa.