Gálatas 6 - Kashibo-Kakataibo Biblia

Bëtsibë ꞌaquiananti bana

¹ ꞌËn xucë́antu, axa Jesucristomi catamëcë unían manúxun ñu ꞌaisama ꞌaia camina mitsux asérabi Nucën Papa Diosan Bëru Ñunshin Upitan sinánmicë ꞌixun axa upí ꞌinun quixun nuibaquin ꞌaquinti ꞌain, rabíquin —ꞌëx cana ꞌuchañuma ꞌai —quixun sinánquinma. Mixribi usai ꞌitin rabanan camina bërúancati ꞌain.

² Min ñuishi ꞌati sinánquinma camina uni raíriribi ami sinánquin ꞌaquinsa ꞌicë ꞌaquinti ꞌain. Usai camina bëtsibë bëtsibë ꞌaquiananti ꞌain. Usai ꞌi camina Cristo quiásabi oi ꞌiti ꞌain.

³ Ui unin cara asérabi upí ꞌixunmabi ax isa upí uni ꞌicë quixun sinania, ax ca aín sinanëinshi cëmëia.

⁴ Ñu ꞌaquin ca aín unin —¿Cristo cuëëncësabi oquin carana ꞌai? —quixun sinánti ꞌicën. Usai ꞌi ca unían a cuëënti sinanima —Cristo cuëëncësabi oi cana ꞌi —quixun sináncë cupí a uni chuámarua tani cuëënti ꞌicën.

⁵ Cristonan ꞌixun ca unin uisa cara aín sinan ꞌicë quixun sinánan uisa ñu cara ꞌati ꞌicë quixun anbi sinánti ꞌicën.

⁶ An Nucën Papa Diosan bana ꞌunánmicë uni a ca a ꞌunánmicë unin cupíoquin uisa ñuñu cara, a mësú ꞌinánti ꞌicën.

⁷ Camina upí oquin ꞌunánti ꞌain, Nucën Papa Dios parani ca uni ami cuaitima ꞌicën. Ënëx ca ësa ꞌicën: An ꞌapácë ñu bëru aín bimibi ca unin biti ꞌicën.

⁸ Usaribiti ca axa aín ꞌuchacama ënima aín cuëëncësa oíshi ꞌicë uni ax ainanma ꞌaish xënibua ꞌaínbi Nucën Papa Diosbë ꞌíma. Usa ꞌaínbi ca an aín Bëru Ñunshin Upitan sinánmicëxun sinánquin ñu upí ꞌacë uni ax Nucën Papa Diosnan ꞌaish xënibua ꞌaínbi abë ꞌia.

⁹ Usa ꞌain cananuna Nucën Papa Dios cuëëncësabi oquin ꞌaquin atsánquin ëntima ꞌain. Usoquin ñu upí oquin ꞌai cananuna ax quiásabi oi an ꞌaquincë ꞌianan aín nëtënu abë ꞌiti ꞌain.

¹⁰ Usa ꞌain cananuna axa nubë Jesucristomi catamëcë unicama ꞌaquinti ꞌain. ꞌAquianan cananuna ꞌaquinsa ꞌicë uni raíriribi camabi ꞌaquinti ꞌain.

Pablonëan ashiquin ꞌësëanan bërúanxa ꞌinun ca

¹¹ ꞌËn mëcënanbi chaira letranën mitsu cuënëoxuncë bana ënë camina isti ꞌain.

¹² An —camina ꞌunántioracacë ꞌiti ꞌai —quixun caquin mitsu ꞌunánmicë unicaman ca judíos unicama cuëënmiti cupíshi usaquin ꞌunánmia. I curúsocënua ax bama, Cristo, ami catamëtishi ca uni ië́ti ꞌicë quicë, a bana cupí bëtsi bëtsi ocë ꞌitin rabanan ca —mitsux camina ꞌunántioracacë ꞌiti ꞌai —quia.

¹³ Axa ꞌunántioracacë unicamanbi ca camabi Moisésnën usai ca judíos unicama ꞌiti ꞌicë quixun cuënëo banacama quicësabi oquiinra ꞌaima. Usa ꞌixunbi ca atun ꞌunánmicë cupí camina mitsux judíos uni ꞌicësaribiti ꞌunántioracacë ꞌai quiax rabiácati sinánquin usaími ꞌinun quixun mitsu ꞌunánmia.

¹⁴ Usa ꞌaínbi cana ꞌëxbi rabiacaquinma, i curúsocënua ax bama ꞌaían a cupí uni ië́ti, Nucën ꞌIbu Jesucristo, ashi rabin. Cristo i curúsocënu bama cupí cana a ꞌën ꞌatia Nucën Papa Dios cuëëncëma ñucama ëni, usa ñu ꞌatëcënti cuëëniman. ꞌImainun ca unin a ꞌatia Nucën Papa Dios cuëëncëma ñu ꞌë ꞌamitima ꞌicën.

¹⁵ Nux asérabi Cristonan ꞌaish cananuna, axa usabi ꞌunántioracacë unicamaxa ꞌicësaribiti ꞌunántioracacëma ꞌaíshbi Nucën Papa Diosan iscëx upí ꞌain. Ainan ꞌicëa Cristonën nu ꞌimicëxun bërámanu ꞌása oquin sinántëcënquinma bëtsi oquin sináncë cupíshi cananuna Nucën Papa Diosan iscëx upí ꞌain.

¹⁶ Axa usai ꞌicë unicamacëñuan uicamax cara asérabi aín uni ꞌicë, acama Nucën Papa Diosan nuibaquin aín ꞌucha tërë́anan chuámashirua ꞌimiti cana cuëënin.

¹⁷ Nucën ꞌIbu Jesúsnan ꞌicë unin bëtsi bëtsi ocë cupí, ꞌën nami tëacë mocë, aín bërucama isquin ca ui uni cara, anbi, ꞌëx cana asérabi Nucën ꞌIbu Jesusan uni ꞌai quixun ꞌunánti ꞌicën. ꞌUnánquin ca uisa uni carana ꞌai quixun ꞌë ñucátëcëntima ꞌicën.

¹⁸ ꞌËn xucë́antu, Nucën ꞌIbu Jesucristonëan nuibaquin mitsu asaribi ꞌaíshmi upí ꞌinun ꞌaquinti cana cuëënin. Usai ca ꞌiti ꞌicën. Ashi, Pablo.