Gálatas 5 - Kashibo-Kakataibo Biblia

Jesucristonan ꞌixun bëráma ꞌá ñucama sinántëcëntima bana

¹ Nun Moisésnën usai ca judíos unicama ꞌiti ꞌicë quixun cuënëo bana quicësabi oquin ꞌacë cupíma cananuna Cristomi catamëcë cupíshi Nucën Papa Diosnan ꞌain. Usa ꞌain camina asérabi Cristomi catamëquin a ënti sinántima ꞌain. Usai judíos unicama ꞌiti Moisésnën cuënëo bana quicësabi oquin ꞌacë cupí cana Nucën Papa Diosnan ꞌai quixun camina sinántëcëntima ꞌain.

² Pablo ꞌixun ꞌën mitsu camainun ca cuat, Nucën Papa Diosnan ꞌinux cana judíos unicama ꞌicësai ꞌunántioracati ꞌai quixun sinanibi camina Cristomi catamëcëma ꞌaish Nucën Papa Diosnan ꞌitima ꞌain.

³ Cana mitsu catëcënin, uicaman cara —ꞌunántioracacëma ꞌaish cana Nucën Papa Diosan iscëx ꞌën nuitu upí ꞌinux ꞌunántioracacë ꞌiti ꞌai —quixun sinania, a unicaman ca ꞌunántioracacë ꞌiti ashima camabi usai ca judíos unicama ꞌiti ꞌicë quixun Moisésnën cuënëo bana quicësabi oquin ꞌati sinánti ꞌicën.

⁴ Uicaman caramina —Moisésnëan usai ca judíos unicama ꞌiti ꞌicë quixun cuënëo bana quicësabi oquin ꞌacë cupí ca ainan ꞌicë Nucën Papa Diosan ꞌë upí isia —quixun sinani, mix camina upí ꞌinux ami catamëtancëxunbi Cristo ëncë ꞌain. Usa ꞌaish camina Nucën Papa Diosnanmasa ꞌain.

⁵ Usa ꞌaínbi cananuna nun, ami catamëti ënquinma aín Bëru Ñunshin Upitan ꞌimicëx cananuna Nucën Papa Diosan iscëx upí ꞌiti ꞌai quixun sinanin.

⁶ Nux asérabi Jesucristonan ꞌaish cananuna ꞌunántioracacë unicama ꞌicësaribiti ꞌunántioracacëma ꞌaíshbi Nucën Papa Diosan iscëx upí ꞌain. Jesucristomi catamëcë ꞌixúan an uni nuibacë uni ax ca Nucën Papa Diosan iscëx upí ꞌicën.

⁷ Mitsux camina upiti Jesucristomi sináncën. ¿Ui unin cara Jesusan banami ënun quixun mitsu sinanamiax?

⁸ Nucën Papa Dios an mitsu ainan ꞌinun sinánmicë, an ca Jesusan bana ënun quixun mitsu sinánmicëma ꞌicën.

⁹ Unix ca quia, “Anun pán chamiti ñu an ca xanpanu ꞌicë pán ꞌati ñu acëñun mëscucëxun camabi chamia”. Usaribi ꞌixuan an uni paráncë unin ñuixuncëxun ca camabi unin aín bana cuatia. Usa unin sapi ca mitsu paránxa.

¹⁰ Usa ꞌaínbi cana mitsúxmi Nucën ꞌIbu Jesucristomi catamëcë ꞌain ësaquin sinanin, mitsun camina ꞌën ꞌacësaribi oquin —Moisésnëan cuënëo bana cupíma Jesucristomi catamëcë cupíshi cananuna Nucën Papa Diosan iscëx upí ꞌai —quixun ꞌunanin. Usa ꞌaínbi ca an mitsu ꞌatimaquin sinanamisa tancë uni, uisa uni cara, abi Nucën Papa Diosan castícanti ꞌicën.

¹¹ ꞌËn xucë́antu, cana mitsu cain, ꞌën —Nucën Papa Diosan iscëx upí ꞌinux ca uni ꞌunántioracacë ꞌiti ꞌicë —quixun caquin, unicama bana ñuixuncë ꞌaish cana judíos unicaman bëtsi bëtsi ocëma ꞌitsían. I curúsocënuaxa ax bama, Jesucristo, ami catamëtishi ca uni upí ꞌiti ꞌicë quixun a bana ꞌën ñuicëbëma ca uni ꞌëmi nishtsíanma.

¹² An mitsu ꞌunántioracanun quixun ubíocë unicama aín namiribi tëatibi ca ꞌia.

¹³ ꞌËn xucë́antu, mitsun ñu ꞌacë cupíma Cristomi catamëcë cupíshi an iscëx upí ꞌinun ca Nucën Papa Diosan mitsu caísaxa. Usa ꞌixun camina mitsux cuëëncësabi oquin ñu ꞌatima ꞌati sinántima ꞌain. Usaquin ꞌaíma camina bëtsibë nuibanani asérabi ꞌaquiananti ꞌain.

¹⁴ Nucën Papa Diosan bana ca quia: —“Mixmi bërúancacësaribi oquin camina min aintsicama nuibanan axa ꞌaquinsa ꞌicë ꞌaquinti ꞌain”. A bana quicësa oquin ꞌacë ꞌixun camina bëtsi uni nuibati ꞌain, mix bërúancacësaribi oquin. Usoquin ꞌacë ꞌixun camina Nucën Papa Diosan bana raírinëxa quicësabi oquin ꞌacë ꞌiti ꞌain.

¹⁵ Usa ꞌaínbi bëtsibë nishanani cuamianani camina mitsux Jesucristonën unimasa ꞌiti ꞌain. Usai ꞌitin rabanan camina bërúinraocati ꞌain.

Unin sináncësa oquin sinanima Nucën Papa Diosan Bëru Ñunshin Upitan sinánmicë ꞌiti bana

¹⁶ ꞌËn cana mitsu cain, mitsux cuëëncësabi oquin ñu ꞌatima ꞌaquinma camina Nucën Papa Diosan Bëru Ñunshin Upitan sinánmicësa oquinshi sinánquin ñu ꞌati ꞌain.

¹⁷ Nun sináncësa oquinshi ënë nëtënu ꞌicë ñu ꞌaquin cananuna Nucën Papa Diosan Bëru Ñunshin Upí cuëëncësama oquin ꞌain. Nucën Papa Diosan Bëru Ñunshin Upí ax ca nun sináncësa oquinu ñu ꞌati cuëënima. Usa ꞌixun camina mitsux an sinánmicë ꞌixun mitsun cuëëncë ñu ꞌatima ꞌain.

¹⁸ Mitsun aín Bëru Ñunshin Upitan sinánmicëxun sinánquin ñu ꞌacë ꞌaish camina usai ca uni ꞌiti ꞌicë quixun Moisésnën cuënëo bana quicësamaira oi ꞌicë ꞌaish ꞌuchocëma ꞌiti ꞌain.

¹⁹ Camina ꞌunanin, unin ca ꞌaisa tanquinbi tënëquinma aín cuëëncësa oquin ësa ñucama ꞌaia quixun: aín xanuma ꞌaínbi xanubë ꞌiti, xanúxmabi uni itsibë ꞌiti, ꞌimainun ñunshínquin ñu ꞌatima ꞌati.

²⁰ ꞌAnan ca ꞌaia, Nucën Papa Diosmi sinánquinma unin ꞌacë ñu rabiti, ñubë́ ꞌiti, bëtsibë nishánanti, cuamianani nishánanti, ñuñanánti, unimi pishui nishti, bënëtishi unimi nishti, anbi ñu ꞌacatsi quixun sináncë ꞌiti, ꞌimainun uni raíri, raíri unibë nishananquin amanu amanu sinánun sinánmiti, acamaribi.

²¹ ꞌImainunribi ca ꞌaia, bëtsi unin ñu cuëënti, uni ꞌati, paë́nti, picë́ntapun ꞌiti, acama. Usa ñucama ca unin aín cuëëncësa oquin ñu ꞌaquin ꞌaia. Usa ꞌain cana ën mitsu cacësaribi oquin mitsu catëcënin, usa ñua an ꞌacë unicamax ca aín unima ꞌaish Nucën Papa Diosan nëtënu abë ꞌitima ꞌicën.

²² Usa ꞌaínbi ca Nucën Papa Diosan Bëru Ñunshin Upitan sinánmicëxuan an sináncë uni ax ësai ꞌia: unicama nuibacë, chuámarua ꞌaish cuëëncë, uisa ñu cara ꞌicëbëbi chuámarua ꞌaish bënë́cëma, an ꞌatimocëxunbi uni cupicëma, cuëmëninínshi banacë, upí nuituñu, ꞌimainun Jesucristomi upiti catamëcë,

²³ rabícëma, aín cuëëncësari ꞌiisa tanquinbi tënëcë. Usa uni ñuia, ax —usai ꞌitima ca —quicë bana ca ꞌaíma ꞌicën.

²⁴ Cristo nun ꞌucha cupí i curúsocënu bama ꞌain cananuna nun nu ñunshínquin ꞌasaribi oquin ꞌatëcënuxunma ñu ꞌatimacama ëan.

²⁵ Usa ꞌain cananuna nux aín Bëru Ñunshin Upitan ꞌimicëx Nucën Papa Diosan uni ꞌixun, aín Bëru Ñunshin Upitan an nu sinánmicësabi oquin ꞌati ꞌain.

²⁶ Usa ꞌain cananuna —ꞌëx cana bëtsi unisama ꞌai —quiax rabítima ꞌain, cananuna cuëbicanani unibë nishanantima ꞌain, ꞌimainun cananuna bëtsimi nutsitima ꞌain.