Gálatas 4 - Kashibo-Kakataibo Biblia

¹ Ësaquin cana mitsu cain, aín papa bamacëbëtan ca aín ñucama ainan ꞌicëbi canicëma pain ꞌixun aín bëchicënën bitsima. Canitancëxun cuni ca biti ꞌicën. Usa ꞌaish ca a tuá aín papan ñucama axa ainan ꞌaínbi a ñucama bicëma pan ꞌaish, an aín papa ñu mëëxuncë unisaribi ꞌicën.

² Aín papan anúan aín ñu biti mënío nëtë sënë́ntamainun ca aín papan caíscë unin aín bëchicë bërúanan aín chupa acama aín papan curíquinën bixunti ꞌicën.

³ A tuásaribi ca Jesucristo ucëma pan ꞌain judíos unicama ꞌiacëxa. Usa ꞌixun ca Moisésnën cuënëo bana quicësabi oquin ꞌanan aín nuitu upí ꞌinúan unin sináncë ñuishi ꞌati sináncëxa.

⁴ Usa ꞌaínbi ca aín uti nëtë sënë́ncëbëtan Nucën Papa Diosan aín Bëchicë ënë nëtënu xuacëxa. Achúshi xanúxa bacë́ncëx canitancëx ca judíos unicama ꞌicësaribiti Moisésnën cuënëo bana, usaía judíos unicama ꞌiti, a ꞌunáncë ꞌiacëxa.

⁵ Ax ca judíos uni ꞌaíshnu nux Moisésnën cuënëo bana cuacë ꞌicë, an ꞌimicëxëshi nun ꞌuchacama tërë́ncë ꞌaish Nucën Papa Diosan bëchicë ꞌinun nu ꞌiminux uacëxa.

⁶ Mitsux camina asérabi aín bëchicë ꞌai quixunmi ꞌunánun ca Nucën Papa Diosan aín Bëchicënën Bëru Ñunshin Upí mitsubëa ꞌinun xuacëxa. Usa ꞌain camina aín bëchicë ꞌixun —ꞌën Papa Dios camina mix ꞌai —quixun Nucën Papa Dios cain.

⁷ Usa ꞌaish camina an uni ñu mëëxuncë uni ꞌicësai ꞌima xubu ꞌibu unin bëchicë ꞌicësai asérabi Nucën Papa Diosan bëchicë ꞌain. Mixmi aín bëchicë ꞌicë ca Cristo ax quiásabi oquin mitsun ꞌuchacama tërë́nquin an iscëxmi upí ꞌinun ꞌimianan aín Bëru Ñunshin Upí mitsubë ꞌinun ꞌinania.

Axa Jesucristomi catamëti unicamamia Pablo sinan

⁸ Bëráma camina —Nucën Papa Dios ca asérabi Dios ꞌicë —quixun ꞌunáncëma ꞌixun Diosma ñucama rabiquin bëtsi bëtsi ñu ꞌacën.

⁹ Usaquin bëtsi ñu rabiá ꞌixunbi camina an sinánmicëxun —Nucën Papa Dios ax ca asérabi Dios ꞌicë —quixun ꞌunanin. ¿An mitsu ainan ꞌimicëxunbi caramina uisa cupí mitsúnmi bëráma rabia ñucama rabitëcënti sinan?

¹⁰ Nucën Papa Diosan mitsu upí isnun quiax camina bërámami quiásaribiti nëtë ñui —ënë nëtëx ca bëtsi nëtësama ꞌicë —quianan ꞌuxë ñui —ënë úxëx ca bëtsi ꞌuxësama ꞌicë —quianan bari ñui ënë barix ca bëtsi barisama ꞌicë —quin.

¹¹ Usaquin sinanimi ꞌën mitsu ꞌunánmicë banacama manucësa ꞌain cana —sapi cana ñancábi mitsu ꞌunánmia —quixun sinanin.

¹² ꞌËn xucë́antu, mitsux judíos unima ꞌixun camina Moisésnëan cuënëo bana ꞌunáncëma ꞌixun a bana quicësabi oquin ꞌama ꞌain. ꞌËnribi cana —a bana quicësabi oquin ꞌacë cupí cana Nucën Papa Diosan iscëx upí ꞌai —quixun bërí sinaniman. Usa ꞌain camina mitsúxribi ꞌëx ꞌicësaribiti Nucën Papa Diosan iscëx upí ꞌinux asérabi Jesucristomishi catamëti ꞌain. ꞌËx mitsubë ꞌain camina ꞌëmi ꞌicëma ꞌain.

¹³ Camina ꞌunanin, ꞌën nami ꞌaisama ꞌixun cana bëtsi menu cuanti sinánquinbi anuxuinshi Jesucristo ñuiquin mitsu bana ñuixuntabaquin ñuixuancën.

¹⁴ ꞌËx ꞌñucë ꞌaish upíma ꞌicë isquinbi camina ꞌë timáma ꞌain. Usa ꞌixun camina Nucën Papa Diosan xucë ángel bicësa oquin upí oquin bianan Jesucristo ꞌacësa oquin ꞌë biacën.

¹⁵ ꞌË isi camina cuëëancën. ¿Usai ꞌiá ꞌaíshbi caramina bërí uisacatsi usama ꞌain? Usama ꞌaínbi cana ꞌunanin, usoti ꞌicë cuni camina mitsun bëru ëchíxun ꞌë ꞌinan ꞌitsían.

¹⁶ ¿ꞌËn mitsu asérabi cacë bana sinánquin caramina ꞌëx cana mitsumi nishi quixun sinanin? Usama ca.

¹⁷ An mitsu bana itsi ꞌunánmicë unicamax ca cëmëquin parani mitsubë upiti banaia. Usai ꞌiquinbi ca asérabi mitsu ꞌaquinti sinaníma. Mitsúnmi ꞌë sinánquinma atuishi sinánquin aín banaishi cuati ca cuëënia.

¹⁸ Usa ꞌaínbi cana mitsu cain, paránquinma unin upí oquin ñu ꞌaquincëxmi mitsux abë nuibananti ca asábi ꞌicën. Usaribi oquinmi mitsubë ꞌicë ꞌacësaribi oquin mitsubë ꞌicëmabi ꞌë sinánti ca asábi ꞌiti ꞌicën.

¹⁹ Mitsux camina ꞌën bëchicësa ꞌain. Usa ꞌain cana mitsúnmi Cristo ꞌunáncëma pain ꞌain ꞌiásaribiti mitsúxmi asérabi ami upiti catamënun quixun sinani, masá nuituti bënëtin, bacë́nuxun paë tania xanu bënë́cësaribi oi.

²⁰ ꞌËx anu mitsubë ꞌiti cana cuëënin. ꞌËx anu ꞌixun cuni cana mitsubë banaquin, upí oquin mitsun sinan ꞌunánquin, mitsu upí oquin ꞌësëtsian. Mitsubëma ꞌixun cana uisai caramina ꞌicani quixun ꞌunaniman. Usa ꞌain cana uisaquin carana mitsu cati ꞌai quixun ꞌunaniman.

Agarcëñun Sara ñuicë bana

²¹ Mitsux Moisésnën cuënëo bana quicësabi oquin ꞌati cuëëncë ꞌixun camina ꞌën ñucácëxun ꞌë cati ꞌain, ¿caramina uisai cara a bana quia quixun upí oquin ꞌunáncëma ꞌain?

²² A banax ca quia, Abraham ca rabë́ bëbu bëchicëñu ꞌiacëxa. Bëtsin titax ca Abrahamnën xanúan ñu mëëmicë, Agar cacë xanu, ꞌiacëxa. Bëtsix ca Abrahamnën xanun tuábi ꞌiacëxa.

²³ An Abrahamnën xanu ñu mëëxuncë xanun tuacëx ca camabi tuásaribi ꞌaish unin bëchicëishi ꞌiacëxa. Usa ꞌaínbi ca bëtsix Abrahamnën xanu, Sara, ax tuacëma ꞌaíshbi Nucën Papa Diosan Abraham cásabi oi tutancëx bacë́ancëxa.

²⁴ Ënëx ca ësa ꞌicën. Ënë xanu rabë́ ꞌimainun tuá rabë́ ñui quicë bana isquin cananuna bëtsi bana rabë́ribi sinánti ꞌain, ësai quicë: A bana achúshinëx ca Cristo ñui quicë ꞌicën. A bana ca asérabi ꞌicë quixun sinani Cristomi catamëcë unicamax ca Saran rëbúnquisa ꞌicën. Bëtsix ca Nucën Papa Diosan Moisés cuënëomia bana a ñui quicë ꞌicën. Aín bashi Sinaí, anuax ꞌitsa nëtë abë banaquin ca Nucën Papa Diosan usai ca ꞌën uni ꞌiti ꞌicë quixun Moisés cacëxa. A bana quicësabi oquin aín unicaman ꞌanun ꞌinan ꞌaínbi ca ꞌitsa unin, a ꞌacë cupíshi cana Nucën Papa Diosan uni ꞌai quixun sinania. Usaquin sináncë unicama ax ca Agarnën rëbúnquisa ꞌicën.

²⁵ Aín bashi Sinaí ax ca Arabia menu ꞌicën. Aín bashi Sinaínuxuan abë banaquin Nucën Papa Diosan Moisés, usai ca aín unicama ꞌiti ꞌicë quixun cá bana ꞌacë cupí cana Nucën Papa Diosan uni ꞌai quixun sináncë unicamax ca Jerusalénu ꞌicë unicamasa ꞌicën. Usaquin sináncë unicamax ca Agarnën tuá ꞌiásaribi ꞌicën. Usa ꞌaish ca ësa ꞌicën. Nucën Papa Diosan, min xanun ca mi tuaxunuxun ꞌaia cá bana sinánquinma ca Abrahamnën bëchicëñu ꞌiti cuëënquinshi Agar cacë xanumi bëchiacëxa. Usa ꞌaish ca a tuá a Nucën Papa Diosan Abraham ñuixuan, ama ꞌiacëxa.

²⁶ ꞌItsa uníxa Agarnën tuá ꞌiásaribi ꞌaínbi cananuna usama ꞌain. Nux cananuna Nucën Papa Diosan nëtënu ꞌicë Jerusalén anu abë ꞌiti uni ꞌain.

²⁷ Abrahamnën xanu ñui ca cuënëo bana ësai quia: An tuacë xanun rëbúnquinëxa ꞌicësamaira oi ca —ꞌën cana tuaima —quixuan an sináncë xanu aín rëbúnqui ꞌaisamaira ꞌiti ꞌicën. Usa ꞌain camina mix tuatima ꞌaish tuáñuma xanu ꞌaíshbi —tuáñu cana ꞌiti ꞌai —quixun ꞌunani cuëënti ꞌain; tuacën paë tancëma xanu ꞌaíshbi camina tuá ꞌimainun rëbúnquiñu ꞌicë cupí chuámarua tani cuëënti ꞌain.

²⁸ ꞌËn xucë́antu, Nucën Papa Diosan Abraham cacësabi oquin ca Isaac aín titan tuacëxa. Usaribiti cananuna nux Nucën Papa Diosan mëníosabi oi Cristo cupí ainan ꞌain.

²⁹ Bëráma ca Agarnën tuá, axa camabi tuá ꞌicësaribi unin bëchicëshi ꞌinun aín titan tua, an, Isaac, Nucën Papa Diosan cacësabi oquian Abrahamnën bëchicë, a bëtsi bëtsi ocëxa. Usaribi oquin ca an Nucën Papa Diosnan ꞌinuxun, usai ca judíos unicama ꞌiti ꞌicë quicë bana ꞌacë unin, axa Nucën Papa Diosnan ꞌinux Cristomi catamëcë unicama bëtsi bëtsi oia.

³⁰ Usa ꞌaínbi ca Nucën Papa Diosan bana cuënëo ësai quia: “Aín xanúan ñu mëëmicë xanun tuacën rëbúnquinëx ca Nucën Papa Diosan cásabi oi Abrahamnën xanun tuacën rëbúnquisaribi ꞌitima ꞌicën. Usa ꞌain ca aín xanúan ñu mëëmicë xanubë aín tuá ashiti Abrahamnën xubunuax utëcëntimoi cuanti ꞌicën”.

³¹ ꞌËn xucë́antu, usa ꞌain cananuna nux Agarnën tuá ꞌiásaribima ꞌaish Saran tuása ꞌain.