Gálatas 3 - Kashibo-Kakataibo Biblia

Moisésnën cuënëo bana quicësabi oi ꞌicë cupíma Jesucristomi catamëcë cupíshia uni upí ꞌiti bana

¹ Gálatas unicama, mitsux camina sinánñumasa ꞌain. Unin ꞌucha cupía ax i curúsocënu bama Jesucristo ñuiquin cananuna mitsu upí oquin bana ñuixuancën. Ñuixuncëbi ca uni raírinën bëtsi bana ñuixunquin, Jesucristo ñui quicë bana cuaxunma ꞌanun quixun mitsu paránxa.

^2-3 Camina ꞌë cati ꞌain, ¿Moisésnëan usai ca judíos unicama ꞌiti ꞌicë quixun cuënëo banami cuacë cupí cara Nucën Papa Diosan aín Bëru Ñunshin Upí mitsubëa ꞌinun mitsu ꞌináncëx? Usama ca. Jesucristo ñui quicë bana cuatími ami catamëcëxuinshi ca aín Bëru Ñunshin Upí mibëa ꞌinun mitsu ꞌináncëxa. ¿Usa ꞌixunbi caramina mitsun Nucën Papa Diosan Bëru Ñunshin Upitan mitsu upí ꞌimiti sinántancëxunbi —ꞌën ñu upí ꞌacë cupíshi ca Nucën Papa Diosan ꞌë upí isia —quixun sinanin? Usaquin sinani camina sinánñuma unicamasa ꞌain.

⁴ ¿Ñancábi caramina cëmëishi tëmëraibi Jesucristomi sináncën? Mitsúxmi usai ꞌicë ax ñancábimi usai ꞌicëma ꞌitibi ca ꞌia.

⁵ Nucën Papa Diosan ca aín Bëru Ñunshin Upí ꞌinánan uni itsían ꞌacëma ñu mitsu ꞌamia. ¿Uisa cupí cara mitsu usoquin ꞌamia? An ca usaquin ꞌaia, mitsúnmi Moisésnëan usai judíos unicama ꞌiti cuënëo bana cuacë cupíma mitsúxmi Jesucristo ñui quicë bana cuati, ax ca asérabi ꞌëbë ꞌicë quixun sinani, ami catamëcë cupí.

⁶ Abrahamnën ca sináncëxa, Nucën Papa Diosan ca ax quicësabi oquin ꞌati ꞌicë quixun. Usaquin sináncë cupí ca Nucën Papa Diosan Abraham aín nuitu upí ꞌicë isacëxa.

⁷ Usa ꞌain camina mitsun ꞌunánti ꞌain, an ax quicësabi oquin ca Nucën Papa Diosan ꞌaia quixun sinani ami catamëcë unicamax ca axa ꞌiásaribiti Nucën Papa Diosmi catamëcë ꞌaish Abrahamnën rëbúnqui ꞌia.

⁸ —Judíos unicamaishima camabi uni cana axa Jesucristomi catamëtia nuibaquin aín nuitu upí isti ꞌai —quixun ꞌunánquin ca Nucën Papa Diosan an Abraham ësaquin cacë bana aín uni cuënëomiacëxa: “Mi cupí ca camabi menu ꞌicë unicama ꞌën ꞌimicëx aín nuitu upí ꞌaish chuámarua tani cuëënti ꞌicën”.

⁹ Usa ꞌain ca ui unicamax cara Abraham ꞌiásaribiti —Nucën Papa Diosan ca aín quicësabi oquin ꞌaia —quixun sinani ami catamëtia ax ca Abraham ꞌiásaribiti Nucën Papa Diosan ꞌimicëx aín nuitu upí ꞌaish chuámarua tani cuëënti ꞌicën.

¹⁰ Usa ꞌaínbi ca ësairibi a bana usai ca judíos unicama ꞌiti ꞌicë quixun cuënëo ax quia: “Ui unicaman cara camabi cuënëo bana quicësabi oquinra ꞌacëma a ca Nucën Papa Diosan uisa cara oti ꞌicë usoquin ꞌati ꞌicën”. A bana asérabi ꞌain cananuna ꞌunanin, a bana quicësabi oquin ꞌacë ꞌaish cana Nucën Papa Diosan iscëx ꞌuchañuma ꞌai quixun sináncë unix ca a banacama quicësabi oquinra ꞌacëma ꞌicë Nucën Papa Diosan uisa cara oti ꞌicë usoquin ꞌacë ꞌiti ꞌicën.

¹¹ Nucën Papa Diosan bana cuënëo ca ësaribiti quia: “Ui unicama cara Nucën Papa Diosan upí isia, ax ca asérabi ami catamëti tsóti ꞌicën”. Usaquin cuënëo bana ꞌunánquin cananuna ꞌunanin, Moisésnëan usai ca judíos unicama ꞌiti ꞌicë quixun cuënëo bana ꞌacë cupíma ca Nucën Papa Diosan uni ainan ꞌicë upí isia, quixun.

¹² Moisésnën cuënëo banax ca quia: “Nucën Papa Diosbë upí ꞌinux Moisésnën cuënëo bana quicësabi oi ꞌiti sináncë unin ca asérabi a banacama quicësabi oquin ꞌati ꞌicën”. Usai quibi ca, ami catamëtishi ca uni Nucën Papa Diosbë upí ꞌicë quima.

¹³ A bana, usai ca judíos unicama ꞌiti ꞌicë quixun Moisésnën cuënëo, a banacamaxa quicësabi oquiinra ꞌacëma ꞌicë, nu uisa cara oti ꞌicë usoquin ꞌati ꞌixunbi ca Nucën Papa Diosan nu ꞌaquinma, Cristo, nun ꞌucha cupí tëmëramia cupí, nu ami catamëtia uisotima ꞌicën. Camabi unin ꞌucha cupí ca ꞌuchañuira uni ꞌicësari Cristo i curúsocënu bamacëxa, Nucën Papa Diosan bana cuënëo ësai quicësabi oi: “Ui unix cara i curúsocënu matáscë ꞌicë ax ca asérabi ꞌuchañuira ꞌaish Nucën Papa Diosan uisaira cara oti ꞌicë usoquin ꞌacë ꞌiti ꞌicën”.

¹⁴ Nucën Papa Diosan Abraham cásabi oía judíosma unicamaxribi Nucën Papa Diosnan ꞌinun ca Cristo Jesús ꞌuchañuira uni ꞌicësari bamacëxa. Ax usai bama cupí ca axa ami catamëcë unicama Nucën Papa Diosan aín Bëru Ñunshin Upí ꞌinania, ax quiásabi oquin.

Moisésnën cuënëo bana ꞌimainun Nucën Papa Diosmi catamëti quicë bana

¹⁵ ꞌËn xucë́antu, ësa ca ënë bana ꞌicën. Achúshi unían, usa ca ënë ñu ꞌiti ꞌicë quixun quiricanu cuënëocë ꞌicë ca uinu ꞌicë unínbi a bana tërë́caquin bëtsi otëcëntima ꞌicën.

¹⁶ Usaribi ca Nucën Papa Diosan Abraham cá bana ꞌicën. An ca Abraham aín rëbúnqui achúshi ñuiquin, a cupí ca camabi menu ꞌicë unicama an iscëx upí ꞌaish cuëënti ꞌicë quixun cacëxa. Usaquian Nucën Papa Diosan Abraham cá bana ax ca “aín rëbúnquicama” ñui quima, “aín rëbúnqui achúshi” ñui quia. Usa ꞌain ca aín rëbúnqui achúshi a ñuia quiá ax Cristo ꞌicën.

¹⁷ Ësa ca a bana ꞌicën. Nucën Papa Diosan ca aín rëbúnqui achúshi ñuiquin, a cupí ca camabi menu ꞌicë unicama an iscëx upí ꞌaish cuëënti ꞌicë quixun caquin Abrahambëtan ashiquin mëníocëxa. Usaquian mënío ꞌixun ca cuatrocientos treinta baritia inúcëbëtan Nucën Papa Diosan usai ca judíos unicama ꞌiti ꞌicë quicë bana Moisés cuënëomiacëxa. Usaquin cuënëomiquinbi ca an Abrahambëtan mënío bana ñancáishia ꞌinun Nucën Papa Diosan tërë́cama ꞌicën.

¹⁸ Moisésnëan usai ca judíos unicama ꞌiti ꞌicë quixun cuënëo bana quicësabi oquin ꞌacë cupía uni Nucën Papa Diosan iscëx upí ꞌain ca an Abrahambëtan mënío bana ñancáishi ꞌitsíanxa. Usa ꞌaínbi ca usama ꞌicën. A ñuiquian an Abrahambëtan mënío achúshi uni a cupíshi ca uni ami catamëtia Nucën Papa Diosan upí isia.

¹⁹ ¿An Abraham cá bana xënibua ꞌaínbi asérabi ꞌain cara uisacasquin Nucën Papa Diosan usai judíos unicama ꞌiti bana cuënëonun Moisés cacëx? Uisa ñu ꞌati cara ꞌaisama ꞌicë quixuan unin ꞌunánti cupí ca a bana judíos unicama ꞌináncëxa. Abrahamnën rëbúnqui, Cristo, axa utia Abraham ñuixuan, a utámainuan a bana quicësabi oquin pain ꞌanun ca Nucën Papa Diosan a bana Moisés cuënëomiacëxa. Nucën Papa Diosan cacëxuan ángelcaman a cacë bana ca Moisésnën cuënëo bana ꞌiacëxa.

²⁰ An cacë bana ñuiquin judíos unicama canun Moisés ꞌiminuxbi ca Nucën Papa Dios achúshi, ax Abrahambëbi banacëxa, uni itsi camima.

Uisa cupí cara Nucën Papa Diosan usaía uni ꞌiti bana Moisés ꞌináncëxa quicë bana

²¹ ¿ꞌËx ësai qui carana Nucën Papa Diosan Abraham cá banaxa bëtsi ꞌimainun ca an Moisés cá banáxribi bëtsi ꞌicë quin? Usama ca. Moisésnën cuënëo bana quicësabi oquin ꞌacë cupía uni aín nuitu upí ꞌaish Nucën Papa Diosnan ꞌain, ca a bana ꞌacë cupíshi uni Nucën Papa Diosan iscëx upí ꞌitsíanxa.

²² Usa ꞌaínbi ca Nucën Papa Diosan bana cuënëo —camabi unin ca ñu ꞌatima ꞌaia —quia. A banaxa asérabi ꞌain ca axa Jesucristo cupí ami catamëcë unicamaxëshi Nucën Papa Diosan iscëx upí ꞌiti ꞌicën, an aín rëbúnqui achúshi ñuiquin Abraham cásabi oi.

²³ Ami catamëtinu ië́ti Jesucristoa utámainun ca judíos unicaman Moisésnën cuënëo bana quicësabi oquin ꞌati ꞌiacëxa.

²⁴ Usa ꞌain cananuna an bërúancë xanun bana tuacën tancësaribi oquin, Moisésnën cuënëo bana tanquin, a bana quicësabi oquinshi ꞌaquin, uisa ñu ꞌati cara asábi ꞌicë, uisa ñu ꞌati cara ꞌaisama ꞌicë quixun ꞌunáncën, aminu catamënuan Cristo utámainun. Usai ꞌia ꞌaíshbi cananuna Cristo uá ꞌain, ami catamëtia nun ꞌucha tërë́ncë ꞌaish Nucën Papa Diosan iscëx upí ꞌain.

²⁵ Nux ami catamënuan Cristo uá ꞌain cananuna ami catamëquin an bërúancë xanun bana tuacën tancësaribi oquin Moisésnën cuënëo bana tancë cupíma, Jesucristomi catamëcë cupíshi Nucën Papa Diosan iscëx upí ꞌain.

²⁶ Usa ꞌain camina mitsux Cristo Jesúsmi catamëti abë ꞌaish Nucën Papa Diosan bëchicë ꞌain.

²⁷ Ami catamëtia ainan ꞌicë nashimicë ꞌaish camina unían aín chupa xëni ꞌaisama pëquin chupa ió pañucë usaribi ꞌaish mibëa Cristo ꞌain min nuitu upíira ꞌain.

²⁸ Judíos unicama ꞌimainun axa griego banan banacë judíosma unicama, an uni ñu mëëxuncë unicama ꞌimainun an uni ñu mëëxuncëma unicama, bëbu ꞌimainun xanu, acamáxbi camina Jesucristonan ꞌaish Nucën Papa Diosan iscëx bëtsisaribi ꞌaish achúshisa ꞌain. Jesucristonan ꞌixun camina camaxunbi bëtsin sináncësaribi oquin sinanin.

²⁹ Mitsux Cristonan ꞌaish camina axa ꞌiásaribiti Nucën Papa Diosmi catamëcë ꞌaish Abrahamnën rëbúnqui ꞌain. Usa ꞌaish camina Nucën Papa Diosan aín rëbúnqui ñuiquin Abraham cásabi oi aín uni ꞌain.