Gálatas 2 - Kashibo-Kakataibo Biblia

Jesucristonën aín bana ñuixunun caíscë raírinëan cuëënquin Pablo bia

¹ Usa ꞌain cana catorce baritia ꞌicëbë Tito buani, Bernabébë Jerusalénu cuantëcëancën.

² Nucën Papa Diosan ꞌë sinánmicësabi oi Jerusalénu cuanx bëbax cana anu ꞌicë axa Jesucristomi catamëcë unin cushicamabëshi banacën. Banaquin cana ꞌën judíosma unicama Jesucristo ñuiquin ñuixuncë banacama ñuixuancën, usaquin cana unicama ca quixun caquin. ꞌËn usaquin bana ñuixunti cara atun sináncëx asábi ꞌicë quixun ꞌunánuxun cana ꞌën judíosma uni ñuixuncë banacama chiquinaquin cacën, ꞌën uni ñuixuncë bana axa ꞌëx cëmëi banacësa ꞌaish ñancáishi ꞌitin rabanan.

³ ꞌËn usoquin judíosma uni bana ñuixuncë chiquinaxuncëxun ca —asábi ca —quixun sinánquin —griego uni ꞌicë camina Tito judíos unicama ꞌicësaribitia ꞌinun ꞌunántioracamiti ꞌai —quixun ꞌë cáma ꞌicën.

⁴ Usa ꞌaínbi ca a cushi unicaman ꞌë uisaquin cacëbëmabi, nuxnu anu timë́anbi ax isa Jesucristomi catamëcë ꞌicë quibi cëmëcë unicama, axribi anu atsíancëxa. A unicamax ca, judíosma unicama ca Jesucristomi catamëcë ꞌaish judíos unicama ꞌicësai ꞌinun ꞌunántioracacë ꞌiti ꞌicë quixun nu sinánmisa tani, uisa cupí caranuna judíosma unicama ꞌunántiocë ꞌinun ꞌimicëma ꞌai quixun isi uacëxa. A unicaman, judíosma uniribi ca ꞌunántiocë ꞌiti ꞌicë quixun caquin nu sinánmisa tancëbëtanbi ca axa Jesucristomi catamëcë unin cushicaman Tito, ꞌunántioracamicëma ꞌicëbi nu uisaquinbi cáma ꞌicën.

⁵ A unicaman judíosma unicamax ca judíos unicama ꞌicësa ꞌiti ꞌicë quixun nu sinánmisa tancëxunbi cananuna, mitsúnmi Jesucristomi catamëtishi ca uni ië́ti ꞌicë quixun asérabi ꞌunánti cupí, atun nu cacësa oquin sinánma ꞌain.

⁶ —Axa ami sináncë unicaman cushi ꞌinun Jesucristonën ꞌimicë ca atux ꞌicë —quixun unin cacë ꞌixunbi ca a unicaman bëtsi ñu ꞌanun ꞌë cáma ꞌicën. A unicamax nun cushi ꞌaínbi cana ꞌën ꞌunanin, Nucën Papa Diosan ca aín nuitu ꞌunánquin, camabi uni asérabi uisa uni cara quixun ꞌunania.

⁷ Bëtsi ñu ꞌanun ꞌë caquinmabi ca a cushi unicaman, judíos unicama bana ñuixunuan Pedro ꞌamicësaribi oquin ca Nucën Papa Diosan judíosma unicama bana ñuixunun ꞌë ꞌamiaxa, quixun ꞌunáncëxa.

⁸ An judíos unicama Jesucristo ñuiquin bana ñuixunun Pedro ꞌimia ꞌixun ca ꞌëribi judíosma unicama bana ñuixunun ꞌimiacëxa.

⁹ Nucën Papa Diosan usaquin ꞌë ꞌimicë ꞌicë ꞌunánquin ca Jacobo, Pedro, Juan, acaman atux Jesucristomi catamëcë unicaman cushi ꞌixun Bernabécëñun ꞌë aín mëcën ꞌinánquin, —asérabi camina nu ꞌacësaribi oquin Cristo ñuiquin aín bana ñuixunun Nucën Papa Diosan caíscë ꞌai —quixun canan —nun nu judíos unicama bana ñuixunmainun camina mitsun judíosma unicama bana ñuixuni cuanti ꞌai —quixun nu cacëxa.

¹⁰ Canan ca ësoquinshi nu cacëxa, —camina ñuñuma uni ꞌaquinti ꞌai —quixun. Usoquin ꞌati cana sináncën.

Antioquíanuxuan Pablonën Pedro ñu ca

¹¹ Usa ꞌain cana ꞌëx Antioquía ëmanu ꞌixun Pedro Jerusalénuaxa ucë upí oquian asérabi Jesusan bana ꞌaiamoquin ñu cacën.

¹² Jacobonëan xucë́xa uni raíri ucëma pain ꞌain ca Pedronën judíosma unicamabëtan piacëxa. Usaquin ꞌaxunbi ca Jacobonëan xucë unicama ucëbëtan atubëtan piquinma, judíosma unicama ëancëxa, axa Jerusalénuax ucë unicaman a ñu cati rabanan.

¹³ Pedronëan usaquin ꞌaia isquin ca axa Jesucristomi catamëcë judíos unicama raírinënribi, judíosma unicama axribi Jesucristomi sináncë ꞌicëbi, atubëtan piquinbi ëancëxa. A unicamaxa usai ꞌia isi ca Bernabénëxribi usaribiti ꞌiacëxa.

¹⁴ Acamaxa —judíos uni cupíma Jesucristomi catamëtíshi ca uni ië́ti ꞌicë —quixun ꞌunanibi usai ꞌia isquin cana axa Jesucristomi catamëcë unicama timë́cënuxun Pedro ësaquin cacën: ¿Mix judío uni ꞌaíshbi judíoma uni ꞌicësai ꞌiquinbi caramina uisa cupí judíosma unia judíos unicama ꞌicësai ꞌinun quixun cain?

Judíos unicamaxa judíosma unicama ꞌicësaribiti Nucën Papa Diosnan ꞌiti bana

¹⁵ ꞌË ꞌimainun ꞌëbë ꞌicë unicamax cananuna judío unin rëbúnqui ꞌaish judío uni ꞌain. Nux cananuna an Nucën Papa Diosan bana ꞌunáncëma judíosma unicamasaribima ꞌain.

¹⁶ Usa ꞌixunbi cananuna ꞌunanin, Moisésnën usai ca judíos unicama ꞌiti ꞌicë quixun cuënëo bana quiásabi oquian ñu ꞌacë cupíma Jesucristomi catamëcë cupíshi ca uni Nucën Papa Diosan aín ꞌuchacama tërë́nquin ainan isia. Usaquin ꞌunani cananuna nuxribi Nucën Papa Diosan iscëx upí ꞌinux Jesucristomi catamëacën. Usai ca unicama ꞌiti ꞌicë quicë bana ꞌacë cupíma ca Nucën Papa Diosan uni ainan ꞌicë upí isia.

¹⁷ Nun ꞌucha sinánquin cananuna nun ꞌucha tërë́nquin nu ië́minun Cristo cain. ¿Usaquin caquin caranuna Cristonën ca nu ꞌuchañu ꞌimia quixun cain? Usama ca.

¹⁸ —Nun ꞌacë upí ñu a cupíma Jesucristomi catamëcë cupíshi cananuna Nucën Papa Diosan iscëx abë upí ꞌai —quixun ꞌunáncë ꞌixunbi, amiribishi —ꞌën upí ñu ꞌacë cupí cana Nucën Papa Diosan iscëx upí ꞌai —quixun sináncë ꞌaish cana Nucën Papa Diosan iscëx ꞌuchañumama ꞌain.

¹⁹ Moisésnëan usai ca judíos unicama ꞌiti ꞌicë quixun cuënëo bana quicësabi oquin sënë́onquin ꞌacëma ꞌaish cana ië́timoi bamati ꞌiacën. Usai ꞌicëbi ca Jesucristomi catamëcë cupíshi Nucën Papa Diosan ax cuëëncësabi oi ꞌinun, ꞌën ꞌuchacama tërë́nquin ꞌë ainan ꞌinun ië́miacëxa.

²⁰ ꞌUchatëcënuxunma ashiquin ꞌën ꞌuchacama ëni cana Cristobë bamacësa ꞌain. Usa ꞌaish cana ꞌëshima, Cristo ax ꞌëbë ꞌain, aín cushínbi ax cuëëncësa oíshi ꞌin. Nucën Papa Diosan Bëchicë, axa ꞌë nuibati bamatsianxmabi ꞌën ꞌucha cupí bama, ami catamëti cana ax ꞌëbë ꞌain, ax cuëëncësabi oi ꞌin.

²¹ Moisésnëan usai ca judíos unicama ꞌiti ꞌicë quixun cuënëo bana quicësabi oquin ꞌacë cupí ca Nucën Papa Diosan uni ainan ꞌicë upí isia quixun sináncë ꞌaish cana Cristo bama ax ca ñancáishi ꞌicë quicësa ꞌitsían. Usa ꞌaínbi cana, Nucën Papa Diosan ca aín Bëchicë ñancábi bamanun xuacëxa quixun sinanima, asérabi ami catamëtin.