Gálatas 1 - Kashibo-Kakataibo Biblia

Galacia menuaxa ax Jesucristomi catamëcë unicama Pablonën quirica cuënëoxuan

¹ ꞌËx cana Pablo ꞌain. Unin ca Jesucristo ñuiquin uni bana ñuixunun ꞌë caísama ꞌicën. Nucën Papa Dios, an a bamacë ꞌicëbi baísquimicë, abëtan ca Jesucristonën aín bana ñuixunun ꞌë caísacëxa.

² Ënu ꞌicë axa ami catamëcë unicamabëtan cana Galacia mecamanu ꞌicë ëmacamanuaxmi Jesucristomi catamëcë ꞌicë, ënë quirica mitsu cuënëoxunin.

³ Nucën Papa Diosbëtan Nucën ꞌIbu Jesucristonën mitsu nuibaquin ꞌaquincëxmi chuámarua ꞌaish bucucanti cana cuëënin.

⁴ Ënë menu ꞌicë ñuishi ꞌatia an sináncë unicaman ꞌacësaribi oquin ñu ꞌatima ꞌati rabanan nu ië́mi ca ax bamatsianxmabi nun ꞌucha cupí bamacëxa, Nucën Papa Dios cuëëncësabi oi.

⁵ Nucën Papa Dios ax ca unicaman xënibua ꞌaínbi rabicë ꞌiti ꞌicën. Usaquin ca ꞌati ꞌicën.

Jesucristomi catamëtishi ca uni Nucën Papa Diosan iscëx upí ꞌicë quicë bana

⁶ Cristonën nuibacë ꞌaíshmi ainan ꞌinúan Nucën Papa Diosan caísquin sinánmicë ꞌixunbimi mitsun aín bana ënquin bëtsi bana cuacëbëtan, cana uisacatsi caramina usari ꞌicani quixun sinanin.

⁷ Anúan uni aín ꞌucha tërë́ncë ꞌaish Nucën Papa Diosnan ꞌinux ië́ti bëtsi bana ca ꞌaíma ꞌicën. Usa ꞌaínbi ca uni raírinën mitsu ꞌatimaquin sinánmiquin a bana bëtsi oisa tanquin bëtsi oquin ñuia.

⁸ Uin cara nun nu Cristo ñuiquin mitsu ñuixuncë Nucën Papa Diosnan ꞌinux anun uni ië́ti bana, abi ñuixunquinma bëtsi bana mitsu ñuixunia, a ca Nucën Papa Diosan uisa cara oti ꞌicë usoquin ꞌati ꞌicën. Usoquin ca ꞌë ꞌimainun naínuax ucë ángelribi, bëtsi bana uni ñuixuncë ꞌicë, ꞌati ꞌicën.

⁹ ꞌËn cacësaribi oquin cana mitsu catëcënin, ui unin cara nun ñuixuncëxunmi cuacë a banama bëtsi bana mitsu ñuixunia, a ca Nucën Papa Diosan uisa cara oti ꞌicë usoquin ꞌati ꞌicën.

¹⁰ ¿Ësaquin mitsu caquin carana unían ꞌëx cana asérabi upí ꞌai quixun ꞌë rabiti sinan? Usaquin sinánquinma cana Nucën Papa Diosan ꞌë upí isti sinan. ¿Carana unicamabë upí ꞌiti sinan? Cana usaquin sinaniman. Nucën Papa Diosma unishi cuëënmiti sinani cana Cristonën unima ꞌitsían.

Uisax cara Pablo an Jesucristonën bana uni ñuixuncë uni ꞌiacëxa quicë bana

¹¹ ꞌËn xucë́antu, mitsúnmi ꞌunánun cana ësaquin mitsu cain, Jesucristo ñui quicë bana ꞌën mitsu ñuixuncë ax ca unínbia sináncë banama ꞌicën.

¹² A bana cana unin ñuia cuacëma ꞌain. Uinu ꞌicë unínbi ca a bana ꞌë ꞌunánmicëma ꞌicën. Jesucristonënshi ca a bana ꞌë ꞌunánmiaxa.

¹³ ꞌËn judíos unicama cuëëncësa oquin ñu ꞌaia unin ñuia camina cuacën. ꞌËn cana axa Jesucristomi catamëcë unicama ꞌaisamaira oquin bëtsi bëtsi ocën, Jesucristomi sinánti bana ënun quixun.

¹⁴ Usoquin ꞌanan cana judíos unin sináncësa oquinshi sináncën. ꞌËn aintsi ꞌëbë sënë́nburibi an ꞌacësamaira oquin cana uni apáncaman ꞌë ꞌunánmicësa oquinshi ꞌën chaitinën ñuiasabi oquin ꞌaisa tancën, ꞌëx asérabi judío uniira ꞌixun.

¹⁵ Usai ꞌiabi ca Nucën Papa Diosan, ꞌën titan pucu mëucüabi ꞌë aín bana ñuixunun caísa ꞌixun nuibaquin asérabi ainan ꞌinun ꞌë sinánmiquin,

¹⁶ aín Bëchicëmi catamëti ꞌunánmianan, atúxribia ami catamënun judíosma unicamaribi bana ñuixunun ꞌë ꞌimiacëxa. Usaquin ꞌanúan ꞌimicëxun cana uibi uisai carana ꞌiti ꞌai quixun ñucáma ꞌain.

¹⁷ ꞌËn a ꞌunáncëma pain ꞌaían a pain aín bana ñuixunun Cristonën caísa uni camabi ñucati cana Jerusalénu cuánma ꞌain. Anu cuaníma cana Arabia cacë menushi cuantancëx Damásconu cuantëcëancën.

¹⁸ Rabë́ ꞌimainun achúshi bari inúcëbë pain cana Jerusalénu Pedro isi cuancën. Cuanx cana anu abë rabë́ semana ꞌimainun achúshi nëtë ꞌiacën.

¹⁹ Aribia Nucën ꞌIbu Jesusan aín bana ñuixunun caísa uni raíri isquinmabi cana Jacobo, Nucën ꞌIbu Jesusan xucën, ashi isacën.

²⁰ ꞌËn a cuënëoquin mitsu cacë bana ënëx ca cëmëma ꞌicë quixun ca Nucën Papa Diosan ꞌunania.

²¹ Jerusalénu ꞌitancëx cana Siria me ꞌimainun Cilicia menu cuancën.

²² Usa ꞌain ca Judea menu ꞌicë ëmacamanu ꞌicë axa Jesucristomi catamëcë unicaman ꞌë ꞌunánma ꞌicën.

²³ ꞌUnánquinmabi ca ësaquian ꞌë ñuicania cuacëxa: An nu bëtsi bëtsi o uni, an ca bërí Jesucristomi catamënun quixun unicama bana ñuixunia, ami catamëtia ënun quixun unicama bëtsi bëtsi o ꞌixunbi.

²⁴ Usaquian ꞌë ñuia cuaquin ca Nucën Papa Dios rabiacëxa.