Filipenses 4 - Kashibo-Kakataibo Biblia

Nucën ꞌIbu Jesucristonan ꞌaish cuëënti bana

¹ ꞌËn xucë́antu, mitsu nuibaquin sinánquin mitsu istisa tani cana cuëënin. ꞌËn mitsu ñuixuncëxmi Jesucristomi catamëcë cupí cana cuëëinra cuëënin. Mitsux usai ꞌicëbë cana cupí bitsi cuëëncësaribi oi cuëënin. Usa ꞌain cana nuibaquin mitsu cain, mitsun ꞌacësabi oquin camina ënquinma Nucën ꞌIbu Jesucristomi catamëquin an cacësabi oquin ꞌati ꞌain.

² Evodiacëñun cana Síntiqueribi cain, mitsux cuamianancë ꞌaíshbi camina Nucën ꞌIbu Jesucristonan ꞌaish cuamiananima bëtsin sináncësabi oquin sinani nuibananti ꞌain.

³ An ꞌëbëtan Jesucristo ñuiquin uni bana ñuixuncë a cana ësoquin cain, ënë xanu rabë́ camina bëtsibë upí ꞌinun ꞌaquinti ꞌain. Atun ca ꞌë ꞌimainun Clemente, ꞌimainun anribia ꞌën ꞌacësaribi oquin aín bana ñuixuncë a unicamabëtan, Jesucristomia sinánun unicama ꞌaquianxa. An usoquin uni ꞌaquincë unicaman anë ca Nucën Papa Diosbë ꞌitioquian aín nëtënu ꞌicë quiricanu cuënëo ꞌicën.

⁴ Mitsux camina Nucën ꞌIbu Jesucristonan ꞌai quixun sinani camina camabi nëtën uisa ñu cara ꞌicëbëbi chuámarua tani cuëënti ꞌain. Usai ꞌinun caxunbi cana mitsu catëcënin, chuámarua ca ꞌican.

⁵ Uisa ñu cara ꞌicëbëbi nishímami upí sinánñu ꞌicëa camabi unin mitsu isti cana cuëënin. Nucën ꞌIbu Jesús anun utëcënti nëtë ca ꞌuramatia.

⁶ Usa ꞌain camina uisa ñu cara ꞌicëbëbi bënë́tima ꞌain. Bënë́quinma camina abë banaquin Nucën Papa Dios a ñucama ñuiquin cati ꞌain. An mitsu ꞌaquinun ñucáquin camina ami catamëquin —asábi ca —quixun rabiquin cati ꞌain.

⁷ Usaquinmi cacëxun cuaquin ca Nucën Papa Diosan mitsu nuibaquin bënëtima chuámarua ꞌinun mitsu ꞌimiti ꞌicën, uisa ꞌaish cara aín uni usai ꞌia quixuan uni raírinën ꞌunáncëbëtanmabi. Usaquin ꞌimianan ca Jesucristobë ꞌicë mitsun sinan ꞌimainun mitsun nuitu upí ꞌinun bërúanti ꞌicën.

Upí ñuishi sinánti bana

⁸ ꞌËn xucë́antu, ësaquinshi cana mitsu cain, unían ësa ñu ꞌaia isquin camina mitsun —ax ca asábi ꞌicë —quixun sinánti ꞌain, cëmëma banacama ꞌimainun —upí ca —quixun ñuicë ñucama, ꞌimainun uni itsi paránquinma upí ñu ꞌacë, ꞌimainun ñu ꞌatima ꞌati sinánquinma upíshi ꞌiti sináncë, ꞌimainun bëtsibë upiti nuibananti, acama ꞌimainun rabiquian unin —upí ca a uni ꞌicë —quixun mitsu ñuixuncë, acama. ꞌImainun camina uisa ñu ꞌati cara upí ꞌicë, uisa ñu ꞌati ñui cara —asábi ca —quiax uni quiti ꞌicë, acama sinánti ꞌain.

⁹ ꞌËn mitsu ꞌunánmicë banacama quicësabi oquin ꞌanan camina, ꞌën ꞌunánmicëxunmi ꞌacësabi oquin ꞌanan ꞌën mitsu ñuixuncëxunmi cuacë banacama quicësabi oquinribi ꞌanan ꞌën ꞌaiami iscësabi oquin ꞌati ꞌain. Usoquinmi ꞌacëbë ca Nucën Papa Dios, an aín unicama bënëtima chuámarua ꞌinun ꞌimicë, ax mitsubë ꞌiti ꞌicën.

Filiposnu ꞌicë unicaman Pablo curíqui ꞌinan

¹⁰ Mitsúnmi ꞌë nuibaquin curíqui buánmiquin ꞌaquinti sinántëcëncëbë cana Nucën ꞌIbu Jesucristo —asábi ca —quixun cai cuëënin. Bëráma ca a curíquimi mitsun ꞌë bëmiti ꞌaínbi an bëti uni ꞌaíma ꞌiaxa.

¹¹ Usa ꞌain cana uni ucëbëmabi asábi ꞌian. Ñuñu ꞌaish ꞌicësaribiti cana ñuñuma ꞌaíshbi bënëtiman.

¹² Ñuñuma ꞌiti ꞌunánan cana ꞌaisamaira ñuñu ꞌitiribi ꞌunanin. Uisa ñu cara ꞌicëbëbi bënë́tima ꞌunánan cana pitiñu ꞌaish puchácë ꞌianan pitiñuma ꞌaish ꞌacëñuma ꞌitiribi ꞌunan. ꞌAisamaira ñuñu ꞌianan ñuñuma ꞌitiribi cana ꞌunan.

¹³ Usa ꞌixun cana uisa ñu cara ꞌicëbëtanbi tënëquin Cristo cuëëncësabi oquin ꞌati ꞌain, usai ꞌinun an cushiocë ꞌixun.

¹⁴ Usa ꞌaínbi ca mitsúnmi ꞌëx tëmëraia ꞌaquinquin ꞌë curíqui bëmicë asábi ꞌiaxa.

¹⁵ Mitsux Filipos ëmanu ꞌicë uni ꞌixun camina ꞌunanin, anuxun Jesucristo ñuiquin ñuixuntabaquin bana ñuixuntancëx Macedonia menuax cuania, camina mitsúinshi curíqui bëmiquin ꞌë ꞌaquiancën, ꞌën mitsu ꞌaquincë a sinánquin. Axa bëtsi ëmanuax Jesucristomi sináncë unicaman ca ꞌë ꞌaquianma ꞌicën.

¹⁶ ꞌËx Tesalónica ëmanuax cuancëma pan ꞌicë camina mitsun curíqui timëtancëxun ꞌë buánmiacën. Achúshi oquinshima, camina buánmitancëxun amiribishi ꞌë buánmitëcëancën, ꞌën cuëëncë ñu anun binun.

¹⁷ Mitsúnmi ꞌë curíqui ꞌináncë ashi sinanima cana ꞌëmi ꞌaquincë cupími mitsux Nucën Papa Diosan iscëx upí ꞌiti cuëënin.

¹⁸ ꞌËmi bëmicë curíquicama cana bian. Anun ꞌën cuëëncë ñu bitiribi ca tëxëaxa. Epafroditonën ca mitsúnmi bëmicë curíquicama ꞌë ꞌinánxa. Mitsúnmi ainan cupí nuibaquin ꞌë usaquin ꞌinania isi ca Nucën Papa Dios cuëëanxa.

¹⁹ A ꞌën rabicë Nucën Papa Dios, an ca ami cuëëncë ñu mitsu ꞌinánti ꞌicën. Jesucristonëan mitsu ainan ꞌinun ꞌimicë ꞌicë ca Nucën Papa Dios ax camabi ñun ꞌIbu ꞌixun mitsúnmi cuëëncë ñu a ꞌinánan mitsu ꞌaquinti ꞌicën.

²⁰ Axa asérabi Nucën Papa Dios a ca camabi aín unin rabiti ꞌicën, nëtë xënibua ꞌaínbi. Usaquin ca asérabi ꞌati ꞌicën.

Bërúanx ꞌinuan Pablonën Filiposnu ꞌicë unicama ca

²¹ Anu ꞌicë axa Jesucristonan ꞌaísh Nucën Papa Diosan unicama aribi, camina bërúanxa ꞌinun ꞌë caxunti ꞌain. ꞌËbëa ꞌicë axa nubë Jesucristomi sináncë nucën xucë́antunribi ca bërúanxmi ꞌicánun quixun mitsu canun ꞌë caxa.

²² Axa Jesucristomi catamëcë ënu ꞌicë unicamabëtan ca atúxribi Jesucristonan ꞌixun Romanu ꞌicë ꞌapu Césarnën xubunu ꞌicëcamanribi bërúanxmi ꞌicanun mitsu canun ꞌë caxa.

²³ Nucën ꞌIbu Jesucristonëan nuibaquin ꞌaquincëxmi mitsun nuitu upí ꞌiti cana cuëënin. Usai ca ꞌiti ꞌicën. Ashi, Pablo.