Filipenses 3 - Kashibo-Kakataibo Biblia

Jesucristomi catamëtishia uni upí ꞌiti bana

¹ ꞌËn xucë́antu, ësaquinribi cana mitsu cain, mitsux Nucën ꞌIbu Jesucristonan ꞌaish camina chuámashirua tani cuëënti ꞌain. ꞌËn cacësabi oquin mitsu catëcëni cana atsaniman, mitsúxmi upí ꞌiti cupí.

² An ñu ꞌaisamaishi ꞌati sináncë uni ꞌimainun axa ꞌatimati banacë unicama ꞌimainun an —Nucën Papa Diosan uni ꞌinux cananuna ꞌunántioracacë ꞌiti ꞌai —quixun sináncë uni, acaman mitsu cacësa oi ꞌitin rabanan camina bërúancati ꞌain.

³ Atúxa judíos uni ꞌicë ꞌunántiocë ꞌaínbi cananuna nux asérabi Nucën Papa Diosan uni ꞌain, aín Bëru Ñunshin Upitan ꞌimicëx. Usa ꞌixun cananuna a rabianan Cristo Jesúsmi catamëcë ꞌixun cuëënquin ꞌunanin, nux ꞌunántioracacë cupíma Cristo Jesúsmi catamëcë cupíshi cananuna Nucën Papa Diosan uni ꞌai quixun.

⁴ ꞌËx ꞌunántioracacë cupí cana judíos uni ꞌaish upí ꞌai quixuan atun sináncë ꞌaínbi cana ꞌëx ꞌiisa tani atúxa ꞌicësamairai rabítsian. Uinu ꞌicë unínbi ca ꞌën ꞌacësamaira oquin usai judíos unicama ꞌiti Moisésnën cuënëo bana quicësabi oquin ꞌacëma ꞌicën.

⁵ ꞌËx mëcën achúshi ꞌimainun rabë́ ꞌimainun achúshi nëtë ꞌicë ca judíos unin bëchicë ꞌicë ꞌë ꞌunántiocëxa. Usa ꞌaish cana Benjamínën rëbúnqui ꞌaish ꞌën aintsi ꞌicësaribiti hebreo banan banain, ꞌën papa ꞌën tita ꞌicësaribiti. Usa ꞌaish cana ꞌëx Moisésnën cuënëo bana fariseo unicaman ꞌunánmicësabi oi ꞌiacën.

⁶ Judíos unicaman cuati Moisésnën cuënëo bana axëshi ca asábi ꞌicë quixun ñunshínquin sinánquin cana —axa Jesucristomi catamëcë unicamax ca ꞌaisama ꞌicë —quixun sinánquin atu bëtsi bëtsi ocën. Axa quicësabi oquin ꞌati Moisésnën cuënëo banacama quicësabi oquin cana ꞌën ꞌacën. Usa ꞌain ca a ñuiquian ꞌë ꞌuchoti ñubi ꞌaíma ꞌiacëxa.

⁷ —Usa ñucama ꞌacë cupí cana Nucën Papa Diosan iscëx upí ꞌai —quixun sinan ꞌixunbi cana bërí Cristo ꞌunánquin usai ꞌëx ꞌiá ax ca ñancáishi ꞌicë quixun ꞌunanin.

⁸ Judíos unicama Nucën Papa Diosan uni ꞌicë ꞌunántiocë ꞌaish ꞌiásamaira ca Nucën ꞌIbu Jesucristo amishi catamëti upíira ꞌicën. Usa ꞌain cana ꞌën ꞌá ñucama ñu ꞌatima pucësa oquin ëni Jesucristonan ꞌinux amishi catamëtin.

⁹ Usa ꞌaish cana usai judíos unicama ꞌiti Moisésnën cuënëo bana quicësabi oquin ꞌacë cupíma axa ꞌëbë ꞌinun Cristomi catamëcë cupíshi Nucën Papa Diosan iscëx upí ꞌain. Usa ꞌicë ca an axa Cristomi catamëcë aín unicama ꞌacësaribi oquin Nucën Papa Diosan ꞌë upí isia.

¹⁰ Usa ꞌixun cana Jesucristonën sináncësaribi oquin sinánan, anun Jesucristo baísquimia aín cushi anúan Nucën Papa Diosan ꞌë cushiocë ꞌiti cuëënin. Nucën Papa Dios cuëëncësabi oi tëmëratancëx ca Jesucristo bamacëxa. Axa tëmërasa usaribiti ꞌëxribi ainan cupí tëmërati ca asábi ꞌicën. Cristo bamasaribi oquin ꞌën ꞌuchacama ꞌatëcëntimoquin ëncë ꞌiti cana cuëënin.

¹¹ Usai ꞌitancëx axa bamaxbi baísquiasaribi oi ꞌëx bama ꞌaíshbi asaribi ꞌinux ax utëcëncëbë baísquiti cana sinanin.

Aín nëtënu abë ꞌinux Jesucristosaribi ꞌiti cupí ax cuëëncësabi oi ꞌiti bana

¹² Usa ꞌaínbi cana asérabi asaírama pain ꞌain. Asaírama ꞌixun cana asérabi an ꞌacësaribi oquiinra sinaniman. Usa ꞌixunbi cana ꞌunanin, axa quiásabi oi asaribi ꞌinun ca ꞌë ië́miacëxa quixun. Usaquin ꞌunánquin cana asaribi ꞌinuxun, ënquinma aín bana quicësabi oquin ꞌain.

¹³ ꞌËn xucë́antu, ꞌëx cana —asaribi cana ꞌai —quiman. Usaquin sinánquinmabi cana ꞌën ꞌá ñucama sinántëcënquinma, asérabi ami catamëti ax cuëëncësa oíshi bërí ꞌiti sinánan, uisai caranuna asaribi ꞌiti ꞌai quixun sinánquin an ꞌë sinánmicë ñuishi upí oquin ꞌain.

¹⁴ Usoquin ꞌatancëxun cananuna uisaira caranuna aín nëtënu abë ꞌaish asérabi asaribi ꞌiti ꞌai quixun isti ꞌain. Isanan cananuna uisaira oquin cara Cristo Jesúsnan ꞌicë Nucën Papa Diosan nu ꞌimiti ꞌicë quixun isti ꞌain.

¹⁵ Usaquin cananuna nun Nucën Papa Diosan bana asérabi ꞌati ꞌunáncë ꞌixun sinánti ꞌain. Usaquinmi mitsun sinaniama ca Nucën Papa Diosan mitsuribi usaquin sinánun ꞌunánmiti ꞌicën.

¹⁶ Usa ꞌain cananuna uisai ꞌinun cara Nucën Papa Diosan nu ꞌunánmiaxa, usai ꞌiti ꞌain.

¹⁷ ꞌËn xucë́antu, mitsun camina ꞌëx usai ꞌiia ꞌunanin. Usa ꞌain camina ꞌëx ꞌicësaribiti ꞌiti ꞌain. ꞌIanan camina mitsúxribimi usai ꞌinun nux ꞌiia an iscë unicamaxa ꞌicësaribiti ꞌiti ꞌain.

¹⁸ Usaquin caquin cana bëráma ꞌitsa oquin cásaribi oquin bëunan mëscuquin ësaquin mitsu catëcënin, ꞌitsa unin ca ꞌën mitsu cacësabi oi ꞌiquinma axa unin ꞌucha cupí i curúsocënu bama, Cristo, a ñui quicë banacama cuaisama tania quixun.

¹⁹ Atúan ñunshínquin aín cuëëncësabi oquinshi ñu ꞌaia isquian unin —ñu ꞌaisama ca ꞌaia —quixun ñuicëxbi rabínquinma an ꞌacësabi oquin ꞌai ca rabitia. Jesucristomi sinánquinma ca ënë menu ꞌicë ñuishi sinania. Usaía ꞌicë cupí ca ainanma ꞌaish xënibua ꞌaínbi Nucën Papa Diosbë ꞌitima ꞌicën.

²⁰ Atúxa usai ꞌimainunbi cananuna nux Nucën Papa Diosan nëtënu abë ꞌiti ꞌain. Usa ꞌain cananuna a nëtënuaxa Nucën ꞌIbu Jesucristo, an nun ꞌucha tërë́nquin Nucën Papa Diosnan ꞌinun nu ië́micë, axa uti cuëënquin cainin.

²¹ Nux bamai chëquiti ꞌicëbi ca ax uquin nu axa bamax baísquiasaribi oquin, asaribi ꞌinun, nu bëtsi oti ꞌicën. Usonan ca aín cushi anun ax camabi ñun ꞌibu ꞌiti anúnribi nu bëtsi oti ꞌicën.