Filipenses 2 - Kashibo-Kakataibo Biblia

Bamatancëx baísquia ꞌicëa Cristo camabi unin rabiti bana

¹ Mitsux an ꞌaquincëx Cristomi cushianan an nuibacëx cuëëni, Nucën Papa Diosan Bëru Ñunshin Upíñu ꞌianan ꞌë nuibacë ꞌaish,

² camina ꞌë cuëënminux ësai ꞌiti ꞌain, bëtsin sináncësaribi oquin sinani asérabi camáxbi bëtsibë nuibananquin amanua sinánquinma achúshi oquinshi sinani ꞌiti ꞌain.

³ Bëtsi uni ꞌaquinti sinánquinma camina minánshi ꞌiti ñu ꞌatima ꞌain. ꞌËx cana bëtsi unisama ꞌai quixun sinani rabíquinma camina —uni raírinëx ca ꞌëx ꞌicësamairai upí ꞌicë —quixun sinánti ꞌain.

⁴ Mitsúxëshi chuámarua ꞌaish cuëënuxun ñu ꞌatishi sinánquinma camina uni raíriribi chuámarua ꞌi cuëënun ꞌaquinti ꞌain.

⁵ Jesucristonëan ꞌásaribi oquin camina sinánti ꞌain.

⁶ Aribi ꞌaish Nucën Papa Diosbë ꞌixunbi ca —anu ꞌëx asaribi ꞌaish ꞌën Papa Diosbë ꞌicë ënë nëtë cana ëbiántima ꞌai —quixun sinánma ꞌicën.

⁷ Aín nëtë ëbëtsini utancëx uni ꞌaish ca aín Papa cuëëncësabi oquin camabi uni ꞌaquinux ënë menu ꞌiacëxa.

⁸ Aín Papa cuëëncësabi oi ca bamatsianxmabi i curúsocënuax bamacëxa, ꞌuchañuira uni ꞌicësaribiti.

⁹ Usaía ꞌicë cupí ca Nucën Papa Diosan Jesucristo, unicama ꞌimainun ángelcamabëtan sënë́nmaira ꞌimiacëxa. Bëtsi unicamasamaira ca a uni Jesús caquin anëcë, a ꞌicën.

¹⁰ Usa ꞌain ca a ñuicë a bana cuaquin, camabi nëtënu ꞌicë unicama ꞌimainun naínu ꞌicë ángelcama ꞌimainun anua uni bamacë anu ꞌicëcamanribi ami racuë́quin a rabiti ꞌicën.

¹¹ Usa ꞌain ca camaxunbi —Jesucristo ax ca asérabi camabi menu ꞌicë uni ꞌimainun ñucaman ꞌIbu ꞌicë —quixun cati ꞌicën, Nucën Papa Dios ax ca asérabi Dios ꞌicë quixun ꞌunánquin.

Axa Jesucristo catamëcë unicaman, upí ꞌinun bëtsi unicamaribi ꞌaquinti bana

¹² ꞌËn nuibacë xucë́antu, a ñucama ꞌunani camina ꞌëx mitsubë ꞌain, ꞌën Jesucristo ñuiquin mitsu cacë bana quicësabi oi ꞌian. Usa ꞌain camina ꞌëx mitsubë ꞌain ꞌicësamaira oi ꞌëx mitsubëma ꞌain, ꞌën mitsu cásabi oi ꞌiti ꞌain, Nucën Papa Dios cuëëncëma ñu ꞌatimi racuëti.

¹³ Nucën Papa Diosanbi ca ñu upí ꞌaími ax cuëëncësabi oi ꞌinun mitsu sinánmia. Sinánmianan ca a ꞌatimi sináncë ñu a ꞌanun mitsu aín cushi ꞌinania.

¹⁴ Usa ꞌain camina añu ñu caramina ꞌai a ñui quianan cuëbicanánquinma nëtë́xuinshi ꞌati ꞌain,

¹⁵ bëtsi unicaman, mitsúxmi ñu ꞌaisama ꞌaíma Nucën Papa Dios cuëëncësabi oíshi ꞌia isnun. Usai ꞌia ca ꞌaisama ꞌaísha ax ami sináncëma unicaman, Nucën Papa Diosan bëchicë ꞌaíshmi mitsun nuitu upí ꞌicë isti ꞌicën. Usa ꞌaish camina mitsux ꞌispacaman bëánquibucë ꞌicëbi pëcacë usaribi ꞌain,

¹⁶ —Jesucristomi catamëti ca uni Nucën Papa Diosnan ꞌia —quixunmi unicama bana ñuixuncë cupí. Mitsúxmi usa ꞌain cana ꞌën Cristo ucëbëtan —ñancábi cana tëmëraquinbi Cristo ñuiquin Filiposnu ꞌicë unicama bana ñuixuanma ꞌai —quixun ꞌunani cuëënquin upí oquin sinánti ꞌain.

¹⁷ Mitsun camina tëmëraquinbi Jesucristomi catamëquin ax cuëëncësabi oquin ꞌaquin Nucën Papa Dios rabin. Mitsúxmi usai ꞌicëbë cana ꞌën mitsu ꞌaquincë cupí mitsux ꞌicësaribiti cuëënin. Cristomi sináncë cupí sapi cana bamati ꞌai quixun ꞌunanibi cana masá nuitutíma mitsúxmi ꞌicësaribiti cuëënin.

¹⁸ ꞌËx usai cuëëncëbë camina mitsúxribi —Jesucristonan ꞌiti ca asábi ꞌicë —quixun sinani cuëënti ꞌain.

Timoteo ꞌimainun Epafrodito ꞌia bana

¹⁹ Nucën ꞌIbu Jesús cuëëncëbëtan Timoteo mitsu istánun ꞌitsama nëtë ꞌicëbëtan xuti cana sinanin. An mitsu isbëtsíntancëxun uisa caramina ꞌicani quixun ñuixuncëxun cuati cana cuëënti ꞌain.

²⁰ Timoteonënshi ca ꞌën ꞌacësaribi oquin mitsu sinania. Usaquian an sináncë bëtsi uniribi ca ꞌaíma ꞌicën.

²¹ Ënu ꞌicë uni raírinën ca aín cuëëncë ñu ꞌatishi sinánquin a ꞌanúan Cristo Jesús cuëëncë ñu ꞌati sinanima.

²² Acamaxa usa ꞌaínbi camina Timoteonën ca Nucën Papa Dios cuëëncësabi oquin ꞌaia quixun ꞌunanin. An ca ꞌëbëtan Cristo ñuiquin bana ñuixuanxa. Aín bëchicënëan aín papa ꞌaquincësaribi oquin ca Timoteonën ꞌë ꞌaquianxa.

²³ Uisaquin cara an ꞌëmia uni manáncëxun cuacë ꞌapun ꞌë caia quixun cuatancëxun Timoteo xuti cana sinanin.

²⁴ Sinánan cana Nucën ꞌIbu Jesucristonëan ꞌaquincëx ꞌitsama nëtë ꞌicëbë mitsu isi cuanti sinanin.

²⁵ Nun xucën Epafrodito, ami mitsun ꞌëa ꞌaquinun xucë, a mitsunu cuanun xuti ca asábi ꞌiti ꞌicë quixun cana sinan. Suntárunëan tëmëraquinbi aín capitanën bana tancësaribi oquin ca Epafroditonën Jesucristonën bana quicësabi oquin racuë́quinma ꞌanan ꞌëbëtan unicama bana ñuixuanxa.

²⁶ Mitsúnmi a ꞌinsíncë cuacë a ꞌunani ca mitsu isi cuanti sinani bënëtia.

²⁷ ꞌInsíncë ꞌaish ca asérabi bamatisa ꞌiaxa. Usa ꞌicëbi ca Nucën Papa Diosan pëxcúmiaxa. ꞌËx a sinani masá nuitutancëx axa bamacëbë ꞌaisamairai masá nuituti rabanan ca ꞌëribi nuibaquin Nucën Papa Diosan pëxcúmiaxa, ꞌën upí oquin sinánun.

²⁸ Usa ꞌaínmi a sinani masá nuitutíbi —ñucëma ca —quiax a istëcëni cuëënti cupí cana bënë́nquinshi mitsunu cuanun xutin, ꞌënribi upí oquin sinánuxun.

²⁹ Usa ꞌain camina cuania, axa Nucën ꞌIbu Jesucristonan cupí cuëënquin upí oquin bicanti ꞌain. Usa unicama camina —upí uni ca ax ꞌicë —quixun sinánquin aín bana cuati ꞌain.

³⁰ ꞌËx ꞌura ꞌicëmi mitsun ꞌë ꞌaquiniamabi ca —sapi cana bamati ꞌai —quixun sinanibi Epafroditonën ënu uxun ꞌë ꞌaquianxa. Asérabi ca Jesucristo cuëëncësabi oquin ꞌacë cupí bamaibi ië́axa.