Filipenses 1 - Kashibo-Kakataibo Biblia

Palonëan sipunuxunbi Filiposnuaxa Jesucristomi catamëcë unicama quirica cuënëoxuan

¹ ꞌËx Pablo ꞌixun cana Timoteobëtan mitsu quirica buánmin. Jesucristonën casabi oquin aín bana uni ñuixuncë cananuna nux ꞌain. Micamaxmi Filipos ëmanu ꞌaish Jesucristomi sinania cana mitsun cushicama ꞌimainun an axa Jesucristomi catamëcë unicama ꞌaquincë unicamaribi ënë quirica buánmin.

² Nucën Papa Diosbëtan Nucën ꞌIbu Jesucristonën nuibacëxmi mitsux chuámarua ꞌaish bucucanti cana cuëënin.

Axa Jesucristomi catamëcë unicama Pablonën Nucën Papa Dios ñucáxuan

³ Mitsux camina upiti Jesucristomi catamëcë ꞌai quixun sinánquin cana —asábi ca —quixun caquin Nucën Papa Dios rabin.

⁴ Abë banaquin cana upí oquin sinani cuëënquin mitsu ñucáxunin.

⁵ ꞌËn mitsubë timë́xun bana ñuixuntabacëxun camina ꞌën ꞌacësaribi oquin, Jesucristomi catamëquin uni raíriribi amia catamënun ꞌaquinin. Usa ꞌain cana —asábi ca —quixun caquin Nucën Papa Dios rabin.

⁶ Cana ꞌunanin, an mitsu Jesucristomi catamënun sinánmicë ꞌixun ca axa utëcë́nti nëtë ꞌitámainun Nucën Papa Diosan Jesucristosaribi ꞌaish upí ꞌinun mitsu ꞌimia.

⁷ Sipuacë ꞌicëa, ꞌapun ñucácëxun cana ꞌën, Jesucristomi catamëti Nucën Papa Diosnan ꞌiti bana ax ca asérabi ꞌicë quixun can. Usaquin ꞌën ꞌamainun camina mitsúnribi nuibaquin Nucën Papa Dios ꞌëa ꞌaquinun quixun ñucan. Usa ꞌain ca ꞌëa ꞌaquincësaribi oquin Nucën Papa Diosan mitsuribi tëmëraiabi nuibaquin ꞌaquinia. Usaími mitsux ꞌicëbëtan cana nuibaquin mitsu sinánquin Nucën Papa Dios —asábi ca —caquin mitsu ñuixunin.

⁸ Nucën Papa Diosan ca ꞌunania, Jesucristonëan unicama nuibacësaribi oquin cana ꞌën mitsu nuibaquin ꞌaisamaira sinani quixun.

⁹ Usa ꞌain cana mitsu nuibaquin Nucën Papa Dios mitsu ñucáxunin, mitsúnmi ꞌacësamaira oquinmi upí sinánñu ꞌixun ax cuëëncësabi oquin ꞌati ꞌunánquin uni nuibanun.

¹⁰ An ꞌunánmicëxunmi ñu ꞌatima ꞌaquinma ñu upíshi ꞌati ꞌunánun cana Nucën Papa Dios mitsu ñucáxunin. Usai ꞌiquinmi ax cuëëncësa oquinshi ꞌacë ꞌicë ca Cristonën utëcë́nquin mitsu ꞌuchoquinma upíshi isti ꞌicën.

¹¹ Jesucristonën ꞌaquincëxunmi mitsun ñu upíshi ꞌaia isquin ca unin —Nucën Papa Dios ax ca asérabi upí ꞌicë —quixun caquin a rabiti ꞌicën.

—ꞌËishima, Cristo ꞌëbë ꞌain cana abëtan ñu ꞌai —quiáxa Pablo quia

¹² ꞌËn xucë́antu, mitsun ꞌunánun quixun cana ësaquin mitsu cain, ꞌë sipuacancë cupí ca ꞌitsa uni Jesucristomi sinania quixun.

¹³ ꞌApun suntárucama ꞌimainun camabi unínribi ca ꞌunania, Jesucristo ñuiquin uni bana ñuixuncë cupí cana sipuacë ꞌai quixun.

¹⁴ ꞌËx usai ꞌia ꞌunáncë cupí ca axa Cristomi catamëcë uni aín patsanën, atun ꞌacësamaira oquin Jesucristomi catamëquin, racuë́quinma Nucën Papa Diosan bana uni ñuixunia.

¹⁵ Usa ꞌain ca raírinën ꞌëmi nutsiquin, ꞌën bana ꞌacësamaira oquin isa unin aín bana cuanun quixun, Cristo ñuiquin bana ñuixunia. Ñuixunmainunbi ca raírinën asérabi, an Jesucristomi catamënun uni ꞌaquinti sinánquin upí oquin bana ñuixunia.

¹⁶ Axa ꞌëmi nutsicë unicaman ca ꞌëx sipunu ꞌain, Jesucristomia sinánun ñuixunquinma aín cuëëncësa oquinshi uni bana ñuixunia, ꞌëx a cuati bëë́nun quixun.

¹⁷ Usa ꞌaínbi ca raírinën ꞌë nuibaquin, Jesucristomi catamëti Nucën Papa Diosnan ꞌiti bana ax ca asérabi ꞌicë quixun ënuxun cati cupí cana ꞌëx ënu ꞌai quixun ꞌunánquin, upí oquin a bana ñuixunia.

¹⁸ Atúan uisaquin cara uni bana ñuixuinsa tania, usoquin ñuixuncëxbi ca asábi ꞌicën. Usaquian Jesucristo ñuiquin ꞌitsa unin bana ñuiia unin ñuiia cuati cana cuëënin. ꞌIanan cana ꞌëx ꞌicësamairai cuëënti ꞌain,

¹⁹ mitsúnmi Nucën Papa Dios ꞌë ñucáxuncëxuan Jesucristonën Bëru Ñunshin Upitan ꞌaquincëx cana chuámarua chiquíti ꞌai quixun sinani.

²⁰ Usa ꞌain cana ꞌëx Jesucristomishi catamëtia uni ië́ti bana, a ñui rabínquinma, ꞌën ꞌacësabi oquin ñuitisa tanin. Usoquin ꞌai cana nëtë camabi ami catamëti asaribi ꞌiisa tanin, ax ca asérabi upíira ꞌicë quixun ꞌunania camabi uni ami catamënun. Bamacëma ꞌixun ꞌën bana ñuixuncë cupí ꞌiananbia, ꞌëx bamacëbëbi uni ꞌën aín bana ñuixuncë cupí Jesucristomi sinánti cana cuëënin.

²¹ Ainan ꞌaish cana ënë nëtënuax abë ꞌaish cuëëinra cuëënin. Usai ꞌitancëx bamatancëx cana ënë nëtënuax ꞌicësamairai abë aín nëtënu ꞌaish cuëëinra cuëënti ꞌain.

²² Usa ꞌaínbi cana ꞌëx bamacëma pain ꞌixun uni Cristo ñuiquin bana ñuixunquin ëniman. Usoquin ꞌën ñuixuncëx ca uni Cristomi sinanati ꞌicën. Usa ꞌain cana uisairai ꞌiti carana cuëëni quixun ꞌunaniman.

²³ Uisaira carana ꞌiti ꞌai quixun sinani cana sináncasmain. Bamatancëx ënë nëtënuax ꞌicësamairai Cristobë aín nëtënu chuámarua ꞌiti sinani cana anu ꞌiisa tanin.

²⁴ Usa ꞌaínbi ca mitsúnmi upí oquin Jesucristo ꞌunánun mitsu ꞌaquinti cupí ꞌëx ënë nëtënu pain ꞌiti asábi ꞌicën.

²⁵ Asérabi ca usa ꞌicë quixun sinánquin cana ꞌunanin, Jesucristomi upiti sinánun ꞌaquianan ami catamëti cuëënun mitsu ꞌaquinti cupí cana ꞌëora pain ënë menu ꞌiti ꞌai quixun.

²⁶ Usa ꞌaish cana mitsúxmi Cristo Jesúsmi upiti catamëti cuëënun mitsu isi cuantëcënti ꞌain.

²⁷ Ësaíshi ꞌiti camina sinánti ꞌain, ainan ꞌaish camina Cristo quiásabi oi ꞌiti ꞌain. ꞌËx mitsu isi cuananbi, cuanquinmabi cana, mitsux camina bëtsibë nuibanani Jesucristomi catamënun ꞌaquianani quixuan unin ñuia cuaisa tanin.

²⁸ Cuanan cana mitsumi nishquian unin ꞌatimocëxunbi camina racuë́quin a ëníma Jesucristomi catamëti quixuan unin ñuia cuaisa tanin. Mitsúxmi usai ꞌicëbëtan ca Nucën Papa Diosan sinánmicëxun axa mimi nishcë unicaman ꞌunánti ꞌicën, ainanma ꞌaish ca atux nëtë́timoi usabi ꞌinux bamati ꞌicë quixun. ꞌUnánan ca mitsux camina ainan ꞌinux ië́cë ꞌaish Nucën Papa Diosbë ꞌiti ꞌai quixun ꞌunánti ꞌicën.

²⁹ Nucën Papa Diosan ca Cristomi catamënun mitsu ꞌimiaxa. ꞌImianan ca ami catamëtia unin mitsumi nishquin ꞌatimocëxbimi cuëënun mitsu ꞌimiaxa.

³⁰ Usaribi oquin ca ꞌëribi ꞌimiaxa. Jesucristonan cupía unin ꞌë ꞌatimoia camina isacën. Bëríribi cana tëmërai quixun ꞌën mitsu quirica buánmicëxun camina ꞌunanin. ꞌËx ꞌicësaribiti camina mitsúxribi tëmërain.