Filemón 1 - Kashibo-Kakataibo Biblia

Pablonëan Filemón quirica cuënëoxuan

¹ Filemón, ꞌëx Pablo, Jesucristo ñuiquin uni bana ñuixuncë cupí sipuacë ꞌixun, cana axribi Jesucristomi catamëcë ꞌaísha nucën xucën ꞌain, Timoteobëtan mi quirica buánmin. Minribimi nubëtan Jesucristo ñuiquin bana ñuixuncë ꞌicë cananuna ënë quirica mi cuënëoxunin.

² Usa ꞌain cananuna axa Jesucristomi catamëcë ꞌaish min xubunu timë́cë unicama ꞌimainun nucën chirabacësa, Apia, ꞌimainun Arquipo, anribia nubëtan tëmëraquinbi Jesucristo ñuiquin uni bana ñuixuncë, acaman cuanun ënë quirica mi buánmin.

³ Mitsúxmi Nucën Papa Diosbëtan Nucën ꞌIbu Jesucristonën nuibaquin ꞌaquincëx chuámarua ꞌiti cana cuëënin.

Ainan ꞌaish aín unicamabë nuibananan Filemón upiti Jesucristomi sinan

^4-5 Nucën Papa Diosbë banaquin cana camabi nëtë mi sinánquin a mi ñucáxunin. Ñucáxuanan cana, mitsux isamina Nucën ꞌIbu Jesúsmi upiti sinani ami catamëti, aín unicamabë nuibananin quixun ñuicania cuaquin Nucën Papa Dios —asábi ca —caquin a rabin.

⁶ Mix Jesucristomi catamëquinmi ax cuëëncësabi oquin ꞌacë cupí, ca uni raírinëxribi ami catamëaxa. Acaman uisaira oquin cara Jesucristonën aín unicama ꞌaquinia quixun ꞌunánun cana aturibi Nucën Papa Dios ñucáxunin.

⁷ ꞌËn xucën, cana mi cain, axa anuax Jesucristomi catamëcë uni raírinëan masá nuitucë ꞌixunbi minmi nuibaquin ꞌaquincëxun upí oquin sinania ñuia cuaquin cana cuëënquin upí oquin sinan.

Onésimo binuan Pablonën Filemón ca

⁸ Cristonëan ꞌë aín bana ñuixunun ꞌimicë ꞌixun, ꞌëx cuëëncësabi oquinmi ꞌanun ꞌën mi cati ca asábi ꞌicën.

⁹ Usa ꞌaínbi cana —ꞌë nuibaquinshi camina ëx cuëëncësabi oquin ꞌati ꞌai —quixun sinánquin mi cain. ꞌËx cana Pablo, caniacëcë uni ꞌaish, Cristo ñuiquin uni bana ñuixuncë cupí sipuacë ꞌain.

¹⁰ Usa ꞌixun cana Onésimo ñuiquin mi cain. Ënë sipunuxun ꞌën aín bana ñuixuncëxun cuati ca Onésimo Jesucristomi catamëaxa. Ax bërí Jesucristonan ꞌaish ca ꞌën bëchicësa ꞌicën.

¹¹ Bëráma ca Onésimo min ñu mëëmicë uni ꞌixun ꞌaquinsa ꞌixunbi mi ꞌaquincëma ꞌicën. Usa ꞌixunbi ca bërí ꞌëa ꞌaquincësaribi oquin miribi ꞌaquinti ꞌicën.

¹² Minu cuantëcënun cana a xutin. ꞌËn nuibairacë ꞌaish ca ax ꞌën taná bëchicësa ꞌicën. Usa ꞌicë camina upí oquin biti ꞌain.

¹³ Jesucristo ñuiquin uni bana ñuixuncë cupí sipuacë ꞌicëa, min ꞌaquiniamabi an ënuxun ꞌë ñu ꞌaxunun bërúnti cana sinan.

¹⁴ Usa ꞌixunbi cana mi ñucácëma pain ꞌixun a bërúncëma ꞌain. ꞌËx cuëënquinbi, ꞌën mi ñucácëxunmabimi mix cuëënquin a ꞌë ñu ꞌamixunti cana sinanin.

¹⁵ Ënanantëcëntimoi mibë ꞌiti cupí sapi ca Onésimonën mi ëanxa.

¹⁶ Min ñu mëëmicë unishi ꞌiá ꞌaíshbi ca bërí Onésimo Jesucristomi catamëcë ꞌaish min xucë́nsa ꞌiti ꞌicën. ꞌËn cana a nuibatin. Usa ꞌicëbi camina miinra ꞌën ꞌacësamaira oquin a nuibati ꞌain, min ëmanu ꞌicë cupishima, Jesucristomi catamëcë ꞌaísha min xucë́nsa ꞌicë.

¹⁷ Usa ꞌain camina —ꞌëx cana Pablobë nuibanancë ꞌai —quixun sináncë ꞌixun minmi ꞌë bicësaribi oquin a biti ꞌain.

¹⁸ An min ñu mëcamanan mi ribíncë ꞌain camina ꞌën mi a cupíonun ꞌë cati ꞌain.

¹⁹ ꞌËx Pablo ꞌixun cana ꞌën mëcënanbi cuënëoquin mi cain, ꞌën Jesucristo ñuiquin cacë cupí ainan ꞌixunmi min ꞌë cupíoti asábi ꞌaínbi cana Onésimonëan mi ribíncë a mi cupíoti ꞌain.

²⁰ Usa ꞌain camina mix Jesucristonan ꞌaish ꞌën xucë́nsa ꞌixun, Jesucristomi catamëcë unin ꞌacësoquin upí oquin sinánquin, ꞌëxribi ainan ꞌicë upí oquin sinani cuëënun ꞌë ꞌimiti ꞌain.

²¹ ꞌËn cacësa oquinshi ꞌaquinma camina minbi ꞌën mi cacësamaira oquin ꞌati ꞌai quixun sinánquin cana mi buánminuxun ënë quirica cuënëoin.

²² Nucën Papa Diosmi ꞌë ñucáxuncëx cana mitsu isi cuanti ꞌai quixun cana sinanin. Usa ꞌain camina anu ꞌëx ꞌi cuanti ꞌë meníoxunti ꞌain.

Upí oquin sinánxunquian ashiquin Pablonën bërúanxa ꞌinun ca

²³ Epafrasnën ca ꞌëcëñuan Jesucristonan cupí sipuacancë ꞌixun bërúanxmi ꞌinun mi canun ꞌë caxa.

²⁴ ꞌImainun ca an ëbëtan bana uni ñuixuncë unicama Marcos, Aristarco, Demas, Lucas, acamanribi bërúanxmi ꞌinun mi canun quixun ꞌë caxa.

²⁵ Nucën ꞌIbu Jesucristonëan nuibaquin ꞌaquincëxmi min sinan upí ꞌaish chuámarua ꞌiti cana cuëënin. Ashi, Pablo.