Ezequiel 34 - Kashibo-Kakataibo Biblia

Ezequielnëx an Israel unibu ꞌatimokin bërúankë unikama ñui kia bana

¹ Nukën ꞌIbu Diosan ka ꞌë kaxa:

² “Mix uni ꞌixun kamina ꞌë ñuikin an, Israel unikama bërúankëkama kati ꞌain: Ësai ka Dios kiaxa: ¡An Israel unibu bërúankë unikama ax ka atuxi bërúankatia! Usa ꞌain ka an bërúankë unikaman aín ñuina bërúankë usaribi ꞌixun ꞌën uni bërúanti ꞌikën.

³ Mitsun kamina atun ꞌapu ꞌixun an ñuina bërúankë unían aín ñuinanën xuma xëanan, aín rani bixun chupa ꞌaxun pañukësa usakin ꞌanan, oveja xuairabu akama rëtëin, ꞌaínbi kamina mitsun ñuina ꞌarakakëkama upíokin bëruaima.

⁴ Mitsux kamina an ñuina bërúankë unia aín ñuina bërúankinbi ꞌinsíanxa kushikëma akamaribi ronkima ꞌanan axa aín taëmi ñuax tatimakë a nëaxunkëma usa ꞌianan, axa amami kiax nëtë́kë a barixun upioxun bëkima rishkikin ꞌatima okë usaribi ꞌain.

⁵ Usaribiti ka Israel unikama ꞌën ovejakamasa ꞌaish an bërúanti uni ꞌaíma ꞌain abísakëxa, usai ꞌia ka raëkëma ñuinakan ñuina pikësa usaribi ꞌinun ami nishkë unikaman ꞌakëxa.

⁶ Usakin ꞌakëx ka amami amami kuani aín bashikama ꞌimainun matá me kamanu kuani ꞌianan, mekamanu kuani abisi nëtë́akëxa, usai ꞌiabi ka uínbi ami sinánkin ꞌakinuxun baritisama tankëxa.

⁷ Usa ꞌain kamina mitsux an ñuina bërúankë unisa ꞌixun ꞌën banakama ꞌupiokin kuati ꞌain.

⁸ Usa ꞌaínbi kana ꞌëx ñutimoi tsókë ꞌaish ësai kin: Axa pianankë bëtsi bëtsi ñuina raëkëman ꞌakësokin ka axa ami nishkë unikaman, ꞌën ovejakamasa ꞌikëbi an bërúanti uni ꞌaíma ꞌain. Ñuina raëkëman ñuina bixun pikësa ꞌinun ꞌaxa. Mitsux ꞌën ñuina bërúanun nankësa ꞌixunbi kamina ꞌën unikama bëruaiman. An ñuina bërúankë unikamax ka atúxbi bërúankatia, usa ꞌaínbi ka ꞌën ñuina kamasa ꞌikëbi Israel unikama bëruaima.

⁹ Usa ꞌain kamina, an ñuina bërúankë unisa ꞌixun ꞌën bana kuati ꞌain,

¹⁰ ꞌëx Dios ꞌaish kana usai kin: Mitsux an ñuina bërúankë unikamasa ꞌain kana ꞌëx mitsumi nishkë unisa ꞌain, usa ꞌixun kana Israel unikama ꞌën ñuinasa ꞌikëbi bërúankëma a ñuikin mitsu kati ꞌain; bërí kana bërúanxuma ꞌanun mitsu bikuanti ꞌain, usa ꞌain kana axa ꞌën ovejakamasa ꞌikë bitëkënti ꞌain, mitsun pikinshi këñutima kupín, kiax ka Dios kiakëxa.

Dios ax ka an ñuina ꞌarakaxun upíokin bërúankë unisa ꞌikë kikë bana

¹¹ ꞌËx Dios ꞌaish kana ësai kin: ꞌËnbi kana ꞌën ñuina ꞌakësaribi okin Israel unikama bërúanti ꞌain.

¹² An ñuina bërúankë uníxa aín ovejakama abisi nëtë́an ami sinánkësaribi oi kana ꞌëx ꞌën unikamaxa ovejasa ꞌain ami sinánti ꞌain; usai atumi ꞌikin kana achúshi nëtë́an atumi nishkë unikaman nëtë tunankuatsinkësa usairibi ꞌikin axa atumi nishkë unikaman bibiankin anu buan me anuabi atux timë́nun ꞌimitëkënti ꞌain.

¹³ Usakin ꞌakin kana bëtsi unin ëmakamanuabi atu, timë́nun ꞌimikin aín menubi kuanun ꞌimiti ꞌain. ꞌImikin kana anua aín aintsi ꞌibu ꞌikë bashi mekama, ꞌimainun xëxákama ꞌimainun anua uni ꞌikë me anubi atu buántëkënti ꞌain.

¹⁴ Usakin ꞌakin kana anuaxa upíokin pi bukunun atun menua ꞌikë aín bashikama anubi atu buánti ꞌain. Anuxun ka upiti bukukin upíokin piti nëishokin ꞌaxun piti ꞌikën.

¹⁵ ꞌËnbi kana ꞌën unikama an ñuina bërúankë unin ꞌakësokin bërúanti ꞌain, ꞌimainun kana ꞌënbi tantinun ꞌimiti ꞌain. ꞌËx Dios ꞌaish kana ësai kin.

¹⁶ ꞌËnbi kana ꞌën unikama ovejakama ꞌarakakë ꞌikësaia amami amami kuani nëtë́këkama a bëtëkënti ꞌain, bëkin kana axa ꞌinsínkë akamaribi ronkin chupa sanin aín taëmi ñukë tëkërëkaxuanan, axa ñusmakëkamaribi kushinun bërúanti aín, ꞌanan kana xuabu ꞌimainun aín kushibu akamaribi bërúankin. ꞌËn kamabi atu bërúanti ꞌain.

¹⁷ ꞌËx Dios ꞌaish kana ësai kin: Mitsux ꞌën ovejakamasa ꞌixun kamina ꞌën bana kuati ꞌain. Usa ꞌain kana uin kara carnerosa ꞌixun ñu upíokin ꞌakë a ꞌimainun an cabrasa ꞌixun ñu ꞌatima ꞌakë mitsunu ꞌikë unikama usokin anun ꞌati nëtë ꞌikëbëtan amo bukunati ꞌain.

¹⁸ Mitsu raírinën kamina Israel unibu mitsun ꞌaintsi ꞌikëbi ꞌatimokin ovejakaman aín upíbushi pasto pianan axa tikikë a aín taën amákin chakapakësa okin ꞌanan. ꞌUmpax upí xëakinbia aín taën, chubëopakë usaribi okin ꞌain.

¹⁹ ꞌImainun ka mitsun ꞌaintsi Israel unibu raírinën mitsunmi pikin chakapakë pasto pianan, ꞌumpax mitsunmi xëakin chubëopakë aribi xëati ꞌikën.

²⁰ Usa ꞌain kana ꞌëx Dios ꞌaish ësai kin: ꞌËn kana mitsúxmi oveja xuábukamasa ꞌikë uisakin karana ꞌati ꞌai kixun isanan oveja chumínbukëkama akamaribi uisa karana oti ꞌai usokin ꞌati ꞌain.

²¹ Mitsun kamina mitsun aintsi axa ñuumasara ꞌikë, bëtsin aín manchatan ꞌakëxa ñuina abákësa usaribiti abátanun abámikan.

²² ꞌAínbi kana ꞌën ovejakamasa ꞌikë ꞌën unikama bërúanti ꞌain. Bërúankin kana mëkamakinshima këñuia usa ꞌain bërúanti ꞌain. ꞌËn kana ꞌën unikama oveja raírikama ꞌakësokinma aín aintsikaman ꞌatima oia bërúanti ꞌain.

²³ ꞌËn kana ꞌën uni David axa utëkënun bëti ꞌain, a kana axëshi ꞌapu ꞌixuan ꞌën unikama bërúanun ꞌimiti ꞌain, ꞌimikëxun ka an ñuina bërúankë unisa ꞌixun ꞌën unikama bërúanti ꞌikën. Ax ka an atu bërúankë unisa ꞌiti ꞌikën.

²⁴ ꞌËx Dios ꞌaish kana atun Dios ꞌiti ꞌain, ꞌimainun ka ꞌën uni David atun ꞌapu ꞌiti ꞌikën. ꞌËx Dios ꞌaish kana ësai kin.

²⁵ ꞌËn kana ꞌën unikamabëtan achúshi ñu ꞌati ꞌain, usakin ꞌakëbë ka atux upitax tsóti ꞌikën. Usai ꞌikëbëtan kana raëkëma ñuinakama a menuax nëtënun ꞌimiti ꞌain, usakin ꞌimikëbë ka ꞌën ꞌarakakë ñuinanëxa aín pastonu bukukë usaribiti uinu kara tsotia anu upiti ꞌuxi bukuti ꞌikën.

²⁶ ꞌËn kana ꞌën unikama ñuina ꞌarakakë ꞌikësa ꞌikë ꞌën bashi upí kakë anu bukunun ꞌimikin upíokin sinánxunti ꞌain, ꞌakin kana anun ꞌiti nëtë ꞌikëbëa ꞌuñe atunu ꞌibúnun upíokin sinánxunti ꞌain.

²⁷ Usai ꞌikëbë ka axa bimikë ikamax ꞌitsaira ꞌinun bimiti ꞌikën, ꞌimainun ka menu ꞌapákë ñukamax ꞌitsaira ꞌinun tuati ꞌikën, usakin ꞌakëbë ka atux aín menubi a pi upiti tsókanti ꞌikën. Uínsaran karana ꞌën unikama an tëmëramikë unikamanua chikinin anun ka ꞌëx kana atun Dios ꞌai kixun ꞌunánkanti ꞌikën.

²⁸ Usa ꞌain ka bëtsi ëmanu ꞌikë unikaman atu ꞌibuatëkëntima ꞌikën, ꞌimainun ka raëkëma ñuinakamanribi atu pitëkëntima ꞌikën. Usa ꞌain ka uínbi rakuëokëma upitax tsókanti ꞌikën.

²⁹ Usa ꞌain kana ꞌën atun menuaxa ꞌapákëx ꞌitsaira ñu biminun ꞌimiti ꞌain, usakin ꞌimikëbë a piti ñu ꞌitsa ꞌain numin ꞌi tëmëratëkëntima ꞌikën, ꞌimainun ka bëtsi menu ꞌikë unikama atumi kuai banatëkëntima ꞌikën.

³⁰ Usa ꞌain ka atun ꞌunánti ꞌikën, ꞌëx atun Dios ꞌaish kana atubë ꞌai kixun, ꞌimainun ka Israel unikamax ꞌën uni ꞌikën. ꞌËx Dios ꞌaish kana ësai kin.

³¹ Mitsux kamina ꞌën ꞌarakakë ñuinakamasa ꞌain, usa ꞌaish kamina ꞌën ꞌarakakë ñuinakama ꞌën menu ꞌikësa ꞌain. ꞌËx Dios ꞌaish kana ësai kin. ꞌËx kana atun ꞌIbu ꞌain.”