Ezequiel 33 - Kashibo-Kakataibo Biblia

Diosan Ezequiel an bërúankë unisa ꞌixun ain aíntsikama bërúanun ká bana

¹ Nukën ꞌIbu Diosan ka ꞌë kakëxa:

² “Min kamina min ꞌaintsikama ësakin kati ꞌain: Uínsaran karana ꞌën mitsubë ꞌakánanti bëtsi menu ꞌikë uni xuti anun ka anu ꞌikë unikaman achúshi uni an bërúanti uni bariti ꞌikën.

³ Usokin ꞌakëxun ka an bërúanti anëkë unin an ka ami nishkë unikaman suntárunën atux anu ꞌikë me ꞌurama obëtsinia iskin, aín aintsikama mëníokatanun aín manë banañu banoti ꞌikën.

⁴ ꞌAínbi ka uin kara manë banañu banoia kuakinbi kuakëmasa oia ax ka ami nishkë unikaman ami bëbarukin ꞌakëx bamati ꞌikë, ax ka aín ꞌuchabi ꞌiti ꞌikën,

⁵ usa ꞌaínbi ka a uni manë banañu banoia kuakinbi kuakëmasa oxa; usa ꞌaish ka ax bamakëxbi aín ꞌuchabi ꞌikën, an manë banañu banókë an banoia kuati bërúankax kuni ië́kë ꞌitsíanxa.

⁶ ꞌAínbi ka an bërúanti nankë uni an axa atumi nishkë unikaman suntáru bëbaia iskinbi, unia mëníokatanun aín manë banañu banokëma ꞌain ka axa ami nishkë unikama atumi bëbarukin bëtsi unibi ꞌati ꞌikën, ꞌakëx bamakë ax ka aín ꞌuchabi ꞌiti ꞌikën, ꞌaínbi kana an bërúankë uni a ñukë ꞌain, uisa kupín kara a uni ñuaxa kixun ñukáti ꞌain.

⁷ ꞌËn kana an bërúankë unisa ꞌixunmi Israel unikama bërúanun mi ꞌimian. Usa ꞌixun kamina ꞌën kakë banakama kuantankëxun min unikama ñuixunti ꞌain.

⁸ ꞌËx kana uni ꞌatima sinánñu achúshi ka bamati ꞌikë kiax kiti ꞌain; ax ka asábi ꞌikën, usa ꞌaínbi kamina min abë banakin aín tsóti mëníokanun kati ꞌain, usakin kakëxubi ka a unin min kakë bana kuatima ꞌikën, usai ꞌika a uni aín ꞌuchakë anunbi bamati ꞌikën, usa ꞌaínbi kana ꞌën mi a uni bamakëbëtan uisa kupí kara a uni bamaxa kixun mi ñukáti ꞌain.

⁹ Usakin min ꞌain ñu ꞌatima ꞌakëkama ënun kakëxunbi ënkinma ñu ꞌatima ꞌai, ꞌuchai anunbi bamakë ax ka aín ꞌuchabi ꞌiti ꞌikën, usaía ax ꞌikë ꞌaínbi kamina mix ië́kë ꞌiti ꞌain.

Diosan ka upiokin ñu ꞌaia kikë bana

¹⁰ Mi unin kamina Israel unikama ësokin kati ꞌain: Mitsux kamina ësai kin: Nukamax kananuna ñu ꞌaisamaira ꞌai ꞌitsaira ꞌuchan. Usa ꞌain kananuna nux ꞌuchakë anunbi tëmërai chë́kibuti tsókësa ꞌain. ¿Usai ꞌi karanuna nux ꞌupitax tsóti ꞌain?

¹¹ Usa ꞌaínbi kana ꞌëx Dios ꞌaish atun tsóti ñui ësai kin, ꞌatima sinánñu unikama ñuti kana ꞌëx kuëëniman usa ꞌain ka atun ꞌakë ñu ëni upitax tsóti ꞌikën. Israel unikama ꞌatima ñu ꞌaimi tsókankë akamina ënti ꞌain. ¿Uisa ꞌaish kara usakin ñu ꞌai ñukanti ꞌik?

¹² Mi unin kamina min ꞌaintsikama ësokin kati ꞌain: Achúshi uni upíokin ñu ꞌakë ꞌuchaia ka an bërámabi ꞌakë ñu upí anbi ië́mitima ꞌikën, ꞌimainun ka achúshi uni an ñu ꞌatima ꞌakë a ënti ꞌikën, usa ꞌain ka bëráma ax ꞌuchakin ñu ꞌatima ꞌakë a kupí bamakë ꞌitima ꞌikën. Achúshi uni upíokin ñu ꞌakë ꞌuchaia ka an bëráma ꞌakë ñu upí anbi basi tsónun ꞌimitima ꞌikën.

¹³ ꞌËn kana an ñu upí ꞌakë uni achúshi upitia tsónun kati ꞌain, usakin kakëx upiti tsókima ka anbi kuëënkin ñu ꞌatima ꞌati ꞌikën, usakin ꞌakëbëtan kana an ꞌakë ñu upíkama a upíokin ka an ñu ꞌaxa kixun sinántima ꞌain, usa ꞌain ka an ñu ꞌatima ꞌakë anunbi bamati ꞌikën.

¹⁴ Usa ꞌain kana ꞌëx uni achúshi an ñu ꞌatima ꞌai ꞌuchakë ax ka bamati ꞌikë kiti ꞌain, ꞌaínbi aín ꞌuchakë a ënkin ñu upí ꞌakin,

¹⁵ bëtsi uninua ꞌinantëkënuxun bikë ñu aribi ꞌinánkin mëkamakë aribi ꞌinánti ꞌikën, usakin ꞌakin ñu ꞌatima ꞌakë akama ënika, ꞌën bana kikësabiokin ꞌai bamaima tsóti ꞌikën.

¹⁶ Usakin ñu upí ꞌai bërí upiti tsókëbëtan kana, an ñu ꞌatima ꞌai ꞌuchakama achúshirabi sinántëkëntima ꞌain.

¹⁷ Min aintsikamax ka ësai kiti ꞌikën, ꞌën kana ñu upíokin ꞌaima kiax kiti ꞌikën; ꞌaínbi ka atúnbi ñu upíokin ꞌaima.

¹⁸ Uni upí an ñu upíokin ꞌakë ꞌixunbi a ënkin ñu ꞌatima ꞌai ka anunbi bamakë ꞌiti ꞌikën.

¹⁹ ꞌImainun ka uni ꞌatima sinánñu an ñu ꞌatima ꞌakë a ënkin ñu upí ꞌakë anbi upitax tsónun ꞌimiti ꞌikën.

²⁰ Mitsux kamina ꞌë ñui ësai kin: Diosan ka upíokin ñu ꞌaima kiax kikani. ꞌAínbi kana Israel unikama mitsu achúshi achúshi ꞌën, uisakin kaina ñu ꞌakan istankëxun usakinbi mitsu ꞌati ꞌain.”

Babilonia ëma ꞌikë unikaman Jerusalén ëmabia ñuia bana

²¹ Mapai rabë́ ꞌimainun rabë́ baritia anun nukama bibiakin nun menua uankan inúkë ꞌaia mapai rabë́ ꞌuxë ax mapai achúshi nëtë ꞌikë ꞌain ka achúshi uni axa Jerusalénnuax abákë an ka nun ëma ka axa numi nishkë unikaman ꞌibuaxa kixun ꞌë ñuixuankëxa.

²² Axa abati ukë uni ax bëbatisama pan ꞌain ka a imë́ Diosan ꞌë banañuma ꞌinun ꞌimiakëxa; usa ꞌain ka uni axa pëkarakëma ꞌaínshi ukëbëtan, Diosan bananun ꞌimikëxun kana ꞌëx banañuma ꞌikë a ëankën.

Ëmanu ꞌikë unikama ꞌucha ñuikë bana

²³ Nukën ꞌIbu Diosan ka ꞌë kakëxa:

²⁴ “Axa ami nishkë unikaman rurupakin ꞌatimokë Israel ëmakamanu tsókë unikama ax ka ësai ki nitsia: ꞌAbraham ax ka achúshi unishi ꞌiakëxa, usa ꞌixunbi ka an ënë me ꞌibuakëxa; usa ꞌaínbi kananuna nuxira ꞌitsa ꞌixun ënë me ꞌibuati ꞌain kiax ka atux kikania.

²⁵ Usa ꞌain kamina ësokin atu kati ꞌain: Ësai ka Dios kiaxa: Mitsun kamina nami aín imikëñun diosmabi ñukama rabikin pin, ꞌianan kamina uni ꞌain. ¿Usakin ꞌakinbi kaina mitsux ismina me ꞌibu ꞌinuxun ꞌai kixun sinánkanin?

²⁶ Mitsun kamina bënë́kinshi anun uni ꞌati sinánkin anun ꞌakánanti a tuinin, kamabi unin ka bëtsi unin xanu ꞌaia, ¿usakin ꞌaínbi kaina mitsux ismina ënë men ꞌibu ꞌinuxun ꞌai kixun sinánkanin?

²⁷ Ësakinribi kamina kati ꞌain: Ësai ka Dios kiaxa: ꞌËx kana axa xënibua ꞌaínbi tsókë a ꞌain usa ꞌain kana ësai kin, axa ëmakama masókë anu ꞌikë unikama atúxribi ka ami nishkë unikaman ꞌakë ꞌiti ꞌikën, ꞌimainun kana axa ninu unëax ꞌikëkama a raëkëma ñuinakama pinun ꞌamiti ꞌain, ꞌimainun ka axa mapara kini uisabi oisama ꞌimainun kininu ꞌikë akamaribi ꞌinsinan bamati ꞌikën.

²⁸ Usakin ꞌakin kana a mekama anu uni ꞌikëmasa ꞌitánun ꞌimiti ꞌain, ꞌimianan kana usokin ꞌakëxa nux kananuna kushiira ꞌai kiax rabiakakë a nëtë́nun ꞌimiti ꞌain. Usokin ꞌakëx ka Israel menu ꞌikë bashikama ax anu uni ꞌikëma mesa ꞌiti ꞌikën; usakin ꞌakë ꞌain ka uinu ꞌikë uníxbi anun inútima ꞌikën.

²⁹ Uínsaran karana ꞌën atun me anu uni ꞌikëma mesa atux ꞌuchakë kupin masónun ꞌamin anun ka asérabi kana ꞌëx Dios ꞌai kixun ꞌunánti ꞌikën.

³⁰ Min aintsi ꞌibukamax ka mi ñui ëma kënëara xëpúti rapasu nitsax kianan xubu xëkuë kamanu nitsax bëtsibë bëtsibë kánani ësai kikania: An aín bana ñuiti Diosan xukë uni ñuixunkëxun usai Dios kikë bana kuati kamina rikuatsinkanti ꞌain.

³¹ Usakin min kakëx ka ꞌën unikama utankëx atux ꞌikësabi min bana kuati mi bëtánain tsóbukanti ꞌikën. ꞌAínbi ka atun mix kikë bana tankin usakinbi ꞌatima ꞌikën. Usa ꞌixun ka mix kikë banakama a tania, ꞌaínbi ka a banakama uníxa xanu ñui katakësokinshi ꞌaia, usai ꞌianan ka atun ꞌitsaira kuríkishi kuëënia.

³² Atun ka mix kikë bana a uníxa xanumi kantakin aín arpa mëkësokinshi ꞌaia. ꞌAínbi ka atun mix kikë banakama a kuakinbi mix kikësabiokin ꞌakanima.

³³ Usa ꞌaínbi ka atunu a ñukama ꞌiti ꞌikën, ꞌikëbëtan ka asérabi ka an Dios kikë bana ñuikë achúshi uni atunu ꞌiaxa kixun ꞌunánkanti ꞌikën.”