Ezequiel 3 - Kashibo-Kakataibo Biblia

¹ Usa ꞌain ka Diosan ësokin ꞌë kaxa: “Mix unin bëchikë ꞌixun kamina kirika tarankë anu kuënëokë ënë piti ꞌain, ꞌabianxun kamina Israel unikama kai kuanti ꞌain.”

² Ësokin kakëx anchatia ka anbi kirika tarankë anu bana kuënëokë a ꞌë pimiaxa.

³ Usokin ꞌamitankëxun ka ꞌë kaxa: “Bërí kamina kirika tarankë kuënëokë ꞌën mi pimi ënë pitankëx anun puchati ꞌain.” Kixun kakëxun pikinbi kana ꞌën buna rëpasa ꞌaish bataira ꞌikë tan.

⁴ Usa ꞌain ka ësokin ꞌë kaxa: “Anu kuaxun kamina Israel unibu ꞌën kaisatankë banakama ënë kai kuanti ꞌain.

⁵ ꞌËn kana aín bana kuaisama inúa banakë unikamanu mi xutiman, usa ꞌain kana Israel unikamanubi mi xutin.

⁶ ꞌËn kana mi bëtsi bëtsi menu ꞌikë unikama ꞌuakamë ꞌëokë aín bana min kuaisama ꞌinua banakë anu mi xutiman. ꞌËn anu mi xutia sapi ka bëtsi bëtsi ëmanu ꞌikë unikama atun kuni min bana kuati ꞌikën.

⁷ Usa ꞌaínbi ka Israel unikaman min kakësabiokin ꞌati kuëëntima ꞌikën, atun ka ꞌën kakëxunbi ꞌën bana kuaisamatania. Kamabi Israel unikamax ka bana kuakëma ꞌaish maxká iru ꞌikën.

⁸ ꞌAínbi kana ꞌën atusamaira ꞌaíshmi bana kuakëmasa ꞌinun mi ꞌimiti ꞌain.

⁹ ꞌËn kana tsasitisama iruira ꞌimianan, maxá irusamaira mi ꞌimiti ꞌain. Usa ꞌain kamina atumi rakuë́tima, ꞌianan kamina atun bëmánan nishkëira okëbëbi atumi ratutima ꞌain, atux ka bana kuakëma unibu ꞌikën.”

¹⁰ Usa ꞌain ka ꞌë kaxa: “Ñuitsimarua tsóxun kamina ꞌën mi kakë banakama a sinánkin min maxkátan sinánti ꞌain.

¹¹ Anu kuanxun kamina min aintsikama mi këñunbia ñatanbiankin buan, akama min kakëxun kara kuati ꞌikë, kara kuaisama tanti ꞌikë abi. Ësai ka Nukën ꞌIbu kiaxa kati ꞌain.”

¹² Usa ꞌain ka Diosan Bëru Ñunshinan ꞌë biruaxa, birukëxun kana ꞌë kaxakúaxa kushiira rërëkikësai banaia kuan, usai ka anua ꞌikë anuaxa Diosan kushi nirukëbë ꞌiaxa.

¹³ Unisa aín pëchikamaribi kana bëtsibë tsënkanania kushiira banaia kuan, kuanan kana a axa mañákë akamaxa kushiira banakë akamaribi küan; usa ꞌaish ka aín banakëkama ax chaiira ꞌinun banakë ꞌiaxa.

¹⁴ Usa ꞌain ka Diosan kushi anua ꞌë chikíanxa, chikinkëx kana anuax masá nuitukë ꞌianan nishkë kuan, kuankinbi kana Diosan aín mëkënanbi kushiokin tuinkësa tan.

¹⁵ Usakin ꞌakëx Tel Abibnu kuantankëx kana, anua Quebar kakë baka kuëbí anua Israel unikama raíri ñatankë ꞌikë anu bëba, anu kana mapai ꞌimainun rabë́ nëtë a ñu karana ꞌati ꞌai kixun ꞌunánan, uisakin karana kati ꞌai kixun ꞌunánimabi atubë ꞌian.

Diosan Ezequiel an bërúankë unisa ꞌinun anëa ñuikë bana

¹⁶ Usa ꞌain ka mapai ꞌimainun rabë́ nëtë ax inúkëbëtan, ësokin Diosan ꞌë kaxa:

¹⁷ “ꞌËn kana mi, unin bëchikë ꞌikë an bërúankë unisa ꞌixun an Israel unikama bërúanti ꞌimin. Usa ꞌixun kamina usakinmi kanun ꞌën mi kakëxun atun ꞌunánkë ꞌitánun ꞌëx kikë banakama kati ꞌain.

¹⁸ ꞌËx kana uni ꞌuchañukamax ka aín ꞌatima ñu ꞌakë anubi bamati ꞌikë kiax kiti ꞌain; usa ꞌaínbi min a uni ꞌatima sinánñukama aín ñu ꞌatima ꞌakëkama ëntankëxua ñu upí ꞌanun kakëma ꞌain ka ain ꞌucha kupíbi bamati ꞌikën, ꞌaínbi kana ꞌë mi aín bamakë kupí uisa kupí kara ax bamaxa kixun ñukáti ꞌain.

¹⁹ Usakin min kakëxunbi, aín ñu ꞌatima ꞌakë ëinsama tani ka, aín ꞌuchanbi bamati ꞌikën, usaía ax ꞌikëbëbi kamina mix uisa ñubi inútima ië́kë ꞌiti ꞌain.

²⁰ ꞌAínbi ka uni upí achúshinën an ñu upí akë a ënkin ñu ꞌatima ꞌati ꞌikën, ꞌakë kana ꞌën anúan bamati ñu ꞌinánti ꞌain, usakin ꞌakëbi min kakëma bamakë ax ka min ꞌucha ꞌiti ꞌikën. Usai ꞌikëbëtanbi kana ꞌën an ka ñu upí ꞌakëxa kixun sinántima ꞌain, ax ka aín ꞌuchakënënbi bamati ꞌikën, ꞌaínbi kana ꞌën mi aín bamakë kupí uisa kupí kara bamaxa kixun ñukáti ꞌain.

²¹ ꞌAínbi ka min kakëxun kuakin, a unin aín ꞌuchakë a ëni ꞌuchaima tsóti ꞌikën, an ka min kakëxun kuaxa usa ꞌain, usai ax ꞌikëbë kamina mixribi ië́kë ꞌiti ꞌain.”

Diosan ꞌimikëx Ezequiel banañuma ꞌia ñuikë bana

²² Usa ꞌain ka Diosan, anu ꞌëx ꞌikë anuxun ꞌë kaxa: “Anu mi ꞌikë ënuax nirukiani kamina me sapan ꞌikë anuxun mi kanun kuanti ꞌain.”

²³ Usokin kakëx kana nirukiani anua me sapan ꞌikë anu kuan, anuxun kana Diosan kushi Quebar kakë baka kuëbí anuxun iskësokin istëkëan. Usa ꞌain kana anuax tëtúbuti tsóbuti ꞌën bëmánan memi tikai ꞌian,

²⁴ ꞌaínbi ka Diosan Bëru Ñunshinan ꞌënu ukin nirunun ꞌë ꞌimiaxa. ꞌImikëx niruia ka Diosan ësakin ꞌë kaxa: “Min xubunu kuantankëx kamina anu xëpúakati ꞌain.

²⁵ Anuxun ka mi raíri unikaman mëxin nëakanti ꞌikën, usakin ꞌakëx kamina unikamabë chikítima ꞌain.

²⁶ ꞌIanan kana ꞌën min ana manxantanu takásh kikësai ꞌikëbëmi banañuma ꞌinun ꞌimiti ꞌain. Usa ꞌixun kamina atu bana kuakëma unibu ꞌikëbi usai kamina ꞌitima ꞌai katima ꞌain.

²⁷ ꞌAínbi kana ꞌën mi ñu ñuikin kaisatankin amiribishi bananun ꞌimiti ꞌai, usakin ꞌimikëxun kamina ësakin kati ꞌain: Ësai ka Dios kiaxa. Uin kara kuatia an ka kuati ꞌikën, uin kara kuaisama tania an ka kuatima ꞌikën. Atux ka bana kuakëma unibuira ꞌikën.”