Ezequiel 2 - Kashibo-Kakataibo Biblia

Diosan Ezequiel an bana ñuiti kaisa ñuikë bana

¹ Mi kana unin bëchikë ꞌikë kain: “Usa ꞌain kamina ꞌën kakëxun kuati niruti ꞌain.”

² Kakëx nirukin a bana ꞌën kuakëbëbi ka Diosan bëru ñunshin ꞌënu ꞌirukin ꞌë nirunun ꞌimiaxa. Usa ꞌain kana ꞌëa,

³ kakë bana a kuan: “Mi uni kana ꞌën Israel unikama kakëxun bana kuati ꞌunánma ꞌimainun ꞌëx kikësabi oi ꞌisama tankë unikama anu xuti ꞌain. Atux ka atun chaitiokëkama ꞌiásaribiti bërí nëtënbi ꞌën kakësoi ꞌisama tania.

⁴ Usa ꞌain ka atun bakë bëchikëkamaxribi maxkáñumasa ꞌixun ꞌën kakë bana kuaisama tania. Usa ꞌain kana minmi ësokin kanun atunu mi xuti ꞌain: Ësai ka Nukën ꞌIbu Dios kiaxa.

⁵ Atun min kakëxun kuananbi min bana kuatima ꞌikën, atux ka bana kuakëma unibuira ꞌikën, usa ꞌixunbi ka nunu ka an Dios kikë bana ñuikë uni ꞌikë kixun ꞌunánkanti ꞌikën.

⁶ Mix unin bëchikë ꞌaish kamina atumi rakuë́tima ꞌain, ꞌianan kamina uisakin kara mi kaia usakin kakëx atun banami rakuë́tima, ꞌianan i muxañunën bëarabuinkësa tanan nibantakamanu ꞌikësa tanibi rakuë́tima ꞌain. Usa ꞌain kamina uisakin kara mi kaia kakëxi atun banami rakuë́tima ꞌain, ꞌianan kamina bana kuakëmaira ꞌixun ꞌain bëmánan nishkë okëbëbi atumi ratutima ꞌain.

⁷ Min kamina ꞌën bana kuanabia min kakëxun kuanumabi a unikama ñuixunti ꞌain, atux ka bana kuati ꞌunánma unibuira ꞌikën.

⁸ Usa ꞌain kamina min ꞌën kakëxun upíokin kuati ꞌain, kuati kamina atux ꞌikësaribiti bana kuakëma unisa ꞌitima ꞌain. Usa ꞌain kamina añu karana ꞌën mi ꞌinani a piti ꞌain.”

⁹ Usa ꞌain kana achúshi kirika nëakë anu bana kuënëokë tuiax ꞌëmiki achúshi mëkën mëshpatia isan.

¹⁰ Iskëxun ka ꞌën ismainunbi kirika tarankë a sarakaxa. Usa ꞌaish ka a kirikanu amo rabë́bi kuënëokë ꞌiaxa: usa ꞌain ka anua kuënëokë bana ax masánuituti ꞌianan paëtani bënëti ꞌimainun uisa kara oti ꞌikë usokin isa ꞌati ꞌikë kixun ñuikin kuënëokë ꞌiaxa.