Ezequiel 18 - Kashibo-Kakataibo Biblia

Uix kara ꞌuchaia ax ka bamati ꞌikë kikë bana

¹ Nukën ꞌIbu Diosan ka amiribishi ësokin ꞌë kakëxa:

² “¿Uisa kupín kara Israel menuaxa amiribi amiribi ësai ki banakë a ënima: atun papan ka uvas kachakë piakëxa, usa ꞌaínbi ka atun bakë bëchikëkama aín xëta xëmanxëakëxa kiax kitima ꞌik?

³ ꞌËx mitsun Ibu, ꞌaish kana ësai sinanatëkëntima oi tsóti kin, usa ꞌain kamina mitsux Israel menuax ënë banan uínsaranbi banatëkënkantima ꞌain.

⁴ Kamabi unix ka ꞌën bërúankë ꞌikën, usa ꞌain ka uni ꞌimainun aín bakë bëchikëkama ꞌën bërúankë ꞌikën. Usa ꞌain ka uix kara ꞌuchaia ax bamati ꞌikën.

⁵ An upíokin ñu ꞌakë uni an ka ñu ꞌakin upíokin ꞌaia:

⁶ usa ꞌaish ka atun dios rabikian matá mekamanuxun unikaman piti ꞌakë anu ꞌianan, Israel unikaman dios isa kixun këmëkinshi rabikë ñukama ami katamëtima; ꞌimainun ka bëtsi uni aín xanu bikuanima ꞌianan ka, aín xanun pëi machakë sënë́nkëmapain ꞌain abë ꞌima;

⁷ ꞌianan ka uibi an ꞌinantëkënuxun aín ñu ñukáxun bikë aribi usaribi okin upioxun ꞌinántëkënia; ꞌanan ka uinu ꞌikë unin ñubi mëkamakin bitsima; ꞌianan ka pitiñuma ꞌaish panankë uni a aín piti ꞌinánan chupañuma uni aribi aín chupa ꞌinania;

⁸ ꞌinánan ka mi ꞌën kuríki ꞌinámainun kamina mi ꞌinankë a inumikin ꞌë ꞌinánti ꞌai kixunbi kaima; kanan ka uinu ꞌikë unibi ꞌatima oima; usa ꞌixun ka bëtsibë ꞌatima onani nishanankë uni a mëníoxunkin a rabë́bi atun ꞌakë ñu a upíokin mëníoxunia;

⁹ usa ꞌixun ka a unin ꞌën banakama kikësabiokin ꞌakin ax kikësabi oi ꞌiti banakama a upíokin ꞌaia. A unix ka asérabi upí sinánñu ꞌaish upiti tsóti ꞌikën. ꞌËx Dios ꞌaish kana ësai kin.

¹⁰ Usa ꞌaínbi ka a unin bëchikë achúshi an bënë́kinshi ñu ꞌakë ꞌixun bëtsi uni ꞌati ꞌikën, ësokin ënë ñukama ꞌakë ꞌiti ꞌikën,

¹¹ usakin ꞌakin ka aín papan ꞌasama okin ñu ꞌakë ꞌiti ꞌikën, usa ꞌixun ka anuxua unikaman aín dios rabikin piti ꞌaxun pikë matá me anu anribi atubëtan rabi kuania kuanxun ka anuxun bëtsi uni aín xanu bikuania,

¹² usokin ꞌanan ka ñuñuma uni a ꞌimainun an ñu kuëënkë uni aribi ꞌatimonan bëtsi unin ñukamaribi mëkamatia, usa ꞌixun ka ꞌinantëkënuxun aín ꞌibu ñukáxun bëtsi unin ñu bikë a ꞌinantëkënima, usakin ꞌai ka bëtsi unin dioskama a mi katamëanan bëtsi ñu ꞌën a kuëënkëma ꞌaia,

¹³ usai ꞌikin ka bëtsi uni aín kuríki ꞌinanxunbi a ꞌinánkë a inumikinsa cha ꞌinanun kixun ubíokin kaia: usa ꞌaish ka a uni upiti tsótima ꞌikën. Usakin kamabi ꞌën kuëënkëma ñukama ꞌatankëx ka a uni uisokinbi unin mënioisama ꞌinun bamati ꞌikën, usaía a uni bamakë ax ka aín ꞌuchanbia bamakë ꞌiti ꞌikën.

¹⁴ Usa ꞌaínbi ka a uni achúshi bëchikëñu ꞌiti ꞌikën, an ka ain papaxa a ꞌai ꞌuchakë ñukama ꞌunánkë ꞌiti ꞌikën, usa ꞌaínbi ka ax aín papa ꞌikësaribiti ꞌitima ꞌikën;

¹⁵ ax ka ꞌikë, unikaman matánuxun atun dios rabikë anu kuanima ꞌianan, Israel unikaman a rabinuxun ꞌakë dioskama ami katamëtima ꞌianan; bëtsi uni aín xanu bikuanti sinanima ꞌianan,

¹⁶ uinu ꞌikë unibi aín ñu ñukákëxun ꞌinanxun ꞌë kamina ꞌën ñu ꞌinánti ꞌai kixun bënë́kin kaima; usakin ꞌanan ka uibi mëkamatima ꞌianan, axa pitiñuma ꞌaish ꞌakëñuma tsókë uni aribi aín piti ꞌinánan chupañuma uni aribi aín chupa ꞌinania;

¹⁷ ꞌinánan ka uinu ꞌikë unibi ꞌatima oíma ꞌianan ka bëtsi uni aín kuríki na ꞌinántëkënua ꞌinánkë a inumikian ꞌinánun kaima: ꞌimainun ka a tanti ꞌën bana ax kikësa ꞌoíshi ꞌikë: a uni ka aín papa ꞌuchakëkama a kupín bamatima ꞌikën. Usai ꞌika asérabi tsóti ꞌikën.

¹⁸ Usa ꞌain ka aín papax, bëtsi uni ꞌatima okë ꞌianan ñu mëkamakë ꞌiakëxa, ꞌanan ka anua tsókë ëmanuxun aín aintsikaman ismainun ñu ꞌatima ꞌakëxa, usa ꞌaish ka aín ꞌuchakëkama anunbi bamati ꞌikën.

¹⁹ Mitsux kamina ñukákanani kananti ꞌain: ¿Uisa kupí kara aín bakë bëchikëribi aín papan ꞌucha kupín ꞌatimokëma ꞌiti ꞌik? Usama ka aín bakë bëchikënën ka ñu upí ꞌakin ꞌën banakama tankin ax kikësabiokin ꞌaxa: usa ꞌaish ka asérabi a unin bakë bëchikënëxëshi tsóti ꞌikën.

²⁰ Usa ꞌain ka uix kara ꞌuchaia axëshi ñukë ꞌiti ꞌikën. Usa ꞌain ka aín bakë bëchikënëx aín papa ꞌuchakama kupín tëmëratima ꞌikën, ꞌimainun ka ain paparibi aín bakë bëchikënën ꞌuchakama kupín tëmëratima ꞌikën. Usa ꞌain ka uni upíkama an upíokin ñu ꞌakë ꞌixun a ꞌinánti ñu a biti ꞌikën; ꞌimainun kana ꞌatima sinánñu unikama aribi ꞌatimokin sinánkin ñu ꞌakë ꞌikë ꞌatimoti ꞌain.

Diosan ka upíokin ñu ꞌaia kikë bana

²¹ Usa ꞌain ka uni ꞌatima sinánñu an kamabi ñu ꞌatima ꞌaia ꞌuchakë a sinanakin aín ꞌucha a ënkin ꞌën banakama ax kikësaibi ꞌiti a tankin ꞌanan ñu upíokin ꞌai ka asérabi ñuima a unix tsóti ꞌikën.

²² ꞌËn kana an ꞌa ñu ꞌatimakama a sinántëkëntima ꞌain, usa ꞌain ka a unix upiokinshi ñu ꞌai upiti tsóti ꞌikën.

²³ ꞌËx kana an ñu ꞌatima ꞌakë uni ax ñuti kuëënima, usa ꞌain ka an ꞌakë ñu ꞌatimakama ëntankëx upitax tsóti ꞌikën. ꞌËx Dios ꞌaish kana ësai kin.

²⁴ Aínbi ka an ñu upí ꞌakë ꞌixunbi a ënkin uni ꞌatima unikaman ꞌakë ñu a ꞌati ꞌikën, ¿mitsun sinánkëx kara usakin ñu ꞌakë unikama ax upitax tsóti ꞌik? ꞌËn kana amiribishi an ka ñu upíokin ꞌakëxa kixun sinántëkëntima ꞌain: usa ꞌain ka an ꞌunánkinbi usakin ñu ꞌai ꞌain ꞌuchakë kupín a unix bamati ꞌikën.

²⁵ ꞌAínbi kamina mitsux abi nëtë́tima ꞌëinsana upiokin ñu ꞌakima ꞌatimakin ñu ꞌai kikanti ꞌain; ꞌaínbi kamina Israel unikama mitsun kuati ꞌain, ¿mitsun sinánkëxun karana ꞌën ꞌupiokin ñu ꞌaiman? ¿Usama ka mitsun kuni kamina ñu ꞌatimakin ꞌakanin?

²⁶ Usa ꞌain ka uni ñu upí akë ax an ꞌakë ñu upí a ënkin ñu ꞌatima ꞌai, anunbi ꞌatimati bamati ꞌikën.

²⁷ Usa ꞌaínbi ka ui unin kara ꞌatima sinánkin ñu ꞌatima ꞌakë ꞌixunbi, a ënkin ñu upí ꞌaia ax kuni ië́ti upiti tsóti ꞌikën.

²⁸ Usai ꞌika ꞌën kakësabiokin ꞌën bana kuakin, an ꞌakë ꞌatima ñukama ëni, asérabi upiti tsóti ñutima ꞌikën.

²⁹ Usa ꞌaínbi ka Israel unikama kiti ꞌikën, ꞌën isana ꞌupiokin ñu ꞌaima kiax kiti ꞌikën. ¿ꞌËn karana ꞌupiokin ñu ꞌaíma? ¿Israel unikaman atúnbi sinánxun ñu ꞌakëmakama ax kara upiokin ñu ꞌakë ꞌik?

³⁰ ꞌËn kana achúshi achúshi uni Israel unibu mitsu uisakin kaina ñu a usakinbi ꞌati ꞌain. ꞌËxmin ꞌIbu ꞌaish kana asérabi ësai kin. Usa ꞌain kamina bëríbi mitsun ñu ꞌatima ꞌakëkama a ënti ꞌain, usa ꞌain ka a kupín ꞌuchokë ꞌitima ꞌain.

³¹ Usa ꞌain kamina kamabi ñu ꞌatima ꞌën kuëënkëma mi ꞌakë a ënkanti ꞌain, usakin ëni kamina upíokin sinani kuëëni tsókanti ꞌain. ¿Uisa kupín kara Israel unikama bamati ꞌikën,

³² ꞌëx uibi bamati kuëënkëbëmabi bamati ꞌik? Usa ꞌain kamina ñu ꞌatima ꞌakëkama ëni upiti tsókanti ꞌain. ꞌËx Dios ꞌaish kana ësai kin.”