Ezequiel 1 - Kashibo-Kakataibo Biblia

Ezequielnën namákësa okin anua ꞌikë anu tsókë Dios isa ñuikë bana

^1-3 ꞌËx kana sacerdote Ezequiel ꞌiakën, ꞌën papax ka Buzí kakë ꞌiakëxa, usa ꞌain ka mapai achúshi baritia ꞌapu Joaquín Judá menu uankë ꞌiakëxa, anúan rabë́ ꞌimainun rabë́ ꞌuxë ꞌikë ax mapai achúshi nëtë ꞌikë anun kana ꞌëx treinta baritia ꞌiakën. Usa ꞌain kana ꞌëx ñatanbiankin Babilonianu uankë a kamabëbi Quebar kakë baka kuëbí Babilonia menu ꞌikë anu ꞌiakën, anuxun kana naíkamë ꞌëo baaki panárabëkëbëtan Dios isakën. Usa ꞌain ka Diosan anbi ꞌë kakin aín mëkën ꞌënu nankësa ꞌinun aín kushi ꞌë tamiakëxa.

⁴ Usa ꞌain kana aín tsipumiaxa suñúan kushiira aia isakën; isanan kana kuin chaiira anuaxa tsi rëkirukësa ax kaná kamë ꞌëo mëríru mërirui ꞌikësai ꞌia isakën, ꞌimainun ka mëríru mëriruia ꞌikë a rapasu kuainakëkin ichu ichukikë an pëkakë ꞌiakëxa. ꞌIanan ka tsi rëkirukësa a nëbëtsi niba niba kikë ꞌitanuan unin ñu mëniokësa usaribi ꞌianan ichu ichukikë anu mërakëxa,

⁵ ꞌimainun ka tsi rëkirukë aín nëbëtsi anubi, rabë́ ꞌimainun rabë́ uni iskësa mërakëxa.

⁶ Usa ꞌain ka akama achúshi achúshinëx rabë́ ꞌimainun rabë́ bëmánañu ꞌianan rabë́ ꞌimainun rabë́ pëiñuribi ꞌiakëxa;

⁷ ꞌimainun ka aín kisikamax puntëira ꞌaish, vaca bakë ꞌuntsisa ꞌiakëxa, ꞌianan ka manë panshian unin chabáchabákikë ꞌitánun nibókësa ꞌiakëxa.

^8-9 ꞌIanan ka rabë́ ꞌimainun rabë́ bëmánañu ꞌianan rabë́ ꞌimainun rabë́ pëchiñu, ꞌaish a ñukamax, unin mëkënsa, rabë́ ꞌimainun rabë́ amokamanu aín pëchi shimú ꞌiakëxa. Usa ꞌain ka aín pëchikaman bëtsibë bëtsibë pëntikanankë ꞌiakëxa, usai ꞌika kuainakëtima puntëishi kuani kuankëxa.

¹⁰ ꞌIanan ka aín bëmánankamax rabë́ ꞌimainun rabë́ unin bëmánansa ꞌiakëxa: usa ꞌain ka aín bëmanaira ax unin bëmánansa ꞌiakëxa; ꞌianan ka aín mëkeu ꞌikë aín bëmánan ax paru ꞌinúan bëmánansa ꞌiakëxa; ꞌimainun ka aín mëmiu ꞌikë ax vaca bënën bëmánansa ꞌiakëxa; ꞌianan ka aín kaxú ꞌikë ax tëtëkamë ꞌëo bëmánansa ꞌiakëxa.

¹¹ Usa ꞌain ka aín pëikamax manámi ki pëntikanani pënchakë ꞌiakëxa, ꞌimainun ka rabë́ aín pëi aribi pëntikanankë ꞌiakëxa, ꞌianan ka rabë́ anúnribi aín nami mapukë ꞌiakëxa.

¹² Usa ꞌain ka akamaxbi puntëishi kuani kuainakë kuatsini utëkënima puntëishi kuankëxa. Usai ꞌika uinu ꞌikë anun kara Diosan kushin buania amibi kikiani kuankëxa.

¹³ Usa ꞌain ka unisa ñukama ax tsi ëxku ënxaira iskësa ꞌianan ñu tiríoxun buánxun bëtëkënkësa atu nëbë́tsi ꞌiakëxa; usa ꞌain ka tsi ëxku ërë́kësa ax anubi ërë́akëxa, usai ꞌikëbë ka anuax kaná kamë ꞌëo mëriti ꞌikësai ꞌiakëxa.

¹⁴ A ñukama uni iskësa ax ka kuantankëx bënëtishi utëkëni kaná mëriti ꞌikësai ꞌiakëxa.

¹⁵ A unisa ñukama iskin kana menua atu achúshi achúshinua, axa mañákë aribi isakën.

¹⁶ Usa ꞌain ka rabë́ ꞌimainun rabë́ mañákë ax uisakin kara bëtsi axa usakinbi ꞌakë ꞌaish sënë́nbi ꞌiakëxa, usa ꞌaish ka topacio ꞌikësairibi ichuakëxa. Usa ꞌaish ka akama ꞌukëmëubi axa mañati bëtsiribi ꞌakësa ꞌiakëxa.

¹⁷ Usa ꞌaish ka uimi kara kuankatsia abu kuani, utëkënima kuanshiti kuainsa ꞌiakëxa.

¹⁸ Usa isanan kana rabë́ ꞌimainun rabë́ mañakë anua ꞌikë ain bërukama, an buinarakin upíokin pëkakë isan.

¹⁹ Usaia unisakama ax kuankëbë ka axa mañakëkama ax atubëbi kuankëxa, ꞌimainun ka unisa ñuinakama axa menua nirukëbë axa mañakëkama axribi niruakëxa, unisa ñukama ꞌimikëbë axa mañákë akamaxribi atubë niruakëxa, axa mañákë ñukama ax ka unisa ñukama abëbi ꞌikë ꞌiakëxa.

²⁰ Usa ꞌain ka unisa ñukama ax uin kuanun kara Diosan kushin ꞌimia amibi kikiani kuankëxa, kuankëbë ka axa mañakëkama ax atubëbi niruakëxa, axa mañakëma ax ka unisakama amibi birukin ꞌakë ꞌiakëxa.

²¹ Usa ꞌain ka uínsaran kara unisa ñukama ax shaíkia anun axa mañakë ñukama axribi shaíkiakëxa, ꞌimainun ka uínsaran kara atux nirakëtia anuribi axa mañakëkama ax nirakëakëxa; ꞌimainun ka uínsaran kara unisa ñukama ax menuax niruia anun axa mañákë ñukama ax atubë niruakëxa, axa mañakëkama ax ka unisakama amibi birukin ꞌakë ꞌiaxa.

²² Unisa ñukama aín maxká manámia kuman batsisa anu chaiira ichu ichu kikë ꞌaish bëxnan bëxnan kikësa iskë ꞌiakëxa.

²³ Anu niti ꞌakë a shimú ka unisakama ax aín pëchi rabë́ ax puntëira ꞌinun bëtsin pëchi rëbumi aín pëchi rëtikanani ꞌiaxa. ꞌImainun ka rabë́ aín pëchi anúnribi aín namikama mapukë ꞌiakëxa.

²⁴ ꞌImainun kana aín pëchikama kuankin banamia kuan: ax ka baka ꞌëi kushiira xukirui banakë usaribi ꞌiaxa, usai ꞌika Dios kamabi kushiñu ax banakësari ꞌiaxa, ꞌianan ka suntárukama ꞌaisamaira ꞌaish bëtsibëtan sënënbi chaninrukiani kuani me banamibiankë usaribi ꞌiaxa. ꞌIanan ka uínsaran kara nirakëtia anun aín pëchikama pëntsispuküaxa.

²⁵ ꞌImainun kana anu niti ꞌakë atun maxká manámi ꞌikë anuaxribia achúshiti banai xukirui ꞌia kuan.

²⁶ Kuanan kana anu niti ꞌakë a manámia anu tsóti ꞌakësa maxax upíira zafiro kakë, kuman batsisa isan isanan kana anu tsóti a manámiaribi uni achúshi iskësa ꞌiaxa.

²⁷ Ax ka aín chixumiax manámi ꞌikë ax manë pënë́ ꞌitánun nibókësa ꞌiaxa, usa ꞌikë ka tsi rëkirukësa an bëararakë ꞌiaxa, ꞌimainun ka aín chixumiax shimuribi tsi rëkirukësa an pëkakë kana isan. Usa ꞌain ka a rapasunuax ichu ichukikë ax,

²⁸ ꞌuí ꞌibúnuxa nëtë kuínu nón bai mërakë usaribi ꞌiaxa, usa ꞌain kana ꞌën Dios ax ka kushiira ꞌikë kixun isan. Usa ꞌikë isi kana ꞌëx rantinpuruni memi bëtiki ꞌian.