Éxodo 9 - Kashibo-Kakataibo Biblia

ꞌArakakë ñuinakama Egipto menuax këñua

¹ Usa ꞌain kamina faraón isi kuanti ꞌain kixun ka Nukën ꞌIbun Moisés kakëxa: —Kuanxun kamina faraón abë banakin ësokin kai kuanti ꞌain: Ësai ka hebreo banan banakë unikama aín Dios kiaxa: ꞌËn unibu kamina ꞌë rabi kuantanun xuti ꞌain.

² Min kuantanun ënkinma, amiribishi bëruntëkënkëbëtan, ka

³ Nukën ꞌIbun aín kushínbi mitsun ꞌarakakë ñuina aín pastonu ꞌikëkama maëmikin, aín ꞌinsín kushiira ꞌimiti ꞌikën. ꞌImikëbë ka caballo, asno, camello, vaca ꞌimainun ovejakamax, maërakati këñuti ꞌikën.

⁴ ꞌAínbi ka Nukën ꞌIbun Israelkaman ꞌarakakë ñuina uisaibi ꞌinun ꞌimitima ꞌikën, ꞌimikinmabi ka Egiptonu ikë unikaman ꞌarakakë ñuinakamaishi maë rakátanun këñumiti ꞌikën.

⁵ Usa ꞌain ka Nukën ꞌIbu anúan ꞌati nëtë ñui, kiakëxa: —ꞌËn kana imë́ishibi ꞌati ꞌain.

⁶ Usai kionxun ka a pëkarakëbëtan Nukën ꞌIbun usakinbi ꞌakëxa. ꞌAkëbë ka kamabi egipcio unibunën ꞌarakakë ñuinakama aín ꞌinsínan ꞌi këñuakëxa; usai ꞌikëbëbi ka israel unikaman ꞌarakakë ñuinanëxëshi achúshirabi bamama ꞌikën.

⁷ Usaia atun ꞌarakakë ñuinakama këñúkëbëtan ka faraónën Israel unibunën ꞌarakakë ñuinakama karaisa uisa ꞌikë istánun kixun aín uni xuakëxa, xukëx kuanxun iskëxbi ka achúshi ñuinabi bamakëma ꞌiakëxa. Usa ꞌikë isbiani kuanxuan kakëxunbi ka faraón aín nuitu iruarakin israel unikama kuantanun xuama ꞌikën.

Unikama kun këñua bana

⁸ Usa ꞌain ka Nukën ꞌIbun Moisés ꞌimainun Aarón kakëxa: —Tsi tikakë kininua aín chimapu mësukin bitankëxun kamina, faraónën ismainunbi, manámi mësukin sakati ꞌain.

⁹ Usa okinmi ꞌakëx ka chimapu ax kuputi, abisi kamabi Egipto me tsitsibiani uninu ꞌiruanan ñuinakamanuribi ꞌirui aín nami kamanu chanku chikiti ꞌikën.

¹⁰ Kakëxun ka Moisés ꞌimainun Aarónën anua tsi tikakë kininua chimapu bibiani faraón isi kuankëxa. Kuanxun ka anuxun Moisésnën manámi mësukin chimapu sakakëxa, sakakëx ka chimapu ax uninu ꞌiruanan ñuina kamanuribi ꞌirui chanku ꞌinun ꞌiruakëxa.

¹¹ Usakian Moisésnën ꞌakëbatan ka an ñunshinan ꞌamikëxun aín kushin ñu ꞌakë unikama atunribi usakin ꞌakatsi kixun sinanibi atúxribi ꞌain aintsi egipcio unibu ꞌikësaribiti aín namikamanu ankëti chanku ꞌirukë ꞌixun ꞌama ꞌikën.

¹² Usa ꞌaínbi ka Nukën ꞌIbun ꞌimikëxun aín nuitu iruarakin faraónën Moisés ꞌimainun Aarónën kakëxun kuaisama tankëxa, Nukën ꞌIbun Moisés kakësabiokin.

Naínuax matsi bëruñu ꞌibua ñuikë bana

¹³ Usa ꞌain ka Nukën ꞌIbun Moisés kakëxa: —Imë́ishi pëkarakëma ꞌaínshi nirukiani kuanxun kamina faraón ësokin kati ꞌain: Ësai ka hebreo unikaman Dios kiaxa: ꞌËn unikama kamina, ꞌë rabi kuantanun xuti ꞌain;

¹⁴ mi xukëbëtama kana ënu ꞌatëkënkin ñu ꞌaisama, mi ꞌatima onun xukin bëtsin ꞌakësamaira okin ꞌën an mi ñu ꞌaxunkë unikama ꞌimainun min unikamanu xuti ꞌain, ësokin ꞌaia kamina bëtsi Dios ꞌësaribi ka ënë menu ꞌaíma ꞌikë kixun ꞌunánti ꞌain.

¹⁵ ꞌËx kuëënxun kana ꞌën kushi ismikin ꞌatima okin egipcio unikama achúshi ꞌinsínan këñumikë ꞌitsían, ꞌën usokin ꞌakëx ka atux ënë menuax ñankáishi ꞌitánun këñúkë ꞌitsíanxa;

¹⁶ usa ꞌaínbi kana ꞌën kushi ismiti kupín mi uisabi okëma ꞌain, kamabi menu ꞌikë unían ꞌëx kana usa kushiñu ꞌai kixun ꞌunánun.

¹⁷ Usakin ꞌën ꞌaia iskinbi kamina, ꞌën unikama min kuantanun xuisama tanin.

¹⁸ ¡Asabi ka usa ꞌain kana! imë́ishi ꞌën ësañuishi achúshi matsin tita chaiira bëruñu Egipto me ënuxun unin uínsaranbi isun ñuiama pakënun ꞌimiti ꞌain.

¹⁹ Usa ꞌain kamina mitsun ꞌarakakë vaca pastonu ꞌikëkama, anua ñun uisabi oisamanu bukunun ꞌamiti ꞌain, matsintita bëruñu ax ꞌibúkin ka uni ꞌimainun ñuina ꞌain xubunu atsínmikëma ëman ꞌikëkama këñuti ꞌikën.

²⁰ Ësokian Nukën ꞌIbun kakëx kuanxuan Moisésnën, faraón kakëbë ka an ñu ꞌaxunkë raíri aín unikamax rakuë́akëxa, rakuë́kin ka aín uni raírinën an ñu mëëxunkë uni ꞌimainun an ꞌarakakë ñuinakama aín xubunu atsímixun anu nitsíankëxa,

²¹ ꞌaínbi ka raírinën an asérabi ka usai ꞌiti ꞌikë kixun sinánkëma unikama an aín ñuina ꞌarakakëkama aín xubunu atsímikima ëman nitsíankëxa.

²² Usa ꞌain ka Nukën ꞌIbun Moisés kakëxa: —Naími mësui kamina mëshpati aín, kamabi Egipto menu ꞌibúkian matsin unikëñunbi atun ꞌarakakë ñuina ꞌimainun kamabi egipcio unibunën atun menu ñu ꞌapákë ꞌatima onun.

²³ Kakëxun ka Moisésnën, manámi mëshpakin aín tsatin naími sanankëxa usakin ꞌakëbëshi ka Nukën ꞌIbun ꞌimikëx kanákamë ꞌëo mëríru mërirui sharakirukëbëishi ka matsin tita bëruñu menu pakëakëxa. Pakënun ꞌimikëbë ka kamabi Egipto menu matsintita ꞌibúakëxa,

²⁴ usakin ꞌimikëx ka matsin tita rëukumainun kanákamë ꞌëo mërirukë ax në́tëtimaira ꞌiakëxa. Usai ka uinsaranbia Egipto menu anun matsin tita kushiira pakëama anun usai ꞌiakëxa.

²⁵ Anu pakëkin ka matsin titan kamabi egipcio unibunën aín menu ꞌapákë ñukama ꞌatima okin këñuakëxa: usakin ꞌakin ka uni ꞌimainun ñuina kamakëñunbi ñu ꞌapákë ꞌimainun a nëtënu ꞌikë ikamaribi aín pëñan tsasipakëxa.

²⁶ Usai anu pakëtibi ka Gosen kakë me, anua Israel unibu tsókë anu, matsin tita bëruñu achúshirabi pakëama ꞌikën.

²⁷ Usaia ꞌikëbë ratúkin ka faraónën Moisés ꞌimainun Aarón kamiakëxa, kamikëxa aia ka ësokin kakëxa: —ꞌËx kana ꞌucha kixun kana ꞌunanin. ꞌËn ꞌucha ꞌimainun ꞌën unibu ꞌuchakë kupín ka ësai ñu ꞌia, Nukën ꞌIbux ka ꞌuchakëma ꞌikën.

²⁸ ꞌAisamaira kanákamë ꞌëo banai sharakirumainun ka matsi bëruñu nunu pakëtia, usa ꞌain kana mitsu kuainsa tania bëruntëkëntima ꞌain. Usa ꞌain kamina mitsun Nukën ꞌIbu nu ñukáxunti ꞌain, ꞌën mitsu kuantanun xumainun.

²⁹ Ësai kia ka Moisésnën kakëxa: —ꞌËx ënë ëmanuax chikíkian kinshi kana, ꞌën mëkën manámi okin Nukën ꞌIbu mi ñukáxunti ꞌain. Usakin mi ñukáxunkëxun ka matsi bëruñu pakëkë a ꞌimainun kanákamë ꞌëo sharakiru sharakirukë a nëtë́miti ꞌikën, usakian ꞌaia kamina min ꞌunánti ꞌain ënë mex ka Nukën ꞌIbun unio ꞌikë kixun.

³⁰ ꞌAínbi kana usaími mix kikëbëtanbi ꞌën upíokin ꞌunanin, mi ꞌimainun min unikamax ka Diosmi kana rakuë́ti ꞌai kixun sinánkëma pain ꞌikën.

³¹ Usai anu pakëkin ka matsi chaiira an xapu upíira lino a uabutiabi ꞌanan cebada egipcio unibunëan ꞌapákë a bimiñu ꞌikëbi masókin ꞌatima okëxa, cebada ꞌapákë ax bërí bimibu kuaimainun ka lino ꞌapákë ax bërí uábu kuaini ꞌiakëxa.

³² Usokin ꞌakë ꞌaínbi ka trigo ꞌimainun centeno kakë bimi ꞌapákë trigo iskësaribi ax uisaibi ꞌima amiribishi kotëkëankëxa.

³³ Usa ꞌain ka Moisésnën faraónbë banatankëx anuax chikíkiani a ëmanuax kuanxun, aín mëkën manámi okin Nukën ꞌIbu atu ñukáxuankëxa. Ñukákëbëishi ka matsin tita pakëti ꞌuí ꞌibúkë a ꞌimainun, kanákamë ꞌëo sharakirukë ax bukubuti nëtë́akëxa.

³⁴ Usokin ꞌakëbëa ꞌuí ꞌibutíma ꞌianan matsin tita pakëtima ꞌimainun kaná banai nëtë́tia isi ka amiribishi ꞌapu faraón ꞌuchakëxa. Usai ꞌuchamainun ka ꞌain unikamaribi ꞌuchakin, aín sinan atiaira iruarakëxa.

³⁵ Usakin aín sinan iruarakin ka faraónën Israel unikama kuantanun xuisama tankëxa, Nukën ꞌIbun kakëxuan Moisésnën bëráma kakësabi oi ka usai ꞌiakëxa.