Éxodo 8 - Kashibo-Kakataibo Biblia

¹ Nukën ꞌIbun ka Moisés kakëxa: —Anu kuanxun kamina ꞌapu faraón kai kuanti ꞌain: Ësai ka Nukën ꞌIbu kiaxa: ꞌËn unikama kamina ꞌë rabia kuantanun xuti ꞌain.

² Min xukëbëtama kana ꞌën atu ꞌatima okin kamabi Egipto me tsitsiruia ꞌuakamë ꞌëotanun ꞌashá ꞌimiti ꞌain kixun mi kanun ka ꞌë kaxa.

³ Usa ꞌain ka Nilo kakë baka kubini sëë ꞌi kukakikëbë anuax ꞌuáti ꞌashá chikiti këñurui, anu mix ꞌikë ꞌapun xubu anubi atsini, anumi ꞌuxkë anubi atsínti ꞌikën, atsíanan ka min unikaman xubunuribi atsini kamabi unin xubunuribi atsíanan ka anuxuan pán ꞌakë anubi atsínti ꞌikën.

⁴ Usai ꞌika minubi këñuruanan, an mi ñu mëëxunkë min uni kamanubi ꞌiruanan a ëmanu ꞌikë unikamanuribi ꞌashá këñuruti ꞌikën.

⁵ Ësokin ka Nukën ꞌIbun Moisés kakëxa: —Aarón kamina baka kamami sanankin tsatin xëxá ꞌimainun ꞌian akamami okinribi sananun kati ꞌain, usokëbë ka kamabi Egipto me tsitsirui ꞌashá anuax chikiti ꞌikën.

⁶ Usakin kakëxuan Aarónën Egiptonu ꞌikë bakakamami okin aín tsatin sanankëbë ka bakakamanuax ꞌaisamaira ꞌashá chikíkin kamabi Egipto me tsitsiruakëxa.

⁷ Usakian ꞌakëbëtan ka, an ñunshinan kushin ꞌamikëxun ñu ꞌakë unikamanribi usaribi okin, ꞌakëbë ka ꞌaisamaira ꞌashá Egipto menu ꞌiakëxa.

⁸ Usai ꞌikëbëtan ka faraónën Moisés ꞌimainun Aarón kamiakëxa, kamikëxa aia ka: —Mitsun ꞌIbu kamina nun menua unikë ꞌashá ënëa nëtëminun ñukáti ꞌain, usakin mi ꞌakëbëtan kana ꞌën min unikama mitsun ꞌIbu rabikin ñuina xaroxuni kuantanun xuti ꞌain.

⁹ Ësokian kakëxun ka Moisésnën ꞌapu faraón kakëxa: —ꞌË kamina uínsaran karana ꞌën Dios mi ñukáxuanan, kamabi an mi ñu mëëxunkë unikama ꞌimainun min ꞌaintsi kamanua ꞌanan min xubunua nëtë́mikin bakanushi ꞌashá ꞌiminun kati ꞌain.

¹⁰ —Imë́ishibi kamina nëtë́miti ꞌain —kixun ka faraónën kakëxa. Kakëxun ka Moisésnën kakëxa: —Usakian ꞌakëbëtan kamina ꞌunánti ꞌain, an nun Diosan ꞌakësaribi okían an ñu ꞌakë bëtsi Dios ka ꞌaíma ꞌikë kixun ka Moisésnën kakëxa.

¹¹ Usa ꞌain ka ꞌaisamaira ꞌashá ax min ꞌikënuax nëtë́ti bakanushi kuanti ꞌikën. Usai ꞌi ka mi ubioima ꞌianan, an mi ñu ꞌaxunkë unikama ꞌimainun min aintsikamaribi ubiotima ꞌikën.

¹² Usai banatankëx ka Moisés ꞌimainun Aarón anua ꞌapu faraón ꞌikë xubunuax chikíkiani kuankëxa. Kuanxun ka Nukën ꞌIbu abë banakin minmi ꞌapu faraónën ëmanu xukë ꞌashá kamina nëtë́miti ꞌai kixun kakëxa.

¹³ Usakin kakëxun ka Nukën ꞌIbun Moisésnën ñukákësabi okin ꞌakëxa, ꞌakëx ka ꞌashá xubukamanu ꞌikë ax me mëníokënu këñumainun ka ninubi këñuakëxa.

¹⁴ Këñutia ka anu ꞌikë unikaman ꞌashá timëkin bukuankëxa bukunkëx ka ꞌaisamaira ꞌashá bamakë ax kamabi a menuax xëisamai pisiakëxa.

¹⁵ Usakin ꞌaia isi aín sinan asábi tani kuëënkinbi ka faraónën, aín sinan atiainra iruarakin Moisés ꞌimainun Aarónën kakëxunbi kuaisamatankin Nukën ꞌIbun Diosan kakësabiokin Israel unikama xuisamatankëxa.

Diosan ꞌimikëxa ꞌaisamaira sëbë ꞌia

¹⁶ Usa ꞌain ka Nukën ꞌIbun Moisés kakëxa: —Aarón kamina kati ꞌain, aín tsatian me kupúkë nirutanun rishkinun usakian ꞌakëbë ka anuax ꞌaisamaira sëbë Egipto menu uniti ꞌikën.

¹⁷ Usakin ka ꞌakëxa. ꞌAkin ka Aarónën aín tsatin me kupúkë rishkiakëxa, usokin ꞌakëx ka kamabi me kupúkë Egipto menu ꞌikë ax sëbë ꞌikin uni ꞌanan ñuinakamaribi piakëxa.

¹⁸ Usa ꞌoia iskin ka an ñunshinan ꞌamikëxun ñu ꞌunánkë unikama atúnribi usaribi okin ꞌakatsi kixun ꞌakinbi ꞌakamakëxa. ꞌAkasmamainun ka sëbën unikama aín ñuina ꞌarakakëkama këñunbi piakëxa.

¹⁹ Usa ꞌain ꞌakamakin an ñu ꞌunánkë unikaman ꞌapu faraón kakëxa: —¡Ënëx ka Diosan aín kushin ꞌakë ñu ꞌikën! ꞌAínbi ka faraónnën aín sinan iruarakin, Nukën ꞌIbun kakësabiokin kuaisama tankëxa.

Diosan ꞌimikëx chipë ꞌaisamaira ꞌiá

²⁰ Ësokin ka Nukën ꞌIbun Moisés kakëxa: —Imë́ishi ka pëkarakëma ꞌaínshi faraón bakanu kuania, usa ꞌain kamina mixribi pëkarakëma ꞌaínshi nirukiani kuanxun kai kuanti: Ësai ka Nukën ꞌIbu kiaxa: ꞌËn unibu kamina ꞌë rabia kuantanun xuti aín.

²¹ Min kuantanun xukëbëtama kana ꞌën chipë mi ubionan, min unikama ꞌimainun min xubukamanu xuti ꞌain. Usokin ꞌimikëx ka egipcio unibunën xubukama ꞌaisamaira chipën nutúruti ꞌikën, usakin ꞌai ka menubi chipë ꞌaisamaira ꞌiti ꞌikën.

²² ꞌAínbi ka anua ꞌën uni Israelkama ꞌikë Gosen kakë me anu añu ñubi ꞌaíma ꞌiti ꞌikën. Usa ꞌain ka anu achúshi chipërabi ꞌaíma ꞌiti ꞌikën. Usaia ꞌikëbëtan kamina ꞌunánti ꞌain ꞌëx kana asérabi min ꞌIbu kushiira ënë menu ꞌai kixun.

²³ Ësokin kana imë́ishibi ꞌati ꞌain. Usakin ꞌën unikama ꞌakimabi kana min unikama usakin ꞌati ꞌain.

²⁴ Usakin ka Nukën ꞌIbun ax kiásabiokin ꞌakëxa, ꞌakin ka chipë nëtë kuin tunan iskësa kuatsinia utanun ꞌimiakëxa, ꞌimikëx ka ꞌapu faraónën xubunu irapain tsitsirui atsíankëxa, atsíanan ka an ñu ꞌaxunkë unikama aín xubunuribi atsíankëxa, atsíanan ka kamabi egipcio unikaman mebi tsitsirui ukin ka. Chipën kamabi Egipto me ñuñuma ꞌitánun tsitsirukë ꞌiakëxa.

²⁵ Usai ꞌia iskin ka faraónën Moisés ꞌimainun Aarón kamiakëxa kamikëxa aia ka kakëxa: —Mitsun Dios ñuina rëxun xaroxunkin rabi kamina kuanti ꞌain, ꞌaínbi kamina nun me ëbiani chikítima ꞌain.

²⁶ Ësai kia kuakin ka Moisésnën kakëxa: —Usakin nun ꞌakëxbi ka upí ꞌitima ꞌikën, nun Dios rabikinu nun ꞌakë ñuinakama ax egipcio unikaman iskëx upíira ꞌiti ꞌikën. Usakinnu nun atun rabikë ñuina xaroia iskin ka egipcio unikaman, nukama ꞌën sinánkëxun maxaxan rëti ꞌikën.

²⁷ Usa aín kananuna anu uni ꞌikëma menu rabë́ ꞌimainun achúshi nëtë ꞌikiani kuanti aín, usai anu kuantankëxun kananuna ñuina ꞌatankëxun xarokin nun ꞌIbu Dios, an nu usakin ꞌanun kakësabiokin ꞌai kuanti ꞌain.

²⁸ Ësakin ka faraónën Moisés kakëxa: —Anu uni ꞌikëma menu kuantankëxun kamina ñuina rëtankëxun min Dios rabi kuanti ꞌain, ꞌaínbi kamina ꞌuraira kuantima ꞌain. ꞌImainun kamina ꞌëribi ñukáxunti ꞌain.

²⁹ Usakian kakëxun ka Moisésnën kakëxa: —ꞌËx ënuax chikikiankinshi kana ꞌën Nukën ꞌIbu imë́ishibi chipë minua nëtë́mianan, an mi ñu ꞌaxunkë unikama ꞌimainun min ëmanu ꞌikë unikamanuaribi chipë nëtëminun kati ꞌain, ꞌaínbi kamina amiribishi paránxun Israel unikama aín Dios rabi kuainsama okin bëruntëkëntima ꞌain, usa ꞌain kamina Israel unikama Nukën ꞌIbu rabikin ñuina xarotanun xuti ꞌain.

³⁰ Usai banatankëx faraónën xubunuax chikixun ka Moisésnën Nukën ꞌIbu ñukákëxa,

³¹ ñukákëxun ka Nukën ꞌIbu Moisésnën ñukákësabi okin chipë faraón ꞌimainun an ñu mëëxunkë unikamanuaribi nëtë́nun chipë ꞌimiakëxa.

³² ꞌAínbi ka usa oia iskinbi faraónën aín sinan iruarakin Israel unikama kuantanun ëinsama tankëxa.