Éxodo 7 - Kashibo-Kakataibo Biblia

¹ Usa ꞌain ka Nukën ꞌIbun Moisés katëkëankëxa: —Ka kuat, ꞌën kana mi ꞌësaribi ꞌixunmi Egiptonu ꞌikë ꞌapu faraónën ismainun ñu ꞌanun mi kain, ꞌimainun ka min xukë́n Aarón mix kikësa ꞌitanun banati ꞌikën.

² Min kamina min xukë́n Aarón ꞌën mi kakësokinbi kati ꞌain; usakinmi kakëxuan an kakëxun ka faraónën Israel unikama ꞌain menuaxa chikitanun kati ꞌikën.

³ ꞌAínbi kana ꞌën faraón kakëxunbi kuaisama tankin aín nuitu iruaranun ꞌimiti ꞌain, ꞌimainun kana uínsaranbi atun iskëma ꞌitsaira ñu a isia atux rakuë́ti Egipto menu ꞌimiti ꞌain.

⁴ Usakinmi kakëxunbi ka faraónën kuaisama tankin mitsu xutima ꞌikën. ꞌËnbi kana usaía ꞌinun ꞌimiti ꞌain, usa ꞌain kana ꞌaisamaira atun iskëma ñu ꞌën kushínbi Egipto me ënu ꞌakin atu ꞌatima ꞌoti ꞌain, usa atu okin kana ënë menua Israel unikama aín kushikaman suntáru chikínbiankin uankësa usaribi okin buánti ꞌain.

⁵ Usakin kana ꞌën kushi Egiptonu ꞌikë unikama ismiti ꞌain, usa ꞌixun kana Israel unikama chikínti ꞌain, usakin ꞌën ꞌakëbëtan ka ꞌëx kana asérabi Mitsun ꞌIbu ꞌai kixun atun ꞌunánti ꞌikën.

⁶ Usakin ka Moisés ꞌimainun Aarónën Nukën ꞌIbun kakësabiokin ꞌakëxa.

⁷ Usa ꞌain ka a nëtë́an ꞌapu faraónbë banai kuankë anu, Moisés ochenta baritiañu ꞌiakëxa, ꞌimainun ka Aarón axribi ochenta ꞌimainun tres baritiañu ꞌiakëxa.

Aarónën tuinkë tsati ñui kikë bana

⁸ Usa ꞌain ka Nukën ꞌIbun Moisés ꞌimainun Aarón kakëxa:

⁹ —Faraónëan, unin ꞌakëma ñu achúshi ꞌanun kakëxun kamina Aarón aín tsati bikian faraónën ismainun menu ninun kati ꞌain, kakëxuan menu nikëx ka achúshi runu ꞌiti ꞌikën.

¹⁰ Usakian Nukën ꞌIbun kakëx ka Moisés ꞌimainun Aarón ꞌapu faraón isi kuankëxa, kuanxun ka ësakin kakëxa, ꞌën kana Diosan a ꞌanun ꞌë kakësabiokin ñu ꞌain: Ësakin faraón kakin ka Aarónën aín unibunën ismainunbi menu aín tsati niakëxa, nikëxëshi ka achúshi runu ꞌinun ꞌiakëxa.

¹¹ Usakian ꞌakëbëtan ka ꞌapu faraónën ribi an ñu tankë ꞌimainun an ñu ꞌunánkë aín unikama kuënxun usaribikinsa ꞌanun kixun ꞌamiakëxa:

¹² ꞌamikëxun ka atúnribi achúshi achúshi unin aín tsati menu niakëxa, nikëx ka achúshi achúshi tsatix runu ꞌiakëxa. Usokin ꞌaiabi ka Aarónën tsati runukë an ñu ꞌunánkë ꞌimainun an ñu tankë unikaman tsati runukë a éakëxa.

¹³ Usa ꞌoia iskinbi ka faraónën aín sinan iruarakin, Nukën ꞌIbun Moisés ꞌimainun Aarón kakësabiokin aín bana kuaisamatankëxa.

ꞌUmpax imi ꞌiá bana

¹⁴ Usakin ꞌakë inúkë ꞌain ka Nukën ꞌIbun abë banakin Moisés kakëxa: —Egiptonu ꞌikë ꞌapu faraónën ka aín sinan iruarakin ꞌën uni Israelkama kuantanun xuisamatania.

¹⁵ ꞌAínbi kamina imë́ishi pëkarakëma ꞌaínshi kuantankëxun, Nilo kakë baka kuëbíxun kaini kuanti ꞌain, kuankin kamina min tsati axa runuëxankë abi buani kuanti aín.

¹⁶ Anuxun kamina faraón mërakin ësakin kati ꞌain: hebreo unibunën ꞌIbu ꞌianan aín Dios an ka ësakin min kanun ꞌë kaxa: ꞌËn unikama kamina anu uni ꞌikëma menu kuantankëxuan ꞌë rabitanun xuti ꞌain. ꞌAínbi kamina bëríbi min an kikësokin ꞌaisama tanin.

¹⁷ Usa ꞌain ka, Nun ꞌIbu kiaxa: Bërí kamina min ꞌunánti ꞌain, ꞌëx kana Nukën ꞌIbuira ꞌai kixun. ꞌËn tsati ꞌën tuinkë ënën Nilo kakë baka rishkikëbëishi ka ꞌumpax imi ꞌiti ꞌikën.

¹⁸ Usaia imi ꞌikëbë ka bakanu ꞌikë ñuinakama këñuti ꞌikën, usai ꞌikëbëa baka pisikëbë ami kuínsakin ka egipcio unikaman ꞌumpax xëatima ꞌikën.

¹⁹ Usakin kanan ka ësokinribi Nukën ꞌIbun Moisés kakëxa: —Aarón kamina aín tuinkë tsati bikian manámi okin anun sananbëkinkin kamabi Egipto menua ꞌikë baka, xëxá ꞌimainun ꞌian uinu kara ꞌumpax ꞌikë axbia xëatisama imi ꞌitánun ꞌanun kati ꞌain. ¡Usakian ꞌakëbëshi ka anu ꞌumpax nanti i ꞌanan maxá ꞌakë akamanu nankë ꞌumpax kamáxbi imi ꞌiti ꞌikën!

²⁰ Usakian Nukën ꞌIbun kakëxun ka Moisés ꞌimainun Aarónën an kakësabiokin ꞌakëxa. ꞌAkian Aarónën aín tsati birukin anun baka rishkikëbëishi ka ꞌumpax faraón ꞌimainun aín unikaman ismainunbi imi ꞌiakëxa.

²¹ Usai ꞌikëbëa bakanu ꞌikë ñuinakama këñúkëbë ka ꞌumpax pisiakëxa, usai ꞌia ka egipcio unibunën xëatisama ꞌikë ꞌumpax xëama ꞌikën. Usaia ꞌikëbë ka kamabi Egipto menu ꞌikë ꞌumpax imi ꞌiakëxa.

²² Usakian ꞌakëbëtan ka egipcio unibu an ñu tankë ꞌimainun an ñunshinan kushin ñu ꞌakë a unikamanribi usaribi okin ꞌakëxa, ꞌakëbëtan ka faraónën aín sinan iruarakin Moisés ꞌimainun Aarónën kakëxunbi Nukën ꞌIbun kakësokin aín bana kuaisama tankëxa.

²³ Usakian ꞌaia isíbi ka faraón aín xubunu atun ꞌakë ñu asérabi ka ënë ñukama ꞌikë kixun sinanima kuankëxa,

²⁴ usai ꞌikëbëtan ka kamabi egipcio unibunën Nilo kakë baka kuëbí anua ꞌumpax biti upí kini ꞌakëxa, bakanu ꞌikë ꞌumpaxkama xëatisamaira ꞌain.

ꞌAshá ꞌaisamaira ꞌiá bana

²⁵ Usai ꞌian ka mapai achúshi ꞌimainun rabë́ nëtë ꞌinukëbëtan Nukën ꞌIbun amiribishi ꞌumpax imi ꞌikë a nëtë́miakëxa.