Éxodo 6 - Kashibo-Kakataibo Biblia

¹ Usai kia ka Nukën ꞌIbun Moisés kakëxa: —Bërí kamina uisakin karana ꞌapu faraónën kuëënkimabi ꞌën kushinbi ꞌamikëxun mitsu xunun ꞌami isti ꞌain, usa ꞌaínbi kana anbia mitsu aín menua xunun sinánmiti ꞌain; usa ꞌain ka, anbi mitsu ënuax kamina kuanti ꞌain kixun kati ꞌikën.

Diosan Moisés amiribishi kuëntëkëan bana

² Amiribishi ka Diosan abë banakin Moisés katëkëankëxa: —ꞌËx kana min ꞌIbu ꞌain.

³ Usa ꞌikë ka min chaitiokë Abraham, Isaac ꞌimainun Jacob akaman ꞌëx kana kamabi kushiñu Dios a ꞌai kixun ꞌunánkëxa, ꞌaínbi kana asérabi ꞌën anëira a atu ꞌunánmiama ꞌain: ꞌËx kana min ꞌIbu a ꞌain.

⁴ Usa ꞌixun kana këñutima okin achúshi ñu atu ꞌaxuan, ꞌakin kana Canaán kakë me a ꞌinánuxun atu kakën, ax ka anu paian bëtsi menu ꞌikë unikama ꞌikësai ꞌitsama baritia anu tsóa a ꞌiakëxa.

⁵ Usa ꞌain kana Israel unikamax bërí ꞌitsaira tëmëraia ꞌunan, ꞌimainun ka egipcio unibunën ñu mënun ubíokin ꞌamia, usa ꞌain kana ꞌën unikamabë mënionani kia a sinan.

⁶ Usa ꞌain kamina Israel unibu anu kuanxun kai kuanti ꞌain, ꞌëx min ꞌIbu ꞌixun kana tëmëramikian ñu mëëkë anua chikínti ꞌain. Usa ꞌain kana ꞌaisamaira egipcio unibunën ñu mëëmikin tëmëramikë anua chikínti ꞌain; ꞌimainun kana ꞌën kushi atu ismikin ꞌëx upí ꞌixun mitsu ꞌakësamaira okin atu tëmëramiti ꞌain;

⁷ tëmëramianan kana mi kamaxmi ꞌën uni ꞌikë mitsu ië́miti ꞌain, ꞌëx kana mikaman Dios ꞌain. Usakin ꞌakëbëtan ka ꞌëx kana mitsun ꞌIbu Dios ꞌain kixun ꞌunánti ꞌikën, usa ꞌain kana ꞌën egipcio unibunëan amiribishi tëmëramikin ñu mëëmitëkëntima okin mitsu ꞌimiti ꞌain.

⁸ Usa ꞌain kana a me ꞌinánuxun ꞌën Abraham, Isaac ꞌimainun Jacob akama ká me mitsunanbi ꞌinun ꞌinánti ꞌain. ꞌËx kana mitsun ꞌIbu ꞌain.

⁹ Ësokian kakëxun ka Moisésnën usakian Diosan kakë banakama israel unikama ñuixuankëxa, ñuixunkëxunbi ka ꞌaisamaira ñu mëi atsanxun aín bana kuaisama tankankëxa.

¹⁰ Usai ꞌikankëbëtan ka Nukën ꞌIbun Moisés kakëxa:

¹¹ —Anu kuanxun kamina Egiptonu ꞌikë ꞌapu faraón Israel unikama kuantanun xunun kai kuanti ꞌain.

¹² ꞌAínbi ka Moisésnën Nukën ꞌIbu katëkëankëxa: —Uisaxunbi ka israel unibunën ꞌën kakëxun ꞌën bana kuaisamatania; ¿uisaxun kara ꞌën kakëxun faraónën kuati ꞌikën, ꞌëx upitira banakë unima ꞌain ꞌën bana kuati ꞌik?

¹³ Ësokin katankëxun ka Nukën ꞌIbun Moisés ꞌimainun Aarón israel unibu kanan, faraón katabakin katánun kixun xuakëxa, Diosan ka asérabi un kaxa nun kananuna israel unibu egipcio me ënua chikínti ꞌai kixun.

Moisés ꞌimainun Aarón Diosan kuëan ñuikë bana

²⁸ Anúan abë Egipto menuax banakë a nëtën ka Nukën ꞌIbun Moisés,

²⁹ kakëxa: —ꞌËx kana min ꞌIbu ꞌain. Usa ꞌain kamina Egiptonu ꞌikë ꞌapu faraón, ꞌën mi kakë kamabi banakama ñuikin kati ꞌain.

³⁰ ꞌAínbi ka Moisésnën katëkëankëxa: —ꞌËn ꞌIbu, ꞌëx kana upitira banakëma uni ꞌain, usa ꞌikë kara, ¿Uisaxun kara faraónën ꞌën kakëxun ꞌën bana kuati ꞌik?