Éxodo 5 - Kashibo-Kakataibo Biblia

Moisés ꞌimainun Aarón Egiptonu ꞌikë ꞌapu faraónbë bana

¹ Usakin unikama katankëx ka Moisés ꞌimainun Aarón, ꞌapu faraónbë banai kuankëxa: —Kuanxun ka ësai ka Israel unikaman Dios kiaxa kixun kakëxa: ꞌËn unikama kamina anu uni ꞌikëma menu kuanxuan achúshi fiesta ꞌakin ꞌë rabitanun xuti ꞌai kixun mi kanun ka ꞌë kaxa kixun kakëxa.

² ꞌAínbi ka faraónën kakëxa: —¿Ui kara min ꞌIbu ax ꞌik? ¿ꞌËn karana an kakëxun aín bana tankin israel unikama kuantanun xuti ꞌain? ¡ꞌËn kana min ꞌIbu ꞌunaniman, usa ꞌain kana israel unikama kuantanun xutima ꞌain!

³ Usakian kakëxun ka a rabëtan kakëxa: —Usama ka ax ka hebreo unikaman Dios ꞌikën, usa ꞌaish ka numi chikirakëaxa; usa ꞌain kananuna anu uni ꞌikëma menu kuanti ꞌain, ax ka rabë́ ꞌimainun achúshi nëtë ꞌikiani kuanti ꞌikën, anuxun kananuna nun ꞌIbu Dios ñuina rëtankëxun xaroxunti ꞌain, usakin ꞌaxunkëxuma ka nukama ꞌinsínan këñumianan bëtsi unikaman nubë ꞌakanankin këñunun nu ꞌamiti ꞌikën.

⁴ ꞌAínbi ka Egipto menu ꞌikë ꞌapun Moisés ꞌimainun Aarón kakëxa: —¿Uisa kupín kaina min unikama aín tëëti ëmitisa tanin? ¡Abi kamina mitsun ñu mëëti ënkinma ꞌati ꞌain, kixun ka faraónën kakëxa!

⁵ Ësakinribi ka faraónën amiribishi katëkëankëxa: —Bërí ka ënë menu ꞌaisamaira Israel unibu ꞌikën, ¿Min kaina atun tëëti ëmitisa tanin?

⁶ A nëtënbi ka faraónën an bërúanxun unikama ñu mëëmikë ꞌimainun, an ñu mëia bërúankë aín ꞌapukama ësokin kakëxa:

⁷ —Bërí kamina Israel unikama ladrillo ꞌati me tëikëñun mëskuti basi ꞌinántima ꞌain, atun ꞌakësabi okían ꞌanun. Kamina kuantankëxuan atúnbi basi binun kati aín.

⁸ ꞌAínbi kamina atun ꞌakësabi okían uiti ꞌitsa kara ꞌaia, ati ꞌitsabi bërí ꞌanun atu ꞌamiti ꞌain. Achúshi ladrillorabi ka sënëmamitima ꞌikën, a unikamax ka chikish ꞌikën, usa ꞌaish ka atux munuma banai kuënishi kia: Nukën ꞌIbu Dios rabikin ñuina rëxun xaroxuni kuantanun kamina nu xuti ꞌain kiax ka kikania.

⁹ Usa ꞌain kamina a unikama mitsun ꞌakësamaira okin bërí tëmëramikin ñu mëëmiti ꞌain; usokin ꞌakëxun ka ñu mëëkin uisa bana kara kuatia abi asérabi ka a bana ꞌikë kixun sinántima ꞌikën.

¹⁰ Ësokian ꞌapu faraónën kakëx ka an ñu mëia bërúankë unikama ꞌimainun aín kushikama, ax unikama kai kuankëxa: —Kuanxun ka kakëxa, ꞌapu faraónën ka bërí ladrillo ꞌati basi mitsu ꞌinanxuma ꞌanun nu kaxa.

¹¹ Usa ꞌain kamina bërí kuantankëxun mitsúnbi uinua kaina mërai anua basi biti ꞌain. ꞌAínbi kamina mitsun ꞌakësabi okin uiti ꞌitsa karamina atu ꞌaxun ꞌinanin ati ꞌitsa ladrillobi ꞌaxun achúshirabi sënëmamikinma ꞌinánti ꞌain.

¹² Ësakian kakëx ka Israel unibu Egipto mekamanu kuani basi bari abísakëxa, abístankëxun ka basi paxa basi chushikë, ꞌakësaribi okin ꞌati biakëxa.

^13-14 Usakian ꞌaia ka kamabi nëtën an ñu mëia bërúanti faraónën nankë unikaman bënë́kin, uiti ꞌitsa kara basi ꞌinánkëxun ladrillo ꞌaia ati ꞌitsabia ꞌanun ꞌamiakëxa, ꞌimainun ka Israel unibunën kushikama mëëkin kakëxa: —¿Uisa ꞌixun kaina imë́ishibi ꞌaíma ꞌiónxunbi bërámami basi ꞌinánkëxun ꞌakankë ati ꞌitsabi ladrillo mitsun ꞌakaniman?

¹⁵ Usakin atun ꞌakëxun ka Israel unin kushikaman anu rikianxun ꞌapu faraón kakankëxa: —¿Uisa kupín kaina mix ꞌapu ꞌixunbi an mi ñu mëëxunkë unikama ꞌikëbi nu usokin ꞌain?

¹⁶ Bërí ka basi nu ꞌinankimabi, ladrillo ꞌanun kixun bënëanan nu mëia. ¡Usakin ka min unikaman nu ꞌaia!

¹⁷ ꞌAínbi ka faraónën kakëxa: —Mitsux kamina asérabi chikishan tapunbuira ꞌain. Usa ꞌaish kamina mitsun nikënuaxbi kin: Nukën ꞌIbu kananuna ñuina rëtankëxun xarokin rabi kuanti ꞌain kiax kikanin.

¹⁸ ¡Kamina mitsun tëtinubi rikianti ꞌain! Bërí kananuna mitsu basi ꞌinániman, usa ꞌaínbi kamina bërámami ꞌinankësa ati ꞌitsabi ladrillo ꞌaxun ꞌinánti ꞌain kixun ka kakëxa.

¹⁹ Usakian kakëxun ka Israel an ñu mëëmikë aín kushikaman tëiira iskin sinánkëxa: Uisaxun karanuna ladrillo ꞌitsamashi ꞌanun kakima bërámanu ꞌakë ꞌati ꞌitsabi achúshi nëtën ꞌanun kakëxun ꞌati ꞌai kixun.

²⁰ Usakin ꞌapu faraónën kakëx chikikinbi ka Israel unibunën kushikaman Moisés ꞌimainun Aarón ëmanxuan kainkëxun mërakëxa,

²¹ mërakin ka atun kakëxa: —Nukën ꞌIbun ka nukamami ꞌakësaribi okin mi ꞌatima oti ꞌikën. Mi rabëtan ꞌucha kupín ka faraón ꞌimainun ꞌain unikama xuamati numi nishkin nukama ꞌaisatania. Mitsúnbi kamina usakian nu ꞌanunbi anu kuanxun faraón kan, usa ꞌain ka atun usakin nu ꞌaia.

Moisés Diosbë bana

²² Usa ꞌain ka Moisésnën Nukën ꞌIbu abë banakin kakëxa: —ꞌËn ꞌIbu, ¿Uisa kupín kaina min unikama ꞌatima oin? ¿Uisoti kaina min atunu ꞌë xuan?

²³ ꞌËn kana anu uxun mi ñuikin ꞌë mi kakë banakama faraón ñuixuan, usa ꞌaínbi ka an bëríbi min unikama ꞌatima oti ënkëma ꞌikën, usa ꞌaínbi kamina min atu ꞌiëminuxun uisa ñubi ꞌaxunkëma ꞌain.