Éxodo 40 - Kashibo-Kakataibo Biblia

Anuax Nukën ꞌIbubë mërananti xubu ñuikë bana

¹⁶ Uisakin kara Nukën ꞌIbun kaia usakinbi ka kamabi ñu Moisésnën ꞌakëxa.

¹⁷ Anúan Egipto menuax chikíkë achúshi bari këñutankëxa rabë́ bari ꞌinux ꞌirukë a ꞌuxë achúshi nëtë ꞌikëbëtan ka anuax Diosbë banati xubu chukúma ꞌakankëxa.

¹⁸ Usa ꞌain ka Moisés ꞌimainun Israel unikaman Diosan kakësabiokin anuax abë banati ꞌakin, ami puruti i kamapain nitsintankëxun, aín ꞌirakanti akamaribi ꞌatankëxun aín ikamaribi puruakëxa,

¹⁹ purutankëxun ka chupasa okían ꞌakë anun aín manámi mapuakëxa, aín namëkama axa mapukë ꞌitánun, usakin Nukën ꞌIbun ꞌanun kakësabiokin ka anuax abë banati ꞌakëxa.

^20-21 Usakin akamapain sënë́ontankëxun ka Moisésnën ax kikësabi oi ꞌiti bana kuënëokë maxá pará rabë́ a bunántisa kurin ratakakakë mëu ꞌaruakëxa; ꞌarutankëxun ka bunántisa kurin ratakakakë aín ñaruantikama ꞌakëxa, ꞌimainun ka aín maputiribi ꞌatankëxun xubu chatani aín kata upíira a ꞌukëmëu uankëxa; uanxun ka chuparibi bunántisa kurin ratakakakë axa ꞌukëmëu ꞌinun nëbëtsin amo rabë́ ꞌitanun bëarakin bëpankëxa; Nukën ꞌIbun usakin ꞌanun kakësabiokin ka ꞌakëxa.

²² ꞌAtankëxun ka anuax Nukën ꞌIbubë mërananti xubu chukúma okin ꞌakë anu pain atsínti anu mesa achúshi nankëxa ax ka aín tsipumiu chupa bëpankë a ꞌuri nankë ꞌiakëxa.

²³ Anu ka pán Diosan ka nun piti cha ꞌinania kixun ꞌunántiokin nankëxa, usakin ꞌanúan Nukën ꞌIbun kakësabiokin.

²⁴ ꞌAtankëxun ka anu pain atsínti anu tirí nanti xubusa okían ꞌakë ꞌukëmëu anua mesa nankë a bëtánain aua bari urukë upíira kakë anu nankëxa,

²⁵ ꞌatankëxun ka anupain atsínti anu tirícha kurin ꞌakë, axa siete lamparínñu ꞌikëa nanti xubusa okían ꞌakë ꞌukëmëu anua mesa nankë a bëtanain aua bari urukë upí kakë anu nankëxa.

²⁶ ꞌAtankëxun ka kuri ꞌakë anuxun sanuira ñu xaroti aribi xubusa okin ꞌakë ꞌukëmëu kata itsi, upíira kakë chupan bëpankë anu nankëxa,

²⁷ anuxun ka tsëpasa ro sanuira xarokëxa, Nukën ꞌIbun ꞌanun kakësabiokin.

²⁸ Usakin ꞌatankëxun ka Moisésnën anun upíira kakë anu atsínkiantinu chupa an bëpanti tëkërë kamiakëxa;

²⁹ ꞌamianan ka anuxun ñuina xarotia ꞌamikë manë uxua ꞌakë aribi, anun xubusa okin ꞌakë upíira upí kakë anun atsínkianti aín xëkuë ꞌurama ëman nankëxa, anuxun ka ñuina xaronan ñu bimi upíirabu xarokëxa Nukën ꞌIbun usakin ꞌanun kakësabiokin.

³⁰ Usakin ꞌamianan ka ëman anuxun ñuina xarotia ꞌamikë manë uxua chookin ꞌakë aribi anun xubusa okin ꞌakë upíira kakë anu atsínkianti aín xëkuë ꞌurama nankëxa, nanxun ka anun mëchukati ꞌumpax anu buákakëxa.

³¹ Anua ka Moisés, Aarón ꞌimainun aín bakë bëchikëkaman anun mëchukanan tachukati ꞌumpax biakëxa.

³² Anun ka uínsaran kara xubusa okían ꞌakë anu atsímianan, anuxun ñuina xaroti ꞌakë a ꞌurama oia anun ka ꞌumpax a bitankëx chukakëxa, usaía ꞌinun Nukën ꞌIbun Moisés kakësabi oi.

³³ Usokin pain kamabi ꞌamitankëxun ka Moisésnën xubusa okin ꞌakë a ꞌimainun, anuxun ñuina xara otia ꞌakë rapasu me mëníokë a chupan buinarakin anun atsintinu ꞌikë a bëararákëxa. Usokin ka Moisésnën xubusokin anua Diosbë banati a këñuakëxa,

Xubusa okin chupa ꞌakë ain kaxunu kuin ꞌia bana

³⁴ këñúkë ka kuinan xubusa okin chupa ꞌakë anu ꞌibúkin mapumainun ka Nukën ꞌIbun kushin ꞌain namë anu ichúkin tsitsiarakëxa.

³⁵ Usakian xubusa okin ꞌakëa anu ꞌibúti tsóbukin kuinan mapukë ꞌain ka, Moisés anu atsíama ꞌikën, Nukën ꞌIbun kushian aín namë upí kakë a tsitsiarakë ꞌain.

³⁶ Usai xubusa okin chupa ꞌakë anu, ꞌibútankëx kuin manámi niruia iskin ka Israel unikaman xubusa okían chupa chukúmokin atux anu ꞌiti ꞌakë a mëniobiani anua ꞌikë anuax kuankëxa,

³⁷ ꞌaínbi ka uinu kara kuin nirakëtia anu nirakëtankëxun kuin nirukëmapain ꞌain, Israel unikamanribi atux anu ꞌikë anuax kuanuxun kuin niruiapain kainkin anua ꞌikë a mëniomapan ꞌikën.

³⁸ Munu ꞌikiania Israel unikama kuankëbë ka xubusa okin ꞌakë aín manámia kamabi nëtën kuin ꞌibútia isakëxa, ꞌimainun ka kamabi imë́ribi kuin ꞌibúkë anu tirí chaiira atux anu ꞌikë abi pë́kai mërakëxa, usakin ka Nukën ꞌIbun Israel unikama ꞌakiankëxa anuishi.