Éxodo 4 - Kashibo-Kakataibo Biblia

¹ Atun ka usaka kixun sinanima ꞌianan ka ꞌën kakëxun kuatima ꞌikën —kixun ka Moisésnën kakëxa—. Usai ꞌi ka kiti ꞌikë: mimi ka nukën ꞌIbu chikirakëkëma ꞌikë kiax kiti ꞌikën.

² —¿Añu kara min mëkënumi tuinkë ax ꞌik? —kixun ka Nukën ꞌIbun ñukákëxa. —Ënëx ka achúshi tsati ꞌikë —kixun ka Moisésnën kakëxa.

³ —Menu kamina min tsati niti ꞌain —kixun ka Nukën ꞌIbun kakëxa. Kakëxun ka Moisésnën aín tsati menu niakëxa, nikëxëshi ka aín tsati achúshi runu ꞌinun ꞌiakëxa. Usai ꞌia isi ka. Moisés a ëbiani uri ki abákëxa,

⁴ ꞌaínbi ka Nukën ꞌIbun Moisés kakëxa: —Aín inan kamina min mëkënan tuinkin biti ꞌain. Kixun kakëxuan Moisésnën aín inan bikë́xëshi ka runu amiribishi tsati ꞌiakëxa.

⁵ —Ënëx ka a iskian asérabi ka Nukën ꞌIbu mimi chikirakëaxa kixun ꞌunánti ꞌikën, mitsun chaitiokë Abraham, Isaac ꞌimainun Jacob aín Dios ax ka mimi mëraxa kixun ka atun sinánti ꞌikën

⁶ —kixun ka Nukën ꞌIbun kakëxa—. Bërí kamina min mëkën min shikanu nanti ꞌain. Kakëxun ka Moisésnën aín mëkën aín shikan ꞌain kutun mëu Diosan kakësabiokin atsímiakëxa, atsímixun amiribishi bitëkënkin iskëxbi ka aín mëkën an nami chëkimikë ꞌinsín shurun shuruanbu ꞌaish matsi uxuira iskësa ꞌiakëxa.

⁷ Usa ꞌain ka Diosan kakëxa: —Min mëkën kamina amiribishi min kutun mëu atsímitëkënti aín. Kakëxun ka Moisésnën amiribishi aín mëkën aín kutun mëu atsímitëkëankëxa, atsínmixun bitëkënkin iskëxbi ka aín mëkën aín namikama iskësabi ꞌaish upí ꞌiakëxa.

⁸ Usokin ꞌimitankëxun ka Nukën ꞌIbun kakëxa: —A painmi ꞌakë ënë iskinbi asérabi ka kixun sinánkima ka bëtsi ñumi ꞌatëkënkëbëtaira a iskin asérabi ka kixun sinánti ꞌikën;

⁹ ꞌaínbia usa ka kixun sinanan min kakëxun kuaisama tánkin ënë ñu rabë́ iskinbi usa ka kixun sinánkankëbëtama kamina, ꞌumpax bakanua bixun menu chikuti ꞌain. Usakin ꞌumpax bakanua bikë a menu anpënkakëxëshi ka imi ꞌiti ꞌikën.

¹⁰ —¡Uisati kaina ꞌë usakin kai ꞌën ꞌIbu! —Kixun ka Moisésnën Dios kakëxa—. ꞌËx banati ka tëira ꞌikën, ꞌëx usai banakë ax ka bëríra usai ꞌëx banakëma ꞌikën, usa ꞌain ka, an mi ñu mëëxunti ënëx bëríra usai ꞌiama ꞌaish usaibi banaia. Usa ꞌain kana ꞌëx banaibi upiti banatima ꞌain.

¹¹ ꞌAínbi ka Nukën ꞌIbun Moisés kakëxa: —¿Uin kara uni anúan banati bana ꞌinánkëx? ¿Uinma ꞌën kana an banañuma ꞌianan pabë, bëxuñu ꞌimianan an unikama an upíokin isnun ismikë a ꞌain?

¹² Usa ꞌain, kamina kuanti ꞌain, ꞌën kana Egipto menuax banakëbë mibë ꞌixun, usakinmi kati bana mi ꞌunánmiti ꞌain.

¹³ Ësokin katëkënkëxunbi ka Moisésnën munuma banakin kakëxa: —¡Uisati kaina ꞌën ꞌIbu ꞌixun bëtsi uni xutiman!

¹⁴ Ësakian kakëxbi ami nishkin ka Nukën ꞌIbun Moisés kakëxa: —¡Anu ka min xukën, Aarón sacerdote levita uni ax ꞌikën! ꞌËn kana ꞌunan ax ka upiti banaia, an ka upiti banakin uni kuëëmia, usa ꞌaish ka anumi ꞌikë anuax mibë mëranankin mi isi ꞌitsaira kuëënti ꞌikën.

¹⁵ Usa ꞌain kamina abë banakin kamabi ꞌën mi kakë banakama ñuixunti ꞌain; usa ꞌain kana ꞌëx abë ꞌianan mibëribi unikama kaimi banakëbë mi rabëbë ꞌiti ꞌain, usa ꞌixun ka mi ñuikin an unikama kati ꞌikën, ꞌën kana usakian ñukama ꞌanun ꞌunánmiti ꞌain.

¹⁶ Min kamina abë banakin Aarón ꞌëxbi abë banakësa ꞌinun kati ꞌain, usa ꞌixun ka Aarónënbi kamabi bana minmi ñuixunkë kamabi unikama kati ꞌikën.

¹⁷ Usa ꞌain kamina min tsati bibiani kuantankëxun anunbi ꞌën mi ꞌanun kakë usakinbi, atun uínsaranbi isama ñukama a isia rakuë́ë kantanun ꞌati ꞌain.

Moisés Egipto menu kuantëkëan bana

¹⁸ Usa ꞌain ka Moisés aín kuku Jetró ꞌikëbi Reuel kakinribi anëkë aín xubunu kuantëkëankëxa, kuanxun ka aín kuku kakëxa: —ꞌË karamina Egipto menu kuantëkëntanun xutima ꞌain. ꞌËn aintsi ꞌibukama kara anu tsótaxa kana isi kuainsatanin. —Usakian kakëxun ka aín kuku Jetrónën asábi ka usa ꞌain kamina bërúanx kuantankëxun isi kuanti ꞌai —kixun kakëxa.

¹⁹ Usa ꞌain ka amiribishi Nukën ꞌIbun Moisés Madián menuxun kakëxa: —Kamina Egipto menu kuantëkënti ꞌain, ax mi ꞌakatsi ꞌia unikamax ka kamáxbi këñúaxa.

²⁰ Usakian kakëxun ka Moisés aín xanu ꞌimainun aín bëchikëkama burronu ꞌarubiani Egipto menu kuankëxa. Kuani ka aín tsati anúan Diosan ꞌamikëxun bëtsi ñu ꞌakë a buani kuankëxa.

²¹ Usa ꞌain ka Nukën ꞌIbun Moisés bërámabi kakë ꞌiakëxa: —Egipto menu bëbaxun kamina ꞌën mi, ꞌanun kakë ñukama ꞌapu faraónën ismainun an iskëma ñu min tsati anun ꞌën mi kakësabiokin ꞌati aín. ꞌËn kana ꞌapu faraónëan min kakëxunbi kuaisamatankin aín sinan iruarakin Israel unibu kuantanun xuxunma ꞌanun ꞌimiti ꞌain.

²² Usa ꞌain kamina ꞌë ñuikin, faraón kati ꞌain: Ësai ka Nukën ꞌIbu kiaxa: Israel unibunëx ka ꞌën rëkuë́n bëchikësa ꞌikën, usa ꞌikë kana atu nuibatin.

²³ ꞌËn kana ꞌën unikamami ꞌë rabia kuantanun xunun mi kan; ꞌaínbi kamina min kuantanun atu xukëma ꞌain, usa ꞌain kana ꞌën min rëkuë́n bëchikë bamamiti ꞌain.

²⁴ Usakian Diosan kakëx ka Moisés aín xanu ꞌimainun aín bëchikë kamabë anun Egipto menu kuankë bain kuankëxa, kuanbaiti ka anua ꞌuxti anu bërúakëxa, bërúkë ka ami mërakin a ñantan anua ꞌikë anuxun Nukën ꞌIbun Moisés ꞌakatsi ꞌiakëxa ain bëchikë Guersón kakë abá an kakësabiokin aín nëtokë ñu maxaka tëakin ꞌunánti okëma kupín.

²⁵ Usa ꞌain ka Séforanën achúshi maxá xëtokë bikin anun aín tuákën nëtokë ñu maxaka tëakëxa; tëakinshi ka aín tuákën nëtokë ñu maxaka tëakë anun aín taënu tatikakin Moisés kakëxa: Mix kamina asérabi ꞌën bënë ꞌain, usa ꞌikë kana bamati ꞌikëbi mi ië́mia.

²⁶ Usa ꞌain ka Nukën ꞌIbun Moisés kuantanun kixun ëankëxa. Ën këbë ka Séfora kiakëxa, Moisés ënëx ka ꞌën aintsi ꞌibu ꞌikëbi ꞌën bikë ꞌikën, usa ꞌikë kana bamati ꞌikëbi ië́mian.

²⁷ Usakian ꞌamainun ka Nukën ꞌIbun Aarón ësokin kakë ꞌiakëxa: Anu uni ꞌikëma menu kuantankëxun kamina Moisés aia mëranankini kuanti ꞌain kixun kakë ꞌiakëxa. Usakian kakëx ka Aarón Diosan bashi kakë anua Moisésbë mëranani kuankëxa. Kuanxun ka anua mërakin bëtsukukakin biakëxa.

²⁸ Abë mëranantankëxun ka Moisésnën Aarón usakin kanuan Nukën ꞌIbun kakë banakama ñuixunkin kakëxa, kanan ka usakian unin iskëma chaiira ñu ꞌatia Diosan kakë akamaribi ñuixunkin kakëxa.

²⁹ Usakin ñuixunbiani ka a rabëtaxbi anuax kuantankëx Israelkama aín kushibu kamabë timë́akëxa,

³⁰ timë́xun ka Aarónën usakian Nukën ꞌIbun Moisés kakë banakama ñuixuankëxa, ñuixunkin ka usakin ꞌanúan Diosan kakësabiokin atun iskëma ñukama kamabi unían istánun ꞌakëxa.

³¹ ꞌAia iskin ka Israel unikaman asérabi ka kixun sinánkëxa. Sinánkin ka Nukën ꞌIbun ka nux ꞌaisamairai tëmëraia isaxa kixun sinánkankëxa, sinani ka aín bëmánanën memi bëtiki tsóbukin Dios rabikankëxa.