Éxodo 34 - Kashibo-Kakataibo Biblia

Diosan amiribishi bënókin ax kikësaibi ꞌiti bana kuënëonun ká bana

¹ Nukën ꞌIbun ka Moisés ësakin kakëxa: —Minbi kamina maxá pará rabë́ bëráma ꞌën mi ꞌinánkësa usarabi okin abëtsinkin bëti ꞌain, bëxunkëxun kana ꞌën usai ꞌiti bana bëráma kuënëokëmi tukakë, usaribi okin a banabi kuënëotëkënti ꞌain.

² ꞌImainun kamina imë́ishi pëkarakëma ꞌaínshi aín bashi Sinaí kakë anu mapërakëti kuantëkënux mëníokati ꞌain, mëníoka kiani mi kuankë kana aín bashi chairui sënënakëkë anua mi istisa tanin.

³ Uinu ꞌikë uníxbi ka mix kuankëbë mibë kuantima ꞌikën, uibi kana bashi anua kuania istisamatanin, ꞌimainun kana oveja ꞌimainun, vacakama abi aín bashi bëtánain anuxun pasto pi nitsia istisama tanin.

⁴ Usakin kakëxun ka Moisésnën maxá rabë́ bëráma Diosan ꞌinánkë usabi okin mëníokëxa, mëníonx ka pëkarakëma ꞌaínshi maxá pará okían ónkë a bibiani bashi Sinaí anu Nukën ꞌIbun kakësabi oi kuankëxa.

⁵ Usa ꞌain ka Nukën ꞌIbu kuin mëu ubuax Moisésbë anu ꞌiakëxa, anu ꞌixun ka aín anë ñuikin Diosan kakëxa.

⁶ Kai ka Moisésnën kuanun a inubuini munuma banai ësai Dios kiakëxa: —¡ꞌËx kana Israel unikaman ꞌIbu ꞌain! ¡ꞌËx kana Dios ira ꞌain, usa ꞌixun kana ꞌën anë mitsu ꞌunánmin! ¡ꞌËx Dios ꞌixun kana nuibakin mitsun nuibakëxunmabi ꞌakinin, usa ꞌixun kana ꞌatima okima unikama nuibatin usokëxun tani ka unikama ꞌëmi katamëti ꞌikën!

⁷ ꞌImainun kana bërámabi usa ꞌia ꞌaish xënibua ꞌaínbi usabi ꞌixun nuibakin uin kara bana kuakinma ñu ꞌatima ꞌai ꞌëmi ꞌuchaia akama mëníoxunti ꞌain; ꞌaínbi kana usashi ënkinma axa ꞌuchakë uni ꞌatima oti ꞌain, usakin ꞌanan kana aín papa ꞌuchakë kupínribi aín bakë bëchikëkama ꞌimainun aín babakama ꞌianan aín bëchikënën bëchikënëan bakë bëchipakëkamaribi ꞌatima oti ꞌain.

⁸ Ësakin kakëxun kuati bënëtishi tsóbukin aín bëmánanën me tikai ꞌikin ka Moisésnën Nukën ꞌIbu rabikin,

⁹ ësakin kakëxa: —¡ꞌËn ꞌIbu! ¡ꞌËn ꞌIbu! Asérabi nu nuibati kamina nu kuankëbë nubë kuanti ꞌain. Ënë unikaman ka asérabi aín sinan iruarakin bana kuakëma ꞌikën, ꞌaínbi kamina nux mimi ꞌuchakë a tërënkin minan ꞌinun nu ꞌimiti ꞌain.

Diosan këñutimokin achúshi ñu Israel uni kamabëtan mënio bana

¹⁰ Nukën ꞌIbun ka amiribishi Moisés kakëxa: —Bërí mi kamainun kamina kuati ꞌain, mi ꞌimainun min aintsikamabëtan kana achúshi ñu ꞌain. ꞌAnan kana bëtsi menu tsókë unikamanbia ꞌama ñu upíira ꞌati ꞌain, ꞌaia ka axa mitsu rapasu tsókë unikamanribi ꞌën mitsunu ñu upíira unin iskëma ñu ꞌaia isti ꞌikën.

¹¹ ꞌËn kakësokinmi bërí mitsun ꞌakëbëtan kana mitsun ismainunbi anumi tsóti kuankanti me anu ꞌikë unikama kuantanun chikínti ꞌain, ax ka amorreos, cananeos, hititas, ferezeos, heveos ꞌimainun jebuseos unikama a ꞌikën.

¹² A menu atsínxun kamina a unikaman mitsubëtan ñu ꞌakatsikixun ubíokin kakëxunbi ꞌatima ꞌain, atun ꞌakë ñu ꞌatima ꞌaimi atux ꞌikësaribiti ꞌuchatima kupín.

¹³ Usai atubë ꞌikinma kamina añu ñubi ꞌaíma ꞌitánun mitsun ira atúan a rabikë maxá ꞌimainun i upíira akama këñuti ꞌain.

¹⁴ Usa ꞌain kamina bëtsi dios rabitima ꞌain, ꞌëx kana mitsun ꞌIbu an ñu ꞌatima ꞌaisama okin mitsu bërúankë a ꞌain. ꞌËn anëx ka Dios an ñu ꞌatima ꞌaisama okin bërúankë a ꞌikën.

¹⁵ A menu atsinia anu ꞌikë unikaman mitsubëtan ñu ꞌakatsikixun kakëxunbi kamina ꞌakantima ꞌain, usakin kakima mitsun atubëtan ꞌakëxunbi ka mitsu atun dios rabikin pitia ꞌakë ꞌimainun a ꞌinántia ꞌakë ñukama ꞌakinkin mitsu ꞌuchamiti ꞌikën,

¹⁶ usokin ꞌakima ka atun ꞌini bëchikë xanukama mitsun bëchikë bëbu aín xanu ꞌinun ꞌinánti ꞌikën, ꞌinánkëxun atun rabikë aín dios aribi rabi ka mitsun bëchikëkama ꞌëmi ꞌuchati ꞌikën.

¹⁷ Uinsaranbi kamina mitsun manë charoxun unisa okin ꞌatankëxun a rabitima ꞌain.

Achúshi baritia inúkëtibi Israel unibunën fiesta a bana

¹⁸ Anun chamiti ñu këñuma ꞌakë pán piti fiesta kamina ꞌati ꞌain, ꞌën mi kakësabiokin ꞌakin kamina anun chamiti ñukëñunma ꞌakë pán mapai achúshi ꞌimainun rabë́ nëtë ꞌimikin piti ꞌain. Anunmi Egipto menuax chikía bari a ꞌuxë ꞌirutëkënkë anun kamina a sinánkin fiesta ꞌati ꞌain.

¹⁹ Kamabi mitsun rëkuë́n bakë bëchikë bëbukamax ka ꞌënan ꞌiti ꞌikën, ꞌimainun ka mitsun vaca, oveja, ꞌimainun cabrakama aín rëkuë́n tuá aín bënëkamaxribi ꞌënan ꞌiti ꞌikën.

²⁰ ꞌAínbi kamina burro xanúan rëkuë́onkin tuákë axa aín bënë ꞌain, a ꞌinankinma carneronën tuá achúshi ꞌinánkin cabranën tuá a ꞌinántima ꞌain. Usa ꞌain kamina añubi ꞌinánkima burron tuá aín tëxanu tëtsëkaxun rëtëti ꞌain, usaribi okin kamina mitsun rëkuë́n bakë bëchikëkama ꞌinankinma ꞌë ꞌinaishiti nankë a uinu kara nanti ꞌikë anu nanxunti ꞌain. Uíxbi ka ꞌë rabi ñu bëíma ꞌutima ꞌikën.

²¹ Mitsun kamina mapai achúshi ꞌimainun achúshi nëtë ꞌimikin ñu mëëti ꞌain, ꞌaínbi kamina achúshi nëtë ꞌirutëkënkë anun tantiti ꞌain, a nëtën mitsun ñu ꞌapákë aín bimi bianan ñu mëëti ꞌaínbi kamina a nëtën ꞌatima ꞌain.

²² Kamina mapai achúshi ꞌimainun achúshi nëtë a sinánkin anumi mitsun ñu ꞌapákë ax pain bimikë bikë aín fiesta ꞌianan, a baritian mi mitsun trigo bimi bikin sënë́onkë a ꞌiti ꞌikë kixun ka Diosan kakëxa.

²³ Kamabi unikamax ka achúshi baritia ꞌikëtibi, rabë́ ꞌimainun achúshiti ꞌë rabinux timë́ti ꞌikën, ꞌëx kana Israel unikaman ꞌIbu ꞌain.

²⁴ ꞌËn kana mitsun ismainunbi anumi kuankanti menu ꞌikë bëtsi unikama chikínti ꞌain, chikínxun kana a me mitsunan ꞌinun ꞌinánti ꞌain. Usa ꞌain ka uinu ꞌikë unínbi mitsun me bikatsi ꞌitima ꞌikën, anuxun kamina achúshi baritia ꞌikëtibi ꞌë rabë́ ꞌimainun achúshi okin rabiti ꞌain.

²⁵ Ñuina rëtankëxun xarokin kamina aín imi këñun ꞌatima ꞌain, ꞌimainun kamina pán anun chamiti ñukëñun ꞌakë aribi ꞌatima ꞌain, ꞌianan ka Pascua nëtë inúkin ñuina nami xarokë ax pëkarakëbëtan ꞌanuxun nankë ꞌitima ꞌikën.

²⁶ Mitsun ñu ꞌapákë ax pain bimikë aín bimi upíirabu bitankëxun kamina anuxun ꞌë rabiti xubusokin ꞌakë anu uanti ꞌain. ꞌAnan kamina cabranën tuá aín bënë rëtankëxun aín titan xuma bixun anun ꞌarutima ꞌain.

Moisésnën ax kikësabi oi ꞌiti bana kuënëo

²⁷ Usa ꞌain ka Nukën ꞌIbun Moisés ësakin kakëxa: Ënë banakama kamina kuënëoti ꞌain, ax ka achúshi ñu këñutima okin mi ꞌimainun israel unikamabëtan ꞌakë ñui kikë bana a ꞌikën.

²⁸ Usa ꞌain ka Nukën ꞌIbubë Moisés cuarenta nëtë ꞌimainun cuarenta imë́ aín bashi Sinaí kakë anu bërúakëxa anuxun ka añubi pima ꞌianan xëama ꞌikën. Anu ꞌixun ka maxá pará anu këñutima okin ñuikë bana, mapai rabëbëtan sënën ꞌitánun kuënëokëxa.

Moisés Diosbë banatankëx aín bashi Sinaí kakë anuax taramëbutëkëan ñuikë bana

²⁹ Usakin ꞌatankëx ka aín bashi Sinaí kakë anuax Moisés taramëbuakëxa, anua usai ꞌiti bana maxá pará rabë́nu kuënëokë a bëi ka uakëxa, usai anuax ukinbi ka Moisésnën Nukën ꞌIbubë banakë ꞌaían ain bëmánan chabáchabákikë ꞌikëbi ꞌunánma ꞌikën.

³⁰ Usai aín bëmánan chabáchabákikë ꞌaish aia Moisés iskin ka Aarón ꞌimainun Israel unikaman ami rakuë́kin Moisés ꞌurama oma ꞌikën.

³¹ Usai ꞌia ka Moisésnën Aarón ꞌimainun Israel unikaman kushibu abë bananua unun kixun kuëankëxa, kuënkë́xa anu ukëbë ka Moisés atubë banakëxa.

³² Atubë pain banakë basiramashi ka Israel unikamaxribi anu rikiankëxa, rikiania ka Moisésnën usai ꞌiti banakama aín bashinuxun Nukën ꞌIbun kakëkama ñuixunkin kakëxa.

³³ Usakin atu bana ñuixuni sënë́nishi ka Moisés chupa achúshitan bëmápuküakëxa.

³⁴ Uínsaran kara anuaxa Nukën ꞌIbubë banati xubusa okin chupa ꞌakë anu atsinia, a nëtën ishi ka Moisés anúan bëmápukukë chupa bëókiakëxa anúan ax chikitëkënti ꞌitámainun. Usai ꞌitankëxun ka Moisésnën usakin atu kanun Nukën ꞌIbun kakë banakama Israel unikama ñuixuankëxa.

³⁵ ꞌAínbi ka Israel unikaman Moisésnën bëmánan ichutia isakëxa, iskëbë ka Moisés aín bëmánan chabákikëbë amiribishi chupan bëmápuküakëxa, anúan Nukën ꞌIbubë banai atsíntëkënti nëtë ꞌitámainun.