Éxodo 33 - Kashibo-Kakataibo Biblia

A ꞌinánuxuan aín chaitiokëkama ká me anua tikima kuantanun Nukën ꞌIbun Israel unibu ká bana

¹ Usotankëxun ka Nukën ꞌIbun Moisés anu kuantëkënkë kakëxa: —Ënuax kuankin kamina Egipto menuami chikínbëtsinkin bëkë unikama buánti ꞌain, ꞌën min chaitiokë Abraham, Isaac ꞌimainun Jacob akama aín rëbúnki ꞌinánuxun ká me anu kamina kuanti ꞌain.

² ꞌËn ángel kana an mitsu kuania rëkuëonxun buánti xuti ꞌain. ꞌImainun kana ꞌën a menua ꞌikë ëmakama cananeos, amorreokama, hititas, ferezeos, heveos ꞌimainun jebuseos akaman menumi mitsux bukunun chikínti ꞌain.

³ A mex ka anu a piti ñu ꞌaisamaira ꞌimainun buna rëpa ꞌaisamaira ꞌumpax iskësa ꞌianan anu tsótisa upí ꞌianan anuxun kamabi ñuina kanionan anu ñu ꞌapátisa ꞌikën. ꞌAínbi kana ꞌëx mitsubë kuantima ꞌain, mitsubë kuankinbi atuna mitsu këñunun ꞌimin. Mitsux kamina bana kuakëma unibuira ꞌain.

⁴ Ësakin Diosan kakëx utankëxun ka Moisésnën Israel unikama bana ñuixuankëxa. Ñuixunkëxun kuati ka Israel unibu masá nuituti nitë́xëkin atun tëñutikama uínbi tëñuama ꞌikën,

⁵ usakian kanun ka Nukën ꞌIbun Moisés kakë ꞌiakëxa: —Israel unikama kamina kati ꞌain: Mitsux kamina sinan iruarakë unibuira ꞌain. ¡ꞌËx mitsubë ꞌixun kana bënë́kinshi mitsu këñúkë ꞌitsian! Usa ꞌain kamina bëríbi mitsun tëñuti ꞌimainun mëñusuti akama uisa karana mitsu oi isnun pañutima ꞌain.

⁶ Usakin kanuan kakëxun ka aín bashi Horeb, kakë anuxun Israel unikaman atúan pañukin aín naminu ꞌakë ñukama ëankëxa.

Anuax Diosbë mërananti chupa xubusa okin ëma ꞌuri a bana

⁷ Usa ꞌain ka Moisésnën xubu chukúma ꞌakë anua ꞌikankë a ꞌuri takumiakëxa, takumitankëxun ka anuax Nukën ꞌIbubë mërananti xubu kakin anëakëxa. Uix kara Diosbë banakatsia, ax ka xubu chukúma ꞌuri ꞌikë anu kuantankëx abë banakëxa.

⁸ ꞌImainun ka Moisés anuax Diosbë mërananti xubu chukúma anu atsini kuankëbë ka kamabi unix aín xubusa okin ꞌakë aín xëkuënubi sëtëakëxa, sëtë́xun ka Moisés xubu chukúmasa anu atsinkiani nëtëti kuania iskankëxa.

⁹ Usai Moisés atsínkëbëishi ka achúshi kuin ubútankëx anua atsínkë xëkuënu nirakëakëxa, nirakëkëbë ka Nukën ꞌIbu Moisésbë banakëxa.

¹⁰ Usaia anuax Diosbë mërananti xubu chukúma aín xëkuënu kuin nirakëtia isi ka kamabi uni aín xubu xëkuë anuaxbi rantinpuruni tsóbukin Dios rabikankëxa.

¹¹ Diosbë banai ka Moisés ain ꞌunánkë unibëa uni isánani banakësa ꞌinun banakëxa, usai anuax banatankëx ka Moisés anua ꞌikankë anubi kuantëkëankëxa. ꞌAínbi ka uni bëna Josué kakë Nunnën bëchikë an ꞌakinkë xubusa okían ꞌakë a bërúankë ax uínsaranbi anuax kuaiama ꞌikën.

Nukën ꞌIbun Moisés aín kushi ismia bana

¹² Ësakin ka Moisésnën Nukën ꞌIbu kakëxa: —Ka kuat, min kamina ënë unikama bërúanun ꞌë kan, ꞌaínbi kamina uin kara ꞌë ꞌakinti ꞌikë kixun ꞌë kakëma ꞌain. ꞌImainun kamina ꞌëx isana upí sinánñu ꞌaish ꞌitsaira min nuibaisa ꞌai kixun ꞌë kan kanan kamina ꞌëx isana min kuëënkësabi okin ꞌai kixun ꞌë kan.

¹³ Min nu ꞌakinsa tankin kamina añu ꞌati kaina kuëëni ꞌë asérabi kati ꞌain, usakinmi kakëxun kana ꞌënribi mi nuibati ꞌain. ꞌImainun kamina ënë unikamax ka min unibu ꞌikë kixun sinánti ꞌain.

¹⁴ Ësokian kakëxun ka Nukën ꞌIbun kakëxa: —ꞌËnbi kana mitsu kuania buani usa ꞌain kamina ꞌaisamaira okin sinani bënëtima ꞌain.

¹⁵ Kakëxun ka Moisésnën kakëxa: —ꞌAínbi kamina mix nubë kuankinma ënuax kuantanun nu xutima ꞌain.

¹⁶ Mixmi nubë kuankëbëtama kara uisaxun, ¿min uni Israelkama ꞌimainun ꞌënribi min kamina nu nuibakin ꞌakini kixun ꞌunánti ꞌain? Usakin min unikama ꞌimainun ꞌë ꞌakinkëx kananuna bëtsi menu ꞌikë unikamasamaira ꞌiti ꞌain.

¹⁷ Kakëxun ka Diosan kakëxa: —Asabi ka usa ꞌain kana mitsubë kuanti ꞌain, asérabi kana ꞌën mi nuibatin ꞌimainun kana upí uni ꞌikë mix kikësabiokin ꞌën mi ꞌakinti ꞌain kixun ka Nukën ꞌIbun kakëxa.

¹⁸ —¡Usakian kakëxun ka Moisésnën Dios kakëxa! —ꞌË kamina min kushi ismiti ꞌain.

¹⁹ ꞌAínbi ka Nukën ꞌIbun ësokin kakëxa: —ꞌËx kana nuibanairakë ꞌain, usa ꞌain kana uikama karana ꞌakinsa tani akama ꞌakinti ꞌain. ꞌAkianan kana mi nuibakin ꞌën anëmi ñuinun mi ꞌimianan uikama karana nuibati akama nuibati ꞌain.

²⁰ ꞌAínbi kana mi kain ꞌën bëmánan kamina istima ꞌain ui unin kara ꞌën bëmána isia ax ka bamakë ꞌiti ꞌikën.

²¹ Kanan ka ësakinribi Nukën ꞌIbun kakëxa: —Ka kuat, anu ꞌëx ꞌikë ꞌurama ënu ka mapara achúshi ꞌikën. Akamanan kamina nirakëti ꞌain.

²² Usa ꞌain kana ꞌëx mi rapasu inúkin, mapara kini mëu nankin mi ꞌën mëkënan bëpanti ꞌain.

²³ Usokin inúkin mi ꞌatankëxun ꞌën mëkën bikëbëtan kamina ꞌën kaxuishi isti ꞌain ꞌaínbi kamina ꞌën bëmánan istima ꞌain.